الأعضاء الإشتراك و التسجيل

الملتقيات
ADs

°ˆ~*¤®‰« ô_° ما يجب عليك فعله عند وصولك لأمريكا °_ô »‰®¤*~ˆ°

°ˆ~*¤®‰« ô_° ما يجب عليك فعله عند وصولك لأمريكا °_ô »‰®¤*~ˆ°


NOTICE

تنبيه: هذا الموضوع قديم. تم طرحه قبل 2182 يوم مضى, قد يكون هناك ردود جديدة هي من سببت رفع الموضوع!

قائمة الأعضاء الموسومين في هذا الموضوع

  1. الصورة الرمزية وليد الرشيدي
    وليد الرشيدي

    مبتعث مميز Characteristical Member

    وليد الرشيدي الولايات المتحدة الأمريكية

    وليد الرشيدي , ذكر. مبتعث مميز Characteristical Member. من السعودية , مبتعث فى الولايات المتحدة الأمريكية , تخصصى TESOL , بجامعة Arkansas Tech University
    • Arkansas Tech University
    • TESOL
    • ذكر
    • Russelville, AR
    • السعودية
    • Nov 2011
    المزيدl

    December 25th, 2011, 09:26 AM

    السلام عليكم اخوتي الكرام اخواتي الكريمات..هذا موضوع لاخونا ابراهيم الرميح احد اعضاء هذا المنتدى المبارك..كتب موضوعا مفيدا، واستعرض فيه خبراته وما واجهه عند وصوله لامريكا ..لن أطيل عليكم وأترككم مع الموضوع

    المشاركة الأصلية كتبت بواسطة iAlromaih
    السلام عليكم و رحمة الله و بركاته..

    هذا الموضوع هو شرح للأشياء البسيطة و الصغيرة اللي راح تواجهها من وصولك لأمريكا و حتى إستقرارك في مكان معيشتك، بصراحة الشباب هنا فيهم خير و بركة لكن كثير أشياء تغيرت من وصولهم لأمريكا و فيه كثير أشياء ما يعرفون أو ما يتذكرون كيف يسوونها..

    أولاً: الرحلة:
    أكبر غلطة يغلطون فيها الطلاب هي أنهم يحجزون على واشنطن، الآن كل شي تسويه عن طريق البوابة الإلكترونية و مرورك بواشنطن مجرد مضيعة لوقتك، الأسوأ من هذا أنك تجي لنيويورك ترانزيت، أصعب و أقرف موقف ممكن تمر عليه هو أنك توقف بسرى طويل و أنت وراك رحلة طويلة ثانية و لا تقدر تقول شي.. المطارات الأوربية ما راح تدقق عليك زي المطارات الأمريكية (لأنك جاي ترانزيت على أوروبا)، نصيحتي تنتبه من الترانزيت داخل أمريكا..

    أنا شخصياً حجزت على الخطوط الإماراتية (الرياض-دبي-سان فرانسيسكو) و وصلت فرانسيسكو و كان التفتيش جداً سلس، و الضباط جداً محترمين، أول ما وصلت قال صباح الخير، كيف رحلتك و بعدها عبى الأوراق اللي معي و أخذ بصماتي و مشاني.. وقتها كان السرى طويييل، و ما كنت شايل أي هم للتأخير لأنها ببساطة كانت المحطة الأخيرة لي.. طبعا بالطيارة راح يعطونك نموذج تعبيه إسمه I-94، الضابط راح يأخذ الجزء اللي في نهاية النموذج و يدبسه على جوازك و يأخذونه إذا جيت تطلع من أمريكا..


    ثانيا: أول ما توصل أمريكا:
    أهم شي بالنسبة لي هي الجوال، فيه تقريباً أربع شركات في أمريكا At&t و T-Mobile و Verizon و Sprint الشركتين الأخيرتين يستخدمون نظام ثاني غير ال GSM فجوالاتنا ما تشتغل عليها، At&t خدمتهم خرافية لكن ما عندهم ما يعطونك نت على الآيفون إلا إذا عندك عقد، T-Mobile هي الشركة الوحيدة اللي تقدر تستخدم النت و أنت ما عندك عقد، طبعاً السعر خرافي لكن الخدمة أسوأ من At&t، السعر هو $50 شامل لكل شي (مكالمات غير محدودة، رسائل غير محدودة، و إنترنت غير محدود)، لكن النت على الآيفون ما يعطونك 3G!! (تدفع $10 للمكالمات الدولية الرخيصة (السعودية 59p و رسائل غير محدودة مجانا) و 10$ لخطمة البلاك بيري). نصيحتي أول شي تسويه إذا وصلت هي أنك تروح T-Mobile و تأخذ الشريحة (بعد ما تأخذ نت، تقدر تدخل على خرائط الآيفون و تدبر نفسك بكل شي بدون ما تسأل أحد)

