اسال ونحن نجيبك في كل ما يخص الابتعاث ،،، نصائح ذهبية للمبتعثين الجدد

مقدمة
السلام عليكم ورحمة الله وبركاته
هذا اول موضوع لي في هذا المنتدي المبارك الذي كان له الفضل الكبير باعضاءه في تنوير دربي لما كنت على باب الابتعاث

غرضي من هذا الموضوع افاده اكبر عدد ممكن من المتعثين الجدد ومساعدتهم في جلب واختيار المعاهد المناسبه

وايضا المساعده في القبولات لان يولمني جشع المكاتب ويعلم الله ليس من باب الحسد او قطع الارزاق لكن يطلبون مبالغ عاليه وهم فقط يدفعون 200 دولار قيمة الابلكيشن والتوصيل ويتقاضون الالاف

وايضا يسرني تقديم المشوره فقط في حالة كنت متاكد منها وسبق ان حصل لي تجربه راجيا من الله الاجر والثواب

وسبب اخر بعدما قابلت بعض المبتعثين الجدد وقد وقعوا في اخطاء لم تكن بالحسبان كلفتهم ضياع وقت وجهد ومال


قبل استقبال اسالتكم اود سرد بعض النصائح المهمه جدا جدا جدا

مرحلة اللغة :

1- يجب على كل مبتعث ان يعي ان فترة اللغة هي اصعب مرحله في الابتعاث وسبق ان نبهني من سبقني بهذه النقطه ولم التفت لها وتفاجات بمدى صعوبتها ، ولكن هنا سوف اوضح اين تكمن الصعوبه
الصعوبه لا تكمن في تعلمها ولكن الصعوبه في تحقيق الدرجة المطلوبه في اختباري الايلتس والتوفل لدخول الجامعة ففتره ال 18 شهر لا تكفي لتحقيق درجه عاليه .
من يريد ان يتاكد من هذا النقطه عليه ان يدخل هذا الرابط انتهت فترة اللغة - Google Search وهو عباره عن بحث في قوقل عن كمية الاستفسارات لمن انتهت فترة ال 18 شهر ولم يجدوا قبول جامعه

عارف بعد قرااءة النقطة الاولى حسيتوا بشي من الاحباط لاني مريت فيه وعالجته بشكل سلبي بقول ( يارجال يحلها الف حلال ) ما بدات بتنظيم ،،،، طيب ايش الحل ؟؟؟

3- الحل يكون في رسم خطة مستقبليه معلومة الاهداف وراح اسرد خطوات تنفيذ هذه الخطه المحكمه باذن الله تحقق لكم الهدف المرجو

هذه الخطه مخصصة للمبتعثين اللي يعتبرون انفسهم صفر بالانجليزي الى اللي عنده بعض الكلمات يقدر يتكلم ع خفيف ويجب تنفيذ هذه الخطة قبل السفر

هذا الخطه طووووويلة التنفيذ وتحتاج وقت لهذا يجب تنفيذها قبل السفر لان بعد السفر لن تستطيع البحث

>>>> نبدا الخطوات

1- البحث عن جامعة يتوفر فيها هذه المعايير : موصي بها ، تخصصك موجود فيها ، فيها معهد تابع لها ، تطلب في الايلتس من 5 الي 6.5

2- كيف نحدد الجامعة ؟؟ فيه كم طريقه اما ان تسال اصدقائك او في المنتديات لكن الافضل وهي تحتاج وقت وبحث طويل لكن ستصل الي نتيجة حلوه وهي كالتالي

1- ابدا في محرك بحث الجامعات الموصي بها في موقع وزارة التعليم العالي واختر الولايه اللي ترغب فيها والتخصص الي ترغب بدراسته

2- عادة سيظهر لك نتايج كثيره ابدا بالبحث عن كل جامعه : هل لديها معهد تابع لها ؟ كم تطلب في الايلتس ؟ وكل جامعة تستوفي المعاايير المذكوره في نقطة 1 تسجلها في ملف خاص وتسجل كل المعلومات عنها

3- بعد ما تنتهي من عملية البحث ويصفي عندكم كم جامعه مستوفيه المعايير بعدها استبعدوا منها الجامعات الموجوده في مدن غير امنه

4- اللي يصفي من عملية البحث الطويله تقدر تختار منهم وانت مرتاح واللي يعجبك منهم واذا فشلت عملية بحثك ولم تجد جامعات مستوفيه الشروط غير الولايه وابحث من جديد

