الأعضاء الإشتراك و التسجيل

الملتقيات
ADs

خطوة ,, في رحلة الالف ميل ( معهد اللغة )

خطوة ,, في رحلة الالف ميل ( معهد اللغة )


NOTICE

تنبيه: هذا الموضوع قديم. تم طرحه قبل 2249 يوم مضى, قد يكون هناك ردود جديدة هي من سببت رفع الموضوع!

قائمة الأعضاء الموسومين في هذا الموضوع

  1. الصورة الرمزية أوكاسيا
    أوكاسيا

    مبتعث مميز Characteristical Member

    أوكاسيا الولايات المتحدة الأمريكية

    أوكاسيا , أنثى. مبتعث مميز Characteristical Member. من السعودية , مبتعث فى الولايات المتحدة الأمريكية , تخصصى Marketing , بجامعة P.S.U
    • P.S.U
    • Marketing
    • أنثى
    • Portland, Oregon
    • السعودية
    • Oct 2010
    المزيدl

    November 26th, 2011, 05:02 AM

    مسائكم / صباحكم
    طهـــــر ,, وسعادة بحجم السماء


    يالله صحصحوا شوي
    قلت لكم ناموا عشان نروح المعهد الصباح ماينفع تتاخروا

    طبعا اهم حاجة دوامكم اول يوم
    الانطباع الاول يظل حاضر في الذهن لـ فترة طويلة ومو سهل انكم تغيرونه
    فما لازم تتاخروا في روحتكم لـ المعهد اول يوم ,,
    حاولوا انكم تكونوا موجودين قبل الكلاس بـ 15 دقيقة

    انا اول يوم قالوا لي الحضور الساعة ثمانية ,, كوني في المعهد سبعة وخمسة واربعين دقيقة
    وبما ان الدعوة عندي سعودية فـ ما رحت الا الساعة ثمانية ونص
    خبركم ربعنا يقولوا لنا تعالوا الساعة تسعة ويلطعونا الين عشرة ,,


    هنا اهم حاجة عندهم دقة المواعيد


    نجي لـ المعهد كيف نختاره
    99% من المبتعثين يقولوا لكم معهد اكاديمي
    علما ان هـ النسبة ندموا قد شعر راسهم لما راحوا لـ المعهد الاكاديمي
    وانا رح اقول لكم ليش
    في الفترة الاولى ( اول ثلاثة شهور او اربعة )
    التحقوا بـ معهد تجاري ,, لا تخافوا رح يخلوكم تحولوا لـ معهد اكاديمي

    ليش المعهد التجاري ؟!

    اولا : اللي لغته ضعيفة بيقعد يفحط في المعهد الاكاديمي الين يقول بس
    فيه ناس اخذوا الليفل ون بـ ستة شهور ,,
    يعني بالله متى رح يخلص الليفلات الباقية ,, ولاحظوا ان اقل معهد فيه خمس ليفلات
    السبب انه ما يعرف اي بي سي دي في الانجليزي
    بعكس المعهد التجاري اللي يغيرون لك الليفل مرة كل ثمانية او عشرة اسابيع

    ثانيا : المعهد الاكاديمي عادة يكون مترووووووس سعوديين يعني هـ الساعتين اللي بتقضونها في
    المعهد بتقضونها وانتوا تتكلموا عربي والشيء هذا ما يساعدكم نهائيا
    بعكس التجاري اللي يكون فيه الطلاب من جميع انحاء العالم وعشان تتواصل معاهم غصب عنك
    لازم تتكلم انجليش

    ثالثا : انتوا ما عندكم الا هـ السنة ( سنة اللغة ) اللي تقدروا تروحوا وتشوفوا فيها البلد
    الشيء هذا انسووووووه مع المعهد الاكاديمي يعني يعطوكم حدود 10 صفحات يوميا هوم وورك
    وفيه مرات توصل لـ 50 و 70 صفحة
    بعكس المعهد التجاري اللي يحاول انه يوريكم ثقافة البلد ويسوي لكم رحلات عشان تروحوا وتشوفوا
    غير الانشطة اللي داخل المعهد


