LinkBack URL
About LinkBacks
اخوي Traveler مبروك عليك السفر القريب ان شاء الله
وسبحان الله كل واحد صار له شي عجيب غريب بهالبعثه
انا صارت لي اشياء عجيبه غريبه وناويه ان شاء الله انزلها بموضوع بس بعد ما اوصل بالسلامه عشان اضمن الروحه
وسالفة عدم حضورك للمقابله غريبه .. وهذا يدل ان في تلاعب ومحد داري عن الدنيا
وسبحان الله كل واحد صار له شي عجيب غريب بهالبعثه
انا صارت لي اشياء عجيبه غريبه وناويه ان شاء الله انزلها بموضوع بس بعد ما اوصل بالسلامه عشان اضمن الروحه
وسالفة عدم حضورك للمقابله غريبه .. وهذا يدل ان في تلاعب ومحد داري عن الدنيا
May 27th, 2007, 12:10 AM
الساده أعضاء ومشرفي هذا المنتدى الراقي بعد التحية ... .. .في البداية أقدم أعتذاري عن إنقاطاعي عن المنتدى بسبب ظروف سفري لدولة عربية عموماً كما وعدتكم في موضوع سابق بإن أحكي لكم قصة بعثتي منذ أول يوم سمعت عن البعثة إلى هذه اللحظة .
في يوم : 08 / 06 / 1427 هـ والموافق : 04 / 07 / 2006 م كنت قاعد عند واحد من خوياي في المكتب وكنت طفشان وقاعد ادخن في مكتبه واسولف انا وياه المهم قال لي : ماقدمت على البعثات الي في الوزارة ؟ قلت اي بعثات ؟ قال وزارة التعليم العالي عندها بعثات قدم ملفك وشف وش يقولون لك يمكن تتيسر معك وتروح تدرس برى وتجيب شهادة وهذي أفضل لك من هالدوام الي يجيب الضغط وبترجع لك اقل شي بلغة من برى . سألته وشلون التقديم ؟ قال عن طريق موقع الوزارة . قلت بقدم اليوم واشوف وش يصير وماني خسران شي . المهم رحت البيت ونمت إلى العشاء وصحيت وهاتك يادخان وياشاهي ويانت حتى موقع الوزارة ما اعرفه بس اخذته من قوقل المهم دخلت على صفحة التقديم وقريت الشروط لقيت ولا شرط منهم ينطبق علي !!! أولاً موظف ومن شروطهم ماتكون موظف لا في قطاع عام ولا خاص . ثانياً تجاوزت 5 سنوات على حصولي على الشهادة ( دبلوم ) وشرطهم 4 سنوات او اقل .....
المهم قلت بقدم واشوف ولا ني خسران شي بديت اعبي البيانات الي في النموذج وخذلك أخطاء .. اول خطأ الإسم كتبته غلط غير الي في الجواز وثاني غلط المعدل كاتبه غلط وثالث غلط سنة التخرج كتبتها غلط ويعلم الله اني ماكنت اقصد الغلط بس ماكنت حافظ البيانات صح . المهم عبيت النموذج واخذت الرقم السري والباسورد طبعاً ارسلوها على ايميلي . فتحت الموقع اليوم الثاني ولقيت مكتوب : تم إستلام طلبك وجاري مراجعته . قلت لخويي عن الي صار وقال انتظر وشف ما انت خسران شي راحت ايام وجت ايام وفتحت الموقع ولقيت مكتوب فيه : تم الترشيح مبدئياً وكان هذا بتاريخ : 06 / 08 / 1427 هـ الموافق : 30 / 08 / 2006 م بعدها بكم يوم جتني رسالة على الجوال عن موعد المقابلة في فندق الفهد كراون وقبل المقابلة قلت لأبوي عن تقديمي للبعثة وعن موعد المقابلة وابي رأيه في الموضوع قالي : ما انصحك فيها أبداً بتضيع وظيفتك وغربة ومن هالكلام يعني حطمني اقتنعت بكلامه وقلت خلاص بكنسل البعثة ولارحت المقابلة ولا رحت المقابلة ولا رحت المقابلة ولا ادري وش صار فيها . ونسيت موضوع البعثة تماماً وحتى ايميلي انسرق ولا ادري وش الرسائل الي جت من الوزارة على الايميل وقلن خلاص بلاش بعثة وبلاش كلام فاضي . راحت ايام وجت ايام وصحيت الصباح بروح الدوام والقى في جوالي كذا رسالة المهم فيها رسالتين وحده من خويتـ .... والثانية من الوزارة والرسالة تقول : تهنئك وزارة التعليم العالي بالقبول في البعثة !!! ياناس وش الي صار البعثة ونسيتها والمقابلة ولا رحت لها والشروط ولا واحد ينطبق علي وشلون انقبلت ما ادري دخلت على موقع الوزارة ولقيت مكتوب : تم القبول في البعثة وكان ذلك بتاريخ : 28 / 12 / 1427 هـ الموافق : 18 / 01 / 2007 م . بعد كذا جلست افكر وشلون الأقدار والحظ صارت معي ويمكن فيها خيرة لي اني اطلع وادرس برى ، كلمت ابوي وتفاجأ وغير نظرته وقال خلاص كمل امورك والله