تقرير التقديم على الفيزا في السفاره الأمريكيه في الرياض يوم السبت 21/1/2012

السلام عليكم ورحمه الله وبركاته

اضع لكم تقرير تقديمي لفيزا دراسيه في السفاره الأمريكيه في الرياض يوم السبت 21/1/2012
.
.
.
.
.

طبعا ماتتخيلون كيف كان كل شي مرتب ومنظم وعمليه الدخول للسفاره كان موعدي الساعه 8:30 صباحا وصلت السفاره الساعه 8 وماكان فيه طوابير انتظار وكان فيه موظفه على الشباك اخذت مني:

- ورقه تأكيد الموعد

- ورقه تأكيد النموذج DS160

- الجواز

- ايصال سامبا


وحطت الاوراق كلها في الجواز واعطيتها كل مفتاح السياره والجوال وحطتهم في ظرف....بعدها دخلت الى غرفه التفتيش وفيها جهاز الكشف مثل الموجود في المطارات طبعا اخذو مني الظرف الي فيه مفتاح السياره والجوال واعطوني رقم علشان استلم الاغراض عند الخروج


بعدها دخلت الى مبنى السفاره وكان فيه وحده جالسه على الطاوله طلبت مني الاوراق التاليه:

- الجواز

- ايصال سامبا

- الاي توني

- كشف الحساب

بعدها سلمتني الأوراق ووجهتني الى غرفه اخذ البصمات وقالت لي اعطيهم الأوراق هذي وكان قدامي شخصين فقط بعدها نادو على رقمي وسلمته الاوراق وسألني الاسئله التاليه:

- اول مره تروح امريكا ؟

انا: لا

- رايح للدراسه ؟

انا: نعم

بعدها طلب مني احط الاصابع الاربع اليمين واليسار وبعدين الابهامين مع بعض وحط الاوراق في ملف شفاف وقالي انتظر لحد ماينادون عليك للمقابله

توجهت لغرفه الانتظار للمقابله وكانت شبه خاليه بعدها كان فيه سيكورتي هندي والابتسامه مافارقته ووجهني اني اجلس في المقدمه

طبعا الكورس الي راح ادرسه عباره عن دوره مدتها قصيره 6 اشهر

انتظرت تقريبا 20 دقيقه ونادوا على اسمي في المقابله وكانت مقابلتي في شباك 9

والي عملت معي المقابله كانت من اصول اسيويه

وهذا الي حصل والمقابله كانت بالانجليزي:

هي : جود مورنج

انا: جود مورنج

هي : انت ساكن في الرياض ؟

انا : نعم

بعدها شافت الاي توني

هي: ايش طبيعه الكورس الي راح تاخذه ؟

انا : شرحت لها بشكل مختصر جدا

هي: الكورس الي راح تاخذه يتطلب لغه ؟

انا: نعم وعندي شهاده في اللغه من بريطانيا تبين مستواي وقالت لي ممكن اشوفها واعطيتها الشهاده شافتها ورجعتها لي

هي : من راح يدفع لك تكاليف الدراسه ؟

انا : ابوي

هي : وين يشتغل ابوك ؟

انا : شرحت لها

هي : وين بتروح في امريكا ؟

انا : فلوريدا

بعدين شافت كشف الحساب وناظرت اخر صفحه ورجعت لي اياه

هي : تعرف احد في امريكا ؟

انا: لا

هي : اهلك كلهم ساكنين في الرياض ؟

انا : نعم

هي : وين راح تشتغل اذا خلصت الكورس حقك ؟

انا : قلت لها

هي : وش الدول الي سافرتها؟

انا : بريطانيا - المانيا- امريكا- الامارات - بلجيكا وهذه الدول كانت لاخر 10 سنوات

هي : جود...حط اصبعك اليمين على البصمه

انا : حطيته

هي : اكسلنت فيزتك مقبوله

انا : ثانكس

اخذت الجواز وايصال سامبا فقط ورجعت لي بقيه الاوراق
.
.
.
.

طبعا كل المحادثه الي فوق ماخذت اكثر من دقيقتين وكانت سريعه وسلسه جدا


طبعا ماحددت لي كم يوم راح تصدر الفيزا ولا قالت لي روح سدد فيديكس حتى سألتها في الاخير اروح اسدد فيديكس قالت لي يس ومشيت


بعدها رحت سددت لفيدكس وكانو اثنين فلبينين وكانت معاملتهم مره عسل واستغربت من بعض الناس الي قالوا انه معاملتهم سيئه ومن هالقبيل

اعطاني ورقه وطلب مني احط رقم جوالي واسمي والمدينه واقرب فرع لي ودفعت 65 ريال وطلعت
.
.
.
.
.
.

- المده الي من اول مادخلت السفاره لحد ماطلعت كانت ساعه و10 دقايق بالضبط حيث ان الدخول كان الساعه 8 وطلعت من مبنى السفاره الساعه 9:10
- التقديم كان يوم السبت 21/1/2012 ولازلت انتظر الفيزا
.
.
.
.
.

الملاحظات:

- الاجراءات كانت سلسه جدا وموظفين السفاره معاملتهم عسل
- خليكم واثقين واوراقكم جاهزه وراجعوها مره واثنين وثلاثه
- عند المقابله خلو الاجوبه تكون مباشره ومختصره بدون اي تفاصيل طويله

.
.
.
.
.

استفسارات:

- لما سألتني عن الدول الي سافرتها نسيت اذكر لها اني رحت مصر وكنت كاتب في الابليكشن اني رحت لها تتوقعون راح يكون في مشكله في ذلك ؟

- لم تطلب مني تعريف العمل حق الوالد اكتفت بكشف الحساب وشافت اخر صفحه ورجعت لي اياه هل الشي هذا طبيعي ؟

- ماحددت لي المده الي راح تصدر فيها الفيزا هل سبق انه صار هالشي مع احد الاخوان او الاخوات



تحياتي,,,,