شرح مقابلتي يوم الثلاثاء الموافق 18 may

May 19th, 2010, 12:52 AM

بسم الله الرحمن الرحيم

طبعا كانت مقابلتي في السفارة الامريكية بالرياض الساعه الثامنه صباحا

حركت من البيت على الساعه 6 الصباح ادري بعض الناس بيقولون بدري بس لاني طالع من الخرج وانتم تعرفون زحمة الرياض وصلت حي السفارات الساعه 7.15 وانا عند التفتيش اللي اول ماتدخل الحي وكانت ياكثر السيارات عاد اذا قربت منهم على طول اربط حزام الامان وافتح الشنطه عشان التفتيش بعدها تطلع على طول للسفارة الامريكية طبعا اول وثاني دوار اتركهم ويجيك ثالث دوار خذ يمين تمشي سيدا بيجيك دوار تلقى مكتوب لوحة الامم المتحده على طول سيده للمواقف خذ لك موقف للسيارتك وانزل على طول توجه للسفارة طبعا عند الباب تلقى زحمة ماعليك منهم مهما كانت الزحمة لانهم بينادون اللي موعده 7.30 وبعدين يقول اللي موعده 8 طبعا بما ان موعدي الساعه 8 رحت له عطيته اسمي عشان يتأكد إن لك موعد عندهم بعد ما يتأكد يقول لك اذا معك شي نزله مثل الجوال والمحفظه <<== نزلها بس لا تنسى فلوس فيدكس ولا تنسى بعد مفتاح السيارة اذا به ريموت نزله عندهم عاد يحطون كل اغراضك بكيس ويعطونك رقم عشان اذا طلعت تاخذه بعدها تنتظر عند الباب يفتحلك الباب واحد هندي معه عصى كفانا اللي شره تقول بيهاوش بعد ما تدخل الان انت في منطقة التفتيش نزل الله يكرمكم الجزمه والساعه والقلم بيحطونها بجهاز التفتيش وانت رح للجهاز الثاني عاد انا الحمد لله على طول مريت من عند الجهاز بدون لا يطلع صووت بعد ما تخلص التفتيش على طول خذ اغراضك والبسها برى لان فيه وحده الظاهر مصريه ولا مدري وش جنسيتها المهم بعد ما تطلع من الباب تلقى واحد ماسك له رشاش الظاهر انه حاطينه تمثال لانه مشالله عليه ما يلتفت ولا يسوي شي ماعليك من العسكري هذا على طول روح تلقى بوابه قدامك اول ما تدخل من عندها تقابل واحد هندي يعطيك رقم انتبه لا ترمي هالرقم لانه بيكون رقمك لين تطلع من السفارة انا كان رقمي 17 انتظرت لين جاء دوري عند شباك رقم 1<<== تدقيق اوراق وليس المقابلة
رحت للشباك رقم 1 قال عطني الجوال والاي توني وايصال سامبا ورقة اللي فيها صورتك حقت السفارة بعد ما تعطيه تنتظر عنده لين يقول لك يالله الان بصم تبدأ باليد اليسرى ثم اليد اليمنى ثم الابهام

بعدها يقول لك رح للصالة الثانية رحت هناك كان فيه ناس تقدر تقول عليهم كثاار طبعا حاطين شاشه مشغلين على وانتم بكرامه قناة الحيوانات مدري وش يحسون فيه ذولا يفرجونا عليها المهم تنتظر ومعك رقمك الاول اذا نادوا رقمك فيه واحد بناني الظاهر مدري سوري يوجه يقول لك تروح لاي شباك طبعا انا رحت شباك رقم 9 كان واحد امركي شباب
اول ماقربت له وانا اطق له ذيك الابتسامه اللي ذوبته <<== اقول بدينا نصب
المهم تعطيه الاوراق اللي مربوطه بمغااط ويطقطق بالكمبيوتر اللي عنده بعدها يقول ممكن تلبس السماعه ودار بيننا الكلام التالي
الامريكي / اي ولاية ستدرس ؟
انا / ولا ية تكساس
الامريكي / ماهي المرحله اللتي سوف تدرسها ؟
انا / لغة ثم ماجستير
الامريكي / ماهو التخصص ؟
انا / الرياضيات
الامريكي / ومن الذي سيدفع تكاليف الدراسة .؟
انا / طبعا على حسابي الخاص قلت لك الوالد الله يطول بعمره هو المتكفل بدراستي
الامريكي / ماهي وظيفة والدك وفي اي قطاع ؟
انا / الوظيفة مهندس القطاع وزارة الدفاع والطيران
الامريكي / ممكن انظر لكشف الحساب ؟
انا / تفضل طبعا جايب لك كشف حسابي وشهادة بنكية
الامريكي / ماهي الدول اللي زرتها خلال الخمس سنوات الاخيره ؟
انا / ماطلعت من السعودية أبدا ابدا
الامريكي / اذن الفيزا مقببولة اذهب الان سدد فيدكس وستصلك الفيزا خلال ثلاث اسابيع
بعدها على طول روح فيدكس وسدد طبعا اللي من الرياض يسدد 65 واللي مو من الرياض يسدد 125
عاد اذا خلصت من فيدكس اطلع على طول من الباب اللي دخلت معه تلقى العسكري اللي ماسك رشاش ماتحرك فيه لوحه مكتوب عليها Exit يعني خروح تطع مع باب دائري وترروح للشباك اللي برى تعطيه رقم لونه احمر يعطيك اغراضك وبكذا تكون خلصت امور الفيزا

اتمنى ان الشرح يكون كافي واذا قصرت فاعذروني

• نشر عبر تويتر
• نشر عبر فيسبوك
• نشر عبر جوجل