الأعضاء الإشتراك و التسجيل

الملتقيات
ADs

امشو نجهز شنطة السفر

امشو نجهز شنطة السفر


NOTICE

تنبيه: هذا الموضوع قديم. تم طرحه قبل 4518 يوم مضى, قد يكون هناك ردود جديدة هي من سببت رفع الموضوع!

قائمة الأعضاء الموسومين في هذا الموضوع

  1. الصورة الرمزية Biochemist1988
    Biochemist1988

    متعاون سابق

    Biochemist1988 الولايات المتحدة الأمريكية

    Biochemist1988 , أنثى. متعاون سابق. من السعودية , مبتعث فى الولايات المتحدة الأمريكية , تخصصى Biological Science , بجامعة Dominican University of California
    • Dominican University of California
    • Biological Science
    • أنثى
    • San Rafael, California
    • السعودية
    • Jul 2010
    المزيدl

    November 16th, 2011, 04:35 PM

    هاي كيفكم جاءت على بالي فكرة (لعبة) ومنها الكل يستفيد ونساعد بعض في تذكر اشياء لو الواحد راح بلد الابتعاث يكتشف انو نسيها او محتاجاها وماهي موجودة عندهم
    انا راح ابدا احط اشياء وكل واحد جاء على بالو شيء يحطو
    وراح اعمل تحديث للموضوع لحد اجمع اكبر قدر ممكن من الاشياء

    1-اشياء شخصية
    اهم شيء واقي شمس نوعية كويسة و مضمونة

    بطاقة صراف سامبا
    (عشان لو حصل لاسمح الله نقص بالفلوس اي احد يرسلكم من حسابو سامبا على حسابكم سامبا تقدرو تسحبو عن طريق صراف bank of america
    بنفس الوقت بدل ما تضيعو فلوس في السبيد كاش وغيروا)
    انا كنت استخدم بطاقة الصراف حقت سامبا وكان ياخذ على كل عملية سحب (35ريال) بصرغ النظر عن المبلغ اللي بتسحبو كبير ولا قليل فكننت اسحب الرصيد كامل بنفس الوقت وعلى كل عملية استفسار عن الرصيد 10ريال (حلوة اسعارهم مقارنة بعمليات التحويل الاخرى الغالية)

    ملابس طويلة (للنساء)

    لاتكثرو ملابس لانو هناك الاماكن احسن بضاعتهم
    عندهم مانجو و زارر و اتش اند ام وووووووووووووووووووووووووووووووو كل سوقنا اللي هنا يعني لاتكثرو بناطيل
    ملابس رياضية

    حجابات

    بناطيل

    جزم صنادل(الله يكرمكم)

    ادوات حلاقة

    طواقي كب عشان الشمس

    الشامبو (مدري حسب تجربة اختي لمن جاءت تسافر من مطار واشنطن الى سان فرانسيسكو كبو لهم الشامبو والله حرام عليهم كان جديد تقول)
    يعني احسن نجيبو شامبو صغير
    صابونة
    ليفة
    معجون اسنان
    شاور جل
    كريمات
    محفظة للبطايق
    الحقيقة لمن رحت هناك تركت محفظة النقود حقتي وصرت استخدم محفظة البطايق لانو لاحظت اني ما احتاج اشيل معايا مبالغ مالية كلو بالبطاقة الامريكية (حسابي في بنك او امريكا) جيبو نوعية كويسة مو اللي يومين وتتقطع ويطيح منها البطايق وانتنا شايلها
    طبعا كنت احط فيها بطاقة المعهد وبطاقة الباص وكل شيء مررة مهمة

    شنطة الكترونية برقم سري (لحفظ المستندات الهامة) عشان لمن تخرجوا برا البيت لازم تامنو على اشياكم ماتعرفوا مين يدخل
    كاميرا
    صور شخصية

    2-اسلامياتم
    قران كريم
    كتاب اذكار
    ملصقات تذكيرية (زي دعاء الدخول و الخروج من الحمام ومن المنزل او مثلا دعاء الاستيقاظ)
    بوصلة لتحديد مكان الصلاة
    مسواك
    ساعة الفجر للاذان (دي مررررررررررررررة مهمة افتقدتها لمن سافرت سان فرانسيسكو الواحد يحتاج يسمع صوت اذان)


    شراشف صلاة
    سجاجيد خفيفة للصلاة (زي ديكا السجاجيد اللي تجي في اكياس صغيرة عشان يسهل حملها والصلاة في اي مكان عشان الواحد لايتأخر)
    زي اللي بالصورة


    3-مكملات
    مظلة حقت المطرumbrellaجيبو وحدة نوعيتها كويسة وما تخرب يعني تعيش بالذات اللي بيروحوا سان فرانسيسكو والله اسعار المظلات هناك اللي جودتها كويسة غالية جدا ولمن تشتري من المظلات الرخيصة خرجة وحدة وتنكسر
    نظارات شمسية (على فكرة الملحقية راح تعطيكم ضمان 400دولار تقدرو تطلعو بيه نظارة او عدسات او نظارة طبية)
    نظارات طبية احتياط
    سفر للطعام (الغريب انو في سان فرانسيسكو مرة تعبت وانا ادور على سفر بلاستيكية زي اللي عندنا بالسعودية ومالقيت غير السفر الثقيلة حقت الحفلات اللي استخدامها متكرر)
    رشاش للحمام (الله يكرمكم) زي الصورة دي

