اليوم 27 اكتوبر موعدي في السفارة ، وهذا ما حصل معي *

October 27th, 2009, 01:11 PM

بسم الله الرحمن الرحيم


مساكم الله بالخير والنور والسرور << مافيه تجانس

كيفكم .. ان شاء الله بخير ..

اليوم احب اكتبلكم وش صار معي من إلى ، عشان فيه بعض الفوائد بتفيدكم لها ..


كان يا مكان .. في قريب العصر والاوان <<

المهم .. انا قدمت على معهد لغة عن طريق مكتب للخدمات التعليمية .. عشان ناوي اكمل ماستر في الحاسب باذن الله

وكنت حاجز من زمان على هذا الموعد الثلاثاء 27 اكتوبر .. قرب الموعد .. كلمت المكتب يوم الثلاثاء اللي راح ودفعتلهم الفلوس ..
قالي ان شاء الله السبت الاحد يكون عندك الآي توني .. جاء الاحد ما وصله الآي توني .. كلمته الاثنين (امس) قلتله ترى موعدي بكرة .. يعني ضروري يكون عندي الآي توني .. كيف بترسله .. متى بيوصل؟ وش الحل؟

قال راعي المكتب :تكفيك صورة الآي توني في السفارة ويمكن يطلبون منك انك ترسل لهم الآي توني الاصلي اذا وصل لك .. قلت أكيييد؟ .. قال أكيد و اعرف واحد بعد راح للموعد بدون الآي توني ولا الصور حتى وقبلوه .. فالحين برسل لك صورة الآي توني وصورة القبول .. وارسلهم وطبعتهم ..

هذا الكلام كله ليلة الموعد (يعني بكرة الموعد للي ما يعرف عربي ) ..

صليت العشاء .. وقلت يالله بسم الله ببدأ اجهز الاوراق والخرابيط كللللها ..

اولا : لازم أتصور صورة 5 في 5 ، والخلفية بيضاء ، وبدون شماغ ، والصورة بدون معالجة الكترونية . رحت وخلصتها

ثانيا : لازم ادفع السيفيس 200 دولار ، ورسوم السفارة 500 ريال عن طريق سامبا .. دفعت السيفيس اونلاين وطبعت الايصال .

جيت ادفع سامبا ، تذكرت انه ما عندي حساب في سامبا .. طيب ، والحل؟ قالي بعض الشباب : انت متي موعدك؟ قلت : 8:30 صباحا ، قالوا : معك إلى 10 او 11 حتى ، يدخلونك عادي ، وتروح لفرع سامبا الصبح وتسدد وتجيب الايصال .

قلت : مالنا الا هالحل ، بسم الله .

ثالثا : لازم اعبي النماذج الثلاثة : 156 - 157 - 158 .. وافتح منتدى ممتاااز مرة يسمونه منتدى مبتعث
وافتح موضوع اخونا help
http://www.mbt3th.us/vb/forum16/thread547.html

وعبيتهم وطبعتهم .. واللي ما يخصني اكتب فيه NONE ، يعني مثلا الشركات اللي اشتغلت فيها مثلا ، او اسم الزوجة >> ما هو متزوج ، الله يرزقه

رابعا : تجهيز المستندات المطلوبة ، مثل : السجل الاكاديمي الاصلي ، صورة من وثيقة التخرج ، صورة الجواز ، صورة الآي توني ، صورة الضمان المالي او الشهادة البنكية .

حطيت كل هذي في ملف ، ويوم قمت الصبح رحت لحي السفارات ودخلته ، ورحت للسفارة الامريكية ، ووقفت السيارة ..
نزلت وسألت حارس امن قلتله وين السفارة؟ قال شفها يمين ، ووين سامبا ؟ قال شفه قدام .. انت بتطلع فيزا دراسة؟ قلت ايه .. قال نصيحة روح للسفارة اول شي حتي لو ما دفعت رسوم السفارة ، عشان تاخذ رقم بعدين روح لسامبا وادفعلهم .. يصير لمّا تجي تلقى عندك رقم قريب .. قلتله جزاك الله خير ، فائدة حلوة ..

