شرح تعال قدم قبول بنفسك في الجامعات الامريكية والمعاهد !! حصري بصور

October 17th, 2010, 08:42 PM

طبعن كثر نصب بعض المكاتب وكل مالهم يزيد حالهم والطلاب هم الضحية

طيب ليش تدقع 4000 او 3500 على قبول جامعة ومعهد وممكن المكتب يتأخر عليك ويماطلك ويمكن يضيع اوراقك ويمكن يرميك في مكان ماتبغاه او مكان غير الي انت طلبته, لان المكاتب عموماً متعاقدين مع معاهد او جامعات معينة فما عنده الا اماكن محدودة وممكن يحطك في مكان او جامعة لاتناسبك

-----
اعتذر لان الصور ماهي طالعة في الموضوع لكن في بدالها شرح كامل بالفيديو نهاية الموضوع
=======================

طيب اول شي الزبدة اذا تبا تقدم بنفسك لازم يكون معاك احد عنده خلفية في اللغة الانجليزية ولازم يكون صديقك مترجم قوقل مفتوح على جنب......ولازم يكوووووووووووووون عندك فيزا او ماستر كااااارد او اي احد تعرفه يكون عنده تعطيه الفلوس وهو يسددلك بالبطاقة, عشان تدفع رسوم التسجيل في الجامعة او المعهد
-----


طيب راح نمشي خطوة خطوة

اول شي تختار الولاية الي تبغا تدرس فيها اخترلك كم ولاية كدا
تقدر تستعين ببعض مواضيع المنتدى ماشالله ماقصرو الشباب

ولايات امريكا بالتفصيل تجدها هنا
http://www.mbt3th.us/vb/forum8/thread156832.html

وموضوع كن حذراً في اختيارك مكان دراستك في امريكا
http://www.mbt3th.us/vb/forum14/thread114719.html

وغيرها من المواضيع

بعدين تحدد الجامعات الي تبا تدرس فيها وتكون معتمدة وغير مقفلة
عن طريق التأكد من الاعتماد في موقع الوزارة ثم الذهاب لصفحة الجامعات الموصى بها
mohe.gov.sa
وثم تتاكد ان المعهد او الجامعة غير مكدس بالطلاب السعوديين عن طريق تشييك موقع الملحقية ثم البحث عن ملف يحتوي على معلومات الجامعات والمعاهد المقفلة
sacm.org
وممكن تراسل طارق الطيب في الملحقية او غيره في الملحقية وانشالله يجاوبوك اذا المعهد او الجامعة مقفلة او لا

او ممكن تتصل عليهم على ارقامهم

تلاقيها كلها بموقع الملحقية السعودية في امريكا


----

طبعن نصيحة الي معدله طايح لايقعد يتشرط ويبغا يروح كاليفورنيا ولا فلوريدا ولا جامعة هارفارد

يرضى بأي جامعة تكون كويسة وحتى لو ولاية مملة عاد معدلك مايجيب غير هذي الولاية

وهذا موضوع عن اسهل جامعات في القبول
http://www.mbt3th.us/vb/forum8/thread59762.html


طيب اخترت جامعتك وكل شي

بسم الله نبدأ


=====



خطوات التسجيل في الجامعات الامريكية والمعاهد
طبعن انا راح اشرح على ابلكيشن احدى الجاماعت والابلكيشن يختلف من جامعة لأخرى بس تقريبا نفس الشي مع اختلافات بسيطة بس عموما الخطوات متشابه بين اغلب الجامعات

الشرح موجود كامل على فيديو نهاية الصفحة لكن لا مانع من اضافة بعض التوضيحات بالكتابة


طبعن اول شي تدخل على موقع الجامعة وتدور على كلمة admission
وبعد كدا تدور على international admission
وتقرا المتطلبات تحت اسم requirements
وغالبن تكون المتطلبات
•Official educational records
•Official TOEFL scores if available
•Financial statement (form included with application for admission)
•Letter or statement from the bank of your sponsor
وممكن صورة الجواز
وبعضهم عندهم طلبات اخرى

