السلام عليكم ،،
بمناسبة أن عدد كبير من الطلاب يبحثون الآن عن معاهد ، أنا بأعطيكم رأيي الشخصي عن هذا المعهد :
سمعت كثير من الطلاب قبل ما أجي أمريكا يذمون هذا المعهد ، ولا أحد منهم أعطاني سبب وجيه !
الحين أدرس مع الأسف في معهد ALP في جامعة أوهايو استيت في كولمبوس ، وقبل ما جيت كلهم يمدحونه ، ولا أدري إلى الآن على أي أساس ؟!
مزايا معهد ELS على المعاهد اللي يقولون عنها أنها قوية على مستوى أمريكا مثل معهدنا :
1- تتخرج من معهد ELS معك شهادة تقبلك فيها عدد كبير من الجامعات بدون توفل أو آيلس خاصة إذا كنت في البكالوريوس ، أما المعاهد اللي ينقال عنها انها قوية مثل معهدنا تتخرج ما معك شهادة معتبرة في أي مكان ! يعني ممكن أنك تتخرج من معهدنا ولا تجيب درجة التوفل أو الآيلس وترجع السعودية ، والحين أعرف شخصين أحدهم في جامعتنا والثاني في جامعة كابيتال بيخلصون فترة لغتهم وقريبين من التخرج لكنهم ما جابوا الدرجة في الايلس وبيرجعون للسعودية قريب . لكن في معهد ELS بتضمن لك شيء على الأقل .
2- برنامج الدراسة عندهم نظام شهري ، يعني كل شهر في فرصة دراسة ، وهذي ميزة مهمة جدا من ناحيتين :
- الناحية الأولى : لو صار لك ظرف لا سمح الله وتأخر سفرك تقدر تدرس في الشهر اللي بعده على طول ، لكن المعاهد اللي ينقال عنها انها قوية نظامها مثل نظام الجامعة يكون ثلاث سمسترات أو أربع كوارترات ، ومعنى هذا لو صار لك ظرف مثلي أنا تأخرت فيزتي يومين بس ! واضطريت أني أأجل للكوارتر اللي بعده وانتظرت ثلاثة أشهر !!
- الناحية الثانية : تقدر تاخذ إجازة في أي وقت مناسب لك ، مثلا معهدنا الحين نظامه سمسترات لو أبي أسافر لأي سبب ما أقدر إلا بعد ثلاثة أشهر ، يعني مثلا لو جاء رمضان وعندك دراسة ما تقدر تسافر إلا إذا أجلت سمستر كامل ! أما في معهد ELS تقدر تأجل شهر بس . وأحيانا يتعارض وقت استحقاقك للتذكرة مع الدراسة في المعاهد اللي نظامها سمسترات أو كوارترات .
3- معهد ELS رخيص جدا للي يبون يجون على حسابهم ، والفرق أحيانا يوصل بينه وبين المعاهد الثانية أربعة أضعاف !
4- معهد ELS دوامهم أطول من كثير من المعاهد اللي تابعة لجامعات ، وهذا بيفيدك أكثر .
5- الميزة الأخيرة والمهمة بالنسبة لي ، أن معهد ELS فيه نسبة أجانب أكثر من المعاهد الثانية ، والسبب أنه رخيص ؛ لأن الأجانب أكثرهم جايين يدرسون على حسابهم وما عندهم بعثات وهم اللي يدفعون لأنفسهم فيبحثون عن معهد رخيص ، وتخيل أنه معك في الكلاس تقريبا ستين بالمية أجانب ، ودوامك طويل فبيكون كل يومك إنجليزي معهم وتكون كل معارفك بالأجانب وبتكتسب ثقافات مختلفة وتمارس أكثر ،، لكن ! معهد مثل ALP كل اللي معي في الكلاس سعوديين وكويتيين ، وتعرف وش معنى إذا كان معك سعوديين ، يعني مستحيل تتكلم في الكلاس إنجليزي ! وكلهم ببضحكون ويعلقون عليك ، في واحد في كلاس جنبنا يحاول يتكلم إنجليزي مع السعوديين كلهم يضحكون عليه ، وهو الوحيد اللي أعرفه يسوي هذا الشيء .