اسفسار بخصوص السكن

السلام عليكم ورحمة الله وبركاته

اسعد الله اوقاتكم بكل خير احبتي

يوجد لدي استفسار عن السكن

فانه من المطلوب لاستخراج الفيزا احضار ورقه اثبات سكن وكما ان الدراسة في امريكا تتطلب ايضا سكن :

ويكون السكن على الطالب ولكن هل تقدم الوزاره لك خيارات السكن وماهي خيارات السكن

بالنسبة من تقدم وسكن من قبل ماهي الطريقة التي اتبعها لانهاء اجراءات السكن وكيف حصل على ورقة اثبات السكن

شاكرين لكم ,,,,,,,,,,,,,,,,,,

حبيبي الفيزا الامريكية حقت الدراسة .. ( نوعها F-1 ) لا تتطلب اثبات السكن بس تتطلب حاجة اسمها I-20 وهي ورقة قبول المعهد او الجامعة لك ...

الوزارة لا تقدم لك سكن ولا تقدم خيارات سكن ولا لها شغل في هالموضوع انت توقع عقد مع احد المؤجرين وتستاجر

خيارات السكن بامريكا لك ياخي على النحو التالي ..

1- الايجار الشهري ... ويختلف قيمته من ولاية لاخرى حيث في اغلب الولايات في امريكا وفي المتوسط تجد شهريا السكن بـ 600 الى 1000 دولار والغالب حول ال 700 .. بس انتبه من جد كل ولاية لها اسعارها .. وطبعا فيها غرفة وحدة وفيها غرفتين وفيه 3 يختلف

مثلا في ولاية اوريقون تجد الاسعار من 650 الى 1200 دولار .. للغرفة وممكن غرفتين فوق 850 .. وفي ولاية كاليفورنيا .. في لوس انجلوس تلقى بس غرفة واحدة رديئة بـ 1600 دولار على الاقل مقارنة بغرفتين في اوكلاهوما بـ 500 دولار !!!!! يعني مرررره يفرق بين المدن والولايات ..

2- امتلاك سكن ..

وهذا يفضل لو انت بتدرس معهد + جامعة بنفس المدينة والولاية .. وفي عندك مقدرة مالية انك تشتري شقة .. ولن تخسر فيها الكثير لانك راح تشتري ثم تبيع اول ماتخلص ..!! وترتاح من تكلفة الايجار .. ويمكن تبيع بنفس السعر اللي شريته به .. فيصير بدال ماتحط فلوسك بالبنك تخليها في السكن ليين تخلص ولا تصير تدفع ولا ريال للسكن .. طبعا مااعرف الاسعار .. ..

3- السكن مع روم ميت .. وهي طريقة حلوة تبحث فيها عن شخص عبر النت .. او اي وسيلة اخرى او تجده هناك وقد يكون سعودي من هالمنتدى او تعرفه .. على ان يدفع كل منكم نصف الايجار .. او ان تكونوا مجموعة ويصير الايجار بينكم .. ويخفض عليك سعر السكن .. وهي حلوة لو لقيت لك روم ميت امريكي عشان تتعلم منه اللغة بس انتبه من المكسيكان .. لا تجي معهم في بيت ..

4- الخيار المفضل لدي .:. وخصوصا في فترة اللغة .... السكن مع عائلة ... طبعا في عائلات تستضيف الطلبة الاجانب .. بس خذ في الاعتبار ان هذه العائلات تختلف فيها الكويس وفيها الشين وفيها من يستضيف معك 4 وفيها من يستضيف معك واحد ثاني قد يكون اسيوي او من اي دولة وفيها من يستضيفك لوحدك ..

والغالب بنسبة 99% من هذه العائلات تقدم لك وجبتين في اليوم .. مع امكانية استخدام المطبخ .. والغالب ايضا يعطونك دورة مياة مشتركة الا اذا دفعت اكثر لبعض العوائل

وليكن في معلومك ان دورات المياة وانت بكرامة مافيها موية للاستنجاء وانت بكرامة فطبعا قبل لا تروح لامريكا جب معك شطاف الوضوء او اي شي ثاني واعمل حسابك ان الارضية ماتبتل ..

واحرص على الكهرباء لانهم يعاتبونك عليه ..

وترا اغلب العوائل تقدم لك النت والموية ببلاش بس لا تبذر لانهم بيتهاوشون معك ..


كيف تحصل على هالخيارات ..

في 5 طرق ..

1- عن طريق النت .. وهي الطريقة الشائعة والاكثر استخدامًأ وفي مواقع متخصصة بايجار الشقق والاستديوهات ( الاستديوهات شقق صغيرة الصالة تكون مربوطة بالمطبخ .. ) وبعضها متخصص في السكن مع عوائل او مايسمى homestay وبعضها في بيع العقارات وبعضها في .... الخ .. وبعضها مشترك فيها كل شي .,,,,, والغالب الصور للمساكن في تلك المواقع تكون خادعة ومغرية وتجيب اجمل مافي السكن ويتم تعديل الصور وتصويرها بواسطة محترفين .. فالافضل انك تروح تشوف ..

2- عن طريق احد المعارف او احد اخوانك السعوديين هناك .. ويقوم بالبحث لك اذا جيت مدينته وفي ناس متعاونة كثير هناك .. وبعضهم يفرح لانك جيت مدينته لقلة السعوديين فيبحث لك ويخدمك او يبي الاجر ... وهو شي حلو ... وممكن تطلب منه صور ...

3- عن طريق انك تقرا في المواقع اللي بالنت عن خيارات السكن .. وتحط عدة بدائل .. نقول 20 شقة .. وتروح لمدينتك بعد ماتحجز فندق وتسكن فيه مدة خلالها تفرفر في هالشقق لين ماتقرر اي شقة بتاخذ .. وهذا الشي اشوف انه قرار حكيم وحلو .. فيما لو كان معك فلوس للفنادق واحب اطمنك ان الفنادق في امريكا رخيصة جدا مقارنة بالسعودية وفااااارق كبيييير جدا بينهما ...

4- في طريقة سيئة ولا انصح فيها .. وهي انك تاخذ سكن خارجي عن طريق المعهد او الجامعة .. .. فيصير هي وحدة من ثلاث ...

ياما ان المعهد رحيم وبس بياخذ منك مبلغ لمجرد انهم وصلوك للعائلة او وصلوك للبيت والغالب هالمبلغة 150 الى 300 دولار .. تدفعها مره وحده
او ان المعهد شجع شوي وبيصير يوصلك على اساس انك تدفع له كل شهر مع الايجار !!! يصير بدل الايجار مايكون 600 يصير 900 ... 300 للمعهد او الجامعة والباقي للعائلة او اذا المعهد مو طماع بيعطيك اياها 50 دولار شهريا
الخيار الثالث انه ممكن يقولك بتدفع رسوم ال placement ومعناته رسوم ايجاد السكن او العائلة + رسوم شهرية !!!!!

والاغلبية الساحقة من المعاهد والجامعة يكونون رحيمين ويوصلونك للعايلة بمبلغ واحد يدفع مرة وحدة

5- في طريقة انو ممكن انك تسكن في سكن المعهد او الجامعة وهذي يعيبها انك بتكون مع طلاب سعوديين او ناس لا تعرف اللغة في مرحلة اللغة فيصير في لخبطة .. ^_^

موضوع للـ الرفع لاهميته