قبل موعدي عندي استفسارات تعالوا فيدوني فيها؟؟؟؟؟

وعليكم السلام ورحمة الله وبركاته
هلا وسهلا

شوف يا ياغالي , ترى الموضوع سهل جداً جداً
لاتعتقد إن فيه خطوره أو خوف على طلبك في الحصول على التأشيره

أنا من سكان مدينة جده , وحجزت موعد في الظهران يوم الأحد 4 أكتوبر
ورحت ودخلت وماجاني سؤال ليه إخترت الظهران وتركت قنصلية جده

أنصحك إنك تجي بدري بدري , يعني قبل موعدك بنصف ساعه
حتى لاتتأخر , وحتى تخذ رقم بدري تخلص فيه معامتلك بشطل سريع

طبعاً أول ماتجي , راح تتفش انت وعيالك قبل الدخول للسفاره , والتفتيش هو شخصي
يعني مع رجل الامن جهاز كهربائي يمرره على جسمك حتى يطمئن ان مافيه شيء ..
بهالحاله .. أنصحك إن تجيب أوراقك في يدك , يعني بدون شنطه حتى !

لأن هالشيء راح يأخرك ويقولك أرجع من جديد بدون احضار الشنطه
حتى مفتاح السياره خله مع أم العيال لانها ما راح تتفتش
فـ أي شيء فيه حديد لاتخليه معاك ,, أو بشكل عام اي شيء ماتحتاجه خله في السياره

اذا عديت من نقطة التفتيش .. راح تروح لمكتب عند البوابه الداخليه
وحده سودانيه , تقولك هات جوازك حتى تتأكد من تاريخ مقابلتك وموعدك
راح تسمح لك بالدخول , اذا دخلت .. برضو راح تتفتش تفتيش ثاني لكن عبر حديده دائريه
مثل اللي موجوده في السوبرماركات , في هذا الوقت راح ياخذون منك كل البطاقات اللي معاك

حتى بطاقة الاحوال والبنك ومفاتيح السياره راح ياخذونها منك , ويعطونك رقم
بحيث إنك اذا رجعت , تعطيهم الرقم هذا وتاخذ اغراضك اللي خليتها عندهم

الخطوه اللي بعدها هو دخولك لمكتب المواعيد .. اول ماتدخل راح تاخذ رقم
فيه سودانيه واقفه عند الباب , تقولك خذ رقم واجلس على الكرسي وانت والمدام والعيال

طبعاً غنت بهالحاله تنتظر رقم يظهر في الشاشه ,, اذا ظهر
راح تروح لشباك رقم واحد .. عند وحده لبنانيه .. تشيك على اوراقك
ونوع فيزتك وكذا .. اذا كانت أوراقك سليمه , راح تقولك احتفظ بالرقم وارجع اجلس

الخطوه التاليه هي التبصيم .. راح يظهر رقمك من جديد في الشاشه أو ينادون عليه
انت تروح مع المدام والعيال .. تبصمون عند شباك رقم 4 .. فيه واحد مصري واقف عنده
برضو يقولك روح أجلس وانتظر لين نناديك وتقابل القنصل ..

اذا جاء القنصل .. راح ينادون عليك برقمك ,, وتروح له
وراح يسألك أسئله من الأبليكيشن أو الإستماره اللي عبيتها

وين راح تدرس , وش التخصص , وش اسم الجامعه
قد سافرت قبل كذا , وش الدول اللي سافرتها .. كم جلست في هذه الدول

أسئله روتينيه عاديه تقدر تجاوب عليها بكل سهوله ,, بس أهم شيء خليك واثق من كلامك ونبرة صوتك
عاد اذا خلصت المقابله وإجتزتها ,, راح يعطيك كرت صغير للفديكس يقولك روح سدد
مكتب الفيديكس .. تلقاه في الركن أول ماتخش مكتب المواعيد هذا تلقاه قدامك بجوار دورة المياه أكرم الله القارئين

اعطيه رسوم الارسال وهي 125 ريال حتى ترسل لك على جده , طبعاً مدري اذا كان الرسوم هذي شامله لك ولعائلتك الكريمه أو لوحدك فقط , لأني أنا سددت بهالمبلغ لطلبي انا فقط : )

- موضوع الأولاد .. لازم تضيفهم في موعدك وتكتب عنهم كذلك في الاستماره , يعني اسماءهم واعمارهم وكذا
لأنهم راح يبصمون معاك إنت والمدام

- وقت التبصيم والمقابله مع القنصل , راح يطلبون من المدام كشف الوجه , لأني سبق وإن لمحت هالشيء
لكن كنت اغض الطرف ولله الحمد : )

- المكان بااااارد جداً جداً جداً , انا بوقت إنتظاري كنت انتفض من البرد الصارخ , عليهم مكيفات ول عليها بس : )

- ممكن تاخذ من دخولك للسفاره الى خروجك منها ثلاث ساعات أو أكثر , فـ أنصحك بكثرة الدعاء والإستغفار بوقت الإنتظار ,, لعل هالشيء يساعدك في الحصول على التأشيره : )

بالتوفيق يابطل ,, وأسأل المولى عزوجل ان يكتب لك التأشيره والسفر الى أمريكا
وأي إستفسار أو سؤال , انا موجود بالخدمه .. حاضرين للطيبين