تقرير ماحصل معي في مقابلتي بالسفارة الامريكية

June 15th, 2011, 11:41 AM

السلام عليكم ورحمة الله وبركاته ...

تم ولله الحمد اليوم عمل المقابلة بالسفارة الامريكية ..

بس بصراحه ماتوقعت أبداً أبداً انها بهذي السهوله

كنت شايل هم وجالس اقرأ مواضيع عن المقابلة وحالتي صعبة ...

بسرد لكم قصتي وش سويت ::
-------------------

وصلت لبوابة السفارة 6:30 صباحاً وكان فيه تقريبا 6 أشخاص ...

وبدأ الناس يتوافدون وبدأت الزحمه عند البوابه ×_×"

وجلست واقف إلى الساعه 7:30 وفتحوا البوابه <<< سحر جلست واقف

المهم وأنقز أول مافتحوا البوابه وأمسك سرا ...

وتطلع هذيك المزيونه وتقول الي موعدهم الساعه 7:30 يمسكون سرا

وتشرح لنا كيف نرتب الأوراق ...

الجواز ونحط جواه استمارة DS-160 و استمارة تسديد الفيزا من سامبا ...

ونروح للبوابة وتشيك على أوراقنا ويقولون اذا معك شي مخالف سلمه لهم ... ماكان معي إلا جوالي وسلمتهم لهم حطوه بكيس وعطوني الكيس

وفتحوا لي البوابه ودخلت ..
وأشوف سير تحط فيه أغراضك نفس المطار ويدخل بالجهاز ...
وبعد كذا ياخذ الكيس الي فيه جوالك ويعطيك رقم اذا طلعت من السفارة تعطيهم الرقم وتاخذ كيسك ...

وبعدين طلعت من الغرفه إلى ساحة والبوابه حقت السفارة نفسها قدااااااااام بالزاوية اليسرى ...

استغربت من شي واحد وانا في الساحة ..!!

أول مره أشوف عسكري فلبيني على الطبيعه ^^"

المهم وأروح وادخل البوابه وأقابل رجال جالس بكرسي ومعه لابتوب ...

ياخذ جوازك واستمارة ds-160 ويشيك عليها بجهازه وبعدين يعطيك رقم ويقولك رح اجلس بالصاله الأولى فيها كراسي و 3 كونترات

الحمد لله رقمي 5 يعني جاي بدري ^^"


وادخل الصالة وأتكي ربع ساعه وبدو ينادون بالأرقام والكونتر الي تروح له ...

وصل رقمي 5 كونتر رقم 5 يعني بالصالة الثانيه ...

طلعت ورحت لصاله الثانية كونتر 5 ...

كوريه ...

هاي - هاي ...

عطيته جوازي واستمارىة ds-160 ورسوم تسديد الفيزا والآي توني

وقالت بتروح على حسابك ولا بعثه ..
قلت بعثة

قالت عطني التبل نمبر ...
عطيتها وشيكت عليه والحمد لله حصلت اسمي : )

وحطت أوراقي في ملف شفاف وقالت خلاص اجلس إلين نناديك مره ثانيه علشان المقابلة الثانيه ...

وأجلس تقريبا نصف ساعه ... وينادون رقمي ... 5 كونتر 10

وأروح وأنا شااااااايل هم وش بقول وكيف الي بيقابلني يسد النفس ولا نفسيته مخيسه ولا وش وضعه ×_×"

يوم وصلت لكاونتر 10 وأشوف مع القزازه إلا هذاك الامريكي الأشقر وش حليلاااته هو ونظاراته .. ^^

هاي - هاي << مايعرف إلا هاي متوهق ^^"

واعطيه نفس الملف الي حطته لي الكوريه ...

وقلب فيها شوي .. وقال بتروح على حسابك ولا بعثه ؟

قلت بعثه واعطيه رقم المجموعه وجلس يحوس ساعه في الكمبيوتر .. يدور اسمي ..

قال معليش انا بطئ شوي في الكمبيوتر ...

وابتسم هذيك الابتسامه الشنيعه ^______________________^ وأقوله تيك يور تايم

وأخيرا حصل اسمي ...

وقال في أي ولاية بتدرس .. قلت نيويورك .. وفي أي مدينة ؟ قلت منهاتن ...

قال اول مره تروح امريكا .. قلت اي ..

قال قد سافرت للخارج ... قلت اي للبحرين <<< هذا حدكم يالعزابيه ^^"

شوي كذا وأمسك الملفين الي جايبهم معي وفيها كل أوراقي مستعد أطلعهم له

وأنا مجهز أوراقي كلها وزود :

* برنت اوت لسفرتي للبحرين ^^
* وثيقتي وحسن سيرة وشهادة ثانوي وحسين سيرة ومترجمين كلهم ..
* وتوصيات الدكاتره .
* وخطاب القبول المشروط من الجامعه .
* تسديد السيفس

المهم اني شايل أوراق كثير معي في ملفين ماخليت شي ماشلته معي احتياط ...

وفي الأخير بعج ماسألني سؤالين قال مبرووك الفيزا رح سدد فيدكس وإن شاء الله تستلمها بعد اسبوعين ...

بغيت أصيح .. .والأوراق الي جايبها معي ومترجمها علشانكم حسسني طيب بتعبي وقل شكرا لأنك جبت معك أوراقك كثيره

المهم واطلع من عنده وادفع رسوم الفيدكس واكتب له العنوان الي ابيها توصل له ...

واطلع من مبنى السفارة وأنا ماشي حسيت اني ناسي شي

جوالي !!

وأرجع عن البوابه .. حقت السفارة واعطيهم الرقم وعطاني الكيس وخذيت جوالي : )

-----------

باختصار الأسئله الي انسألتها في المقابلة :

وين بتدرس ؟ في أي ولاية ؟ وأي مدينة ؟ أول مره تروح امريكا ؟ قد سافرت خارج السعودية ؟ على حسابك ولا بعثه ؟

يعني مدة مقابلتي ماخذت ولا دقيقتين : )

---------

الله يسهل أمري وتوصل بسرعه .. والله أوضاع الشباب في المنتدى تخوف الي له شهوووووووور مااستلمها -_-

إن شاء الله الأسبوع الجاي تكون واصله قولوا آآآآآآآآآآمين : )

• نشر عبر تويتر
• نشر عبر فيسبوك
• نشر عبر جوجل