مستجد ومتســ((ــدجْ)) !! .. ناخيكم بحاجة عساكم للخير كله ..

إبدأ بتحضير أوراقك :
أولاً: راجع وثيقة التخرج إذا كان إسمك الموجود في الوثيقةوكشف الدرجات هو نفسه اللي في جواز السفر وخاصة اللي بالإنجليزي وانتبه للحروف اللي في الإسم.
ثانياً: إذا كانت وثيقتك بالعربي ومافيها ترجمة بالإنجليزي لازم تراجع الجامعة عمادة القبول والتسجيل وتطلب منهم يستخرجوا لك وثيقة بالإنجليزي وكذلك في كشف الدرجات ويفضل إنك تطلع أكثر من كشف درجات واحد علشان هيفيدك في وق المراجعة مع مركز القبول بالوزارة وتقدر تطلعوا من عمادة القبول والتسجيل في الجامعة وحدة الخريجين.
ثالثاً: صور الوثيقة تصوير ملون لو ما قدرت تصورها إعملها بـ scaner الماسح الضوئي على الكمبيوتر ثم إذهب للجامعة عمادة القبول والتسجيل واختم الصور اللي عملتها صورة طبق الأصل وزي ما قلنا في الفقرة السابقة طلع أكشف درجات ثاني بالإنجليزي خلي معاك احتياطي 3 .
رابعاً:اعمل توصيات من الأساتذة اللي درسوك وهتلاقي التوصيات في قسم الدراسات العليا أو في نفس قسمك من كليتك انتبه لما تيجي تعمل التوصيات لازم تكون التوصيات بالإنجليزي وما يكون فيها أي شيء مكتوب باليد ماعدا توقيع الأستاذ أو الدكتور ويفضل إنها تكون من دكتور مع توضيح اسم المادة اللي درسك هي في التوصية ثم تأخذ التوصيات وتروح تختمها في قسمك أو من قسم الدراسات العليا في كليتك.
خامساً: تعمل خطاب الهدف من الدراسة بالإنجليزي ويكون في حدود 500 كلمة توضح فيه في البداية اسمك بالكامل وتحدد المرحلة اللي هتدرسها مع ذكر التخصص ، هدفك من إكمال الدراسات العليا في الخارج بشكل عام، سبب اختيارك لتخصصك بالذات، كيف هيفيدك تخصصك في العمل بعد ما ترجع إن شاء الله للسعودية ، هتتكلم عن مرحلة البكالوريوس اللي كنت بتدرسها هتكتب تخصصك من أي جامعة تخرجت إيش أهم المشاريع اللي عملتها خلال الدراسة، إذا كان عندك فصل دراسي انخفض فيه معدلك عن المطلوب أو عن المعدل الفصل السابق بشكل واضح تذكر سبب ذلك أو إذا كان عندك أي نقاط ضعف في طلبك مثل : معدلك أو كنت مخبص في مادة من المواد المهمة لازم تذكر إنك هتتلافى المشاكل دي مستقبلاً.. من ناحية إذا كان القسم اللي هتكمل في إن شاء الله يتطلب مواد تكميلية لازم تأخذها قبل ما تبدأ تأخذ الماجستير لازم تذكر إنه في مواد تكميلية لازم تأخذها قبل ما تبدأ الماجستير .. ، تقول ليش اخترت الجامعة هذي بالذات من غير ما تحدد إسمها يعني تقول أسباب اختيارك لها، هتقول أهدافك في المستقبل وأهدافك اللي هتحققها إن شاء الله لما ترجع السعودية.. ممكن تراجع خطوات إعداد خطاب الهدف من الدراسة في موقع الوزارة- جديد البعثات-برنامج خادم الحرمين-مركز القبول-الدراسات العليا- اختار أي بلد- هتظهرلك صفحة فيها كل الخطوات ومن ضمنها خطوات إعداد الخطاب.. ممكن تستعين بمكتب ترجمة يعملك الخطاب بعد ما تكتبه بالعربي
سادساً:جهز صور ملونة لجواز سفرك وبطاقة الهوية
أخيراً .. هتعبي الطلب اللي هينزلوه بعد إعلان النتائج..

