قول لي مبروك الحمدلله استلمت الفيزا

بسم الله الرحمن الرحيم

باركولي يا مبتعثين ومبتعثات
الحمدلله حصلت على الفيزا الامريكية

بكتب لكم بختصار تجربتي مع القنصلية الامريكيه في الظهران وخطوات حصولي على الفيزا
على شكل نقاط مختصرة:

1- حصلت على موعد للمقابلة في 14 مايو في قنصلية الظهران.
2- جهزت اوراقي( قبول معهد اللغة+ الاي توني+جواز السفر وصوره منه+ترانسكربت+الفورمات56و57و58).
3- سددت رسوم السيفيس+رسوم الفيزا.
4- انتظرت حتى موعد المقابلة في قنصلية الظهرن وكان موعدي في الساعه عشر صباحا
رحت الموعد مع اوراقي كامله من الساعه سبع ونص صباحا, دخلت القنصلية واخذت رقم وما كان في زحمه تقريبا كان في عشر مواعيد اوكثر بشوي, شيكت جميع الاوراق مع الموظفة وعبيت بعض المعلومات الناقصه في الفورمات(شوي مو واجد) بعدين رحت سويت البصمات في الشباك الثاني بعدين انتظرة شوي ونادو اسمي حق المقابله في الشباك الثالث مع الموظف, وكانت المقابله سهله وطبع كنت مسافر سوريا قبل اربع سنوات وسألني عن السفره وجاوبته بختصار مفيد وانتهت المقبله وعطاني ورقه صفره وقالي انتظر من اسبوعين الى ثلاث اسابيع وبنتصل عليك واشر في الورقة على خانة الاجرائات الاداريه.
5- بعد ثلاث اسابيع بالضبط اتصلت على القنصلية الساعه ثلاث العصر وطلبو مني ارسل الجواز بالفيدكس عشان اخذ الفيزا وفعلا رسلته يوم ثاني.
6- بعد تقريبا اربع ايام من رسلت جوازي بالفيدكس دقو على الفيدكس عشان استلم الجواز بالفيزا, ورحت استلمت.
و الاي توني موجود داخل الجواز بس ما كان داخل ظرف.

ملاحظة: يوم رحت القنصلة كان ناقصني شي واحد بس القنصلية ما طلبته مني الحمدلله اللي اهو خطاب من الوزارة للقنصلية بأني طالب مبتعث من عندهم ومشت الامور الحمدلله
الفيزا خلصت تقريبا في 25 يوم من موعد المقابلة.
مدة الفيزا سنه ونص وطبعا انا سويت المقابله بعد القرار بزيادة مدة الفيزا بس الظاهر يعطونك الفيزا حسب مدة الاي توني.

وشكرا لكم واسمحو لي على الاطالة.