    اللي بوصله لكم
    المعهد الاكاديمي ممتاز لكن متى ؟!
    بعد ما تقضوا كم شهر في معهد تجاري
    اللغة عندكم تكون صارت اقوى وثقافتكم عن البلد صارت اوضح وحتى معرفتكم بالثقافة العالمية صارت اوسع


    اانا ما اشجع اللي يدرسون 24 في 24 ساعة
    لانهم في النهاية زي ما راحوا رح يرجعوا اللهم الا انهم زادوا شهادة لـ شهاداتهم السابقة
    لكن في النهاية يرجعوا بـ ثقافة عدم ,, ومعرفة في الحياة = صفر

    وفي نفس الوقت نلاقي ناس ما همهم الا الهياته 24 ساعة داج برى البيت
    واذا سألته قال كم مرة بروح امريكا ؟!

    يعني تطرف في كل شيء حتى في الدراسة !!
    امسكوا العصاية من النص
    احضروا كلاساتكم ,, حلوا الهوم وورك ,, واول ما تخلصوا فريرة اطلعوا اتمشوا وشوفوا الدنيا


    حاجة ثانية ,,
    رح تلاحظوا ان سمعتنا كـ سعوديين زي الزفت <<< سوري ع الالفاظ بس الشيء هذا رح تشوفوه
    السبب :
    التعامل + الاهمال + الثقافة
    التعامل : كل السعوديين تعاملهم سيء ,, الامريكان شعب مهذب جدا ورح تلاحظوا انهم ما يستلطفوا البريطانيين
    اللي معروف عنهم قلة التهذيب والذوق في التعامل
    يجي السعودي حتى تحية الصباح ما يقولها ,, صباح الخير ما رح تنقص منكم شيء
    وصدقوني كل ما كان تعاملكم مؤدب معاهم كل ما احترموكم واحترموا ثقافتكم

    (
    تجربة شخصية : اول ما درست انا وزوجي بـ المعهد كان كلاس زوجي بـ وقت صلاة الجمعة ,, رحنا عشان نكلم
    مدير المعهد بخصوص هـ الموضوع وقال لنا بالحرف الواحد : هذي مدرسة لـ تعليم الانجليزية ومو مدرسة لـ المسلمين
    بلعناها وكملنا حياتنا عادي نحضر الكلاسات ونسلم بـ الصباح ولا كان شيء صار ,, والله العظيم لما جات اجازة عيد
    الاضحى بمجرد ما طلبنا يوم اجازة اعطانا هيه من دون ما يوجع لنا قلوبنا ,,
    السبب : التعامل لا اكثر
    )


    الاهمال : دائما الطلبة السعوديين يجوا لـ الكلاسات متاخرين هذا اذا ما سحبوا على الكلاس كامل ,, وفي الاخر يقول
    كنت اصلي علما ان الوقت لا هو وقت صلاة ولا ما يحزنون الين انطبعت عندهم فكرة ان الاسلام دين تسيب واهمال
    وان كل السعوديين بـ الطريقة هذي
    رجاءا لاتخلوا الدين شماعة لـ ااخطائكم ,, لا تشوهوا سمعة الدين الله يخليكم


    الثقافة : ثقافتنا ان احنا شعب الله المختار ,, وانه احنا احسن من غيرنا ,, خلوها في السعودية اصرف
    هنا حتى عامل النظافة له حقوق ,, كونه ينظف من بعدك ما يعني انك احسن منه ,,
    للاسف ناس كثير مازالوا يتعاملوا من هـ المنطلق وناسين ان السعودية شيء وان امريكا شيء ثاني
    يعني اسلوب التعالي نلاقيه في كل مكان ,, حتى مع الاساتذة في المعهد
    علما بان فيه ناس اكثر ثقافة واكثر علم واكثر ادب



    في المعهد حاولوا انكم تطوروا علاقاتكم مع اشخاص من جنسيات ثانية عشان تجبروا نفسكم على الكلام بـ اللغة الانجليزية
    انا ما اقول اقطعوا علاقاتكم بـ السعوديين بس خلوا اكثر وقتكم مع اجانب الين تتحسن لغتكم وبعدين سولفوا مع السعوديين
    لحد ما تطفشوا


