23 ديسمبر .. بداية صفحة ومغامرة جديدة في حياتي

السلام عليكم يا اعضاء منتدانا العزيز :doofywave:

احب في البداية اني اهني كل المبتعثين والمبتعاث بقبولهم في المرحلة الثامنة ٬ عسى ربي انو يوفقنا كلنا ونرفع راس وطننا .
الموهم :
زي مو واضح في العنوان انا انهيت امور السفر كلها و حجزت تذاكري على يوم الاحد ٢٣ ديسمبر . بس حبيت اشارك لكم تجربتي كلها من اصدار للفيزا الى اصدار التذاكر !! :sweatdrop:

اولا : السفارة الامريكية :-

السفارة الامريكية وما ادراك ما السفارة الامريكية !
قبل ما اروح هناك وانا باقرأ عنها في الموقع وبعد المقابلة ٬ اكتشفت انو الناس بيكبروا موضوعها بزيادة ودا الشي كان مخوفني وقلبت مطوع بس ادعي واقرا :ghost:
بس اول نرجع ورا شوية ٬ بدايةً تعبية ال ( D-160 ) هادا كان اكتر شي يتعب تقريبا في العملية كلها وانا انصح انو الشخص يعبيه وهوا مروق مع كاسة الشاهي والمواضيع اللي تشرح طريقة تعبيتها ٬ وكمان ركزوا جدا في المعلومات الي تحطوها ولا تخلوا احد يعبيها بدالكم انتو عبوها بنفسكم واطبعو الاوراق في النهاية ٬ بعد ذلك نذهب الى حجز الموعد تخشوا على موقع فيزا بوينت تشتري ال PIN ب ٤٥ ريال ونعمل الموعد ونعبي اللي يتعبى واطبعوا ورقة الموعد ٬ بعدها دفع رسوم السيفيس البغيضة وتقدر ب ٢٠٠ دولار وطباعة الوصل ٬ اخر شي دفع رسوم السفارة من اي فرع سامبا او عالنت ازا عندكم حساب في سامبا.

هادي الخطوات هيا اخدت مني وقت كتير بصراحة بس انتهيت منها وطلع موعدي يوم التلوت ١١ ديسمبر << خسارة مو ١٢ ولا كان تاريخ مميز :weep: ٬ وجهزوا كل اوراقكم وخلوها في ملف وخدوا كل شي حتى لو مو لازم احسن من انو تنسى ورقة وتتعطل .... وطلعت للرياض يوم الاتنين عشان اقرب موعد للمقابلة عاد انتو وحظكم ممكن تلاقي في جدة ولا الشرقية موعد قريب .
وجا يوم الموعد وصحي المطوع اللي في داخلي وقمت اتجهزت ورحت السفارة وانا بس ادعي وصلت هناك ٨ وفتحو الباب ٨ ونص .. نعمة مو مرة تاخير ٬ دخلت اتفتشت واخدو الجوال وما الى زالك.. واعطوني رقم . جلست تقريبا ٨ دقايق << حاسبها تمام ٬ الا ونادوا عليا رحت عند الكاونتر وكانت في وحدة فلبينية اعطيتها اوراق الموعد وكل شي وسألتني بس سؤال واحد مو ٥ زي ما قرأت هنا ٬ ساأالت ايش رايح تسوي هناك ؟ قلتلها رايح العب ٬ فا مسكتني الباب :upset: ملاحظة : طلبوني رقم الطلب حق البعثة فا احرصو انو يكون معاكم .
بس دا كان في قلبي .. الي صار انو قلتلها انو رايح دراسة واخدت اوراقي وحطتهم في ملف شفاف وقالت وقت المقابلة الملف اعطيه للقنصل وقالت دحين روح اجلس الين ينادوك للمقابلة . جلست ولقيت كل الناس مررة مؤدبييييين مرة ما يبوا انو تنرفض فيزتهم :roll2:
الين دحين اوكي وواثق من نفسي .. الين تجي الصدمة !! لقيت انو كم شخص قبلي وشكلهم مبتعثين زينا اخدوا الورقة الصفرا وقتها رجولي ترجف ومو قادرة تشيلني وقلت في نفسي انا حاخد ورقة صفرا وحتأخر عن الموعد حق المعهد وتروح اموري في خبر كان .
ونادو رقمي للمقابلة وحانت لحظة الحقيقة ٬ قلت لنفسي حتى لو متوتر سوي نفسك واثق ٬ وبس رحت للقنصل وسويت حالي لطيف وقلت ( قود مورنينق سر ) وابتسامتي نص وجهي *افتكروا دا الشي خلوكم مبتسمين عشان يرتاحوا لكم*
و سألني كم سؤال بسيط ( قد رحت لامريكا - عندك اهل هناك - وايش رايح تسوي ) وجاوبت بكل بساطة وعادي تجاوب بالعربي ولا بالانجلش٬ طبطب شوية عالكمبيوتر الا وقلي أبدوللاه ( عبدالله بس بلهجتو ) فيزتك انقبلت روح لفيديكس سدد رسومها (٦٥ لداخل الرياض و ١٦٠ لخارجها ). عاد وقتها انا مرة فرحت ومشيت قدام الناس اللي بتستنى وانا اطالعهم بالنظرة المنتصرة ٬ و رحت لفيديكس اسدد ولمن جيت اكتب اسمي غلطت من كتر اني مو مصدق انو مشيت اموري بسرعة *الحمدلله*
خرجت من السفارة وطالعت الوقت لقيت انو خلصت الشغلة في ساعة ونص وانها مررة بسيطة فا صدقوني لا تشيلو هم بزيادة بس خليكم واثقين وانو اوراقكم كاملة .
عدا التلوت وعدا الربوع وجا الخميس ودق عليا الطيب حق فيديكس وقالي تعال خد جوازك . عاد تعال شوف الفرحة وقتها .
وبكدا انتهت رحلة السفارة بخير

