الأعضاء الإشتراك و التسجيل

الملتقيات
ADs

كلام مهم ونصائح ماقبل السفر الى الوصول لجميع مبتعثين المرحلة السابعة (بعض من تجربتي)

كلام مهم ونصائح ماقبل السفر الى الوصول لجميع مبتعثين المرحلة السابعة (بعض من تجربتي)


NOTICE

تنبيه: هذا الموضوع قديم. تم طرحه قبل 2143 يوم مضى, قد يكون هناك ردود جديدة هي من سببت رفع الموضوع!

قائمة الأعضاء الموسومين في هذا الموضوع

  1. الصورة الرمزية Biochemist1988
    Biochemist1988

    متعاون سابق

    Biochemist1988 الولايات المتحدة الأمريكية

    Biochemist1988 , أنثى. متعاون سابق. من السعودية , مبتعث فى الولايات المتحدة الأمريكية , تخصصى Biological Science , بجامعة Dominican University of California
    • Dominican University of California
    • Biological Science
    • أنثى
    • San Rafael, California
    • السعودية
    • Jul 2010
    المزيدl

    February 4th, 2012, 07:37 PM

    السلام عليكم
    حابة اسمي الموضوع مبتعثين المرحلة السابعة غير...
    السبب
    -تقريبا ملمين بجميع اخطاء المراحل اللي قبل
    -على حظهم في البوابة الالكترونية نظام سفير اللى سهل الامور على جميع المبتعثين والحمدلله معاملة يومين وتلاقي الرد يعني تقدم كبير جدا من الملحقية الثقافية في امريكا جزاهم الله خير

    *انا راح اذكر بالموضوع قليل واللي اتذكره من تجربتي مع السفر
    الحمدلله وصلت في منتصف شهر يناير الى مدينة الداراسة مباشرة دون الحاجة للمرور على الملحقية الثقافية طبعا الغريب بالامر انو مافتشو عفشي باالمطار (انقهرت لاني فرمتت جهازي واشتريت انتي فايروس اصلي و يندوز اصلي ومسحت الافلام والمسلسلات اللي كنت اتفرجها لغرض تنمية اللغة الانجليزية من الهارديسكات والاي بود والاي باد ) المهم الحمدلله خير ان شاءالله
    فتحت ملف بالملحقية عن طريق البوابة الالكترونية يوم السبت
    اخد مني الملف 4ايام تقريبا والحمدلله اعطوني رقم طلابي
    بعد كدا قمت اتصلت على الملحقية وطلبت منهم يرسلو اوراقي لشركة اتنا عشان الضمان الصحي والحمدلله ارسلو الاواراق و واتصلت على شركة اتنا واخذت الانشورنز نمبر بس لحد الان البطاقة ماوصلت قالو تاخد7-10ايام لكن اقدر استخدم الانشورنز نمبر عشان اطلع نظارة او مثلا اتعالج في اي مستشفى تحت تغطية اتنا

    -في نقطة هاااااااااااااااااااامة جدا بخصوص الانشورنزا (التامين الصحي)
    المعهد حقي تابع لجامعة وارسلي رسالة عشان اقدم في برنامج الانشورنز اللي عنده وانا عندي انشورنز اتنا...
    فا المعهد عنده فورم يقول في حال عندك انشورنزا اخر لازززززززززززززم لازم شركة الانشورنزا الاخر يعبي الفورم ويرسله على فاكس او ايميل المعهد كا اثبات انو الطالب ليس في حاجة لي الانشورنزا حق المعهد
    في حال الطالب اتغافل عن دا الامر ومابلغ المعهد انو عنده انشورنزا اخر ولا عبى الفورم.... راح يضطر يشتري الانشورنزا حق المعهد...
    الفورم دا عبارة عن كلام يوضح انو الطالب تحت تغطية التامين الصحي لي اتنا
    كان عندي المعهد طالب يوصل له الفورم قبل يوم 9فبراير ف طبعا رحت اتصلت على اتنا واعطيتهم بيانتي وشرحت لهم انهم لازم يعبو الفورم فطبعا اتنا جزاهم الله خير ماقصروا اتفهمو وضعي و ارسلو الفورم فاكس للمعهد
    المهم خلاصة الكلام عشان امكن في ناس لسا ماسافرت ف لسا مو فاهمة الموضوع اعطو خبر للمعهد اللي راح تروحوه انكم تحت تغطية التامين الصحي لي اتنا... وشوفو هل راح يطلب منكم انو اتنا ترسلهم خطاب او تعبي فورم انتبهو لدي النقطة عشان لا تضطروا تشترو الانشورنز حق المعهد...

