تجمع طالبات وطلاب اوهايو ..كولومبوس ..مع بعض كل شي بيكون اسهل

توجهت للمطار و كانت الرحلة عن طريق خطوط الاتحاد, مسار الرحلة كان ( الرياض - أبوظبي , أبوظبي - شيكاغو , شيكاغو - كولومبس ), الوزن المسموح به: شنطتين كل شرطة ما تتجاوز ٢٣ كيلو، طبعا هاذي غير الشنطة اللي بتدخل فيها الطائرة لانها ما يحاسبون على الوزن بس أكيد لازم يكون حجمها معقول علشان تجئ في الاماكن المخصصة للشنط، غالبا هالشنطة يكون فيها جوازك و اللابتوب و الايباد و قلم و ملف فيه اوراقك كللللللها بما فيها الايتوني و التذكرة و صورة من الجواز و صورة من التأشيرة و صورة من اخر شهادة و صورة من الضمان المالي و صورة من قرار الابتعاث لان توقع اي شي ممكن يسير ممكن الجواز لا سمح الله يضيع يكون معاك صورة او ممكن يطلبون إثبات انك مبتعث المهم كل الاوراق تكون مرتبة في ملف. وهاذي صورة ملفي
[

يجب الانتباه الى التبكير قبل موعد الرحلة ب ٤ ساعات لان طوابير الانتظار طويلة وعلشان اذا كان المسافرين ٢ أو أكثر مثل الأخوات و مرافقينهم يكون يمديهم يحجزون مقاعد بجنب بعض من بدري.
في مطار الملك خالد ( ما ادري باقي المطارات فيها او لا بس غالبا بيكون فيها) خدمة تخفيف وزن الشنطة و وضع الوزن الزائد في كرتون مع تغليفة بأحكام مقابل ٥٠ ريال. هاذي صورة المحل
[

يجب التنبه لنقطة جداً جداً مهمة خصوصاً للأخوة و الأخوات الذين لم يتجاوز أعمارهم ٢١ سنة، لابد من حضور ولي امر الطالب او الطالبة او ان يكون مع الطالب او الطالبة تصريح سفر وهذا فقط لمن أعمارهم اقل من ٢١ سنة حيث ان الجوازات السعودية تطلب ذلك.
١٠٠٠ ريال سعودي كاش يحول الى دولار كاااافي لان حمل الكاش الزائد غير مرغوب. والفلوس الباقية تكون في الحساب و تقدر تسحب من اي صراف فالعالم. طبعا تحويل الريالات الى دولارات تكون فالمطار فيه بنك يكون فاتح ٢٤ ساعة يحول العملات.
هاذي طيارة الاتحاد, الخدمة في نظري كانت ممتازة و انصح فيها. بس مشكلنها الوحيدة ان لازم تروح لابوظبي و بعدين لامريكا [

هاذي صورة لما نزلنا أبوظبي, كان الجو مو بارد يعني معتدل [

من أبو ظبي سافرنا لشيكاقو و كانت الرحلة طويلة شوي تقريباً 16 ساعة يعني بتنامون و تصحون و تنامون و تصحون و لا وصلتوا، لذلك افضل ان الواحد يأخذ معاه كتاب او رواية ، المهم يأخذ معاه شي ينسيه الوقت كل واحد و هوايته.طبعاً الأخوة و الأخوات اللي رحلتهم على خطوط غير السعودية يجب ينتبهون للوجبات و المشروبات اللي تقدم فالطائرة لانها ممكن تكون خنزير او ماهي حلال، أحسن حل هو انك تطلب سمك او تشكن و الشراب بيبسي او سفن اب تو و هيك شغلات.
لما وصلنا شيكاقو كان في زحمة في المطار عند الجمارك و كان تعاملهم مرررره ممتاز معنا و يحبون يساعدون أي واحد. ما فيه داعي للارتباك ولا تشيلون هم انكم ما تعرفون انجلش, هم متوقعين هالشي و التدقيق ما ياخذ 5 دقايق بس يكون الاوراق كاملة اللي هي ( الجواز, الايتوني الأصل طبعاً, الورقتين اللي يعطونكم فالطيارة ) بس للأسف من زحمة الطابور فاتت رحلة كولومبس. لما رحت أحجز على طيارة جديدة -طبعا لا تخافون هم يعوضون الفاتورة و يحجزون على اقرب رحلة ببلاش لان التاخر مو بسببك بسبب الزحمة- لما رحت أحجز كانت اقرب رحلة بكره يعني لازم انتظر اكثر من 12 ساعة. هنا حجزوا لي فندق 80% على حسابهم والباقي علي. انا دفعت 70 دولار. طبعا فيه عند البوابة باصات لكل فندق يوصلون ببلاش من المطار للفندق والعكس.كنت في حاجة الفندق لأني من جد مرهق من طول الرحلة. رحت للفندق وهاذي بعض الصور.
[

