موعدي السبت 18 sep واستلمت الجواز اليوم 22 sep

September 19th, 2010, 04:22 AM

السلام عليكم ورحمة الله وبركاته

من الحين اقول لكم منيب جالس اسوي مقدمات وخنبقه اهم شي الزبده عشان افيدكم وكذا واخذ راحتي بالحكي هههههههههههه
شوفو ياطويلين العمر اول ماجاني قبول معهد اللي هو الاي تونتي حجزت على السفاره وكان موعدي برمضان حلوين ؟
رمضان والساعه ثمان الصبح ماش ماخارجني :d خصوصا ان الشمس حارقه :d وسمعت ان فيه سرا في الشمس والواحد صايم صعبه والا ؟ هههههههههههه :d
رحت المكتب باجل الموعد فطلب مني اوراق في البيت وتعيجزت ارجع اجيبها قلت له طيب لو سحبت عليهم مارحت وش بيسوون ؟؟ قال ابد تدفع 45 جديده وسحبت عليهم بصراحه :$ هههههههه
وحجزت موعد من جديد اللي هو امس السبت حلوين ؟ وكان سبع ونص الصبح ونصييييحه اللي بيحجز يحجز هالوقت لسبب انك بتصف سرا في وقت الشمس باارده مايمديها تحتر الا انت جوا المبنى

اليوووم الصبح وماادركم ماليوم الصبح .. طبعا بيتنا فاضي مافيه احد فخفت انوم وتروح علي نومه قلت بسهر مع الشباب
واسري متاخر يعني اضيع وقت مدري شايل هم الموعد جالس معهم متقروش مانبسطت ولاشعوريا قمت الساعه ثنتين رحت البيت اطقطق عالنت واناظر الساعه ثنتين ونص !! وتصدقون لي شهرين منيب انوم قبل ست الصبح لكن مدري جاني جني مدري عباطه شي زي كذا مسكت معي
الا انوم شوي ههههههه واناظر يحووول الساعه ثنتين وش السوات والله وادق عالوالده تصحيني الساعه خمس
وابي انوم مغير اتقلب تقلب عجزت انوم كل ماغفيت قمت احسب الوقت فاتني المهم شوي خرب المكيف
طبعا هو مهوب خرب عباطه بالعكس متكاتف معي ان وراي موعد لاني رجعت من السفاره ولقيته مشتغل هههههههه
جت الساعه 6 ودقت ساعة سندريلا اللي هي ساعتي :$ قمت وتروشت واتجهت لحي السفارات

من هنا الموضوع الاصلي الباقي فضفضه خخخخخخخخخ

طبعا خلوني اقول لكم وش الاوراق اللي تجهزونها ونصيحه حطو ملف وحطو هالطلبات فيه وعشان ماتنسنون اكتبها
في ورقه وحطو الورقه في الملف وكل ماحطيت ورقه حط جنبها صح انه موجوده بالملف عشان ماتنسى

1- صفحة التاكيد عدد 2 (ملزم)
2- صورة الاي تونتي (ملزم)
3-ايصال سامبا 532 ريال حق التاشيره (ملزم)
4- ايصال السيفس (ملزم)
5- عدد 2 صورة شخصيه خمسه في خمسه خلفية بيضاء مكشوف الراس (ملزم)
6- جواز السفر ساري المفعول + جوازاتك القديمه (ملزم)
7- سجل اكاديمي (احتياط)
8-صورة وثيقة (احتياط)
9-كشف حساب المتكفل بدراستك ( ملزم)
10-شهادة بنكيه ( ملزم)
11- 65 ريال (ملزم للفيديكس) او 130 ريال لسكان خارج الرياض

* ملزم : هي الاشياء اللي طلبوها مني اما احتياط هي الاشياء اللي طلبوها من غيري من الاعضاء او الاصدقاء

-----

اول مارحت مسكت سرا كانت الساعه 6 ونص باقي ساعه على موعدي اللي هو 7 ونص

جت سبع ونص وبدأو في استقبال المتقدمين فطلبو مننا تجهيز :

صفحة التاكيد + ايصال سامبا + ورقة الموعد المتكونه من 4 ورقات

وانتم في الصف بعد ماتجهزون الاوراق تجون عند شباك تعطيه الثلاث طلبات هذي عشان يتاكدون منها وبنفس الوقت
تسلم جوالك + مفتاح السياره اذا فيه ريموت كنترول ويحطونها لك في ظرف ويسلمونه لك مع الطلبات