---

ثانيا : وكالة شؤون البعثات :-
عاد دي شغلتها بسيطة وحلوة طبعا انا قررت اوفر وقت وطلعت لهم ما ارسلت لهم بالبريد ودا خيار للاولاد بس البنات اعتقد انو يرسلو بالبريد.
عالعموم رحت هناك يوم السبت بدري ٨ انا هناك٬ و اخدت رقم وجلست استنى وبرضو ما انتظرت كتيرو جهزت اوراقي من قبل ما يجي دوري خلاص عارف ايش يطلب ما يحتاج اضيع وقت وهوا يطلب شي شي وكمان عبيت وطبعت طلب اصدار القرار ٬ تلاقو في موقع الوزارة. جا دوري اديتو الاوراق وبس قعدت اوقع التعهدات ٬ بعدها قلي خلاص اتوكل وراجعنا بكرا . هنا انا انفجعت ! كيف بكرا ؟ كل الناس قالو انو في نفس اليوم طلعو القرار وحجزو وكل شي . قالي لا تعال بكرا ٬ قلت امري لله وكدا في ساعة خلصت بس ما خلصت !!
عاد جيتهم اليوم التاني قدو ارسلو القرار عالايميل و طبعتو من عندهم كمان عشان اخسرهم ورق :furious:... ورحت اخدت شهادة الثانوية من عندو وقالي ما يحتاج ورقة امر اركاب خلاص هيا صادرة لكم قلت اوكيه ورحت لمكتب الطيار هناك قدو انا اخدت رقم من اول عشان السرا
اديتو القرار والجواز وشفت الحجوزات وحجزت على يوم الاحد ٢٣ ديسمبر على الخطوط الاماراتية - ان شاء الله يكون اختيار موفق - واخترتها عشان البريطانية ما تسمح الا بشنطة وحدة دي سمحت بشنطتين كل وحدة ٢٣ كجم .
وحيكون عندي ترانزيت في دبي للاسف ٩ ساعات بس حاخد فندق للراحة ٬بعدين دايركت الى سياتل - الولايات المتحدة.
ملاحظة اخيرة : في مواضيع كتير ساعدتني في كل خطوة ابحثو عنها راح تفيدكم جدا ـ اعتذر انو ما اضفتها هنا لانو كتبت الموضوع في وقت ضيق وما لحقت ـ

