مقابلتي بالسفاره أمس بالتفصيل الممل؟

May 24th, 2006, 08:55 AM

في البدايه.. حبيت اشكر كل اللي وقفو معاي وساندوني اول مره يوم اكتشفت ان اسمي مو موجود بالقنصليه الامريكيه بجده. ويأست الا شوي بس رحمة الله كانت واسعه هونو علي وخففو علي لدرجه اعرف كم واحد منهم قالي ..ومابي اقول اسمه ازبن مع اخوك لاتخليه.....وثانيا حبيت اشكر كل اللي دعولي بالتوفيق والله يجزاهم الف...خير..والحين نبدأ بسم الله....والله يعينكم عالتفصيل الممل:

طبعا عبيت قبلها بييوم كل الطلب وصورت الاوراق وجه وقفا حسب توصيات طويل العمر هيلب...رغم اني اكتشفت ان نص الطلبه اللي كانو موجودين اوراقهم عاديه مو وجه وقفا.وقبلوها منهم.

صحيت الساعه ست الا عشر صحيت اخوي واخذت اهلي للجامعه....وحط رجلك عالبنزين الين ياطويلين العمر وانا ماسك سرا الساعه 7 الا عشر واقول حق نفسي وناسه انا الحين ابصير الاول واخوي الثاني طلع قدامنا تقريبا 40 واحد اذا مو اكثر...صف واحد حريم ورجال.للأسف.الين ياطول العمر وصلت الشباك اللي يدققون فيه الاسماء والكشف وإيدي على قلبي قلت هنا المفترق الخطر يا يلقون اسمي يايكرشوني..واعطيها رقمي ورقم اخوي.72-72 والا تقول الزين كله وأخوه قلت يس.ونا اقول لا شعوريا يس وبعدين الحمدلله...وعشر دقايق ودخلونا..وتفتيش طال عمرك وانزع النعال تكرمون والحزام لخوي انا كنت مشخص..وامش وروح ممر وبأبتسامه عريضه يقولك عسكري امريكي سيده..شكله محفظينه هالكلمه وتفتيش ثاني..الين دخلنا وعطونا ارقام علشان يشيكون عالارقام..طاح اخوي بشباك واحد وانا بشباك 2 شباك واحد ماطلبت من اخوي اي شي..انا شباك 2 قالت اكتب اسماء اخوانك كلهم بسرعه لو سمحت..؟؟؟؟؟ (ملاحظه مالقت اسمي بالحاسب وقالت انت متأكد ان عند موعد قلت ايه،،شيكي وراح تلقين اسمي.وشيكت ولقت اسمي وعبت البيانات‘‘ هذا اللي ماخلا جده يلقون اسمي)وعبيت ووقع لو سمحت وقعت ومشت امورنا وحولونا عالكاشير و380 الله لايخسر.وعطانا رقمين.

المهم ساعه ونص اذا مو اكثر..احنا ننتظر..ويجيني طالب مطلعه عيونه شباك اثنين واعبي له النواقص (أقلد هيلب) الا ينادون اخوي:

كلمه انجليزي قال نو انقلش..قال وين بتدرس قال جامعة واشنطن بسياتل قال وش بتدرس قاله قانون قال رحت سوريا قال نعم....قاله روح بصم وارجع لي..بصم بالعشره.الوكاد..نادوني انا

المقابله كلها بالانجليزي:
وين بتدرس؟ جامعة واشنطن بسياتل.
وش بتدرس؟ Mbaماجستير إدارة اعمال.
قدر سافرت لسوريا ، العراق، ايران، اليمن. لا لا لا لا لا
وين سافرت اجل؟؟ تايلند ماليزيا دول الخليج..اندنوسيا.وماذكرت بريطانيا...نسيت ويرفع الجواز ويوريني وقال تأشيرة اي دوله هذي قلت سوري وبريطانيا..ويقعد يطبع بسرعه ..واعطيه ذيك الابتسامه واقوله Nice Typingطباعتك جيده...ابتسم وقال ثانكيو.قلت له على فكره وشلون الجو حاليا بساتل قال حلو ودرجة الحراره بداية الثلاثينات.بس ابرد من هنا...ابتسمت انا وقلت اكيييييييد.
قال مستر الزين كله عندك اي سؤال قلت له نو ثانكيو..قال كإجراء روتيني طبيعي جدا..انتظر مننا اتصال من اسبوعين إلى 3 وعطاني الورقه الصفرا الكبيره ومو مشطب على اي شي..يعني مافيها نواقص..على فكره سألته اثناء المقابله يوم يشيك على اوراقي لايكون ناسي شي..ابد..وشغلك جدا حلو.. You Did Good
وقال مو شرط انت تجيب الجواز..اي واحد ثاني...بس لازم تجيب معاك هالورقه الصفرا..
ملحوظه :لأن دراستي اصلا آخر تسعه ميلادي فمو معقول راح يعطيني التأشيره بعد اسبوع..واشوى انه نهائيا ماطلب الخطاب حق الوزاره نهائيا..هيلب تأكد ماعتقد طلب منك الخطاب.

من ملاحظاتي:
1- مايفرق نهائيا، سواء كنت لابس ثوب ولا فنكي.(.مطقم )الامر عندهم سيان (أبوتس ياللغه).
2- عب الطلب كله واذا طلب منك عنواين بـأمريكا اكتب عنوان الجامعه.يعني لاتخلي سؤال عن عنوان بأمريكا فاضي.
3-عب الفراغ اللي يطلب فيه اسم الوالدين والزوجه واكتب اسم اخوانك كلهم.
الاجراءات اسهل مما ذكروها الشباب في المنتديات وهالسوالف هذي...جدا جدا جدا..بس عبو الطلب بليز كامل..هذا مهم جدا.
4- والمسأله حبايبي مو مسألة شبابيك ولا شي..لأن الظاهر يتغيرون...لأني انا كنت بشباك.ِسته وكان حبيب معاي...وماطلب مني اي شي..لدرجه انا اقوله تبي جوازي القديم قال لأ شكرا مايحتاج.
5- الاراق المطلوبه :الايتونتي، السيفيس، الضمان المالي، جوازك، صوره 50*50 والخلفيه بيضا مكشوف الرأس وأنا زدت اوراق من نفسي توصيتين وخطاب بالراتب بالعمل..وكان معاي الجواز القديم والترانسكربت..بملف جانبي بس ماطلبهم..يعني المسأله توافيق من الله..احتمال يطلبونها واحتمال لأ..بس انت خذ احتياطاتك..والحمدلله انها جت على كذا.ويوم طلعت قالت لنا مره اردنيه اللي تفتش بشر وش صار..قلت قالولنا بعد 3 اسابيع قالت ترى طبيعي جدا ولاتحاتون..وعطوهم الين شهر.قلت براحتهم دامهم اخذو الملف وماطلبو خطاب..تعبت من الكتابه..ان شاءالله اكون وضحت اللي صار معاي وفدت الجميع وانا حاضر ياجماعة الخير لأي سؤال.

• نشر عبر تويتر
• نشر عبر فيسبوك
• نشر عبر جوجل