    الامريكان ناس عمليين جدا ,, يعني محبته لك شيء والدرجات شيء ثاني
    يحبوا الشخص اللي يحسونه مهتم في المادة ,,
    لا تخجلوا من انكم رح تغلطوا ,, لانكم رح تغلطوا غلطات شنيعة عدد شعر راسكم ,, عادي انتوا جايين تتعلموا مو جايين عشانكم
    متعلمين وخالصين والا كان دخلتوا جامعة احسن
    اسألوا عن اي شيء ما تعرفونه شغلتهم انهم يساعدونكم حتى لو تسألوا عن معنى 10 كلمات ورى بعض ,,


    حاجة مهمه
    جيبوا معاكم اطلس من السعودية لان اسعارها غالية جدا وجيبوا معاكم دكشنري انجليش انجليش لـ المتعلمين لان اسعارها بحدود الـ
    60 دولار واكثر وتلاقوها في السعودية برخص التراب
    برضوه خلوا معاكم دفتر صغير لـ الكلمات الجديدة اكتبوها واكتبوا معناها بالانجليش رح يفيدكم الشيء هذا كثير لانه كل ما كنت حافظ
    كلمات كثيرة كل ما كان فهمك واتقانك لـ اللغة اسرع
    برضوه دفتر كبير واقلام لان الدفاتر العادية هنا اسعارها على اربعة دولار وانت طالع هذي نفس الدفاتر اللي نشتريها الدرزن بريال
    فما بالكم بالدفاتر اللي اشكالها مرتبة
    القرطاسية بـ صفة عامة غاااااااااااالية ,,, فخذوها معاكم ارخص واوفر
    كمان الباك باق شنط المدرسة ايام زمان رح تخدمكم بشكل كبير وحاولوا انكم تشتروا الشنط اللي يكون فيها جيب شبك من الخارج
    رح ينفعكم تحطوا فيه كوب الكوفي او الموية بدل ما تحوس اغراضكم حوس


    حاولوا ان علاقاتكم تكون ودودة مع الاساتذة بشكل خاص لانهم رح يفيدوكم في البلد والعادات وحتى في الاماكن اللي ممكن تشتروا
    منها مستلزماتكم وحتى لو صعب عليكم شيء بعدين تقدروا ترجعوا لهم ( حتى لو انكم خرجتوا من المعهد )

    استغلوا وجود الهوم لس بـ الشوارع لـ تحسين لغتكم
    ( كان معانا واحد بـ كلاسنا يقول لما يجيني واحد يشحذ مني اقول له انا ما اعطي فلوسي لـ شحاذ ,, لكن عندي لك عقد عمل ,,
    أنا طالب لغة وابغى اقوي لغتي ,, اجلس سولف معاي خمس دقايق واعطيك الربع دولار ,, الحين الولد ما شاء الله عليه في
    المستوى الرابع من اللغة ,, يعني باقي له مستوى ويخلص التوفل )


    دراسة اللغة ما تخوف زي ما يوصفوها لكم ,, سهلة وبسيطة وممتعة
    المهم ركزوا في الكلاس ,,
    حلوا الهوم وورك ,,
    طوروا علاقاتكم وصداقاتكم مع الاجانب ,,
    ورح تتقنوا اللغة بـ اسرع من ما تتخيلوا ,,



    رح يكون الموضوع الاخير ان شاء الله بـ هالسلسلة عبارة عن مقتطفات منوعة من الاشياء اللي انا شفتها بـ هالكم شهر


    لا تنسوا
    اذا اعجبكم الموضوع او استفدتم منه او امتعكم
    فـ هدفي الوحيد هو دعوة صادقة بـ ظهر الغيب لـ والدي بالرحمة والمغفرة
ADs

قم بتسجيل دخولك للمنتدي او

الانضمام لمبتعث

Search Engine Optimization by vBSEO ©2011, Crawlability, Inc.