الأعضاء الإشتراك و التسجيل

الملتقيات
ADs

تقرير تفاصيل وضعي ومقابلتي بالسفارة

تقرير تفاصيل وضعي ومقابلتي بالسفارة


NOTICE

تنبيه: هذا الموضوع قديم. تم طرحه قبل 4722 يوم مضى, قد يكون هناك ردود جديدة هي من سببت رفع الموضوع!

قائمة الأعضاء الموسومين في هذا الموضوع

  1. الصورة الرمزية علامة استفهام
    علامة استفهام

    مبتعث جديد New Member

    علامة استفهام الولايات المتحدة الأمريكية

    علامة استفهام , ذكر. مبتعث جديد New Member. من السعودية , مبتعث فى الولايات المتحدة الأمريكية , تخصصى هندسة , بجامعة انتظار
    • انتظار
    • هندسة
    • ذكر
    • انتظار, انتظار
    • السعودية
    • Feb 2011
    المزيدl

    April 26th, 2011, 07:42 AM

    السلام عليكم
    أهلاً بالجميع..

    أول شي راح أقولكم ليش طرحت تجربتي؟؟!
    أولاً لأن خير الناس أنفعهم للناس مثل مايذكرنا شعار المنتدى..وأرجو الله أن ينتفع بهذا الموضوع ولو شخص واحد..
    ثانياً أن وضعي عند تقديم الفيزا ماكان جيد...لأني درست الجامعة هنا وبعدين تركتها بدون سبب واضح وفوق كذا قعدت فترة بدون عمل رسمي...يعني كنت متخوف كثير من ناحية قبول الفيزا لأني قريت في أكثر من مكان انه اللي مثل حالتي أحسن شي أنه يخفي دراسته ونفس الوقت يدبر خطاب تعريف عمل من أي شركة..حتى ثلاث مكاتب قبول كلهم قالوا ترى وضعك صعب بالسفارة وماراح تمشي أمورك ولازم تشوف أحد عنده سجل تجاري ويعطيك خطاب عمل من تاريخ تخرجك من الثانوي حتى الوقت الحاضر...والله ياجماعة واحد منهم لازلت أذكره وأضحك..كان يتكلم بثقة وكأنه موظف بالسفارة ويضرب يده على المكتب ويقول خذها مني ماراح يمشونك وانا أعرف شباب كثير مثل وضعك والخ الخ الخ....
    شاورت نفسي وقلت يابو الشباب لو بجيب خطاب عمل يعني اني راح أكذب...لأني بقول أني اشتغلت وأنا ماشتغلت... ومستحيل اكذب وأخذت عهد على نفسي أن أكون صادق بكل معلومة ولو كانت صغيرة...

    توكلت على الله وعبيت الأبليكشن وذكرت فيه أني دخلت الجامعة وبالتاريخ متى دخلت ومتى تركتها...
    أخذت موعد وكان بعد أسبوعين... ولاأخفيكم أني كنت متوتر وخايف ويزيد التوتر كل ماقرب موعد المقابلة...
    لكن قبل المقابلة بكم يوم سألت نفسي سؤال بريء....طيب يالحبيب لو رفضوا فيزتك وش بتسوي؟؟ وفعلاً كان سؤال واقعي، لكن بعد تأمل وتفكير خرجت بالنتيجة التالية:
    لو قبلوا الفيز فالحمدلله وهذا فضل من الله وأساله المزيد من فضله...
    ولو رفضوا فمصير حياتي ليس معلق بالدراسة أصلاً...فمابالك بدولة أمريكا....واللي خلق أمريكا خلق غيرها...ومايختاره الله لعبده خير مما يختاره العبد لنفسه...والإنسان مايعلم وين الخيره...
    والله ياجماعة ارتحت بعد ماأقنعت نفسي بالكلام السابق...وصرت أشعر بثقة أكبر...يعني أصبحت أحدث نفسي أني سأعمل السبب فإن قبلت ولا الحمدلله ييسر الله غيرها..
    ،
    ،
    جاء موعد المقابلة...تقدمت إلى الشباك وكنت متوتر إلى حد ما حتى لاأبالغ...سألني الموظف الأسئلة المعتاده:
    وين رايح بأمريكا...
    من المتكفل بدراستك...هل يعمل...أين يعمل...
    هل أنت متزوج...أين سافرت من قبل...
    كانت أسئلة بسيطة ومتوقعه...
    لكن سألني السؤال الصعب: هل درست في السعودية بعد الثانوية؟؟؟
    أجبت بنعم..طيب ليش ماكملت؟ حاولت أشرح احد الأسباب باقتضاب...لاأخفيكم لاأدري إن كان اقتنع أو لا..
    طلب مني الجواز القديم سلمته وفتشه بعدين رجعه لي بدون الجواز الجديد...هنا أيقنت أن فيزتي مقبولة...طبعا هو ماقال شي لحد الحين لكن قاعد يكتب على الكمبيوتر...من الفرحة والله العظيم ماأدري وش قالي يعني ماسمعت الجملة المعتادة "فيزتك مقبولة" أو شي زي كذا ولاأدري هو متى قال بتوصلني...أذكر شي واحد فقط قالي روح سدد فيدكس عشان يوصلون لك الجواز...ضفيت أوراقي وشكرته ومشيت لفديكس وصلى الله وبارك على محمد

