الأعضاء الإشتراك و التسجيل

الملتقيات
ADs

الناس اللي مو فاهمة ايش الهرجة وتتسأل ايش هو الضمان المالي وايش الاي توني والسيفيس

الناس اللي مو فاهمة ايش الهرجة وتتسأل ايش هو الضمان المالي وايش الاي توني والسيفيس


NOTICE

تنبيه: هذا الموضوع قديم. تم طرحه قبل 4506 يوم مضى, قد يكون هناك ردود جديدة هي من سببت رفع الموضوع!

قائمة الأعضاء الموسومين في هذا الموضوع

  1. الصورة الرمزية Biochemist1988
    Biochemist1988

    متعاون سابق

    Biochemist1988 الولايات المتحدة الأمريكية

    Biochemist1988 , أنثى. متعاون سابق. من السعودية , مبتعث فى الولايات المتحدة الأمريكية , تخصصى Biological Science , بجامعة Dominican University of California
    • Dominican University of California
    • Biological Science
    • أنثى
    • San Rafael, California
    • السعودية
    • Jul 2010
    المزيدl

    November 18th, 2011, 05:56 AM

    السلام عليكم
    تم تحديث الموضوع بيوم الجمعة الظهر
    لوسمحتو قبل ماتقروا الموضوع امانة عليكم لاتخرجو الا وانتو حاطين كومنت او حتى كلمة رفع لاني ما ابغاه يروح للصفحة التانية عشان كتير ناس تحتاجو وتحتاج تفهم ايش الحكاية عشان كدا وزي منتو عارفين كل ماكان الموضوع بالصفحة الاولى كل ما كان معرض للقراءة اكتر
    واللي عندهم اي استفسار اتمنى يعملو موضوع جديد ويسالو فيه لانو لو حطو استفسارهم هنا ممكن يكون معرض لعدم الرد لاني مارح ادخل كتير

    حبيت اعمل دا الموضوع خصيصا للناس التايهة
    اول شيء كلنا دققنا---انقبلنا نهائي-----جانا موعد الملتقى =الحمدلله طيب كيف راح نسافر؟؟؟؟؟
    كتير موفاهمين ايش هو الاي توني والسيفيس وكيف نقدر نطلع الفيزة؟؟

    السبب الرئيسي وراء كتابتي لداء الموضوع اللي راح يصدعلي راسي وانا اكتبو هو انو جاتني رسالة من عضو هالله يستر علينا وعليها تقلي من فين اقدر اطلع الفيزة؟ هل اقدر اطلعها من الجوازت؟
    حسيت انها مررة تايهة قلت لازم اساعدها و معاها حق يعني انا مارح اقولكم اني جيت على الدنيا عالمة وفاهمة ترى قبل كم سنة كنت اتسال واقول ايش هو الاي توني وماكنت عارفة دا الشيء والان مدام الحمدلله ربي فتحها عليا قلت لازم افيد الناس التايهة لاني كنت بيوم زيهم

    طيب نبدء بالخطوات وافهمو وفتحو عيونكم بليز مابغى كتير استفسارات او لانو دخولي للمنتدى راح يقل عشان ابغى اجلس اقرى كتب انجليزي الكتب اللي اشتريتها كلها اتراكمت عليا و اتفضى لنفسي شويا
    المهم

