تحذيــــــر من معهد TLC, South bend وجامعة IUSB .. نصيحة لوجه الله ..

.
.

..السلام عليكم ..

انا مبتعثة من مبتعثات المرحلة السادسة .. قدر الله علي والملحقية جابت لي القبول في معهد TLC ساوث بيند , اول مابديت دراسة في المعهد وهذا الكلام كان قبل 9 شهور تقريبا , كان المعهد مقبول قدرت نسبيا استفيد منه .. اما الان فهو جدا سيء من نواحي كثير :

1- الادارة جدا غير متعاونة .
2- المدرسين غير كفؤ وغير مؤهلين للتدريس الا حوالي 4 مدرسين .
3- شهادة المعهد غير مقبولة في كثير من الجامعات .
4- توزيع الدرجات للحصول على النجاح في اعتقادي انه غير عادل .. يعني على الحضور والمشاركة فقط 10% .. والباقي كله في الاختبار .. على عكس معاهد اخرى تعطي 40% على الحضور والمشاركه وهذا يساعد في زيادة نسبة النجاح .
5 - المعهد 9 مستويات .. يشترط للتخرج من المستوى التاسع الحصول على درجة 3 او اكثر في اختبار يسمى ITP, او الحصول على المستوى السابع في اختبار الرايتنق ( اختبار الرايتنق هو اختبار يحدد قدرتك على كتابة مقال باللغة الانجليزية ) النقطة الرابعة مافيها اي مشكلة واغلب المعاهد موجود فيها هذا النظام ولكن المشكلة في التلاعب ..( احكيكم قصة صارت معاي ) . طبعا المعهد يعطيك فرصة تختبر الرايتنق هذا من وانت في المستوى السادس الى ماتتخرج انا في اختبار من الاختبارات دخلت وماحليت كتبت اي شي وخرجت يعني ما استحق حتى اني اخذ المستوى الثالث , اتفاجيء انهم حاطيني في المستوى الخامس :eek:, وفي مره اخرى دخلت و كتبت ونظمت واجتهدت فيه واتفاجيء انهم حاطيني في المستوى الرابع .. هذا ان دل فما يدل الا على التلاعب في التصحيح.

نجي الان للجامعة التابع لها هذا المعهد وهي جامعة IUSB
للامانة انا ما ادرست فيها بس من كلام وخبرات صديقات لي يدرسون فيها حاليا ..

اولا : الجامعة تقبل طلاب البكلاريوس في حالة حصلو على شهادة تفيد انهم انهو المستوى التاسع في المعهد .. وتقبل طلاب الماجستير في حاله انهو الـ9 شهور وفوقها 3 شهور تسمى بوست ناين .
ثانيا : الجامعة جدا صعبة الا في بعض التخصصات القليلة مثل البيزنس والتسويق وفي تخصص ثالث بس ناسية ..
ثالثا : بالنسبة لطلاب الماجستير ..عدد ساعات المواد التكميلة جدا كثير .. وفي بنات اصلا داخلين على تخصصهم الاصلي مايحتاج اي مواد تكميلية الزموهم بمواد تكميليه لازم يخلصوها عشان يبدؤ في برقرام الماستر .

.................................................. .........

طبعا انا الان في مرحلة اللغة وحابة جدا اني انقل من هذا المعهد لاني حاسة اني قاعدة اضيع وقت فيه وكله هذا قاعد يروح من وقت مدة اللغة .. بس للاسف مافي ملحقية تساعد ماينفذو لك الطلب الا بعد طلوع الروح لو ان عندي فيتامين ... كان انا الان في المعهد الي ابغاه بس الله يسهلها من عنده ان شاء .


.انا لي فترة مادخلت المنتدى وعرفت من وحدة من البنات انو طلاب المرحلة السابعة يطلبون منهم تحديد المعهد والولاية عشان كذا حبيت ادخل وافيدكم عشان ماتتورطون مثل صاحبتكم وناس كثير زيي .
* طبعا نصيحة اكيد سمعتوها كثير وراح اعيد واقولها لكم .. انا انتقادي للمعهد من حيث الادارة وانه المعهد مايساعد على التطوير وماراح تستفيدون منه مقارنة بمعاهد ثانية .. بس في الاول والاخير اللغة اذا انت ماشتغلت على نفسك ماراح تتطور فيها .


,, يارب اكون افدتكم .. دعواتكم ,,
.
.

الله يكون بعونك ... وتأكدي ماتضيق الا وتفرج ان شاء الله

اقتباس:

---

المشاركة الأصلية كتبت بواسطة lo0o0vely

الله يكون بعونك ... وتأكدي ماتضيق الا وتفرج ان شاء الله

---

اميـــن .. يسمع منك ربي :)

جزاك الله خير
وان شاء الله يستفيد الجميع من نصيحتك

كان الله في عونك وعوننا
هذا اللي انا خايفه منو اطب بمعهد موكويس ولاجيت اغير ماقدر مع انو العيسى طمنا انو التغيير ممكن

الله يفرج همك .......

مشكورين على الدعوات الحلـــوة :)