ماهي فترة الإنتظار للتقديم لطلب الفيزا مره أخرى بعد الرفض؟؟

August 4th, 2009, 05:22 PM

السلام عليكم .. وش أخباركم أن شاء الله مبسوطين .. أنا شفت كم موضوع بالمنتدى بخصوص إعادة التقديم لطلب التأشيرة بعد الرفض .. الغريب أن فيه ناس قالوا لهم السفارة تعالوا قدموا بعد سنة وفيه ناس قالوا لهم بعد ستة أشهر وفيه ختموا على جوازاتهم وناس لا .. نبي نعرف وش الطريقة بالضبط .. أنا قدمت لطلب الفيزا . وسويت المقابلة بالسفارة وقالوا لي أنت جلست سنتين عاطل .. ما أقدر أعطيك الفيزا لين تقنعني أنك طالب جدي حاولت أقنع اللي سوت معي المقابلة بس ما قدرت .. قلت لها أني حاولت أدرس وما قدرت مافيه ولاقسم قبلني بالجامعة .. قالت هات أثبات أنك قدمت بالجامعة .. وعطتني الورقة الصفراء مع الجواز وقالت ارسل الجواز مع الأثبات..رحت الجامعة ما رضوا يعطوني وأنا فعلا قدمت عندهم كذا مره .. مالكم بالطويلة كتبت ورقة وجبت شروط القبول والتسجيل وترجمتها وبينت أن ولا قسم يرضى يدخلني أدرس عشان نسبتي نازلة .. وارسلتهم مع الجواز من كم يوم .. اليوم الظهر أتصل علي موظف من السفارة .. وقالي تم رفض فيزتك .. ومن دون ما أسالة قال بس أنت تقدر تقدم مره ثانية .. قلت أنا وش سبب الرفض قال ما أدري على حسب الشخص اللي قابل معك.؟ قلت أنا أبي أقدم بس ماعندي أستعداد أنتظر ثلاث شهور ثانية .. قال لا قدم وأطلب موعد طارىء وفيه ناس يسوون كذا ما يمر أسبوعين الا جايين يسوون المقابلة مره ثانية .. المهم قلت شكرا لك وقفلت ..يعني هذا ما قالي قدم بعد ست شهور ولا سنة؟ الغريب بالموضوع أني بديت أشك أن السالفة ربحية .. يعني أنا أوراقي هي هي ما راح تتغير ليش أقدم مره ثاني وأسدد رسوم السيفيس 200 دولار ؟؟ ويمكن تنرفض مره ثاني .. والله أني ما أرتحت للشغلة المفروض يكون كل شي واضح خلاص رفض يعني رفض قبول يعني قبول وش اللخبطة هذي ناس مقدمين خمس وست مرات ويقبلونهم طيب ليش ما أنقبل من البداية .. وين النظام اللي يتكلمون عنه ؟ مافيه أي نظام بالسفارة الأمريكية كلها ماشية بالبركة .. ليش نعامل كأننا همج على حسب مزاج الموظف يعطيك الفيزا ولا ما يعطيك .. والله أنها مهزلة يا جماعة ..

• نشر عبر تويتر
• نشر عبر فيسبوك
• نشر عبر جوجل