    الخطوة الاولى:ارسال رسالة للوزارة طلب الضمان المالي طريقة الارسال على الرابط التالي:
    http://www.mbt3th.us/vb/forum149/thread317508.html
    طيب ايش هو الضمان المالي: راح اتكلم بلهجتي الحجازية العامية
    هو عبارة عن ورقة تثبت انك لو سافرت بلد الابتعاث مارح تتشحت (مع احترامي للجميع بس ابغاكم تفهموها مزبوط) ولازم يكون المبلغ كافي لمدة ولفترة معينة
    طبعا راح اتكلم عن المبتعثين - الضمان المالي دا لو كان من الوزارة يكون مضمونه انو دا الطالب اللي اسمو كدا كدا ورقم طلبو كدا والمقدم على درجة كدا راح تتكفل الوزارة بجميع مصارفه من دراسة علاج سكن مصروف شهري وزي كدا (يعني بالعربي كانو الوزارة تقلهم اطمنو دا الشخص مارح يكون عالة على قلوبكم وراح يكون تحت رعايتنا و نحن متكفلين بي اموره المالية)
    طيب ايش فايدة الضمان؟؟؟
    عشان نجيب قبول من معهد في امريكا لازم يكون عندهم اثبات انك راح تعطيهم حقهم من مبلغ مالي
    عشان تحصل على فيزة امريكية لازم يكون تعطي للسفارة الامريكية اثبات انك لو رحت هناك في احد قادر على تحمل المصاريف والعيشة يعني مارح تجلس عالة على قلوبهم

    فهمتو؟؟؟؟؟؟؟؟؟؟؟؟؟؟؟؟؟؟؟؟؟
    طيب اكتر من كدا ماتوقع في شرح نجي للي بعدو

    دحين خلاص حصلت على ضمانك المالي من الوزارة الف مبروك طيب ايش حتسوي؟؟؟ راح تراسل معاهد امريكا عشان تحصل على القبول ...

    الخطوة الثانية: مراسلة المعاهد والحصول على قبول معهد واللي هيا ورقة ال i-20
    طيب ايش فايدة دي ورقة القبول اللي اسمها اي توني؟؟؟
    قولو ايش مو فايدتها دي الورقة بيها تدخل امريكا وفايدتها انك ماتقدر السفارة تعطيك فيزة طالب الا لمن تثبت لهم انك فعلا طالب ومقبول في احدى المؤسسات التعليمية (معهد او جامعة) في امريكا



    طيب حصلنا على قبول معهد الف الف مبروك ايش راح نسوي ؟؟؟

    الخطوة التالتة راح تدفعو السيفيس 200 دولار وانتو ماتشوفو الدرب

    وه ايش هو دا السيفيس؟؟
    انا بنفسي اعترف لكم اني ماعرفت ايش هو السيفيس غير قريب يعني اول كنت بدي ادفع مبلغ السيفيس على عماها من غير ما ادري ايش هو طيب اهو دحين دريت امشو اقلكم ايش هو؟؟

    السيفيس هو عبارة عن خدمة خاصة بي الطلاب بحيث انها تكون صلة وصل بين معهد الطالب والهجرة طيب ايش فايدتها
    انها تعرف تحركات الطالب بالمعهد يعني بيداوم ما بيدوام لو مثلا مابيداوم او غاب لو كم يوم كدا بس وماعندو عذر قوي من مستشفى راح المعهد يتواصل مع حقون الهجرة في امريكا ويقلهم ترى دا الطالب غاب كم يوم وماعندو اي عذر قوي يقومو الهجرة طوالي يرحلوه او يعطوه غرامه مالية و ياخذو منو تعهد بعدم تكرار ذلك ويختلف العقاب من شخص لي اخر
    يعني بالعربي لاتحسبو انكم بمجرد حصولكم على الفيزة والسفر هناك مارح يراقبو تصرفتكم الهجرة وعلى فكرة لو مثلا كمان الطالب عمل مشكلة ولا شيء بالمعهد لاسمح الله المعهد راح يتحادث مع الهجرة عشان تتخذ العقاب اللازم للطالب
    انا كنت اعرف دا الامر بس ماكنت اعرف انو السيفيس هو الخدمة اللي بتقدم دا الامر
    عشان كدا لمن تجو تدفعو رسوم السيفيس يقولولكم حطو رقم الاي توني حقكم عشان يعرفوا انتو في ايت معهد وزي كدا ولمن تغيروا المعهد او الاي توني لازم تعطو خبر لي حقون السيفيس وهنا الطريقة حقت لمن يتغير المعهد و يكون السيفيس حقك على المعهد القديم (مو دحين راح تحتاجوها لحد يتعب نفسو ويدخل الرابط)
    http://www.mbt3th.us/vb/forum16/thread133543.html