طبعاً من الافضل يكون معاك كاميرا لان من هنا تبدأ تجربة عمر و ذكريات لذلك توثيقها يعطي المستقبل نكهه. صور قد ما تقدر و صدقوني بيجي يوم هالصور تكون ذكريات لا تنسى و يكفي انك بعدين لما تشوفها اقل شي انك تبتسم.

　
ما أطول عليكم فالتفاصيل. المهم نمت و صحيت الصباح و نزلت حصلت الباص ينتظر طلعت علشان رحلة كولومبس.العالم هنا فرندلي مرره و يحبون يساعدون لدرجة أنهم يسوون كل شي لك و يدلونك لين تركب الطيارة.

هنا وصلت كولومبس و هاذي بعض صور المطار.

[

[

[

اللحين بحاول أقسم كل الباقي إلى أقسام:

في سكن اللي قال عليه أخونا عادل آل فاضل ممتاز و مره رخيص بس بشرط يكون معاك بطاقة طالب. مو مشكلة تدفع فلوس واذا طلعت بطاقة الطالب يردون لك الخصم فالاخر. اسم الفندق

هاذي صورة الهوتيل
[

كيف نحصل على سكن دايم بسرعة؟ عن طريق المعهد هم يوفرون هالشي.

الجو هنا مو بااارد مرررره, في اوقات يكون فيها برد خفيف، بس أغلب الوقت أنا أشوف أنه عادي. في أمطار و بهالوقت يكون الهواء بارد أما باقي الاوقات يكون الجو رااايق.
هاذي صورة الجو هنا
[

يعني أنا أنصح اللي ما قد أشترا ملابس أنه ما يكثر ملابس الشتاء يجيب جاكيتين كااافي لأن قليل بتلبسهم.

[

جامعة

[

رحت للمعهد و قابلت بوبي ، طبعاً لازم أي واحد يروح للمعهد قبل يوم الاختبار علشان يسجلون حضوره. اخذت صورة من الجواز و من الايتوني وأعطتني خريطة الجامعة و خطاب علشان أطلع بطاقة الطالب. بطاقة الطالب يطلعونها من

في شارع اللي جنب الجامعة اسمه النورث هاي ستريت, هاذا كللللللللللللللل شي عليه. فيه مطاعم عربية و هندية و كل المطاعم اللي فبالكم بتحصلونها هناك.
هذا مطعم هندي ممتاز تغديت فيه أنا والشباب.
[

طبعاً لازم رز و لحم هههههههههههه
[

طبعاً البنك و الاستيت أي دي يطلبون عنوان ثابت وأنا لسه ما سكنت في سكن ثابت , أن شاء الله بكره باسكن و اروح أطلع بطاقة الولاية و حساب البنك لأن الملحقية يطلبونه.

أتمنى أني أفدتكم و أي سؤال تبونه أنا حاضر. بس ياليت ما يكون رسالة خاصة لأن الهدف أن الجميع يستفيد.

تحياتي للجميع