وبعد كدا تروح apply online
بعض الجامعات قبل او بعد ماتضغط ابلاي اون لاين تلاقي الخطوات بالترتيب
انه تعبئة الابلكيشن ودفع رسوم الابلكيشن وكدا بالترتيب
في جامعات يخيرك تنزل الابلكيشن وتطبعه وتعبيه وترسله لهم
او انك تعبيه اون لاين....انا افضل التعبئة اون لاين
طيب ضغطنا على apply online

طيب بعد كدا اغلب الجامعات يطلب منك انك تعمل accoount
فسويلك اكاونت جديد ادخل اسمك وبعض البيانات ويوزر نيم وباسوورد بعض الاحيان يكون فيه شروط للنك نيم والباسوورد
زي انك تخلي الباس فيله حرف على الاقل والباقي ارقم وزي كدا



طيب سوينا اكاونت جديد

دايمن اول شي يجيك بعد تسجيل الاكاونت نوع الابلكيشن راح تحط international
وبعدين يسألك اي ترم راح تدرس فيه
spring
fall
summer
طبعن اختار الي تتوقع انك تنهي المعهد قبلو وتدخلو وعادي لو اتأخرت راح يقدمو اوراقك على السمستر الي بعدو مو مشكلة

تجيك صفحة فيها new application اضغط عليها
ممكن ماتجيك هذي الصفحة ويدخلك على الابلكيشن على طول

اغلب الجامعات يكون مقسم الابلكيشن على عدة اقسام عشان يسهلو عليك ادخال البيانات


وراح تدخل عليها وحدة وحدة وتعبيها


طبعن الي عليه نجمة حمرا هو المهم الباقي صفك منه


صندوق البريد اتأكد انك تدخل البيانات بشكل صحيح عشان حيرسلولك عليه اوراق القبول
طيب انتهينا كدا وعبينا الابلكيشن
حاولو تتأكدو من كل البيانات انها صحيحة لانه ماراح تقدرو تغيرو الابلكيشن الا لازم ترسلولهم ايميل وهجولة واستنو الين يردو هم يردو بسرعة بس افضلكم اتأكدو من صحة البيانات

طيب بعد ما نتأكد نسوي تسليم submit
========
وبعد كدا نروح لإجراءات الدفع
طبعن الدفع لازم يكون عندك ماستر كارد او فيزا كارد
او تدفع بشيك مادري ايش طريقة الشيك
بس طلعو احسلكم ماستر كارد والله يفيدكم كثير لمن تسافرو ماراح تحتاجو تشيلو فلوس كثير في جيبكم
يعني الصراحة حاجة مرة مهمة انو يكون معاك ماستر كارد
صحيح اننا بنسمع عن السرقات الكثير للفيزا كارد
بس البطاقة هذي لاتتعامل بيها الا مع اماكن ثقة
يعني زي محل ماركة او للتسجيل في الجامعات او موقع امازون او محلات كبيرة سوبرماركتات مثلن
يعني مو تتعامل بيها مع كشك البليلة....

طيب

راح تضغط على pay fees راح تلاقيها بعد ماتعبي الابلكيشن او تلاقيها لمن ترجع للخطوات حقت التقديم الي قلتلكم انو يجيك فيها تعبئة الابلكيشن دفع الرسوم ارسال الاوراق والخ
فتختارو دفع الرسوم

طيب ادخال بيانات الماستر كارد بسيطة انشالله وواضحة

اول شي يطلب منك ادخال بيانات عن الابلكيشن تبعك وممكن مايطلبوها


طبعن صفحة الماستر كارد مؤمنة راح تلاقي قفل فوق
وبرضو للاحتياط يستحب انو يكون عندك برنامج نورتن ولا انتي ولا واحد من العيال دول حقين الحماية