    طيب نرجع لكلامنا كيف ندفع رسوم السيفيس 200 دولار هنا
    http://www.mbt3th.us/vb/forum16/thread552.html
    الطريقة مع ملاحظة انو مانقدر ننتقل لخطوة السيفيس الا بعد استلام القبول (يعني بعد استلام ورقة الاي توني)

    طيب ايش فايدة السيفيس كمان؟؟
    لازم ورقة السيفيس اللي راح نطبعها ناخذها معانا للسفارة الامريكية ولو ما اخذناها اورقنا راح تكون ناقصة
    وعلى فكرة رسوم السيفيس راح تعوضكم هيا الملحقية بس انتو احتفظو بالفواتير


    الخطوة الرابعة راح ناخذ موعد سفارة عشان نحصل على التاشيرة

    وليش راح ناخذ موعد السفارة؟ عشان نطلع الفيزة طيب شكرا (انجنيت اكلم نفسي)
    المهم تعالو هنا
    كيف راح ناخذ موعد سفارة؟؟ هل نروح لمكتب ؟؟ لا طبعا مدام انتو في مبتعث مارح تحتاجو تروحو مكاتب لانو اللي عملني كيف اخذ موعد بفضل الله ثم بفضل المنتدى دا
    طيب ايش متطلبات السفارة منكم
    اتفضلو الرابط دا
    Student (F1, F2) | Embassy of the United States Riyadh, Saudi Arabia
    طيب الان راح اشرح الرابط دا بالتفصيل فتحو عيونكم ترى تعبت وانا اطقطق على الكيبورد
    اوكي موعد السفارة يتقسم لعدة اقسام امشو اشرحها لكم هنا با التبسيط
    اول شيء عشان ناخذ موعد سفارة
    1-لازم يكون عندنا صورة مقاس 5في 5 وشوفو شروط الصورة على الرابط اللي حطيتو فوق حق موقع السفارة لازم ماتكون ملعوبة بالفوتوشوب يعني شكل الشخص الطبيعي ولازم البنات يكونوا مخرجين جزء من شعرهم من قدام ولو عليهم كانو قالولكم فصخو الطرحة

    2-لازم نعبي نموذج اسمو DS-160 طيب كيف راح نعبيه؟ اول شيء اعرفكم ايش هو دا النموذج هو عبارة عن نموذج يوضح حالة الشخص غير المهاجر الى امريكا يعني نموذج فيه اساله طويلة عريضة لازم تجاوبها و تعبيها يعني راح ياخذ منكم تعبئة النموذج اول مرة من ساعة لتلات ساعات على حسب الحوسة و الموقع لو طولتو عليه يخرجكم وساعات بيانات ماتنحفط عليكم فا تضطرو تعيدوها عشان كدا قلت لكم تلات ساعات لانو دي الحوسة حصلت معايا قبل 9شهور من الان والحمدلله احس اني صرت خبرة (لوووووووووووول)
    اتفضلو الرابطين يشرح لكم طريقة تعبئة دا النموذج يعني اختارو منهم واحد رابط ولو جيتو بنقطة مافهمتو شيء روحو للرابط التاني امكن تكون النقطة اوضح
    http://www.mbt3th.us/vb/forum16/thread156518.html
    http://www.mbt3th.us/vb/forum16/thread157658.html

    طيب بعد ما عبينا النموذج دا راح تجينان ورقة تقلنا اطبعني وخذي معك للسفارة لانك من دوني مارح تسوى شيء بالمقابلة وراح تفهمو ايش هيا الورقة اللي راح نطبعها من خلال دخولكم للشرح اللي فوق طبعا لو غلطت فيه مثلا تقدر تعيده من جديد المهم حاول انك تتاكد انو مية بالمية لانك راح تحتاجو لي اخذ موعد السفارة وبيلو راح تروح المقابلة حقت السفارة لانو منو راح يعملو على نموذجك مسح (بارا كود)اعرف كتير مافهمو انا اش قصدي هنا بس راح تفهمو لمن تعبو النموذج

