عدة استفسارات

بسم الله الرحمن الرحيم

اخواني محدثكم طالب قدم على البعثة وقبلوه الحمد لله

وعندي عدة استفسارات أول شي متى موعد السفر النهائي (الفترة بين التدقيق والسفر)

وفي هل المدة وش افضل طريقة للتقوية في اللغة؟؟

بالنسبة للمكافأة هل تكفي (ادري على حسب الولاية) لكن هل يمديني أوفر من المكافأة بشكل دائم
وبالغالب كم اقصي شي؟؟

بالنسبة للولاية نصحني واحد بسياتل لك ما أعرف أي شي عن الولايات
بالعامي ابي ولاية طبيعية وفيها بحر ونهر وتكون فيها اسواق؟

وبالنسبة للسكن ابي اسكن عند عائلة كيف الطريقة؟؟ ،ما ابي سكن فردي (عشان أطور اللغة)

هل تنصحونيي اروح لمكتب يضبطني؟؟

وبالنسبة للتخصص الحين أنا مقدم كيمياء هل يمديني أحول هندسة؟؟ ولا أختار هندسة بحار وبعدين أحول
هندسة تخصص ثاني أفضل؟؟

فيه شي يدور براسي بس ما ادري كيف ،هو اني ادرس لغة من سنة ونص لسنتين وبعدين الغي البعثة
وأتوظف براتب وقدره مترجم ،وبنفس الوقت أدرس بكالوريس عن بعد English أو غيره؟؟

وإذا فكرت بأي استفسار ثاني ان شاء الله ما تقصرون

ومشكورين مقدما. :)

وفيه استفسار بالنسبة للشهادات انا عندي شهادتين وحده عطيتها الإبتعاث ووحده بالجامعة للحين مقدم عليها اعتذار

هل لازم اسحب ملفي من الجامعة ولا عادي؟؟

وبالنسبة لتغير التحصص فهل افضل اني اكون كيمياء واحول لتجصص ثاني ولا اكون علوم صحية واحول؟؟

السفر بعد الملتقيات يعني بعد تاريخ 28 ذي الحجة لو تسافر 29 ممكن !!!... .لكن طبعا مااتوقع يمدي احد على هالتاريخ ..

السفر اهم شي تخلص فيزتك وقبولك وتصدر قرار الابتعاث والقرار مايصدر الا بعد الملتقيات ...

ممكن تكون خلصت الفيزا قبل الملتقيات وتسوي قرار الابتعاث يوم 29 ذي الحجة وتسافر 30 .. ليش لا .. لكن هل تضمن انك بتلقى قبول على هالتاريخ ؟ وهل تضمن ان القبول اللي حصلت عليه غير متكدس (لانك اكيد بتراسل قبل نزول القائمة نتيجة لتأخرها وتبكيرك .. ) وهل تضمن انهاء اجراءات الفيزا بسرعة ؟؟

الوقت المتوقع لسفر اول دفعة من المرحلة الثامنة هو شهر 2 هجري او نهاية شهر 1 وهم اللي خلصوا بسرعة اجراءاتهم ..

لتقوية اللغة : ...

ادرس في معهد ادخل على قناة ابو عمار على اليوتيوب وهو صراحة مميز .. ومواقع لتعليم الانجليزية مثل engVid ومواقع اخرى كثيرة ..

اما بخصوص المكافأة تكفي او لا ..

اقولك هي تختلف بحسب 4 عوامل ..

1- اسعار الولاية والمدينة والسكن والضريبة ..
2- طبيعة صرف الطالب ومدى اهتمامه ...
3- عدد الاشخاص الذي يعيلهم الشخص .. مثلا اللي عنده اطفال بيتعذب من الحضانة ... وهل هناك راتب مرافق او زوجة مبتعثة هي الاخرى ,,,
4- طريقة اختيار الشخص لاستراتيجية الصرف .. فمثلا في جانب السكن ... ممكن تسكن مع شخص وتخفض اسعار السكن والغاز والموية والصرف والكهرباء الى التصف .. وممكن تسكن لوحدك .. ومن الممكن تسكن مع عائلة وتختصر الماء والصرف والغاز والكهرباء والطعام لوجبتين ... وبعض العائلات لا تقدم وجبات ..

