كيفية البحث عن أفضل الأحياء من حيث الأمان - خاص بأمريكا

السلام عليكم :D كيف الحاال جميعاً
أنا آسفه اذا الموضوع متكرر او في أحد حطوا قبل كدا ماعرف و ماعرفت كيف ابحث في الموقع اذا الموضوع موجود او لاء
بس قلت انو ماراح تكون مشكله وراح اضيفو

راح أدخل في الموضوع على طول

كلنا نعرف انو الأمان لا يقدر بكنوز الدنيا أفضل اقعد في بلدي على اني اعيش في مكان ما أأمن فيه المحيط اللي حواليني


ولاني شفت رد على موضوع المعاهد الموجوده في الأحياء الخطيره فكرت ليش ما أشاركم بالقليل اللي اعرفو


نقدر نسوي كدا بطريقتين الاولى هيا >>> google

ندخل قوقل ونكتب بكل بساطة >>> the most dangerous cities in usa

راح نختار موقع مهم إللي هوا دا >>> Neighborhood Search for Home Buyers and Real Estate Investment - NeighborhoodScout

وراح يكون معنون كدا >> Top 100 most dangerous places to live in the USA


ممكن ندخلوعلى الموقع من قوقل و ممكن بكل بساطه ننسخ اللينك و ندخل عليه على طول بس انا كنت ابغاه يدخلني على

صفحة اخطر المدن بالتحديد وهيا اللي راح اتكلم عليها و اضرب عليها الأمثله

اذا دخلنا راح تجينا قائمة اخطر المدن من 1 إلى 100

وراح تكون بالشكل دا
V
V
V

http://im30.gulfup.com/OQQA1.jpg

خلونا نختار مدينه و نشوف ... اممم خلينا نقول مثلا مدينة شيكاغو في ولاية إلينوي

أول ما ندخل على المدينه المختارة

راح تطلعلنا صوره بهذا الشكل

V
V
V

http://im16.gulfup.com/Cpzx1.jpg

طبعاً هذي صورة لخريطة شيكاغو و فيها لونين معينه وهما الأصفر و الأزرق لو حطيت المؤشر على الخريطة راح نلقى
انها بتتفصل لأجزاء بإسم كل حي و ممكن تضغط على كل حي و تطلع معلومات عنو ... و كل ما أشتد الزراق كل ما كان الحي آمن و كل ما الزراق صار باهت و بدأ يميل للون الأصفر
يكون الحي خطير جداً و يفضل الابتعاد عن العيش فيه و عادة يكون ايجار السكن في دي الاحياء رخيص جداً فأنتبهوا مررررره لمن تجو تختارو السكن .. طبعاً الأمن و الأمان و الحفظ من الله
بس الأخذ بالأسباب واجب

في كمان حاجة مهمه في الصوره في أقصى اليسار للصفحة قائمة بأأمن الأحياء في شيكاغو حتلقوها مرقمه من 1 إلى 10

في كمان تحت الخريطة زي الجدول عن عدد الجرائم اللي ارتكبت و نسبة العنف و نسبة امان المدينة بالنسبة للمدن الأمريكيه
اذا تبغوا تبحثوا عن مدينة تانيه تقدروا تكتبوها بكل بساطة في مستطيل البحث الموجود في الموقع لاتنسوا ترفقوا اسم الولايه بعد اسم المدينة و بعدها تضغطوا على كلمة كرايم راتس " Crime Rates " آخر ايقونة ع اليمين فوق الخريطة و بس

ابغى اقول بس لا تتفجعوا من نسب الجريمه او من انو في احياء خطيره كتير لانو لو بحثتو عن المساجد و المسلمين في مدينة شيكاغو على سبيل المثال راح
تلقوا منها عدد كبير فزي مافي اشياء سلبية في اشياء ايجيابة كتير و زي ماقلت الامن و الأمان من الله بس حبيت احط الموضوع يمكن أفيد أحد بشي

وذا كان في اي خطأ فهو مني و من الشيطان و سامحوني على الاطالة


ملاحظة : تقدروا تعرفوا اذا المدينه غاليه أو لاء من اسعار السكن و ميزانيتكم اللي هيا المكافئة اذا سعر المكافئة مايغطي سعر السكن و سعر التوصيله من البيت الى الجامعه غير الأكل فتأكد
انو المدينة غالية بالنسبة لك

Peace :D

الله يكتب أجرك بالعكس أنا بانسبة لي أول مرة يمر علي موضوع كذا وشكرا عالمجهود

جزاكي الله الجنة يارب .. ^_^

جزاك الله ألف خير

لنا و لكم خيــر الجزاء جميعاً


نسيت أقول انكم تقدروا تبحثو عن أأمن المدن بنفس الطريقه إذا كتبتو في قوقل >>> the most safest cities in usa

معنون كدا
V
V

Top 100 Safest cities to live in the USA - NeighborhoodScout

حيدخلكم على نفس الموقع و راح تلقوا قائمة بأأمن المدن من 1 إلى 100

شكراً للجميع :)

الله يجزآك بالخير ع المعلومة المفيدة و جاري البحث :)

الله يجزاك الف خير يارب

جزاك الله خير ... للمفضلة

لنا و لكم خير الجزاء

شكراً

شكراً جزيلاً .. ياليت الأعضاء يتصفحوا الملتقى قبل لا يكتبوا موضوع جديد فيه اسئلة مكررة ..واغلب المواضيع الجديدة تستفسر عن نسبة الأمان في مدن أمريكا .. وجا هذا الموضوع في وقته بارك الله فيكِ.