    طيب عبينا النموذج ايش تالت خطوة من خطوات الحصول على تاشيرة امريكية؟؟

    3-ناخذ موعد عشان نروح المقابلة طيب كيف راح ناخذ؟؟؟ عشان تاخذو الموعد لازم تدفعو عن طريق بطاقة الفيزا او ماستر كارد مبلغ قدرة 45ريال واللي يقول ماعندي اقلو روح عند قريبك صديقك ابوك امك واطلب منهم البطاقة حقت الفيزا او الماستر كارد
    اتفضلو الرابط دا يشرح لكم طريقة اخذ موعد سفارة
    http://www.mbt3th.us/vb/forum16/thread3264.html

    طيب كدا اخذنا موعد سفارة (ياسلام الحمدلله في تطور)
    -بعدها نروح بننك سامبا و ندفع رسوم الفيزا الامريكية (532ريال ينطح ريال) طبعا راح تقولو لي ايش راح نانخذ معانا للبنك وراح اقلكم مو فاكرة بس اتصلو او روحو بنك سامبا واسالوهم ايش نجيب لكم اوراق عشان ندفع فلوس الفيزا لاني انا كدا راح اعمل ان شاءالله
    -ندفع رسوم السيفيس
    -نحفتظ بالايصالات ونعمل منها نسخ عشان لمن نوصل بلد الابتعاث نرسلها للملحقية وتعوضنا
    ادخلو هنا عشان تعرفوا التكاليف اكتر
    http://www.mbt3th.us/vb/forum149/thread319254.html

    4-جاء يوم المقابلة ايش راح ناخذ معانا؟؟؟
    صفحة التأكيد من نموج DS-160
    - صورة الـI-20 الخاص بكل متقدم
    - إيصال الـSEVIS- إيصال سامبا اللي دفعتو بيه رسوم الفيزا 532ريال
    - صورة شخصية
    -الضمان المالي اللي ارسلو لكم هو الوزارة ايميل
    - نقود لتسديد رسوم الـFedEx اللي هيا 75 للناس اللي عايشين داخل المدينة المتواجدة فيها االسفارة 125ريل للناس اللي عايشين برا المديننة اللي فيها السفارة للتوضيح يعني مثلا واحد راح المقابلة وهو عايش بي المدينة المنورة و السفارة في جدة لازم يدفع رسوم 125ريال للفيديكس عشان لمن يصدر الجواز ترسلو من جدة على المدينة
    - جواز سفر ساري المفعول لمدة ستة أشهر على الأقل و الجوازت القديمة ان وجدت
    -شهادتكم حقت ااخر مرحلة دراسية يعني االلي مقدمين بكالوريس يجبيو شهادة الثانوية واللي مقدمين ماجستير يجيبو وثايقهم الجامعية ووووهكذا
    -باختصار جيبو احتياط كل الاوراق المتعلقة بالبعثة
    -وجيبو كمان ورقة اكتبو فيها ارقام لانو لمن تدخلو السفارة مارح يكون معاكم اي جوال ممنوع الجولات لاتعملو مثلي انا لمن دخلت طبعا من غير جوال وبعدين جاني امر لازم اكلم ابويا وكان معاه جوال جديد فا ماكنت اعرف رقمو فا اضطريت اخرج خارج السفارة و اكلمو و رجعت للتفتيش من جديد فعشان كدا خذو ورقة معاكم فيها ارقام الشخص اللي موصلكم وزي كدا لانو داخل السفارة في تلفون ومسموح لكم تكلمو بيه بما انو ماعندكم جوالات لانها ممنوعة
    خذو معاكم صور شخصية احتياط واعملو نسخة لكل المستندات وعلى فكرة ممنوع تاخذو معاكم جوالات او لاب توبات اوي اي جهاز داخل مبنى السفارة مين قلكم لمن تروحوا راح يفتشوكم تفتيش قوي
    -اتاكدو من موقع السفارة الامريكية بالرياض (ادخلو قوقل واكتبو السفارة الامريكية بالرياض يطلع لكم الموقع) المهم لمن تدخلو موقع السفارة اختارو لغة عربية بعدين اضغطو على---تاشيرات----بعدين اختارو تاشيرة F1-F2واقرو التعليمات بدقة وقبل تروحو الموعد اتاكدو من الموقع حق السفارة انو جميع اوراقكم كاملة طيب..

