تم اصدار قرار الابتعاث وامر الاركاب والاجازه الاستثنائية ( اي سوال انا حاضر )

فيه نموذج منزله انا قبل كذا في نفس الموضوع هذا نموذج اصدار قرار الابتعاث بسيط مره بس عشر توقيعات وتوقيع المرافق في الاخير
الافضل انك تذهبين الى الرياض لوزاره التعليم العالي حي الغدير شمال الرياض امتداد طريق العليا متجه شمال .في الداير الشمالي وانت جاي من الشرق الى الغرب يصير على يمينك وانت جاي من الغرب الى الشرق يصير على يسارك عند مكتب تجسير الفكر >>>>> اقرب تكسي يحطكم عنده

انا ما ادري من راح يخلص اوراقك مرافقك والا انتي اذا كان مرافقك ترى السالفه ما تاخذ اقل من ربع ساعه
يعني ربع ساعه ويعطونك قرار الابتعاث ويعطونك صوره بس يعني يعطونك ورقه وحده مصوره وبعد كذا تصورينها وتعطينها مكتب الطيار في نفس المبنى في نفس الصاله من جنب كونتر اللي يصدر قرار الابتعاث ويقول لهم هذا قرار الابتعاث ابي اسافر في اليوم الفلاني في الساعه الفلانيه على الخطوط الفلانيه
طبعا يختار اي رحله في اي خطوط وتمر على اي مدينه يعني لك حرية الاختيار في السفر ويعطونك بعدها التذاكر وعلى طول السفر ان شاء الله

بالنسبه بالحجز على الموقع ما عندي فكره

فتح الملف لك او لمرافقك ما ينفتح الى عند اكتمال الاوارق المطلوبه ولا راح تكتمل اوراقك الى اذا وصلتي بلد الابتعاث عشان تاشيره الدخول والختم على القبول الشيك الملغي
موضوع الملف بسيط مره ما يطول بالكثير ثلاث ايام ويردون لك بالموافقه

المرافق يصرف له مكافاه في نفس حسابك يعني انتي ومرافقك تستلمون الدراهم سوى في نفس الحساب حتى لو ما درس
الموضوع ابسط ممن تتصورين لا تخافين كل الامور بسيطه والشعب كله متعاون وراح تلاحظين اول ما توصلين بلد الابتعاث
اتمنى اني افدتك الله يوفقكم
واي اساله ثانيه انا حاضر ما عليك الا تحطين السوال وانا ان شاء الله اجاوب على اللي اعرفه واسف على التاخير وع الكتابه السريعه

الله يوفق الجميع

مشكوورة جدا على تعاونك خدمتني كثيرا ووضحت لي امور كنت اجهلها
جعله الله في ميزان أعمالك

بنسبه لفتح الملف انا سمعت انه بامكانك عمل فتح من السعوديه وحفظها
واكمالها في بلد الابتعاث وارسالها
طبعا عبر موقع الوزارة الالكتروني

وكذلك بنسبه لصرف الاموال متى يتم الصرف
فور الانتهاء من فتح الملف وفتح حساب

نحتاج الى معلومات عن التامين الصحي ؟؟؟

اعتذر على كثرة الاسئله


وشكرا جزيلا لك

سؤال اخير

يقال انه سوف يتم تعويضنا من قبل الملحقيه برسوم الفيزا والسيفس
كيف يتم ذلك ومتى ؟

بنسبه للحجز هل من الضروري المرور بواشنطن من اجل اكمال فتح الملف ؟؟

وشكرا جزيلا

نعم تقدرين تفتحين ملف بالسعودية بس ما تسوين تسليم مجرد حفظ واول ما توصلين بلد الابتعاث تكملين اوراقك وترسلينها واقل من اسبوع وان شاء الله يرسلون الضمانات عليكم

بالنسبه للصرف ما ادري متى بالضبط على حسب نزول الرواتب وعلى حسب المده المحسوبه لكم
ما راح تقدريين تفتحين ملف الا اذا فتحتي حساب من البنك وترفقين شيك ملغي راح يعطونك البنك شيك ملغي