    بالنسبة لمقابلة السفارة:
    -مافضلت أشرح التفاصيل.. يعني الواحد وين يروح وين يجي..الأمور بسيطة جدا جدا راح تعرف كل شي بمجرد وصولك بوابة السفارة...بعد كذا لاتخافون محد راح يضيع والأمور بتكون واضحه..
    ولابد هنا أن شكر الأخ صاحب موضوع (دليلك إلى السفارة الأمريكية بالرياض) لأني توصلت للسفارة عن طريقه

    -موظفين السفارة كلهم بلااستثناء كانوا غاية في التعامل الراقي والمهذب..حتى موظفة التفتيش كبيرة السن صاحبة السمعة السيئة بالمنتديات كانت مبتسمة ومهذبة...وأنا هنا أحكي عن تجربتي..
    -أرجوكم لاتنسون يكون معكم (فكة) عشان الفيدكس..لأن شفت ناس تنتظر بس عشان يتوفر صرف ويعطيهم الباقي،
    إذا داخل الرياض 65 ريال...برا الرياض 125 ريال وخلص نفسك...لأن ممكن تنتظر أكثر من 20 دقيقة حتى وأنت معك صرف مثل ماحصلي بسبب الزحمة...
    -واي أحد يبغى أي تفاصيل أو أي سؤال أكون حاضر ومسرور للتجاوب معه إن شاء الله

    وقبل كل شي وبعده توكلوا على الله وسلموا أمركم إليه واعلموا وتيقنوا أنه هو وحد النافع الضار وهو المعطي المانع...
    وتذكروا أن الله يقول في الحديث القدسي بما معناه (انا عند ظن عبدي بي فليظن بي ماشاء)...أحسنوا الظن بالله وثقوا برحمته وأكثروا من الاستغفار ورحمة الله قريب من المحسنين...

    ،
    ،
    ،
    بقي أن أخبركم أن الله منَ علي واستلمت الفيزا خلال أسبوع واحد فقط...

    لاتنسوني من دعاكم بظهر الغيب
  2. المشاركة الأصلية كتبت بواسطة Tarkan
    مبروك وان شا الله فيزتك قريبه
    أبشرك استلمت فيزتي بعد أسبوع والحمدلله..
    شكراً على مشاركتك

    المشاركة الأصلية كتبت بواسطة Car Li Tos
    الف مبروووك ..

    والله يوفقك وييسر امورك ...
    وإياك ياأخي..
    شكراً على طيب مشاركتك
    7 "
  3. المشاركة الأصلية كتبت بواسطة عطوووف
    الف شكر اخوي والله معلومات تشكر عليها بس ودي اعرف الاوراق اللي اخذتها معاك بالتفصيل لان موعدي بعد اسبوع وخايف انسى ورقه , ويعطيك الف عافية
    حياك الله أخوي..
    بالنسبة للأوراق بسيطه..
    -وصل التسديد تبع بنك سامبا..
    -ورقة التأكيد اللي فيها الباركود وتطلع لك لما تعبي الأبليكيشن
    -ورقة الموعد
    -ورقة تسديد السيفس ويفضل صورة منها..(مع أنه لم يطلبها أحد مني أبداً)
    -الآي تونتي الأصل +صورة
    -الضمان المالي+كشف حساب لثلاثة أشهر
    -أوراقك الأكاديمية(إن كنت بكالوريس شهادة الثانوية مترجمة أو ماجستير السجل الأكاديمي)
    -خطاب قبول الجامعة(ولم يطلبه أحد مني أيضاً)
    -جوازك القديم
    -صورة شخصية حسب المواصفات المطلوبة

    توكل على الله وفالك التوفيق، وأي استفسار حياك..
    7 "
  4. المشاركة الأصلية كتبت بواسطة يوززع
    مبروووك وان شاء الله تسهل امورك كلها
    الله يبارك فيك اخوي..
    وشكراً على دعاك الطيب

    المشاركة الأصلية كتبت بواسطة مبتعث متلخبط
    انا اول ماوصت السفاره ضاعت علومي كلها ههههههههههههههههه
    بالفعل أحياناً تكون محضر كلام تقوله..لكن إذا دقت ساعة العمل تنسى كل شي
    بالتوفيق يامبتعث
    7 "
ADs

قم بتسجيل دخولك للمنتدي او

الانضمام لمبتعث

Search Engine Optimization by vBSEO ©2011, Crawlability, Inc.