    دا هو الرابط حق موقع السفارة اللي بالرياض و في موقع خاص لجدة و موقع اخر خاص للظهران
    انا عارفة الرابط راح يطلع بشكل غريب عشان كدا قلت لكم ادخلو قوقل واكتبو السفارة الامريكية
    ط¯ط±ط§ط³ظٹط© - F1/F2 - ط³ظپط§ط±ط© ط§ظ„ظˆظ„ط§ظٹط§طھ ط§ظ„ظ…طھط*ط¯ط©

    طيب اللي اوراقه ناقصة ايش يعمل؟
    يعني اللي راح السفارة من غير اي توني مثلا او سيفيس راح تطلب منو السفارة انو اول مايجي الاي توني اوالحاجة النقاصة ترسلها لنا بالفيديكس وزي كدا


    حلووووووووووووووووو فهمتو طيب نجي للي بعدو
    دحين غلقنا المقابلة وخرجنا من السفارة ياسلام اخذو اوراقنا راح نرجع بيتنا زي الطبيبن وننام ونصحى وندعي ربنا يسهل امر الفيزة وتطلع بيوم او يومين وننتظر الفيزة تصدر طبعا راح يتصلو عليكم فيديكس في يوم ما ويقولو لكم تعالو خذو الجوازت حقتكم وانا عارفة راح تطيرو من الفرحة زي ما طرت انا قبل كم شهر ايام لفيزة السياحية (احساس لايوصف)


















    الخطوة الخامسة: اصدار قرار الابتعاث
    اوكي ايش هو دا قرار الابتعاث؟ وه كيف تبغى تسافر من غيروا؟ (معليش اتحملو دي الاسئلة انا كاتبتها هنا عشان مابغى اشوفها بالردود)
    قرار الابتعاث راح يتطلب منك بعض الاوراق توديها للوزارة عشان يصدرولك قرار الابتعاث اللي هيا
    ادخل دا الموضوع عشان تعرفها (مابدي انسخها هنا عشان لايصير الموضوع حقي طويل فوق ماهو مرة طويل)
    http://www.mbt3th.us/vb/forum108/thread26065.html


    الخطوة السادسة: امر الاركاب( يا فلة
    ) (الف الف مبروك)
    امر الاركاب من اسمو يعني حاجة تتعلق بتذكرة الطيارة يعني خلاص قرب موعد السفر ياحلووووو

    متطلبات أمر الإركاب














    1- صورة من قرار الابتعاث .
    2- أصل و صور الجوازات و التأشيرات للمبتعثة و المرافق .
    3- صورة من بطاقة العائلة .
    4- صورة من بطاقة الأحوال
    5- وكالة من ولي الأمر في حال لم يكن المرافق الأب أو الزوج .














    لمعرفة المزيد حول قرار الابتعاث و امر الاركاب ادخلو هنا
    http://www.mbt3th.us/vb/forum134/thread248018.html#post2553375

    بعد كدا راح تروحو تجهزو شنطة السفر حقتكم وحتى دا الامر ماخليتكم فيه لحالكم وقلت لازم اشارككم فيه واذكركم ببعض الاشياء اللي ممكن تاخذوها معاكم
    اتفضلو الرابط
    http://www.mbt3th.us/vb/forum149/thread318744.html

    بعدين اعملو سكنر لكل اوراقكم وحطوها في فاش او سي دي او على الاب توب حقكم المهم اعلمو اسكان لكل اوراقاك اللي خاصة بالبعثة من جواز سفر و ضمان و امر اركاب و قرار ابتعاث و بطاقة الهوية الوطنية كل شيء كل شيء عشان لمن تسافروا هناك الملحقية راح تحتاجو ترسلوها ايميل