    واللي ما جاب او بدو يشتري من هناك تراهم يسموه
    kitchen spray
    لانهم يستخدموه بالمطباخ وتلاقوه في اماكن السباكة انا احس انو مهم الحقيقة لانو حمامتهم مافيها رشاش

    او ابريق
    مناشف للتنظيف (لانو الحمامات مافيها بلاعات ويصعب غسيل الحمام والله معاناه الله يهديهم بس البلاعات اللي عندنا نعمة)
    فيش كهربة 110 فولت

    كدا شكل الافياش

    اي جهاز لازم كهربته 110

    راس للفيش كدا شكلو لازم

    اقفال

    4-اشياء خاصة بالاب توب
    مايك وكاميرا
    سي دي خاص ببرنامج ويندوز الاصلي (لازم الاصلي عشان ممنوع بي امريكا البرامج المنسوخة)
    ولازم تفرمتو جهازكم قبل السفر وتتاكدو انو مركب عليه ويندوز الاصلي و تتاكدو انو خالي من البرامج او الاغاني او الافلام المنسوخة

    سي دي لبرامج مايكروسوفت اوفيس (اصلي ايضا)لانكم تحتاجو البرامج دي هناك مررررة وانتبهو لايكون اللي عندكم بالجهاز تقليد

    اعمل سكنر لكل المستندات اللي معاك من جواز السفر و الشهادات والتوصيات وووووووووووووو
    وحطها على فلاش او سي دي او على الاب توب حقك
    5-اشياء علمية:
    كتاب لقواعد اللغة الانجليزية يشرح القواعد بالعربي ك مرجع
    قاموس اطلس الالكتروني


    نوته صغيرة فيها ارقام وعناوين القرايب والاصدقاء في امريكا ان وجد
    شنطة صغيرة خاصة بالاوراق الرسمية الخاصة زي جواز السفر والشهادات والتوصيات وغيرها
    5-ادوات طبية
    painkiller
    زي البندول
    البروفينال
    ادوية الحساسية و لانفلونزا
    ادوية السخونة
    شنطة اسعافات اولية
    فيتامين سي (مهم عشان تغير الجو) و اول ماتروحو هناك اشربو كل يوم كاسة من فيتامين سي عشان المناعة لا تنزل (لازم فلسفة الكيمياء الحيوية لووووووووول)


    6-ماكولات
    على فكرة لازم لازم حاجة مهمة تحطو في بالكم الاكل الللي بتشيلوه معاكم يكون مغلف وعليه تاريخ انتاج وتاريخ انتهاء
    بهارات
    لانو اعرف وحدة كانت شايلة معاها رز (راحو كبو لها هو) يعني اتخلصو منو بالمطار
    انا عن نفسي كنت اشتري الرز من البقالة العربية ناسية ايش نوعيته واسمو بس لو افتكرت راح احط لكم هو لانو زي رز السعودية جودته
    هيل
    الهيل هناك سعره جدا غالي اخذت معايا هيل من السعودية
    بن للقهوة
    يفضل للناس المدمنة تجيب كمية كبيرة منو لانو البن حقهم هناك مو طعم (انا عن نفسي ماحب القهوة العربية عشان كدا ماواجهت مشكلة في ذلك)
    تمر ليك وللي تحب (جيب هدية تمر) احلا هدية الحقيقة
    معمول
    اندومي
    للناس اللي يحبو الاندومي صح انو مو صحي بس يعني اللي حاب لاني في سان تعبت وانا ادور على اندومي وبالاخير جابوه البقالة العربية بسعر جدا غالي
    نسكافية تلات بواحد
    نسكافية تلاتة في واحد لاني مالقيت هناك غير النسكافية العادي مدري ليش ماعندهم نسكافية تلاتة بواحد وعلى فكرة اخت معايا السترونق نسكافية اللي اعشقو الاخضر و الحمدلله ما علمو لي كلام عليه بالمطار
    جبنة كرفت وما ادراك ما جبنة كرفت عانيت ومالقيتها صح عندهم في جبنة كرفت بس مافي جبنة كرفت السايله

    7-ادوات مطبخ
    ترمسة قهوة
    اهم حاجة اهم حاجة السعوديين راح يموتوا لو ماشالوها اللي هيا ترمسة القهوة
    (انا طبعا ما اشرب قهوة عربية ولا احبها بس اللس كانو معايا كانو كيفييين قهوة فطبعا صارو يبغو يعملو القهوة بس مالها مكان مافي ترمسة تنحط فيه وهاتك تدوير من مكان لمكان الين يوم رحنا مكان و لقينا فيه ترمسه قهوة بس سعرها غالي جدا بس مع ذلك اخذنها )عشان كدا نصيحة خذو معاكم ترمسة قهوة



    وابريق خاص بغلي القهوة

    ليا رجعه لو افتكرت حاجة مهمة كماااااااااااااااان
    ويلا استناكم
  2. المشاركة الأصلية كتبت بواسطة RORO2011
    يعطيكي العاافيه يارب ^^
    موضوع رائع صراحه
    يلا إن شاء الله لو جا في بالي حاجه مهمة كمان أجيبها هنا
    الله يسهل علينا يارب
    الله يعافيكي في انتظاررررررررررررررررك وانتظار البقية
    7 "
ADs

قم بتسجيل دخولك للمنتدي او

الانضمام لمبتعث

Search Engine Optimization by vBSEO ©2011, Crawlability, Inc.