يوفقك . بعدها جتني رسايل على الجوال اني اراجع الوزارة علشان اسلمهم الاوراق المطلوبة ولقيت من ضمن الأوراق السجل الأكاديمي مترجم للغة الأنجليزية وكان موعد التسليم يوم الثلاثاء وماكان عندي سجل اكاديمي مترجم رحت لمكتب ترجمة عشان اترجمه وكان هالكلام يوم الاثنين قالوا لي مايخلص الا يوم الخميس شفتوا النكبة وشلون قلت خلاص مو مشكلة يوم الخميس وبروح الوزراة يوم السبت بدال الثلاثاء وبقول لهم كنت مسافر برى وتوني جيت . اخذت السجل المترجم يوم الخميس وكملت الاوراق ورحت يوم السبت الصباح للكلية التقنية عشان اصدق السجل قالوا هذا مانعترف فيه حنا نعطيك سجل جديد باللغة العربية وباللغة الانجليزية ومصدق من الكلية .شفتوا الحظ وشلون بعد مافاتني الموعد لقيت الحل المهم اخذت السجل المترجم ورحت للوزارة يوم السبت ولا سألوا ليش تأخرت عن موعدك وكان هذا الحمد لله من حظي . وفعلاً بدت الأمور تاخذ طابع الجدية معي وكملت الاوراق المطلوبة وعبيت النماذج الي كانوا طالبينها وقالوا انتظر حتى نجيب لك قبول قلت اوكي صرت ادخل على الموقع حق الوزارة بين كل فترة وفترة لين لقيت مكتوب : تم إصدار الضمان المالي وكان ذلك بتاريخ : 21 / 01 / 1428 هـ الموافق : 09 / 02 / 2007 م جلست انتظر وش بيصير وفي خلال هالمدة لين جتني 5 رسائل على الجوال بخصوص موعد الملتقى وقسماً بالله ولا وحده فيهم نفس الموعد كل رسالة بموعد رحت الوزارة وشافوا الرسائل وطلبوا رقم الطلب وعطوني الموعد الصحيح .
رحنا الملتقى ومثل ماشفتوا وشلون كان وكنت اطلع من دوامي وقتها الساعة 3 العصر واروح الفندق الى الساعه 8 بالليل يعني تخيلوا من 8 الصباح اطلع من البيت للدوام ولا ارجع الا الساعة 8 ونص في الليل حضرنا الملتقى معاكم وكنا نتنتظر القبول يوصل ولا كنت ادري وش اسوي ولا طريقة السفارة ولا الفيزا ولا الموعد ولا شي لين قال الدكتور نبيل الراجح في اخر محاضرة تاخذون موعد من السفارة وتنتظرون القبول . ماكنت اعرف وشلون اخذ موعد لاني ما اعرف موقع السفارة ولا الطريقة ودخلت النت عشان اشوف الموضوع وشلون وكتبت في قوقل ( موعد في السفارة الامريكية ) وطلع لي عدة مواضيع وكان اول موضوع هو الموضوع الي في منتدى مبتعث دخلت وشفت الخطوات وسجلت موعد وكان في 08 / 04 / 2007 م وبالمناسبة هنا كانت انطلاقتي من خلال مبتعث وقبلها والله ماكنت اعرف هالمنتدى . سجلت موعد وكنت انتظر الين جاني الموعد ورحت المقابلة وبالمناسبة البنت الي سوت معي المقابلة في الشباك رقم ( 8 ) نحيفة وطويلة وتلبس نظارات وحليوة تراهي نائبة القنصل ولا عرفت الا بعدين المهم تذكرون وش صار في مقابلتي وقلتها لكم بالتفصيل في موضوع سابق بعنوان Traveler في السفارة الامريكية والموووووووت . انتهى الموعد وجلست انتظر القبول ورحت للوزارة في يوم من الايام وقالوا قبولك المبدئي في جامعة ميامي دخلت النت ابحث عن الجامعة واشوف لقيتها في ولاية فلوريدا تضايقت لان فلوريدا سياحية واسبانية اكثر من انها تكون دراسية وامريكية وفي خلال هالمدة الي انتظر فيها لقيت جامعة ثانية اسمها جامعة ميامي ولكن في ولاية اوهايو مدينة اكسفورد وتعرفون وش الفرق بين الجامعتين ؟ الي في ميامي اسمها : University of Miami والي في اوهايو اسمها : Miami University فرحت انها في اوهايو لانها رخيصة وحلوة وكلها امريكان . بعد فترة رحت الوزارة اشوف القبول لقيته وصل بس الغريب انه ماجاني رسالة قالوا لي تعال الساعه 5 واستلمه لقيت الي وصل قبول الجامعة فقط والجامعة هي : Northeastern University في مدينة بوسطن بولاية ماساتشوسيتس وبوسطن تعتبر اغلى مدينة في العالم !!! قبلت الموضوع على مضض وكنت انتظر وصول I-20 وصل بعد كم يوم مع قبول المعهد والمعهد هو : kaplan في نيويورك يعني ما افتكينا من بوسطن الا وجتنا نيويورك وفي منهاتن بعد الله من الدمار والحظ الشين ..