انا عارف ان الطريقه والخطه مجهده وبالنسبه لكم غريبه جدا لاني كنت في مثل موقفكم كان همي الوحيد اني احصل معهد واركب الطياره واذا وصلت يحلها الف حلال لكن يعلم الله اني تجرعت الامرين يوم انتهت فتره اللغه مثل البرق وانا ما حصلت قبول
واضطريت اني ادخل تخصص ما كان طموحي اني ادرسه لكن هذا اللي حصلته والحمد لله في غيري كثييييييير رجعوا للسعوديه بعد اللغة لانهم ما حصلو قبول جامعه والملحقيه ما عندها تفاهم توقف الصرف اول ما تنتهي الفتره

تنبيهات ماليه

1- اكبر خطا يقع فيه المبتعث ان يضع امواله في حسابه السعودي ويصرفها في امريكا :
الحلول : 1- يكون عندك حساب سعودي ومفعل خدمة الاون لاين بحيث اول ما توصل دولة الابتعاث وتفتح حساب تحولها اون لاين ع حسابك الجديد وهذي افضل طريقه بس تاخذ معك كاش بحدود ال 2000 دولار تحسبا لاي ضرف

2-اذا ما قدرت تسوي الاون لاين تسحبها كاش لين ما توصل وتفتح حساب وتودعها فيه في حاله ان الكاش اللي معك اقل من 8000 الاف دولار
3- تسحب المبلغ كامل وتتركه عند اخوك ويحوله لك اذا وصلت وفتحت حساب

لكن انصح بشده تطبيق رقم 1


2- الاسعار في امريكا جدا جدا متفاوته لذا يجب عليك قبل السفر وبعد تحديد المدينه ان تبحث عن اسعار الاثاث والاجهزه الكهربائيه واي شي متوقع تشتريه فور وصولك وعن الاماكن الرخيصة

3- الاستعجال بشرا الاثاث وخاصة الثقيل اللي يحتاج نقل لان النقل مكلف جدا انتظر لين ما تتاكد انك في السكن المناسب

السكن

1- لكي تكون مبدع في البحث عن السكن يجب عليك ان تتدرب كيف تستخدم موقع ( قوقل ماب ) من قوقل ماب راح تعرف :

1- رابط السكن اللي تبغاه
2- كم يبعد عن معهدك مشي او باص او سياره
3- راح تعرف ايش قريب منك
3- المسافه مشي من شقتك الي محطه القطار او موقع الباص ثم المسافه من موقع القطار او الباص لاقرب نقطه توقف للجامعه ومنها الي الجامعه
بالنهايه راح يكون عندك صوره تخيليله عن مشوارك من تطلع من البيت الي المعهد او السينما او السوبر ماركت او اي مكان ودك توصل له
فقط تدرب عليه لفتره طويله وراح تكتشف المزيد من اسرار هذا الموقع الرهيب
4- للي عندهم اطفال تقدر تشوف ايش الحضانات القريبه


2- العقد : اهم حاجه لازم تعرفها في عقد السكن هي مدة العقد ( Lease Term ) كل شهر كل 3 كل 6 كل سنة
مثال : لو استاجرت شقة عقدها 6 شهور مو معناته مثل عندنا الدفع كل 6 شهور لا راح تدفع كل شهر لكنك ملزم باكمال المده ( 6شهور ) وفي حاله انك قررت تطلع قبل راح تدفع شرط جزائي

فلازم ايضا تسال عن الشرط الجزائي اذا كان مبلغ جامد والشقه منت جازم انك تكمل فيها دور غيرها

عموما انا انصح في البدايه تبحث عن عقد كل شهر ويسمونه ( month on month ) وتشوف اذا هي مناسبه تكمل فيه واذا لا تبحث عغيرها ع راحتك


السيارة والتنقل

1- انصح وبشده للمتزوجين تامين مبلغ لشراء سيارة لانه ممكن راح توفر عليك تعب وتوفر عليك ماديا كثييير كيف ؟

اذا اشتريت سياره ماراح تضطر انك تسكن قريب من الجامعه اللي عاده اسعاره مرتفعه ايضا ماراح تضطر ع اماكن بيع محدده مثل ماقلت لكم قبل الاسعار في امريكا جدا متفاوته ممكن تحصل حاجه ب 50 دولار ومثلها ب 10 في مكان ثاني