    خلال اليوم الأول:
    روح للريسبشن بالفندق أو إسأل العائلة اللي أنت ساكن عندها عن أقرب مكان تقدر تسوي فيه سكان للمستندات اللي عندك، راح تحتاج لصورة للجواز+الفيزا+I-20+ قرار الإبتعاث+ صورة الجزء من ال I-94، صورة شهادتك، راح تدخل على موقع الملحقية و تعبي نموذج طالب مبتعث، بعدها بيرسلون لك على الإيميل أنهم فتحوا لك ملف طالب مبتعث على البوابة الإلكترونية، تدخل و ترفع أوراقك بعدها بيحددون لك مشرفة (حسب المدينة))

    خلال الأسبوع الأول:
    أنصحك تروح لبنك Bank of America و تفتح عنده حساب، لأن كثير من المحلات ما يقبلون بطاقات الفيزا اللي الأرقام مطبوعة عليها طباعة (لازم تكون محفورة حفر)، فتح الحساب سهل جداً جداً جداً، بالبداية يستقبلك موظف و يسألك وش تبي بعدين يوديك لموظف مسؤول عن فتح الحسابات، الموظف هذا راح يسألك عدة أسألة بس يتأكد وش نوع الحساب اللي يناسبك، طبعاً أنا أخذت Debit لأني ما أحب الديون (فيه نوعين Debit: زي اللي بالسعودية، تحط الفلوس بالحساب و بعدين تشتري، Credit: زي الفيزا بالسعودية، تشتري و نهاية الشهر تسدد الفاتورة، و لو تأخرت يحسبون عليك فوائد) طبعاً ما فيه شي إسمه بطاقة بنك وبطاقة فيزا زي السعودية، البطاقة واحدة هي الفيزا و هي بطاقة البنك و هي اللي تشتري فيها بالنت.. طبعاً راح يعطيك بطاقة مؤقته و دفتر شيكات مؤقت تقدر تستخدمها زي العادية بالضبط، و خلال أسبوع يرسلون لك البطاقة اللي عليها إسمك على البريد.. طبعا المطلوب هو فقط (جواز+ رخصة أو أي بطاقة إثبات هوية+ 20 دولار بس)، طبعا الحساب اللي أنا فتحته هو حساب إلكتروني فيه كل الخدمات الإلكترونية لكن لازم تتنازل عن إرسال كشف الحساب على البريد، و تخلص معاملاتك العادية عن طريق الخدمات الإلكترونية (نت+برنامج آيفون+صرافة) و ما تجي للبنك إلا وقت الحاجة، إذا ما تبي لازم تدفع 9 دولار شهرياً

    طبعاً صارت لي قصة عندهم: كنت بحول فلوس من بنك الراجحي ل بنك أوف أمريكا، لكن لأن بنك الراجحي ما يشتغل الخميس و الجمعة و بنك أوف أمريكا ما يشتغل السبت و الأحد، فالسالفة تأخذ وقت و كنت خايف أغلط بأي رقم و تروح علي الفلوس، فصرت أروح يوميا للصرافة و أسحب الحد الأعلى من حسابي في الراجحي، و أودعه في الصرافة في حسابي في بنك أوف أمريكا، جيت مرة وسحبت الحد الأعلى (800 دولار) و أودعته بالصرافة، و الصرافة كالعادة ترفض بعض الفلوس بعدين لازم تدخلها مرة ثانية، المهم الصرافة أخذت 680 دولار ورفضت 120 دولار، بعدين سويت DEPOSIT MORE CASH والصرافة كانت معلقة و رفضت فإضطريت أكنسل الطلب (و طبعا فلوسي جوى الصرافة)، إتصلت على البنك و سويت شكوى رسمية (طبعا الهاتف المصرفي شي خرااافي، كأنه يتكلم معك شخصيا)، الموظفة اللي كلمتها قالت سألتني عن معلوماتي و معلومات الإيداع و قالت لي المبلغ (اللي أنت قلت) راح يكون في حسابك بأسرع وقت ممكن، بعدين راح نحقق في المشكلة و نرسلك رسالة على البريد إذا إنتهت المشكلة، و فعلاً بعد أسبوع أرسلوا لي أن المشكلة أنتهت)


