اللي موعد تدقيق بعد 16\9\2011 يشوف تجربتي للفايدة

September 17th, 2011, 03:09 AM

السلام عليكم ورحمة الله وبركاته
أنا قدمت في برنامج خادم الحرمين الشريفين للإبتعاث الخارجي المرحلة السابعة التخصص المطلوب طب والدولة المراد الإبتعاث إليها ألمانيا
طبعاً كان موعدي يوم الجمعة بالرياض في فندق راديسون الساعة 8 مساءًا
الوثائق المطلوبة للتذكير:
1- نموذج طلب الإبتعاث << اللي هي ورقة وحدة بس وهي البيانات اللي عبيتها في التسجيل ولازم توقع عليها مع التاريخ.
2- نموذج الإلتحاق بالجامعة الاجنبية << اللي هي الأربع ورقات ولازم تاخذ في عين الإعتبار التواريخ بالميلادي ولازم تعبيها عالكمبيوتر ما عدا التوقيع.
3- أصل شهادة الثانوية وصورة منها مختوم عليها.
4- صورة من نتيجة القياس والتحصيلي.
5- صورة من بطاقة الأحوال وجواز السفر ولازم تجيب الأصل منها كلها.
المهم أول ما تخش الفندق لازم تسأل عن قاعة الرجال أو النساء على حسب أما عني سألت عن قاعة الرجال تلقاها ورا الفندق عن المواقف الإضافية فا قبل لا تخش راح تلقى بساط احمر امش عليه لين تلقى مكان التدقيق
المهم قبل لا تدخل للقاعة راح تلقى واحد قبل باب القاعة عاليسار لازم تاخذ منه ورقة ترتيب الوثائق فا راح يقول لك رح شف رقمك في ذي اللوحة فا انت دور عن اسمك وراح تلقى الرقم قدام الاسم المهم راح يعطيك ورقة عبارة عن الوثائق اللي معك على حسب الدرجة بكالوريوس ولا ماجستير ولا زمالة ... الخ المهم راح تلقى مثل الجدول أول خانة يجيك نموذج طلب الإبتعاث راح تلقى مربع مرفق ومربع غير مرفق فا الوثائق اللي معك حط عليها صح تحت كلمة مرفق فا بعد ما تعبي بياناتك داخل القاعة ولازم يكون معك قلم للإحتياط ههههه المهم تجلس عند اول ناس تلقاهم في القاعة فا تنتظر في الكراسي على ما بال يناديك على حسب الزحمة وقتها أنا ما أخذ مني خمس دقايق المهم راح يشوف الوثائق ايه تذكرت لا تدبس الأوراق لانك راح ترتبها بنفسك المهم بعد ما يشوف اوراقك راح يعطيك رقم تروح عند المدقق الحقيقي ههههه فا بعد ما تروح وتنتظر رقمك فا يوم جلست عند المدقق سلمت عليه طبعاً ولازم يكون اسلوبك عسل يعني مو ساكت ولا فلته على أنه خويك ههههه المهم سألني وين تبغى أي دولة؟ قلت: ألمانيا فا قال لي طيب اختبرت اختبار IELST قلت وش هالاختبار؟ قال شبيه بإختبار التوفل فا سألته ليه هو لازم اختبره قال لا بس يعني اذا تبغى تضمن مقعدك في الطب لأنو ما في إلا 350 مقعد عالطب فقط لا غير فا سألته طيب مثلاً ما حصلو لي مقعد ايش يصير؟ قال يحولونك على العلوم الصحية وخلوني اختار بين امريكا وكندا يعني قصدهم اذا ما لقوو مقعد يحولوني على امريكا وكندا وطبعاً اخترت امريكا المهم فا قلت له طيب يميدني اختبر ايلتس عادي؟ قال ايه بس اهم شي يكون قبل نهاية شهر 11 لأن نتائج القبول راح تنزل فا راح نغلق ملفك وقتها المهم فا قلت طيب اذا اختبرت كيف اعطيكم نتيجة الاختبار؟ قال رح عند موقع وزارة التعليم العالي اللي مقابل رياض غاليري المهم فا شال الختم وقال لي ها اختم ترى إذا ختمت راح تنقبل قلت الله يرحم ابوك اختم وريح بالي هههههه
فا الحمدالله قالي نفس المدقق انت دامك مستوفي للشروط خلاص انت مبتعث مبتعث الله لا يعودها بشر ههههه فا هذا بإختصار شديد اللي صار معي اي استفسار انا تحت خدمتكم باللي اقدر عليه
اييييييييه صح نسيت اقول لكم اي احد ناقصه معدلاته لا يجيهم مو تحطيم بس اقول لكم وش صار معي يوم كنت ادقق وثائقي المهم جا واحد جنبي حاط في الاستمارة حق طلب الابتعاث انو نسبته في القياس 80 وهي في الحقيقة في صورة نتيجة قياسه 79 فا قال له المدقق معليش ما اقدر اساعدك الله يستر عليك دور جامعة برنامج الملك عبدالله ما راح تخشه وذاك قاعد يحاول فيه ويقول له يعني نسبة واحدة في القياس تضيع مستقبلي قال المدقق والله لو الموضوع بإيدي والله ما اقصر معك بس راح تمر من ناس فوقي يعني صعبة فا اللي كسر في خاطري انه اخذ الورقة حق الملاحظات الصفراء كتب عليها عدم القبول ولزقها على ملفه وذاك راح وهو محترق اااااخ
الله يوفق ذاك الرجال قولو آمين والله ان وجه انقلب علطول كان على باله انو اموره راح تمشي بس يالله الله يكتب ما فيه الخير ما تدري بخفيات هالدنيا
آسف على التطويل ههههه والسلام خير ختام

• نشر عبر تويتر
• نشر عبر فيسبوك
• نشر عبر جوجل