بعد كذا تجي تدخل البوابه لازم كل 2 يعني حتى لو كنتم قروب مايخش هالباب اكثر من ثنين
تدخلون الباب 2 تفسخون الجزم وانتم بكرامه مع الاوراق مع الظرف ويدخل في جهاز وانتم من بوابة كشف اليه مثل المطار يعني
تاخذ الموظفه الظرف اللي فيه جوالاتكم وتعطيكم ورقة فيها رقم خاص بالظرف تستلم جوالك وانت طالع من نفس المكان

----

الخطوه الثانيه تتجهون للمبنى اول ماتدخلون فيه هنود سكيروتيه بيوجهونكم ويعطونكم رقم تجلسون في الغرفه المقابله للباب ويبدون ينادون بالارقام
طبعا اذا جاء رقمك تتوجه للشباك المحدد تبصم اصابعك وتاخذ صورة من صفحة التاكيد تقصل الباركود وتلزقه عالجواز
يعني عملية ادخال بيانات في الحاسب الالي وتشيك عالاي تونتي

وانتهت الخطوه الثالثه
---------

تقول لك الموظفه اللي بالخطوه الثانيه ارجع اجلس ونناديك بنفس الرقم للمقابله حلوين ؟

تجلس لما يجي رقمك مره ثانيه تروح للشباك المحدد حلو ؟
تروح للشباك يقول لك خذ السماعه يسئلك كم سؤال الاسئله تختلف اختلاف بسيط من مقابل لمقابل انا كانت الاسئله
1- لماذا تسافر امريكا
2- اذا كانت اجابتك لدراسه يسئلك ماذا سوف تدرس
3- من هو الذي سيتكفل بالدراسه
4- يطلب منك كشف حساب المتكفل بالدراسه + الشهاده البنكيه (ماطلب مني شهاده بنكيه بس لقافه عطيته ههههه)
5- ماذا سوف تفعل بعد الدراسه في امريكا
6- ماهي الدول التي سافرت لها
7- يطلب منك جوازاتك القديمه
8- بعد توفيق الله يطلب منك تتوجه للفيديكس تدفع الرسوم طبعا تروح للفيديكس تسجل اسمك حسب الجواز وتقول لهم اقرب فرع فيديكس لك

9- تطلع لنفس البوابة اللي دخلته منها عشان تاخذ جوالاتك ومفتاح السياره

واكرر الاسئله تختلف من مقابل لمقابل والاسئله السابقه كانت موجهه لي

وبختم لكم الموضوع ب 3 مواقف صارت مع المقابل
1- اول ماقال خذ السماعه قال لي لماذا تسافر الى امريكا جلست اضحك هههههه ناقص يقول يااخ العرب لغة عربيه فصححححى هههههههههههه قلت له بكلمك انقلش وش رايك ( لاني مااضمن نفسي بثر بجلس اضحك عالفصحى حقته )

2- سئلني سؤال حسيته بيقول اقضب الباب هههههههه بس الحمدلله عدت على خير طبعا انا عندي فيزه شينقن فقال سافرت اسبانيا قلت لئ قال طيب والفيزه ! قلت انتهت قبل اروح
خفت يقول طيب ديوور عشان تعرف تطلع فيزه وماتروح هههههههههههههههههه

3- قال لي انتهينا وحطيت السماعه فكلمني بالانجلش انو خلاص توجه للفيديكس سدد رسوم الجواز فيزتك مقبوله انا ماسمعته زين قلت له ايش ؟
قال لي بالعربيه الفصحى (تأشيرتك مقبووووله ) قلت له شكرا يعني لاحرج في تاشيرتي هههههههه






تنبيه
المسأله كلها خذت من الساعه 6 وسته وثلاثين دقيقه الى الساعه 8 و ثنين واربعين دقيقه
اللي خارج المدينه اللي فيها السفاره رسوم الفيديكس ميه ومدري كم بس خذو ميه وثلاثين احتياط
خارج المدينه يعني خارج مدينة الرياض كالقصيم وشقرا والخ الخ
او خارج مدينة جده او خارج مدينة الظهران


مواضيع التجارب مع السفاره وش كثرها بالقسم بس قلت يمكن فيه تجديد اطرح لكم تجربتي عل وعسى افيدكم فيها

اي سؤال استفسار خدمه انا هوون اسئلو


سبحانك اللهم وبحمدك اشهد الا اله الا انت استغفرك واتوب اليك

• نشر عبر تويتر
• نشر عبر فيسبوك
• نشر عبر جوجل