فمدينة زي نيويورك على الاغلب حتى وان كانت صرفية الشخص معقولة صعب تعيش فيها الا انك تاخذ روميت وتتقشف في معيشتك ..

لكن على اغلب الولايات وفي ظل صرفية منطقية للشخص وكونه يصرف على نفسه يمكنك التوفير ....

فبعض الولايات من الممكن ان توفر فيها 200 دولار شهريًا واخرى 500 واخرى 1000 !!!!!!!!! واعرف شخصيًا طلاب في مدن يوفرون مثل هذا القدر ...

سياتل راااااااااااااااااائعة ومن اجمل المدن وطبعا لم اكن لأخطاءها عن بقية المدن والولايات وانا اشهد اللي نصحك فيها انه فاهم وبحث صح .. لكن يعيبها غلاءها .. ومن الممكن تحمله مثل ماذكرت لك

طبعا سياتل مطر اغلب السنة وفي الحقيقة اكثر الايام رش ورذاذ ... وغير كذا كل الخدمات فيها من الى واسواق واماكن ترفيهية وخدمات وهي مقر قوقل ومايكروسوفت وطائرات ايرباص تصنع هناك وستار بكس بدأت منها ومقرها هناك والكثير الكثير .. وفيها بحيرة ممتدة من البحر وكذلك البحر لو بغيته قريب .. وجنبها واحدة من اروع الاماكن السياحية الطبيعية في امريكا وهي Olympic national park وجامعاتها جامعة واشنطن الشهيرة وهي من اقوى جامعات امريكا وترتيبها اظن 31 .. وجامعة سياتل كذلك .. وفيها معاهد زي اليوداب قوية لكنها مليانة سعوديين .. اغلب ايجارات المدينة في حدود ال 1000 دولار .. من 850 الى 1200 تقريبا ...

لما تبحث عن سكن عائلة في مواقع توفر هالشي مثل Homestay Finder - Helping host families and international students to find each other
و HomestayWeb - Find a homestay family

وحط في قوقل homestay وممكن تلقى لكل مدينة او ولاية موقع للعائلات المستضيفة ..

وقبل لا تسافر تواصل مع العائلات ولما توصل اسكن بفندق ومر على عدد من العائلات اللي لقيتها بالنت وشفهم وشف البيت حقهم ... وكل شي .. وقرر اخر شي ...

بعض المعاهد يضبطون لك سكن عائلة لو طلبت لكن كل شي بفلوس طبعًا ... وممكن مكاتب القبول مع اني مااتوقع تلقى عندهم ..

ممكن تحول هندسة وهي انك ترفع طلب للملحقية بهذا الشيء .. وتوضح الاسباب وطبعا قبل ماترفع الطلب تجيب معك قبول للهندسة

اما اللي يدور براسك تراك بتحجز مقعد في الابتعاث فلا تحرم غيرك هالمكان .. وحتى لو لم تكن لتحجز او تضيع اموال الدولة فمو منطقي لمصلحتك ..

كيف عندك شهادتين ؟؟ على كل ترا البرنامج يشيك على رقم السجل المدني ويعرف انك طالب وحتى لو سلمته الشهادة ترا سيقومون بمراجعة ملفك في وزارة التعليم العالي وملف اي شخص موظف في القطاع العام مسجل على الخدمة المدينة ويتم رفضك لانك في جامعة .. ولازم اصلا في التدقيق تسحب ملفك وتجيب معك ورقة اخلاء طرف الهدف منها .. انه ممكن يكون اسمك مسجل بجامعة وانت منسحب ولم يتم تحديث البيانات ..

وبما انك في التدقيق ماجبت اخلاء الطرف لازم تروح للرياض وتجيب لهم اخلاء الطرف حقتك .. ولازم تسحب ملفك

التحويل من تخصص اقل الى تخصص افضل العادة يكون اسهل ..

بالتوفيق

الله يجزاك خير اوي عبدالله ويحسن إليك

طيب هل يمديني اغير التخصص إلى علوم صحية بعد التدقيق ولا أخليه كيمياء وبعدين حول من هناك هندسة؟؟

ممكن تحول الان لعلوم صحية واذا وصلت تحول هندسة .. او تخليك على الكيمياء ومن هناك تحول هندسة .. وحقيقة لا اعرف بشكل أكيد ايهما افضل لك ..

موعد السفر راح يكون بعد التدقيق ب ٣ شهور او شهرين