====

طيب نجي لمرحلة ارسال الاوراق

نشوف المتطلبات والاوراق الي يبوها في requirements
ونلمها كلها مع بعض بشكل مرتب ويستحب انك تدفلهم اي ورقة تدعمك خبرات اي شي حتى صورة ابوك حطها عشان تدعمك <<لحد يصدق
وتاخذ عنوان البريد تبع الانترناشيونال ستيودنت راح تلاقيه بصفحة الانترناشيونال
وروح ياعزيزي مكتب البريد السعودي بـ البريد الممتاز اذا تباها توصل خلال ثلاثة ايام بسعر 135 ريال
وروح ياعزيزي مكتب البريد السعودي بـ البريد العادي اذا تباها توصل خلال اسبوع وممكن تضيع بس بـ 7 ريال اعتقد
وروح ياعزيزي ال DHL اذا فلوس ابوك زايدة او اذا حاب تصلخ محفظة الوالد وتوصل الاوراق خلال ثلاثة ايام بـ 500 ريال ولا بنكنوت يمكن اقل بشوية او اكتر

بعد كذا تغثهم كل يوم داخل الموقع تشيك على حالتك اون لاين ولا تشيك كل اسبوع احسلك بدل ماتفقع مرارتك
طبعن هم يردولك على حسب قوة اوراقك يعني انت واحد مطلوب راح تلاقيهم بعد اسبوع متصلين

ممكن برضه للتأكيد تكلمهم بعدها باسبوع تتصل او ترسل ايميل وتقول ايش صار في قبولي وعلى هذا الحال تتابع معهم

وقرابة شهر انشالله او شهرين يجيك القبول باذن الله
====

طيب كدا بحمدلله انتهينا من الجامعة وآخر دعوانا ان الحمدلله رب العالمين
دعواتكم لي بالتوفيق














تعال فين رايح باقي المعهد

المعهد انشالله اسهل
طبعن تختلف المعاهد في الطريقة عن بعض
بس انا راح اشرحلكم عن معهد تجاري مشهور في امريكا زي النمل في كل مكان بالسعودي نقول زي الريال في كل مكان
الي هو معهد ELS
فراح اشرحلكم التسجيل فيه
وعاد قيسو انتو التسجيل عليه اذا كنتو رايحين معهد تاني

طيب
اول شي تدخل عنوان المعهد
www.Els.edu

وتروح How to enroll

تجيك اختيارات 1 2 4 قصدي 3
اول واحد يقولك روح لوكالة els الي في حارتكم
طبعن هي مكتب قبول ويصلخك زي بقية المكاتب

الاختيار التاني تنزل الابلكيشن وعبيه
او انك تعبي الابلكيشن اون لاين

وافضل انك تعبيه اون لاين

ارعصلهم الاختيار التالت enroll online

تنفتح ليك صفحة جديدة
وفيها بعض الشروط والتنبيهات
يعني يقولك فلوس الابلكيشن لازم تدفعها
النقطة التانية انو ماراح نقرا الابلكيشن تبعك الا لمن تدفعها
خلاص عرفنا راح ندفع..بس همهم الفلوس
ويقولك كمان المعلومات كلها ادخلها بالانجلش
يعني لايجي واحد ويكتبلهم بالصيني ولا العربي
بعدين يقولك في حاجات مهمة لازم تعرفها قبل لاتسوي ابلاي اون لاين
1- تحدد نوع برنامجك (طبعن كلنا راح نختار البرنامج المكثف تحت اسم intensive )
2- تختار مركز يعني في اي ولاية في اي مدينة
3- تعرف متى تبى تبدأ دراستك...يعني خليها توقعية واختارها بعيد احسن من قريب عشان لسا وراك فيزا وقرار ابتعاث وعبال مايجيك القبول وهجولة
فخليها بعد اربعة شهور تبدأ مثلن