في النهاية احب اشكر موقع مبتعث وكل الاعضاء والمشرفين ما اسعفتني الذاكرة باسمائهم على كتير من المواضيع اللي لولا الله وهيا كان ما مشيت اموري بالسهولة دي . ووو خلاص قرب الفراق الصعب :happy_crying: وبالتوفيق للكل في دراستهم ومستقبلهم .
ياريت انو نكون على توصل وما ننقطع ٬ انا قليل المشاركة بس دايما موجود اراقب بصمت :smokeib:
و اتمنى انو اتعرف واقابل كل مبتعث على سياتل فا قولو لي ازا انتو هناك عشان نتواصل .
واللي حابب يضيف شي او يسأل عن شي يتفضل القلم لك :

شكرا لكم
اخوكم : عبدالله باويان

الله يوفقك أخوي يارب ويسهل أمرك وترجع بلدك بالشهادة اللي ترفع الراس .. بس سؤالي وش المقصود برقم طلب البعثه ؟ هو نفسه اللي حضرنا فيه الملتقيات ام لا .. موفق يارب

موووضضوعـــك تفآئل ممآششاآآآء الله ،،، ربي يسسسهلك دروبك وَ يحمميكَ :woot_jump:


ممم آنآ عَ سسيآتل وَ نفسس معهدك آن ششآء الله بسس ع آلسسبريينق ف آنت روح وَ ققولنآ ككيف آلووضضع

اقتباس:

---

المشاركة الأصلية كتبت بواسطة بنت أمي

الله يوفقك أخوي يارب ويسهل أمرك وترجع بلدك بالشهادة اللي ترفع الراس .. بس سؤالي وش المقصود برقم طلب البعثه ؟ هو نفسه اللي حضرنا فيه الملتقيات ام لا .. موفق يارب

---

امين يا رب ولك وللجميع ..
رقم الطلب الي بدايتو KAB .. الفلبينية لمن اديتها الضمان قالت انو ما ينفع قلتلها كيف انا مبتعث ودا الضمان اللي ارسلو الوزارة .. قالت طيب عندك الرقم حق الطلب واتوهقت عشان ما كتبتو مرة وقالت انو كدة حتتاخر الفيزا الين ترسل الرقم ٬بعدين ربي ستر انو كان معايا افادة الحضور وفيها الرقم . عشان كدة بقول خدوا كل شي حتى لو مو مطلوب .

اقتباس:

---

المشاركة الأصلية كتبت بواسطة soul20

موووضضوعـــك تفآئل ممآششاآآآء الله ،،، ربي يسسسهلك دروبك وَ يحمميكَ :woot_jump:





ممم آنآ عَ سسيآتل وَ نفسس معهدك آن ششآء الله بسس ع آلسسبريينق ف آنت روح وَ ققولنآ ككيف آلووضضع

---

انا دايما أؤمن بمقولة ( تفاءلوا بالخير تجدوه ) :-)
ما شاء الله شي جميل .. خلاص ابشري وننتظرك اختي
بالتوفيق..

عجبتني التجربه

بالتوفيق لك انشاءالله

جميل بنفس المعهد اللي انا فيه

بالتوفيق لك

//////////

ارسلت لك رسالة خاصة اخوي عبدالله .

!

مبروك اخوي عبدالله وتوصل للسياتل بالسلامة وانا ان شاء الله ح كون بعدك بعد ٣ ايام بس على الطيران الالماني،،،

مووفق يالغالي وما شاء الله شكلنا ح نسوي غزو في سياتل من كثر السعوديين هناك ههههههههههه ^^

مبروووووووك اخوي توصل بالسلامة ان شاء الله وبالتوفيق يارب

اقتباس:

---

المشاركة الأصلية كتبت بواسطة Mr.Sary

مبروك اخوي عبدالله وتوصل للسياتل بالسلامة وانا ان شاء الله ح كون بعدك بعد ٣ ايام بس على الطيران الالماني،،،

مووفق يالغالي وما شاء الله شكلنا ح نسوي غزو في سياتل من كثر السعوديين هناك ههههههههههه ^^

---

الله يبارك فييك .. وشرف ليا اني اكون معاك في سياتل في انتظار تشريفك لنا هناك
وخلاص قود الغزو السعودي هناك وانا ورااااك :mrt: