الأعضاء الإشتراك و التسجيل

الملتقيات
ADs

اللي حصل معي في المقابله وصولا الى الورقه الزرقاء !!

اللي حصل معي في المقابله وصولا الى الورقه الزرقاء !!


NOTICE

تنبيه: هذا الموضوع قديم. تم طرحه قبل 5443 يوم مضى, قد يكون هناك ردود جديدة هي من سببت رفع الموضوع!

قائمة الأعضاء الموسومين في هذا الموضوع

  1. الصورة الرمزية almolta3
    almolta3

    مبتعث جديد New Member

    almolta3 غير معرف

    almolta3 , ذكر. مبتعث جديد New Member. , تخصصى publi adminestraion , بجامعة none
    • none
    • publi adminestraion
    • ذكر
    • none, none
    • غير معرف
    • Mar 2009
    المزيدl

    May 5th, 2009, 10:57 AM

    صبحكم الله بالخير
    في يوم 5 ماي كانت مقابلتي(اليوم) المهم مرتب اوراقي من A to z + نسخ احتياطيه (طبعا خوفا من الورقه الزرقاء) وهي كالتالي :
    1- الاي تويني + خطاب من الجامعه بقبولي.
    2- ترانسكربت (سجلي الاكاديمي الجامعي)+ وثيقة التخرج .
    3- الابلكيشنات 156من الموقع +157+158 موقعه طبعا .
    4- صور 5 في 5 مايحلمون بزيها خلفيه بيضاء والامور زي العسل.
    5-ايصال سامبا.
    6-السيفيس.
    7- صورة الجواز ملونه والاصل طبعا .
    حلوووووين نبدا :
    صحصحت على الفجر وافطرت ولبست (بدله )وعلى السياره سيده على السفاره وصلت الساعه 6 حكم !!
    كان قدامي 8 وانا رقم 9 المهم نشب فيني اللي وراي في السرا .. اللحين هم عصبيين !! قلت لا .. اللحين هم مسكات !! قلت لا .. المهم بتلنا انا وياه هو يقول اللحين وانا اقول لا .. المهم مدري وش خلاني افتح ملفي مادريت الا طمر علي وقال : اشووووووف اشوووف ثم قال وش ذااا قلت ياحبيبي هذي اوراق .. قال واااااالله ان يرجعونك !!
    قلت : عسى ماشر وش بلاك .. قال واحد اعرفه مصور زي صورتك رجعوووه من عند الباب الله يعينك على المشوار .. المهم قلت له انا لا ماعليه وش نسوي اما رجعه اللحين مانيب راجع .. الا واطالع السرا طوووويل عريض وصلوا تقريبا في الاربعينات .. ودقتني ام الركب من كلام ذا المرجف .. والله ويوم جت الساعه 7 وفيها الا وقامت تخبط الموظفه على القزاز وبدا السرا .. المهم جا دوري وانا معد ادري وش اسوي قعدت اقول اديور اروح اصور وارجع .. قامت تخبط بقوه المهم فكيت سبرنت يمها وصبحت على بنت الحلال وعطيتها اوراقي وكل مااملك وهي قاعده تقلب في الاوراق وانا عيني على الصوره المهم وهي تقلب نزلت لي وحده (كيف هالك) قلت وش صورته !! المهم فجأه خذت اوراقي وطلعتها لي قالت رح لشباك الثاني وسالني عندك اي شي الكتروني قلت لا .. لاني مافي مخباتي ولاشي غير الجواز ودراهم .. المهم قالي مع الباب الى داخل السفاره .. انتظرنا الباب يفتح لانهم يدخلونا واحد واحد .. المهم وادخل وافسخ الحزام والساعه ولاتلبسهم لان قدامه فيه تفتيش واروح لثاني مير الثاني كنك في برزن بريك ررررعب !! .. المهم عدينا بسلام وخذيت رقم 9 .. وشوي ودوري جا على شباك 6 عند اللبنانيه التعبانه .. طبعا تنازر(تزعق) على خفيف .. وانا انواع الابتسامات الصفراء ولا الود ودي خلني ساكت بس .. المهم وبدا اللعب في الارقام اللي جاي بعدك يبصم قبلك هكذا النظام في سفارتهم !! المهم رقم 26 بعدين 16 وبعدين 44 وفجأه 9 وانا مفهي شوي الا والهندي ركم تسئااااااااااا .. واطمر عند ولدنا السعودي الامريكي حق البصمات والله وابصم في 6 ثواني اسرع مبصم في العالم !!
    المهم وبدا سرا المقابله بالدور الا شوي جا رقمي !!
    والله واطير لها .. ووقف قدام الكاونتر طبعا تكون واقف في المقابله .. وقالت لي ابصم في البدايه بابهامك قلت ابشري واعطيها احلى بصمه .. وارفع السماعه وخذلك هذره ماتخلص الاسئله كالتالي :
    متى خلصت الجامعه ؟؟
    ج: 2009 الفصل الاول.
    ليه بتروح لامريكا ؟؟
    ج: لان امريكا تمتاز بالجامعات والبرامج القويه.
    وش معنى بتروح كونيركت (المفروض ولايتي)؟؟
    ج: لان كونيركت فيها جامعات قويه مثل ييل ويوكون على مستوى امريكا والعالم.
    وش بتدرس هناك ؟؟
    بداية معهد وبعد ذلك ماستر .
    وش بتدرس ماستر؟
    ج: قانون دولي.
    وش تخصصك في البكالوريوس ؟؟
    ج:اداره عامه
    وين درست هنا في اي جامعه ؟؟
    ج:جامعة الملك سعود
    من بتروح على حسابه ؟؟
    ج: قريبي
    ليه ماتروح على حساب ابوك ؟؟
    ج: لان ابوي جالس يبني بيت والفكره اللحين صعبه اطرحها عليه خصوصا وهو الان يصرف اموال على المنزل الجديد .
    ابوك يدري انك بتسافر؟؟
    ج: طبعا .. حسيت عمري 2 .. بغيت اقولها عمري 25 يعني لو متزوج كانت بنتي اللحين تسوي المقابله ، بس مسكت اعصابي .
    وش قال ؟؟
    ج: مبسووووووط جدا
    وراك توك تطلع جواز ليش مهوب من زمان ؟؟
    ج: قلتلها من زمان مطلع بس ماصار لي جواز خاص فيني الا من قريب .
    ماعندك جوازات ثانيه ؟؟
    لا