اما العزوبي فيقدر يصبر فتره طويله بدون سياره لانه راح تلقون اخوانكم قدامكم وما راح يقصرون

2- شرا السياره جدا سهل وممكن اي مبتعث سابق تتواصلون معاه في مدينتكم يساعدكم او بالبحث في مواقع السيارات بالنت او الذهاب مباشره للمعارض

3- يجب استخراج رخصة قياده ساريه المفعول وفيها اسمك باللغة الانجليزيه


الولايه او المدينه

كثيير من المبتعثين يحتارون لما يبغون يختاروا ولايه

مثلا فيه ناس عندهم رغبه انهم يدرسوا في كاليفورنيا ـ الولايه اللي اعتقد ان دفعتكم اخر دفعه راح تقدر تدخلها ( مجرد احساس انها راح تتقفل مثل فلوريدا) -

لكن ينصدم لما يسمع خبر انها ولايه غاليه ويغير رايه

اللي احب اني اوضحه ان الاسعار بين مدينه ومدينه تفرق لذا دايما اسال عن المدينه وليس الولايه


طيب واحد يسال يقول كيف اعرف ان المكافاه تكفي او لا ؟

الجواب : اول حاجه تسال عنها قيمة ايجار السكن والحضانه اذا عندك اطفال وليس هل المدينه الفلانيه غاليه او رخيصه محد راح يعطيك جواب دقيق

لان السكن الحاجه الوحيده اللي تختلف اختلاف جذري من مدينه الي اخري مثلا انا سكنت في 3 مدن في كاليفورنيا

الاولي السكن لم يتجاوز ال 800 دولار الثانيه بحدود ال 1000 الثالثه يتعدي ال 1500

الحاجات االي راح تدفعها غير السكن متقاربه في جميع الولايات مثل المعيشه الفواتير والباصات والترفيه

كيف احسبها صح ؟

اذا تبقي لك من 1400الي 1600 ( للمتزوجين ) و 800 - 1000 ( للعزاب ) من المكافاه بعد خصم قيمه السكن والحضانه فاعرف ان وضعك مطمئن لكن تحتاج الي ضبط مصروفاتك

مثال 1 : مبتعث واحد مكافاته 1850 يبحث عن سكن او عايله لا زم انه ما يتعدي ال 1000 دولار

مثال 2 متزوج وزوجته مكافاتهم 2800 يبحث عن سكن مابين 1200 - 1400

مثال 3 : مبتعث وزوجته وطفل مكافاتهم 3100 لازم يكون السكن + الحضانه ما يتعدي 1600

وهكذا


موعد السفر

ايضا من الاسئلة المتوقعه متي اسافر ؟ بكم يوم قبل الدراسه ؟


النظام يسمح لك قبل موعد الدراسه ب 30 يوم
وانا راح اقدم نصيحه علي حسب الحاله الاجتماعيه

اللي ما معه طفل يفضل قبل الدراسه ب اسبوعين

اما اللي معاه طفل قبل الدراسه ب 25 يوم

ممكن كثير يخالفوني لكن صدقوني عشان تاخذ راحتك بالبحث عن عايله او سكن او حضانه ويجبرك عامل الوقت انك تاخذ شي ما تبغاه

وايضا ع الاقل تكون خلصت كل شي قبل الدراسه ب 5 ايام وقتها ترتاح شوي قبل الدراسه

نصيحة اخيره تحمل عصاره ما كتبت

اعلم جيدا مدي حماسكم للسفر واعلم مدي صعوبه انتظاركم لنتايج الترشيحات وقد جربته قبلكم ،،،، لكن لا تسافر الا وانت مستعد وعارف كل شي لكي تصل وانت مستعد جيدا للدراسه وحتي لايضيع عليك اي شهر



اعتقد هذي النقاط المهمة جدا التي يجب علي المبتعث معرفتها لانها تحصل قبل استقرار المبتعث ومعرفته للاجواء المحيطه به

اي استفسار او مشوره في اي نقطه تتعلق بالابتعاث انا مستعد الاجابه عليها ولن اجتهد في اي معلومه لا املك اجابتها 100 ٪

ولكن ارجوا ان تعذروني في حالة تاخري في الرد لاني والله مشغول جدا في الدراسه لكن ساجتهد قدر الامكان من اجلكم