    بعد ما تطلع من البنك خذ واحد من الشيكات و إكتب عليه VOID و تعني ملغى، و سو له سكان و إدخل على حسابك في البوابة الإلكترونية و إرفع هالصورة،، أيضاً إذا كنت محتفظ بفواتير رسوم الفيزا و ال SEVIS تقدر ترفعها عن طريق البوابة و يعوضونك إياها، أيضاً لو إختبرت توفل أو جي آر إى أعتقد أنهم يعوضونك..

    بالنسبة للتأمين الطبي، أول شي راح يسألونك عنه المعهد هو التأمين الطبي، بعد ما تفتح ملف في البوابة الإلكترونية، الملحقية راح ترسل كل أوراقك للشركة، كل المطلوب منك هو أنك تتصل على الشركة و تأخذ ال Membersip No. و تروح لموقعهم و تسجل و هم راح يرسلون لك البطاقة.. الشرح كامل موجود هنا

    طبعا بالنسبة للسكن خلال الأيام الأولى أنصحكم تستخدمون موقع Booking.com لأنه ممتاز و يعطيك تقييم مضبوط للفندق من الزباين اللي حجزوا فيه، أنا شخصياً حصلت فندق نظيف مرة و حلو و سعره ممتاز، و عرفت أنه ممتاز عن طريق التقييم في هالموقع. بالنسبة للتمشية و المطاعم ما فيه أفضل من هالموقع Tripadvisor.com يطلع لك مطاعم من تحت الأرض و تروح تجربها تطلع شي خراااافي..

    بعدين إذا بتشتري أي شي أفصل شي هنا هو أنك تشتري عن طريق النت، الأمريكان يعتمدون بشكل خرافي على النت، خصوصاً أمازون و إي باي. أيضاً فيه موقع Craigslist.org، الموقع هذا يعتمدون عليه الأمريكان في كل شي تقريباً، ممكن تحصل سكن فيه، ممكن تشتري سياره عن طريقه، أنا شخصياً حصلت مدقق إملائي ( Editor or Proofreader) إحترافي بشكل ما تخيلته عن طريق هالموقع.


    بالنسبة للرخصة موضوعها جداً جداً سهل، أول يوم وصلت هنا كانوا الشباب جداً متعاونين معي، واحد من الشباب (الله يجزاه خير) أرسل لي نماذج إختبارات المرور (بالعربي)، حفظتها و أخذني بكرى و رحنا لل DMV: Department of Motor Vehicle، و أختبرت النظري و نجحت فيه، بعدين قال لي الظابط تقدر تسوق برخصتك السعودية مدة سنة، و خلال هالسنة تجي مرة ثانية و تختبر عملي و تأخذ الرخصة!! طبعاً طلبت ID تقدر تستخدمها بأي مكان بدل الجواز و عبيت نموذج واحد للرخصة و البطاقة و ما خلصت كل السالفة خلال ساعة، و الرسوم رخيييصة ( 20 دولار للآي دي و 30 دولار للرخصة!!)


    هذا اللي وصلت له أنا خلال 4 أسابيع في أمريكا، أتمنى أكون أفدتكم باللي أقدر عليه،، و راح أحاول أضيف أي شي أتذكرة،،

    تحياتي،،
    أخوكم: إبراهيم الرميح..


    في الختام نسأل الله عز وجل أن يوفق أخونا ابراهيم..وينفع بما كتب..ونساله سبحانه وتعالى ان يوفقنا جميعا لكل خير ويبعدنا جميعا عن كل شر..وأن ييسر امورنا وامور جميع اخوتنا المبتعثين من المسلمين..ودمتم بخير....
ADs

قم بتسجيل دخولك للمنتدي او

الانضمام لمبتعث

Search Engine Optimization by vBSEO ©2011, Crawlability, Inc.