    طبعا المقابله كلها بالانجليزي وهي متشققه ومبسوطه جدااا ، وانا مرتبك شوي والمشكله كل شوي تقول الحمدلله !! المهم قالت شف خذ الاي توني حقك وانتبه له لان بيسألونك عنه في المطار زي الجواز وخذ معه جوازك ومعه ذا الوريقه الزرقاء فيها رقم تشيك عليه في الموقع .. وانا سووويت نفسي مبسوط وانا قافله معي.. قلت وش يعني قالت بعد كم يوم بنرسلك ترسل جوازك لنا .. قلت زين بس يعني اهم شي بتطلع الفيزا قبل موعد بداية دراستي !! قالت ايه لان دراستك باقي لها شهرين و9 ايام.. بعدها قالت باي وقلت باي .. ودعتها وفي قلبي طعون منها .
    وارجع البيت اشيك من العجله على الموقع والقى التالي :
    We were not able to identify Case # 2009125-565-1, Please make sure you have entered your Case Number correctly

    المهم قلبي ناغزني ماااش من ذا الورقه .. عموما هذي تجربتي واتمنى لي ولكم التوفيق باذن الله .
  2. المشاركة الأصلية كتبت بواسطة top1010
    معروفه الورقه الزرقا انه ماقرب موعد دراستك

    انا امس كنت في السفارة الرياض ماعطوني ولا ورقه عطاني كرت اصفر صغير قالي عطه فيدكس والفيزا تستلمها بعد اسبوعين

    والله مدري لكن موعدي كان باقي له يوم يعطوني الورقه الزرقاء شهرين و8 ايام .. الله يسهل ان شاءالله ويعطيك الف عافيه
    7 "
ADs

قم بتسجيل دخولك للمنتدي او

الانضمام لمبتعث

Search Engine Optimization by vBSEO ©2011, Crawlability, Inc.