كنت من الصبح وانا شايل هم وخايف ما اقبل .. لكن من دخلت لحي السفارات .. سبحان الله راح الخوف وجاء بدالة طمأنينة عااااالية الحمد لله

رحت للسفارة ، وفيه شباك يتأكد فيه الموظف من ان اسمك مسجل في لستة الاسامي ولازم يكون عندك ورقة مطبوعة تثبت ان لديك موعد اليوم ، ولّا يردونك .

جيت للموظف - سوداني - قالي عندك ورقة موعد ؟ قلت ايه هذي . قال سددت في سامبا ؟ قلت لا.. قال لازم تسدد .. قلت قالي واحد انك تاخذ رقم بعدين تسدد .. قال :لا ، لازم تسدد وتعال ادخل علطول ..

قلت في نفسي : يا شين الفتوى بغير علم D: ..

المهم رحت لمكتب جنب السفارة يسدد اونلاين بعمولة 50 ريال ، اعطيته 550 ريال وطبعلي الايصال ..

رجعت للسوداني ودخلني علطول .. جيت عند التفتيش .. قالوا: طلع كل شي الكتروني معك ،جوال ريموت سيارة .. الخ

اعطيتهم اغراضي واعطوني رقم عشان ارجع اخذبه اغراضي اذا خلصت ..

دخلت للسفارة .. لقيت عاالم .. اخذت رقم 149 يوم طبعته كانت الساعة 10:24 صباحا ..

دخلت في اماكن الجلوس قدام الكاونترات .. يمكن ثلث نص ساعة وجاء رقمي .. قابلتني وحدة .. اخذت مني الاوراق عشان تشوف هي كاملة ولا لا .. اخذتها وقالت لي خلاص ارجع مكانك وراح ننادي عليك مرة ثانية بنفس رقمك ..

رجعت .. وفعلا يمكن خمس او عشر دقايق ونادوا رقمي مرة ثانية .. عشان ياخذون البصمات للاصابع العشرة كلها ..

وقال الموظف شكرا .. ارجع مرة ثانية وبننادي عليك بنفس رقمك عشان المقابلة ..

خمس او عشر دقايق نادوا علي .. اللي في الكاونتر الحين امريكي .. قالي : خذ التلفون وكلمني .. اخذته .. قال: تتكلم انجليزي؟ قلت : ايه .. قال : قوود

طيب انت رايح امريكا ليش؟ قلت : رايح عشان اكمل ماستر في علوم الحاسب .. قال : راائع! انت درست علوم حاسب هنا في السعودية؟ قلت ايه درست في كلية علوم الحاسب قسم نظم معلومات .. قال : من بيتكفل بدراستك؟ قلت انا باذن الله .. قال : تمام ..

المهم قعد يطقطق عالكمبيوتر حقه .. ثم قال : فيزتك مقبولة .. روح لفيديكس هذا اللي قدامك وادفعله الرسوم .. وبتوصللك الفيزا في اسبوعين ..

قلت : دراستي بتبدأ في 16 نوفمبر .. قالي " ذات وِل بي فاين" يعني ما عليك امورك بتكون تمام ..

شكرته .. ورحت لفيديكس واعطيته البطاقة الصفراء اللي اعطاني الامريكي وسجلت بياناتي .. وقالي خلاص بيتصلون عليك اول ما تخلص ويعطونك في الفرع اللي قريب منك ..

طلعت الساعة 12:05 .. يعني ساعة ونص تقريبا اخذت معي الشغلة..



فالحمدلله .. هذا ما جرى لي .. وهذا كله بفضل الله اولا .. ثم بفضل هذا المنتدي العملاق ، الحبيب الى قلوبنا ..

تشكوراااات ..

• نشر عبر تويتر
• نشر عبر فيسبوك
• نشر عبر جوجل