إمـــاراتـــي متعاطف مع ربـــعه السعوديين ..

July 4th, 2011, 11:26 PM

بسم الله الرحمن الرحيم


السلام عليكم ورحمة الله وبركاته ..

بصراحه شدني المنتدى هذا كثير وخفف عليه هم الانتظار و و و و .. أحيي القائمين على المنتدى هذا وأشكر الأعضاء كلن باسمه .. وكل ما ادخل الموقع اتذكر ربعي السعوديين في امريكا واللي قضيت معاهم احلى سنين العمر "الله يرج اللي ما يحبهم هههه"


حبيت أنظم لقائمة منتظرين الفيزا واللي بصراحه جابتلي الاحباط نوعا ما وحبيت اطرح موضوعي وقصتي مع الفيزا الدراسية عل وعسى نخفف عن باقي المنتظرين ..


تخرجت من احدى الجامعات الي عندنا في الامارات وتوظفت في الحكومة وبعدها قررت اني اقدم استقالتي وادرس باميركا وبتوفيق من الله حصلت على بعثة دراسية من الدولة ..

قدمت على الفيزا والامور كانت طيبة وميسرة وسافرت اميركا ودرست لغة لمدة شهرين وخذت الايلتس وبعدها بديت دراستي الجامعية .. خلال فترة تواجدي باميركا رجعت للامارات تقريبا 6 مرات واول مرة رجعت فيها سرت السفارة وعملت فيزا جديدة باسم الجامعة بدل المعهد .. ومرت الايام وقررت اغير الجامعة اللي كنت بها وفعلا صار اللي بغيته وتغيرت الجامعة ورجعت بعدها للامارات .. وللمرة الثالثه اروح للسفارة الامريكية واغير الفيزا على الجامعة الجديدة والحمدلله الامور مشت بسهاله وتيسرت الامور ورجعت اميركا وتخرجت بعدها بسنتين ورجعت البلاد ...

المهم .. رجعت الامارات وسلمت الشهادة لوزارة التعليم العالي عندنا وتم منحي بعثة جديدة ولله الحمد وكان عندي قبول من الجامعة اللي بدرس بها درجتي العلمية التاليه وكان مكلنها بنيويورك.. سرت للسفارة الامريكية في ابوظبي وقدمت على الفيزا ومشت الامور تمام وعطوني فيزا جديدة بدون اي تعقيد .. سافرت نيويورك ووصلت الجامعة وكانت الامور طيبة وبعدها صار لي ظرف خلاني ارجع للامارات وتركت كل شي وراي واخطرت الجامعة باني بوقف ويمكن ارجع وتم اخطار الادفايزر في السفارة كذلك ورجعت ... المهم .. تعدت مدة تواجدي في الامارات ال 8 اشهر وبعد ما سافرت مع الوالدة للعلاج وتطمنت على وضعها الصحي الله يحفظها قررت اني ارجع وخاطبت الوزارة والملحقية بواشنطن واخطرتني الملحقية بان الجامعة اللي كنت بها مش معترف بها اني مور ولازم اغيرها واشوف لي مكان ثاني ..


وفعلا جبت قبول من معهد تحضيري للدراسات العليا في فلوريدا (الولاية الي كنت ادرس بها قبل) .. خذت القبول والاي توينتي وسرت السفارة وقدمت على الفيزا ولما وصلت للكاونتر الاول سئلتني الموظفة اللي تضبط الاوراق "ماعندك زيارات خلال الخمس سنوات الماضية لدول اخرى غير اللي ذكرتهن في طلبك؟؟" قلت لها عندي سفرة مش مذكورة في الابليكيشن لسوريا بشهر 12-2010 لكن ما قعدت في سوريا بس نزلت المطار وكان في سائق ينتظرني واخذني الى بيروت !! وعملت هذا الشي لان التذكرة جاتني هدية من شخص انا كافله في الامارات وعزمني على السنة الجديدة عند عائلته في لبنان واصر علي كثير واستحيت منه ووقتها ما لقى لي تذكرة دايركت على لبنان فاخذها على سوريا مع العلم باني رجعت للامارات عن طريق مطار بيروت بعد 4 ايام ..

المهم .. بعد البصمة وصلت للقنصل وكانت الاسئلة كالاتي :
- تعمل؟
- لا
-زرت اميركا قبل؟
- نعم
- وين كنت تدرس؟
-ذكرت اسم اخر جامعة بنيويورك واخبرتها اني وقفت ورجعت الامارات لظروف معينة
- وش رايح تسوي الحين؟
- بكمل دراستي لكن في ولاية اخرى
- ليش جاي متأخر ؟ دراستك بتبدأ بعد اسبوعين من اليوم؟؟؟
- استلمت الاي توينتي يوم الخميس (من 3 ايام)
- رح ادفع الرسوم وارجع لي.
- اوكي و ثانكس

دفعت رسوم اصدار الفيزا ورجعت الا اشوفها تعطيني ورقة صفرا وعليها رقم متابعة على موقع السفارة وتقولي كلم المعهد وخلهم يمددون لك اسبوع لان الفيزة مقبوله لكن عندنا اجراءات ادارية بتاخذ من 2 الى 5 اسابيع لكن يمكن تظهر خلال الاسبوعين وتمرنا ونعطيك الفيزا وانت واقف مكانك ..

ياااااا الللللللله ما الذي يحدث امامي (طرى على بالي المعلق فارس عوض) .. اول مرة اتعرض لهذا الموقف وعمري ما توقفت او تاخرت بسبب الفيزا .. يا بنت الحلال غيري بدلي شوفي الفيز القديمة وشوفي اخر فيزا عندي بتنتهي سنة 2014 وانا هنا لاني غيرت الجامعة فقط .. مافي فايده وعلى قولة اخوانا السعوديين "ضفيت وجهي" وظهرت من السفارة ولليوم معاملتي تحت الاجراء واكملت اكثر من 5 اسابيع ولا حس ولا خبر ..


مليت من القعدة ومليت من السفر ومليت من الاجواء اللي حولي وقررت اني احتج (حلوة هذي احتج) واقعد في البيت وصرت م اطيق اشوف احد وربي .. احس اني تعقدت ومقيد .. لا اقدر اشتغل ولا اقدر انتظر !!! وما ادري بصراحه هل سبب التأخير اني ما كتبت سوريا في الطلب ولا بسبب السن واستبعدت موضوع تشابه الاسماء لان اسمي غريب وعمرهم ما وقفوني على الاسم ..

اسف على الاطاله بس من الملل وحبيت افضفض شوي لان الطلبة الاماراتيين في الخارج ما عندهم منتدى يفضفضون فيه فقلت اخوانا السعوديين صدورهم وسيعه والحال من بعضه .. وزرت الموقع وشفت فترات الانتظار اللي بالشهور واللي "تحطم" بصراحه وهانت عليه سالفتي وصرت مقتنع اني اصبر وبس او اني انقل دولة اخرى ..



اسف على الاطاله وان شاء الله نشيل هم بعض ونفيد ونستفيد ...


وشاكر للجميع مرة ثانية وموفقين باذن الله ..


توني اقرا الموضوع مرة ثانية >>>> كاتب قصة حياته الاخ مش فيزا هذي اللي فرت مخه!!

• نشر عبر تويتر
• نشر عبر فيسبوك
• نشر عبر جوجل