مهم جداً للمتقدمين لدراسة الماجستير والدكتوراه (تخصص رياضيات)

math teacher
أولاً أهلاً و سهلاً فيك بين إخوانك و أخواتك و نورت المنتدى
ثانياً أنا نسختلك رد كنت قد ردت به على أحد الأعضاء الجدد و ياليت يساعدك بس لو إنك تتصفح المنتدى في قسم خدمات الطلبة بتستفيد أكثر
بسم الله نبتدأ

1_تدخل موقع الوزارة هذا لو عرفت
2_لو كان حظك بمب و100% و عرفت تدخل على الموقع عبي الأبلكيشن و إحفظ رقم النموذج وكلمة السر الخاصة بطلبك
3_إذا تم قبولك و سو معاك المقابلة و الحركات الغريبة الخاصة بالوزارة و دعتلك الوالده والأهل كلهم وعديت و إنقبلت هيبعتولك الضمان المالي على الصفحة الخاصة بيك في موقع الوزارة
4_تحاول تراسل السفارة علشان تاخذلك موعد و بما إنك ماعندك ماستر ولا فيزا و لا كريديت من أصله فمافي قدامك إلا الطريقة العتيقة و هي مراسلة السفارة بالفاكسات المستمرة هذا لو علق معاك الخط أو بالإيميلات المستمرة حتى يطفشو منك ويقلولك تكفى خلاص أعطيناك موعد ويكلموك و يقلولك موعدك إمتى
5_أول مايجيك الضمان المالي تطبعلك منه كذا نسخة بالبرنتر علشان يكون بالألوان و يظهرك الختم ملون
6_تلملم اوراقق كلها شهادة تخرجك من المرحلة السابقة"ثانوي أو بكالوريس أو ماجستير" و صورة الضمان المالي و تروح لأول مكتب ترجمه لترجمة شهادك
7_تاخذ الشهادة المترجمة و تعدي في طريقك لأقرب صراف و تسحب الرصيد كله :gr_913: و تميل على حبيب تتسلف منه و تروح لمكتب مختص في مراسلة الجامعات بعد إختيارك للجامعه إلي إنت حابب تدرس فيها و خلي بالك لازم تكون من الجامعات المعترف بيها من قبل وزارتنا الغاليه و هتلاقيها موجودة في موقع الوزارة وتطلع مافي جيبك و تسلمه للمكتب و إنت تضحك :gr_891:
8_لو معاك مرافق لازم تبلغ المكتب علشان يجيبلك قبول له مره واحده
9_لما يجيلك القبول وهو الI-20 ترسل للوزارة أوراقك"شهادتك لأخر مرحلة, ونتيجة إختبار القدرات ,و الI-20 ,و صورة من الضمان المالي" علشان يبعتولك خطاب السفارة
10_لما يوصلك خطاب السفارة على نفس الموقع تبعك على طول تطبعه كمان كذا نسخة للإحتياط
11_وبعدين تقعد تردد ياليل:gr_925: ماأطولك و تستنى موعدك مع السفارة و إنت قاعد تستنى سلي نفسك بشي إسمه السيفيس لازم تجيبه قبل ما تروح السفارة و خلي بالك لازم تحتفظ بوصل السداد تبعه ترى ممكن تطيح في شباك رقم 6 و يرزل عليك و يقلك فين وصل سداد السيفيس المهم هتقولي طيب إيش هو السيفيس و من فين و كيف أجيبه ؟
أقوم على طول أقلك والله ما أدري إيش هو السيفيس بس المهم إنك لو رحت السفارة من غيره هيعطوك الورقه الصفرا و يقلولك سدد السيفيس و جيبو هذا لو كنت محظوظ أما لو كنت عكس كده هيقولولك سدد السيفيس و إنتظر إتصال مننا و ساعتها حتى ياليل ما أطولك ماهتفيدك. المهم ياسيدي فين وصلناااااااااااا أها ومنفين تجيبه و كيف تجيبه أقولك عندك كام طريقة بس الأول لازم يكون عندك كريديت علشان تقدر تسدد بيها
أ_عن طريق منتدانا الرائع فهو موفرلنا هذه الخدمة
ب_لو كنت إنت ماشاء الله عليك فركوك في الكمبيوتر تقدر إنت تسدده بنفسك
ج_تروح للحبيب الأولاني إلي سلفك و تقوله الحساب يجمع و تستلف منه تاني و تروح للمكتب إلي جابلك القبول و تقله يجبلك السيفيس و معاه وصل السداد ولا تنسى تعطيله الفلوس لإلي هيطلبها و إنت بنضحك هذيك الضحكه :gr_891:
هذا كله بس لما تسألني من فين لكن كيف هذه بتدفع 100$ قيمة السيفيس ولو حبيته يجيك مستعجل زود عليها 30$
12_جاك السيفيس ووصل السداد خلاص و معاك الشهادة المترجمة و الI-20 و الضمان المالي و خطاب السفارة طيب خلاص كده!!!!!!!!!!!
لا طبعاً مش خلاص
خذ كل أوراقك و روح لأقرب مكتبة و صور كل أوراقك 5 نسخ للإحتياط
13_روح لأول إستديو و إتصور صور شخصية مقاس 5*5 و خلفية بيضاء مره بالزي السعودي ومره من غيره
14_دور مثل الشاطر على موقع السفارة في النت أو تروح للسفارة إن كنت في الرياض أما لو كنت في الشرقية أو جدة تروح للقنصلية و تجيب أبلكيشن الفيزا الخاص بالطلبة لك واحدو لكل مرافق واحد هذا لو كان معاك مرافقين
و أقعد عبي الأبلكيشن كله لا يكون في أي فراغ لو ماعندك إيجابة إكتب no ولو ما‘نت عارف خانة أو ناقصك شي لا تشيل هم و تقول راحت عليا البعثة .أبداً وسع صدرك و لما تروح السفارة هتلاقي في الصالة الداخلية لوحة إعلانات معلق عليها الأبلكيشن و مترجم ساعتها تكمل كل خاناتك إلي نقصاك و نصيحة مني لك خلي الأبلكيشن كله مكتوب بخط واحد بمعنى إنك تعبي الابلكيشن بخطك إنت شخصياً و لو كنت ماتعرف تكتب English خلي احد يعبيلك هو ولكن تكتبلهم مين ساعدك في تعبيته المهم ماعلينا خلينا في المهم
15_قبل ماتروح السفارة تتأكد من تاريخ ال I-20 لأن له مده محدده و ينتهي و هي 3 شهور فلو كان باقيله أقل من أسبوعين لازم تجدده هتقلب رضو كيف هأقلك تراسل جامعتك و تطلب منهم يجددولك الI-20 تبعك وتدفعلهم ياسيدي زي الشاطر كده 100$
ولهنا خلصت مرحلة التقديم أما المقابلة في السفارة فهي في الحلقة القادمة و بالتوفيق

أما بالسبة لأفضل الجامعات فكنت اتمنى ان أفيدك و لكن للأسف ماعندي أي فكرة........ودمت