استلمت تأشيرتي من الظهران في اقل من 9 ايام ومدتها 5 سنوات

December 15th, 2010, 01:27 PM

الله يصبحكم/يمسيكم بالخير

انا من طلاب المرحلة السادسه درجة الدكتوراه بالهندسه

كان موعدي يوم الاحد 5 ديسمبر في قنصلية الظهران الساعه 8ونص

رحت قبل موعدي بنص ساعه واجرائات روتينيه امنيه عند المدخل ... دخلنا داخل وننتظر وناس ترتب لك اوراقك الين يجي رقمك للمقابلة ... كانوا اثنين الي يسوون المقابله ... رجال وحرمه .... قام يناديني كحيلان بن جيف ... دافر سهري دافر سهري

انا: تنحت شوي ما استوعبت اسمي لانه غريب اول مرة اسمعه

انا: اول مادرعمت عنده كبيت عليه كل اوراقي قلت خذ اللي تبي ورجع لي الباقي

هو: قام يضحك قالي شكلك تبي الفكه منها

هو: اول مره تروح امريكا ؟

انا: اي والله، والعذر والسموحه ان كان لقيت اوراق ناقصه والا شي ولا تشرهه علينا واستر ماواجهت ... اخذ السيفس والدي اس 160 والجواز وصورة منه وصورة الاي20 وايصال سامبا

هو: طالع تدرس ماستر ؟؟

انا : لا والله ياللحية الغانمه طالع دكتوراه

هو: اووو كوووول ... وايش بتدرس وليش تختار امريكا بالذات ؟؟

انا: بدرس هندسة تخطيط مدن وامريكا افضل دولة في هذا المجال

هو: اي ولاية بتروح لها ؟

انا: ولاية ميزوري في مدينة كاب جيراديو جنوب سانت لويس ب200 كم في جامعة جنوب شرق ولاية ميزوري وبسكن في مجمع لي كاب لوكس ويمكن اخذ المبنى الغربي رقم 12 شقة رقم 25

هو : يناظرني كذا o_O ..... قال والله انك حافظ حتى وين بتنام بعد ( بضحك )

هو: قد رحت مصر او سوريا ؟؟

انا: اي رحت مصر في مهمة عمل 3 ايام عام 2007 ... وطلعت بدراجتي الناريه (هارلي رحال) من الظهران الى تركيا مرورا لبنان وسوريا الي ماجلست فيها الا 4 ساعات بس وعندي (triptic) يثبت الشي هذا ... وكاي عربي لازم نمر هالدول للسياحه.

هو: اووووه فانتاستك يو هاف هارلي قوووود .... اند اتز اوكي اي نو ( يعني ادري ان اغلبكم راح سوريا ومصر)

هو: طالع على حسابك او حساب الدوله؟

انا: لا عن طريق برنامج الملك عبدالله

هو: اووووه قوووود كونكلاتيشن ( يعني او ماشاءالله مبروووووك) طبعا ماقال ماشاءالله بس لازم نسعود المحادثه

هو: اوكي يو ول ريسيف يور باسبورت وثن تو ويكس ( بتستلم جواز خلال اسبوعين) وسددت حق فدكس

ملاحظة : ما اخذ مني الصور ولا طلب مني الضمان المالي بس عشان ترتاحون


واليوم الساعه 10:30ص الموافق 15 ديسمبر جاتني رساله ع الجوال من فدكس انو تعال استلم البكج حقك .... صراحه استغرب هالسرعه خصوصا اغلب الشباب هنا يصيح ان له شهور ما اخذ جوازه خصوصا موعد دراستي متاخر يعني في مارس وما كنت خايف لو تاخرت حتى لو يناير لاني مو مستعجل عليها .... حتى وانا اروح لفدكس كنت مرتاح عادي وواثق ان الفيزا بتجي باذن الله

الخلاصه ياشباب ..... خلي املك بالله قوي ... واترك كل شي على ماهو عليه ولا تجلس تشيل هم الفيزا وتقلق وتفكر فيها .... لانها بتمشي الامور زي ماهي وماتدري الا بين يوم وليله وهي واصلتك ... وصدقني لها طعم احلى في خاطرك ............. خليك على نياتك وانا اخوك ... وكل شي بيتسهل

هامش: المحادثات فوق واقعيه بس ادخلت عليها شوي من المداعبات اللغويه المحلية، لابين لكم ان الموضوع اسهل مما تتوقعونه ... لانه والحق يقال الناس مره طيبين وطيحت معهم الميانه لدرجة تسمع ضحكهم ... اهم شي خلك صريح وواضح وواثق من نفسك

اخوكم
م.ظافر الشهري
الخبر

• نشر عبر تويتر
• نشر عبر فيسبوك
• نشر عبر جوجل