    طيب ياحلوين دحين ايش راح تعملو استلمتو امر الاركاب خلاص ؟؟ لا مو خلاص طبعا راح تفتكرو بايوكمست (انا عارفة بعض منكم مو عارف ايش معنى اسمي والبعضمو عارف كيف يقراها معنى اسمي-اخصائية الكيمياء الحيوية- والكيمياء الحيوية اللي هو قسمي اللي اتخرجت منو من الجامعة (صرت اعرفلكم كل شيء هههههههههههه) المهم اللي ماراح يفتكر كلمة بايوكمست وهو يدعي يقول (اخصائية الكيمياء الحيوية) اهو بالعربي سهل و صورتي مكتوب عليها i love biocكلمة بابوك اختصار لكلمة بايوكمستري (الكيمياء الحيوية)
    المهم افتكروني بدعوة صادقة من القلب في الصلاة ---انو ربي يحقق لها كل اللي تبغاه ويحفظ لها اهلها و تغلق اللغة بسرعة وتبدء بالماستر من بدري وتحصل قبول جامعة بسهولة لانها تعبت وهيا تكتب دا الموضوع ولا تنسوني وانتو بالطيارة بدعوة حلوة عشان دعوة المسافر باذن الله مستجابة (افتكروني لو سمحتو وي)

    امشو اقلكم باقي حاجة فين راحين لسا ماغلقنا كلام...

    خلاص دحين سافرتوا امريكا (ياسلام حماااس)

    الخطوة الاخيرة: الملحقية الثقافية وفتح حساب فيها
    قبل كم يوم وحدة من صحباتي (غير مبتعثة) سالتني ايش الملحقية؟؟
    قلت لها هيا اللي تهتم بشؤون الطلاب اللي بدولة الابتعاث وتكون وصل بينهم وبين الوزارة

    طيب لو مافتحنا حساب بالملحقية ايش حيصير؟؟
    راح تجلس زي الاطرش بالزفة لا مكافاة ولاهم يحزنون

    هنا طريقة فتح ملف بالملحقية
    فتح الملف


    يستطيع الطالب أن يفتح الملف عن طريق موقع الملحقية الثقافية السعودية الإلكتروني من خلال الرابط التالي:
    فتح ملف طالب جديد
    كما يتعين على المبتعث إرفاق الوثائق والمستندات التالية :

    1- صورة من جواز السفر (المعلومات الشخصية + صورة الفيزا وختم الخروج من المملكة )
    وصورة نموذج الدخول (I-94) للطالب ومرافقيه
    هنا شرح طريقة تعبئة نموذج الدخول
    http://www.mbt3th.us/vb/forum8/thread245146.html

    أما إذا كان الطالب من مواليد أمريكا
    فعليه إرفاق صورة من شهادة الميلاد بالإضافة إلى صورة لختم الخروج من المملكة
    الذي على جواز سفره .
    2- صورة من نموذج (I-20) وصورة من خطاب القبول الأكاديمي.
    3- عدد 4 صور شخصية ملونة مقاس 4 × 6 سم.- بدون شماغ أو غترة على الرأس
    بالنسبة للرجال .
    4- شيك ملغي لإرسال المخصصات المالية للمبتعث إلكترونيا إلى حسابه بالبنك مباشرة.
    http://www.mbt3th.us/vb/forum8/thread169570.html
    5- صورة مصدقة من كشف الدرجات وآخر شهادة علمية تحصل عليها.
    6- صورة من قرار الإبتعاث الصادر من جهة إبتعاثه.
    7- صورة شهادة الثانوية العامة.
    8- صورة من دفتر العائلة أو حفيظة النفوس إذا كان متزوجاً وترافقه زوجته.
    طيب وكيف نسترجع فلوسنا --ايت فلوس؟؟؟ وه بسرعة نسيتو--- طبعا اللي دفعناها اول للسيفيس والفيزا والقبول حق الجامعة ؟؟عن طريق الملحقية طبعا راح ترجع لكم كل قرش بس انتو من البداية احتفظو بالفواتير والاثباتات حقت الدفع
    ادخلو الرابط دا
    http://www.mbt3th.us/vb/forum8/thread169570.html