    بالنسبة للناس اللي لغتهم جيدة
    -اغلبنا يصل قبل بدء الدراسة ب كم يوم
    نصيحة اللغة سنة والتمديد 6شهور حط في بالك تغلق اللغة في سنة وانك قادر على ذلك استغل كل دقيقة من تاريخ الوصول الى بلد الابتعاث في كل مدينة في مكتبة تكون عامة يستطيع اي شخص ان يستعير كتاب وغالبا تحتوي المكتبة على كتب كتير مهمة بالنسبة لنا احنا الانترناشونال ستيدنت نمي روح القراءة يعني مثلا روح للمكتبة و استعير كتب عن اختبارات التوفل و الايلتس او كتب essayلتعليم الكتابة او غيرها حاول تاخذ فكرة مبسطة القراءة اهم شيء في سنة اللغة لا تفوت الفرصة عليك استغل كل دقيقة كل ثانية وحط في بالك انك تختبر الايلتس او التوفل كل بعد شهرين وشوف التقدم وان شاءالله مع كثرة الاختبارات تجيب الدرجة

    -لاتقول اختبر اخر شيء او اختبر لمن اخذ كورسات توفل بالمعهد تقدر تشتري كتب من اماوزن او اغيرها او تستعير من المكتبة كتب متنوعة للتوفل و تذاكره بالبيت و تختبر كل شهرين
    -اغلب المبتعثين ياخذو سنة اللغة على اساس سنة السياحة ولمن تجي تغلق يقوم يروح يختبر توفل وهو مستهون بنفسو (قصدي يختبروا كلو عشان يجيب اي درجة في سبيل ان يحصل على تمديد 6شهور من قبل الملحقية) يعني يقلك انا بختبر الان عشان ابغى تمديد ستة شهور لغة لانو الملحقية شرطها بالتمديد ان تحضر لهم اخفاقك بالتوفل او غيره من الاختبارات (يعني تجيب لهم انك لسا ماجبت الدرجة المطلوبة في اختبار التوفل )

    -سنة اللغة تعتمد عليك وليس على المعهد (تجاري اكاديمي)
    لاحظت كتير من المبتعثين بعد انتهاء سنة اللغة يقلك اعذار اتوقع الجميع يعرفها راح اذكر القليل منها
    -المعهد تجاري مو قد كدا
    -المدرسين ما كانو يفهمو
    -ما خالطت المجتمع الامريكي عشان كدا لغتي ما اتطورت

    وينسو انهم كانو يروحوا سينماء و جمعات و تمشيات احس انو البعض يعتبر دي السنة حقت اللغة (سنة سياحة وترفيه) ويجيك على الاخير ويتورط
    عشان كدا ابدا من الاول عشان لا تتورط بالاخير انا ما اقول لا تتمشو اتمشو بس بعقل وتخطيط واجلعوها اخر همكم
    -افتكر انو وراك اهل بالسعودية ينتظرو منك شهاااااااااااااااااااااااااااااااااادة
    -افتكر انو كتير قبلك سافروا و رجعو بدون شهاااااااااااااااااااااااااااااااااااااااادة
    -افتكر انو كتير جالسين في بيتوتهم يتمنو لو يكونو مكانك يدرسوا
    -افتكر انها فرصة ذهبية مارح تعوض
    -افتكر انو انتا غير وانو هدفك اعلى من انك تكمل فقط بكالوريس او ماجستير يعني فكر بمرحلة الدكتوراة وانك تعمل تمديد وتجيب معدل عالي
    -افتكر انو هنالك مكافاة من قبل الملحقية للناس اللي تغلق اللغة في سنة او اقل وتجيب درجة كويسة بالتوفل او الايلتس
    -حاول تختصر المشوار وتتخرج بسرعة لانو كتير مثلك مبتعثين وكتير راح يرجعو ومعاهم باذن الله الشهادة فكن متميز واختصر المشوار


    -همسة خفيفة
    -نعم نخالط المجتمع الامريكي او الاجنبي الذي يتحدث اللغة الانلجيزية في حدود اللي يسمح لنا ديننا يعني نخالطهم لغرض اكتساب مهارة التحدث وغيرها
    -لا ما نتأثر بعادتهم الغير مسموحة بديننا الاسلامي (مثل الشرب او الاكل المحرم او لبس ملابس غير لائقة بالنسبة للفتيات)

