عرض للطباعة
السلام عليكم ورحمة الله وبركاته
اخواني واخواتي انا متخرجه من قسم علاقات عامة وقدمت ماستر تخصص تأمين
تتوقعو هل هذا التخصص مضمون وهل فيه احد بيدرس هذا التخصص انا مااخترت تسويق لنه شايفه كل الناس بتقدم عليه
ارجو منكم افادتي بكل المعلومات حول هذا التخصص
وجزاكم الله خير
ستتتتتتتتي .. انتي طالعه امريكا او كندا مو ؟؟ .. خليني اقولك .. في كندا وامريكا مافيه حاجه اسمها (ماستر تسويق) الا في عدد قليل جداً من الجامعات وكل الي حتشوفيه انو هناك فيه (برنامج الماستر في ادارة الاعمال) وحيكون التسويق والماليه وغيرهم ان وجد كمسارات في هدي البرامج
التأمييييييين !!! .. ماأدكر من وقت مابديت افكر بالبعثه في ٢٠٠٧ لحد الان اني شفت احد درس ماستر في التأمين .. وبكندا وطوال ماكنت ادور قبول في البزنس سكولز ماأدكر اني شفت ضمن برامج الماستر انو فيه ماستر تأمين .. فلاتدوخي حالك وتدخلي في مشاغل تغيير التخصص ( هدا طبعاُ بإفتراض انو الوزاره فعلاً حطلعك ع التأمين وماحتحولك مباشره ع التسويق) .. وبعدين وانا اخوك الناس هابه ع التسويق لأنو هو التخصص الوحيد المناسب للتخصصات النظرية لأنو حتى الماليه يفترض من الطالب ان يكون صاحب خلفية عنه ..
الزبدة ... ادا انك طالعة للتسويق فعندك خيار امريكا افضل ب ١٠٠٠ مره من كندا .. وعلشان تطمني من الكلام فأنا ياستي جلست في كندا سنه ونص وانا من الاساس خريج ادارة اعمال وعلى كدا فيه صعوبة الحصول على قبول هناك .. والنقطة الاهم في الموضوع كله هو انو ملحقية امريكا متعاونة اكثر من ملحقية كندا بخصوص تغيير التخصص .. يعني خلينا نفترض انك طلعتي للتسويق ( الي حيكون ماستر اوف بزنس) وماتوفقتي في قبول وقتها حتى فيكي تغييري التخصص للعلاقات العامة او التخصصات القريبة ..
بالتوفيق
شكراا يااخويه
الله يسعدك بس انا استخرت ربنا عالكندا وحطيتها في الخيار الاول الله يكتبلي الخير وييسره ليا
معلش ع الدخله الي يمكن يجي بعدي واحد يقولي زنديق .. بس اللي اعرفو انو الاستخارة يعملها الواحد لما يكون محتار بين امرين او اكثر يعتقد انهم كلهم صالحين له .. اما ادا اعرف ان هدا الخيار او داك حيتعبني ( بناء على تجارب الالاف و ٦ سنوات من عمر البرنامج ) والكل يقول كندا للي وضعها بوضعك حتكون متعبه (ماحقول مستحيله) ..اقتباس:
المشاركة الأصلية كتبت بواسطة fine lady
ع العموم ادا توكلتي على الله وحتقدمي على كندا لاتخربيها مررررره وتقدمي على تخصص غير التسويق .. ولارحتي هناك حتفتكري هالكلام .. بالتوفيق
لا زنديق ولاغيرو اهم شي اننا نآمن بشهادة ان لا اله الا الله سيدنا محمد رسول الله
انا صليت استخاره لأني كنت محتارة بين كندا وامريكا
تاني حاجه اتوقع انه تأمين له مستقبل واكيد راح يكون عليه احتياج وقبول مستقبلا بما انه الوزاره حطت التخصص ده من ضمن الشروط بس ممكن راح اخد بمشورتك واختار تسويق مع انه نفسي اكمل دراستي في العلاقات العامة
ومشكوووره يااخويه الله يوفقك ويسعدك يارب ويكتبلك الخير فين ماتكون