    اتمنى اكون افدتكم لانو في دا الموضوع حطيت لكم كل المعلومات اللي انا اعرفها حسب خبرتي عشان اللي مو فاهم يفهم
    ومدري لو الوزارة او الملحقية دي السنة زادو شيء او نقصو شيء بالامور دي
    المهم قبل لا اروح ابغى اقلكم شيء
    1-اعتذر مقدما في حال لو مارديت على استفسار او شيء لاني راح اكون بالفترة القادمة مشغولة قررت اقابل الكتب الانجليزية اللي اشتريتها عشان اللغة مع اني عارفة اني راح ادخل اول ما اقوم من النوم لانو دا المنتدى ادمان الحقيقة
    2-امانة ادعولي ترى الموضوع اخذ مني ساعات وانا اكتبو ووقت ومجهود ويدي اتكسرت
    المهم كمان
    3-كل من دخل الموضوع يعمل رفع او حتى لو حط كومنت يرجع يحط تاني لو شاف الموضوع نزل على تحت عشان يستفيدو اكبر قدر ممكن من الناس
    4-معليش لو في كلجات لاني كتبتو بسرعة وماعملت رفيوو وانا مدري ايش هرجتي عندي في الكيبورد حرف النون ملقوف يدخل في كل هرجة يعني اجي بدي اكتب انا اقوم مع السرعة اكتبها انان او مثلا الناس اكتب النانس المهم افهموها وهيا طايرة واسترو ما واجهتو

    ولو افتكرت شيء او كانت في نقطة ناقصة امكن راح اجي اعمل تعديل للموضوع-يعني الموضوع طور التحديث .

    ************************************************** ************************************

    ::تـــدخـــل رقـــابـــي::
    نظـراً لأهميـة المـوضوع وما يحـويه من معـلومــات مهمــه للطالــب المقبــل علــى الأبتعــاث فقــد قــررنـا تثبيتــه,
    لكــن الـرجاء التأكـد من بعــض الـروابـط وبعـض المـواضيع،،،لأن الإجـراءات تتغيــر مـن وقــت إلـى وقــت وقـد يطــرى عليهـا بعـض التحديـثات.
    أيضـاً هنـاك مـواضيـع قديمـه تكـون تابعـه لمـراحل سابقـه قـد لا تكـون بالضـرورهـ مطبّقــه في هـذه المرحلـه بنفـس الإجـراءات.
    وعليـه لا بــد من التأكــد من كافــة الأجــراءات مـع مـرور الوقــت لانهــا قابلــه للتغييــر،،،ولذلــك نخلـي المسـؤوليـه من عاتقنـا.
    شكـراً لصـاحبة المـوضوع علـى مجهـوداتهـا العظيمــه
    في أمان الله



  2. هههههههههههه رائعه اختي في الاسلوب الجميل والسلس . لتوصيل الفكره والمعنى لشخص الذي يصعب عليه معرفته ...

    لكن انتي قلتي اذا راااح لامريكا يقدر يغير المعهد اذا ماعجبه ....

    لكن النظام الجديد يقول ماااااااااااافيه تغيير الشخص الي يحصل على قبوول من المعهد او الجامعه مااارح يغييره نهاائي ...

    يعني لا تتوهقووون دورلك على معهد وانت متاكد منه ..

    السبب انه صااارت مشاكل في الدفعات الساابقه .. لانه الوزراة تتحمل التكلفه وحجز المقعد للمبتعث واذا غيير الى معهد ثاني تددفع مره ثانيه ويكون كذا صاارت التكلفه عاليه ...

    هذا حسب مااوصلني ..

    واذا الشخص يريد يبعد عن المشاكل دور معهد وانت مقتنع فيه من البدايه وتفك نفسك ..
    7 "
ADs

قم بتسجيل دخولك للمنتدي او

الانضمام لمبتعث

Search Engine Optimization by vBSEO ©2011, Crawlability, Inc.