    -الحجاب هوية:
    -حطو في بالكم التوفيق من عند ربنا
    -طبعا اغلب البنات لمن يطلعو للخارج راح يخلعو العباءة و الخمار ما قلنا شيء كلو في سبيل عدم التعرض للمضايقات و النفور من المجتمع الامريكي او غيره لكن مو معناتو الوحده تخلع الحجاب (طرحة الراس) و تلبس ملابس قصيرة (سكيني و شورت)
    -كتير من البنات الله يهدينها ويهديهم لمن تخرج برا تخلع الطرحة وما تكتفي بذلك غير تلبس ملابس غير لائقة ابدا ابدا (ياجماعة افتكرو احنا مسلمين بنصلي ونصوم) مو معقولة دي الملابس
    -لفت نظري قول وحدة كنت اعرض عليها نروح ال gymالنادي للرياضة .. قالتلي فيه سعوديين؟؟؟
    قلت لها والله حسب ما رحتو زمان ما كان فيه
    قالت لاني انا احب البس ملابس الرياضة (الشورت وغيرها) ولو كان فيه سعودين مارح اقدر اروح
    =====لا ياشيخة خفتي من كلام السعودين طيب فين خوف الله؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

    -المهم نصيحة يا بنات المرحلة السابعة حطي في بالك (طرحة راسك ما تنشنال غير وانتي في بيتك و البسي ملابس ساترة ) عشان انتي مسلمة و عشان ربنا يوفقك ووييسرلك امرك ماتعرفي امكن خطوة خلع الحجاب تكون سبب عدم توفقيك؟؟
    حطي في بالك خوف الله و التوفيق
    -والتوفيق مايجي غير من عند الله

    -بعض الافكار واللي ان شاءالله تكون ناجحة لمرحلة اللغة:
    -المجتمع الامريكي في بعض المدن خاصة الكبيرة مجتمع مشغول بالتالي يصعب على الشخص الاختلاط وكسب مهارة التحدث معهم
    نصحية لو ماقدرت تنخرط بالمجتمع او انخرطت بيهم خلي بالك وتركيزك على القراءة اكتر شيء و التلفزيون ايضا تعجبني خدمة قنواتهم انهم يحطو الكلام اللي يتكلموه بالانجليزي تحت مكتوب بحيث انو الشخص يقرء ويسمع (خطو جميلة جدا)
    -اغلب المعاهد ماتقدم كلاسات ايلتسلانو نظام بريطاني وتلات ارباع المبتعثين بيفضلو الايلتس بيقولو اسهل نسبيا من التوفل مع اني الاحظ انو الناس اللي تقول كدا تكون لسا حتى ماجربت التوفل ولا اتمرنت عليه بس ماشيه على كلام وتجارب ناس قبلها المهم
    اغلب المعاهد في امريكا ماتقدم كلاسات ايلتس لذلك نصيحتي ممكن الواحد يخصص يوم بالاسبوع يتدرب فيه على ايلتس له حرية انو يتدرب اون لاين يعني يقراء كتاب او يدخل مواقع خاصة للتدريب على الاختبار او يستعير كتب من المكتبة العامة او مكتبة الجامعة او يشتري كتاب اون لاين عن طريق امازون
    -ممكن الواحد يعمل قروب خاص للتحضير لي الاختبارات ويتقابل مع مجموعة من الزملاء او الاصدقاء للتدريب و الاستعداد لي الاختبار (دي فكرتي الحالية) و اهم شيء يحددو يوم بالاسبوع ويخصصو ساعة ومكان هاديء يتدربو فيه ويناقشو امور الاختبار (ويكون كانو كلاس) ولازم من الالتزام بالحضور و اهم شيء مايتحول من مزاكرة الى كلام خارج عن نطاق المزاكرة (حكاوي وقال و قيل)
    -القراءة ثم القراءة ثم القراءة
    انا عندي طريقة اتبعها بالقراءة وهيا مسلية جدا (طريقة كتاب الاسبوع)
    -اشتري كتب قصص تلفزيونية مثل اللي بالصورة



    -وعندي كتير منها اخصص كل اسبوع كتاب واحد فيهم (كتاب الاسبوع)
    اقراء الكتاب في اوقات الفراغ والمقصود بي اوقات الفراغ يعني لمن اكون بالبيت ماعندي شيء او اكون بالمترو او الباص او في عيادة انتظر الدخول الى الدكتور او في مطعم او مقهى انتظر احد المهم يكون الكتاب معاي بكل مكان
    -واستخدم مع الكتاب قلم الهاي لايت الاصفر

    -اخطط كل كلمة جديدة بالكتاب مرت عليا ماني فاهمتها
    -بعد كدا اغلق كتاب تقريبا في اسبوع بإذن الله او اكثر
    -بعد كدا ارجع اترجم كلمة كلة بالهاي لايت
    -بعد كدا اغلق ترجمة كل الكلمات و ارجع اقرى الكتاب من جديد مرة او مرتين
    -الصراحة الطريقة مسلية جدا وانصح الجميع بيها

    --ممكن الواحد يعمل الطريقة مع قروب لتنمية روح القراء و المنافسة بين اعضاء القروب



    انتظرو الموضوع تحت الكتابة
ADs

قم بتسجيل دخولك للمنتدي او

الانضمام لمبتعث

Search Engine Optimization by vBSEO ©2011, Crawlability, Inc.