رحت السفارة اعطيهم القبول وكان يوم الأحد وقالوا لي بعد 3 ايام تجي تستلم الفيزا رحت يوم الاربعاء واخذت الفيزا ويوم السبت رحت الوزارة عشان قرار الإبتعاث سلمته للموظف الي مايتكلم الا من طرف خشمه ( بدون ذكر اسم ) في مكتب استلام قرارات الابتعاث . قالي بعد اسبوع تجي تستلم القرار يعني يوم السبت الجاي قلت اوكي بالرغم ان فيه ناس يستلمونه في نفس اليوم . المهم رحت السبت عشان القرار قال اوراقك ناقصة وعليك ملاحظات !!! وشهي الأوراق قال ماجبت المؤهل الدراسي والسجل الأكاديمي قلت بسيطه اروح اجيبه لك من البيت . طيب وشهي الملاحظات قال ماحضرت المقابلة الي في الفهد كراون ( تذكرون قلت لكم مارحت المقابلة ولا دريت عنها ) قلت له طيب وش الحل ؟ قال جب اوراقك الناقصة والباقي على الله يمكن الموضوع يكون سلبي ويمكن يكون ايجابي . رحت جبت له الاوراق وقالي يوم السبت الجاي تجي وتشوف وش صار في موضوعك يعني صارت اسبوعين قلت اوكي . في نفس الليلة دخلت على الموقع اشوف وش فيه لقيت مكتوب : التحقق من القبول وكان ذلك بتاريخ : 25 / 04 / 1428 هـ الموافق : 12 / 05 / 2007 م . جلست انتظر ويوم الجمعة دخلت الموقع وكان مكتوب فيه : تم طباعة قرار الإبتعاث وكان ذلك بتاريخ : 28 / 04 / 1428 هـ الموفق : 15 / 05 / 2007 م . رحت واخذت القرار وامر الإركاب وسويت الحجز وقصيت التذاكر وموعد السفر انشاء الله يوم الأربعاء القادم بتاريخ : 30 / 05 / 2007 م الرياض واشنطن دايركت الساعه 8 ونص الصباح وبقعد في واشنطن يوم الأربعاء والخميس والجمعة الساعه 6 ونص الرحلة من واشنطن الى نيويورك .
وهذي قصة البعثة بكل مافيها . ولكم هذه البيانات ولمن لديه اي استفسار انا حاظر .
الإسم : عبدالله القرني
المدينة : الرياض
الجوال : 0556338805
الإيميل : asa150015@hotmail.com
المعهد : كابلن في نيويورك - منهاتن // kaplan - new york , manhattan
تاريخ بداية الدراسة : 18 / 06 / 2007 م
مدة الدراسة : 13 شهر
الجامعة : Northeastern University
الولاية : ماساتشوسيتس // Massachusetts
المدينة : بوسطن // Boston
التخصص : علوم حاسب آلي // computer since
وقبل الختام اوجه شكري إلى كل من :
1 - الله عز وجل على توفيقه لي وتسهيله اموري .
2 - عبدالعزيز البيشي - من دلني على البعثة واخبرني بها خويي الي في الدوام .
3 - والدي الذي شجعني على البعثة بعد رسالة الوزراة بقبولي في البعثة .
4 - منتدى مبتعث ولولا والله ثم هذا المنتدى لما تحركت خطوة واحدة .
5 - كلللللللل افراد هذا المنتدى والذي استفدت منهم جميعاً واخص بالذكر الأخت مسافره .
6 - السيد اشواق رجل هندي في مكتب الطيار للسفر والسياحة .
دمتم بكل الحب والود واسأل الله العلي العظيم التوفيق لكم جميعاً .