طيب حققنا جميع الشروط

تطالع على اليمين في create account
طيب تسويلهم اكاونت تحط بعض المعلومات العامة وايميلك ويوزر وباسوورد
وتوافق على شروطهم والله كثير انا ماقريتها بس حطيت صح على طول..موافقين على كلو ماعليكم اهم شي خلصونا




بعدين تقولهم اوكي فينيش
يقوم يقولك حط السكيورتي كي
طيب تدخل بريدك الي حطيته تحصلهم راسلينلك مسج يقولك اضغط عالرابط هذا وينحط الكي بنفسه ولا انسخ الكي بنفسك وريحنا من شرك
تسوي الي تبغاه
بعدين تدعس continue

بعدين تجيك كلمة new
يعني ابلكيشن جديد
اضغط عليه
بعدين يبدأ الابلكيشن بسم الله وتعبي البيانات, وشوف الفيديو تحت فيه طريقة التعبئة




طيب بعد ماتخلص تعبئة
حطلهم حفظ

ويرجعك عالصفحة الي كان فيها new
تحط صح على الابلكيشن تبعك
تضغط على print
تطبعه وتوقع عليه
روح لـ pay عشان تدفعلهم تقريبن نفس طريقة الدفع في الجامعة
اذا كنت طالع على حسابك في ورقة لازم يعبيها الوالد يكتب اسمها ويبصم او يوقع بس
تلاقيها في الركن على اليسار مكتوب dwonload additional forms
حملها من هناك وخلي الوالد يعبيها

بعدين نجي للخطوة الاخير وهي upload
هنا ترفع اوراقك للمعهد عن طريق النت مستغرب ماتشرطو وقالو ارسلها بالبريد لازم
بس يلا خير وبركة ارفع اوراقك ومن ضمنها الورقة الي وقعها ابوك والبرينت تبع الابلكيشن الي وقعت عليه

والحمدلله خلصنا من المعهد شيك عليهم وطفشهم عشان تعرف انقبلت ولا لا
وانشالله انك مقبول في المعهد بس الجامعة هي الي تشيل همها
وقبول المعهد ياخد اسبوعين انشالله تقريبن من وقت وصول الاوراق

هذاااااااا

وصلى الله على نبينا محمد وعلى آله وصحبة أجمعين
=====

طبعن بعد كدا مايبقالكم الا ابلكيشن السفارة وماشالله ماقصرو في المنتدى في مواضيع تتكلم عنه


=====
في الاخير
انا انسان واكيد اخطئ والي يلاقي اي خطئ يصححلي معلومتي
والي عنده اي استفسار بخصوص التقديم يتفضل اساعده بالي اقدر عليه واذا ماقدرت في اهل الخير كثير بيساعدوه انشالله

راسلوني عالخاص اذا احتجتوا لاني مادخل الموضوع كثير

وهذا العمل انا سويتو بعد مافحطت المنتدى ادور على احد شرح الطريقة بس مالقيت
كان في كم عضو جزاهم الله خير شرحو الطريقة بس مو مفصلة بالصور
فقلت مالك الا اسوي موضوع عشان لايتبهدل احد مع المكاتب الله ينتقم منهم
او يتبهدل وهو يسوي ابلكيشن


واتمنى من المشرفين تثبيت الموضوع للاهمية

ومانبغا منكم الا الدعاء في ظهر الغيب

================================================== ===
================================================== ===

اعتذر عن عدم ظهور الصور لان الموقع الي رفعتها عليه اتقفل


واضفتلكم مقطع فيديو يشرح التسجيل بالتفصيل انشالله يفيدكم اكثر من الصور

طبعن في خطوة مفقودة في الفيديو وهي بعد ماتسوي يوزر في موقع الجامعة راح يسألك ان الابلكيشن تبغاه لأي ترم وراح تختار الترم الاقرب لك او الترم الي تبغا تبدأ دراستك فيه








بالنسبة للمعهد

هذا شرح الفيديو
وبالتوقيق للجميع


وبالتوفيق للجميع

• نشر عبر تويتر
• نشر عبر فيسبوك
• نشر عبر جوجل