بالنسبه للتامين الصحي فور وصولك الى بلد الابتعاث الملحقية راح ترسل لك الشركه اللي متعاونين معها ويرسلون لك عنوانهم
امريكا الشركه هي اتنا
لها خطوات عشان تفتحين ملف عندهم وبسيطه جدا وتطلبين مترجم وكل هذا راح تسوينه بالتلفون ويرسلون عليك البطاقات على الصندوق البريدي لا تخافين ابدا كل الاوضاع متيسره

الله يوفقك
الله يوفق الجميع

نعم احتفظي بصور السيفيس والايصالات من بنك سامبا صوريها قبل ما تعطينها الملحقية
واول ما توصلين وتفتحين ملف تطلبين تعويض وراح يعوضونك على طول

اما بالنسبه للحجر اشوف ما له داعي المرور بواشنطن لا ما راح احد يفيدك بواشنطن مجرد سياره تنقلك من المطار الى الفندق الفندق على حسابك طبعا وبعدها تسافرين على وجهتك الثانيه
فالاضل تختصرين الوقت والتعب وتروحين على ولايتك على طول
الله يوفقك
الله يوفق الجميع

الف شكر لك اخوي الغالي

استفساري بسيط وهو .. الافضل اسافر لبلد الابتعاث قبل موعد الدراسة ب30يوم ولا اقل يعني حدود كم يوم .. انا مبتعث لوحدي وراح اعتمد على مبلغ بسيط في بداية الايام لحد ما تصرف المكافأة ..

اتمنى تعطيني نصائح بسيطة من تجربتك لتعم الفائدة ..

اخيرا اتمنى لك التوفيق الدائم والسعاده الدائمة يارب ..

الله يعطيك العافيه اخوووووووووووووووووي

سوالي لابد السفر لرياض علشان امر الاركاب وتاريخ الابتعاث والتذكره


ربي يعطيك العافيه

شكرا جزيلا لك
وفقك الله

الامر يختلف من شخص الى اخر
بالنسبه للعزابي اللي مرتب وضعه من السعودية يعني يعرف ناس هناك واستاجروله شقه واوضاعه بالسليم الافضل ما يروح الا قبل الدراسه بايام
اما اللي مو مرتب وضعه ولا يعرف شي يعني رايح على ما قالو على عماها >>>>>>>> احلى ايام راح تمر عليك اسالني انا مجرب تقول هندي اهز براسي بس وربي حلوه
الافضل له يروح قبلها باسبوع او اكثر بكم يوم عشان يرتب وضعه ويستاجر ويفتح حساب ويطلع شريحه وكلها ما تاخذ يوم واحد
اما بالنسبه الللي معه عوايل مثلي
فالافضل والاحسن انه يروح قبل الدراسه باسبوعين وضع العايله مو مثل وضع العزابي العايله شغله شوي يعني راح تشيل همهم شويه
صراحه الموضوع هذا كبير مره وطويل ويعتمد على المدينه اللي رايح لها
يعني ممكن تروح مدينه كبيره كل شي متوفر فيها وكل شي سهل وكل شي تقدر توصله بسهوله يعني تقدر تمشي تروح باص قريب منك متوفر فيها شقق بكثره
بالمقابل تكون غاليه جدا ومكلفه بشكل غير طبيعي
وممكن تروح مدينه صغيره مره تعتبر بالنسبه لنا قريه رخيصه وحلوه وهادئه بس بالمقابل ما يكون متوفر فيها كل شي ولا يكون كل شي قريب منك
يعني انا اول ما وصلت ولايه اوهايو مدينه كنت وكنت مدينه صغيره مره قعدت بالفندق اسبوعين على ما حصلت لي شقه واضطريت اني اشتري سياره ثالث يوم
بالاخير يعتمد على المدينه اللي انت رايح لها
اتمنى اني افدتك لو بالقليل
اذا عندك اي سؤال انا حاضر باي وقت لو عندك مليون سوال ابشر من عيوني انت تامر
الله يوفقك
الله يوفق الجميع

والله ما عندي فكره بس انا شفت ناس بالمنتدى على كلامهم اصدرو قرار الابتعاث وامر الاركاب من دون يجون للرياض
بس الافضل انك تنقز للرياض الشغله كامله ما تاخذ ساعه وانت واقف تخلص امورك كلها
الله يوفقك
الله يوفق الجميع