وإن شاء الله أكون أفدك...

على فكرة ممكن من الآن تبدأ تدور على الجامعات اللي تدعم تخصصك وتجهز اوراقك اللي ذكرتها سابقاً علشان أول ما تطلع النتائج ويطلب مركز القبول منك الأوراق تكون جهزها عندك ومركز القبول هو اللي هيجبلك القبول من الجامعة.. وممكن تجيب قبول الجامعة بنفسك (قبول مشروط)...

وبالتوفيق إن شاء الله....

أولا يعطيك ألف عافية يا اخ لملوم على هالمعلومات المفيدة
ثانيا فيه كذا استفسار لعلك تطول بالك علي وتكسب أجري ههههه ... جزاك الله خير
1- تقول لابد من مراجعة كشف الدرجات هل تقصد بالسجل الأكاديمي ؟؟
2- بالنسبة للتوصيات .. مدري كم عدد التوصيات المطلوب أخذها ؟؟ وهل اخذها من أي دكتور قد درسني أو من دكاترة معينين ؟؟ وهل يشترط القبول في الجامعات هذي اني اجيب تزكية من أحد المتخرجين منها ؟؟
والباقي كله واضح جدا ماشاء الله عليك .. بس مدري بالنسبة للتصوير الملون .. كنت معتقد انه ممنوع هل سمح فيه مؤخرا ؟؟
بس مدري عن التخصصات اللي ذكرت لك قبل .. هل امكانية أيجادها سهلة ؟؟
وجزاك الله ألف ألف خير يابعدي
لاعدمناك

1. كشف الدرجات هو نفسه السجل الأكاديمي.
2. التوصيات عددها 3 ولو قدرت تجيب واحده زيادة أفضل.. ممكن تجيب التوصيات من أي دكتور بس لازم يكون درسك و المادة تكون مسجلة في سجلك الأكاديمي طبعاً...
3.بالنسبة للتزكية من أحد المتخرجين من الجامعة اللي هتقدم فيها إن شاء الله .. ما هي من ضمن الأوراق المطلوبة في مركز القبول بوزارة التعليم العالي ..
4. التصوير الملون ممنوع في المكتبات ولكن ممكن تعملها زي ما قلت بـ الـ scanبالماسح الضوئي تنزلها على الكمبيوتر وبعدين تطبعها بالألوان زي ماهي .. وبعدين تروح تصدقها في الجامعة صورة طبق الأصل.
5.مافهمت سؤالك الأخير.. بس على حسب مافهمت إنك بتستفسر عن تخصصك إذا كان موجود ( الهندسة الصناعية) ممكن تترجم مسمى تخصصك بالإنجليزي وبعدين تروح موقع الوزارة وتدخل على البعثات وتختار الجامعات الموصى بها وتختار البلد إذا كانت أمريكا اللي اخترتها سهل إنك تدور على الجامعة بالتخصص بحيث تختار أمريكا وبعدين تختار بحث بالتخصص وتكتب تخصصك والمرحلةوهيطلعلك الجامعات اللي بتدعم ده التخصص.. إذا ما كانت البلد أمريكا لما هتختارها هيطلعلك قائمة بكل الجامعات فقط ت\هتضظر تعمل نسخ لكل جامعة وتدور على موقعها في الgoogleوتدخل على موقع الجامعة وتبدأ تدور على التخصصات .. والله يعينك..

ملاحظة: مركز القبول في وزارة التعليم العالي هو اللي بيجيب القبول من الجامعة في البلد اللي إنت رايح لها وممكن تحدد الجامعة اللي إنت تبغها في ورقة الطلب الي هتعبيه .. ولكن ما عندي فكرة إذا ممكن تجييك نفس الجامعة اللي حددتها لانه ممكن يغيروها على حسب .. وده اللي حصل العام الماضي ما أدري إيش النظام دي السنة..

وتوكل على الله ولا تشيل هم إن شاء الله ربك يسهلها للجميع إن شاء الله...