وصلت امريكا ... تجربة السفر كاملة ..
السلام عليكم ورحمة الله وبركاته ..
كيف حالكم يالغالين إن شاء الله بخير ..
طبعًا ابشركم اني وصلت لأمريكا .. وانا الان في بيت العائلة .. طبعًا اعذروني ماالتقطت صور الا صور شخصية بالجوال فلذلك فضلت مااضيفها .. طبعا كتبت هالموضوع بناء على طلب من الاعضاء ..
اللي صار اني مشيت من البيت الساعة 10 وربع الليل ودعت فيه بعض اهلي وخصوصًا جدتي الله يحفظها نزلت دمعتي يومنها بكت .. والبعض الثاني فضل انه يروح معي بالسيارة وصلت المطار .. ووداع اخر هالمرة مع الوالدة الله يحفظها .. طبعًا لكي لا أدع للوداع مجال للتأثير فيني أو حتى تأخيري فضلت أني اودع وامشي بدلا من الوقوف والعودة لهم من جديد ..
دخلت وحطيت شنطة وحدة ( ولا وزنها ولا حاجة ) اما الشنطة الثانية فهي شنطة اللابتوب .. والثالثة شنطة ملابس صغيرة وحتى ذي ماوزنها مع شنطة صغيرة جانبية وشنطة لابتوب !! كل هذي دخلت به الطيارة ولا قالوا لي شي .. لأن الابتوب الظاهر مال اعتبار في الشنطة اللي بتحملها ... اهم شي ماتحمل معك سوائل أو مواد حادة في الشنط اللي معك بالطيارة الا ان كان 100 مل فقط أما الشنط اللي بتشحنها فهذي عبها سوائل براحتك ..
ختمت جواز الخروج ورحت شوي للسوق الحر السعودي .. ومالقيت شي اعجبني .. وجلست انتظر عند البوابة 15 لأنه عليها رحلة اللوفتهانزا .. المهم جانا موظف ونقلنا للبوابة 14 وشوي ودخلونا ..
طبعا رحلتي من الرياض لفرانكفورت 6 ساعات و 35 دقيقة ( وبصراحة مر بنا من فوق الكويت مرورا بالعراق على تركيا على اليونان على فرانكفورت .. ) فصارت الرحلة مايله شوي ..
الرحلة من الرياض لفرانكفورت فاضية جدًا لدرجة ان المقاعد الثلاثة الغالب بتلقى فيها واحد منسدح ومستغل المساحة كاملة !!! ..
كان جنبي امريكي من الامريكان الافارقة له جسم قوي ونام طول الطريق ومضايقني .. صرت اطلع ولقيت لي سعوديين اثنين مبتعثين من قبل تعرفت عليهم وسولفت معهم ..
والمهم وصلنا فرانكفورت وانا نزلت .. يوم دخلت ويجي الموظفين حقين تشييك الشنط .. لازم اللابتوب لحال في صندوق والجاكيت لحال و الشنط لحال .. المهم كان النظام ترتيب سرا و خط انا كنت موقف ويوم جيت .. جيت بوزع الاغراض على الصناديق قام يقولي الموظف ( بسرعه ان الزمني عملي بالتحدث معك بالانجليزية ولا لو مهما تسوي ماتكلم الا الماني .. وحنا احسن منكم يالالمان ) قلت له صح انتم احسن مننا وابتسمت .. المهم قالي ( هل تظن ان هذه مزحة خلص بسرعه ) واعطيه الاغراض وتمشي بالسير واطلع .. لما جيت اطلع قال الموظف انت بتروح امريكا قلت ايه .. قالي ادخل هالجهاز ( بس هالموظف فرنسي ومعه وحدة تركية ) قالي ادخل في الجهاز وحط رجلك على رسمة الرجال وسو مثل شكل الصورة اللي قدام .. يعني ترفع يدينك شوي .. المهم طلع عندي علامة صفراء في الرجل اليسرى .. قالي الموظف شل النعال اتأكد شلتها ..
قالي خلاص بالسلامة واعذرنا ( وقام يتعذر والابتسامة ماتفارقه حتى بوقت التفتيش )
وبالبوردنق مكتوب عليه رقم البوابة كانت Z50 ..... المهم شوي نادوا حقين البوابة وقالوا اللي معه شنط كبيرة يجي .. وانا اروح قلت احتياط لا اتورط .. وشافت لابتوبي وشنطتي الصغيرة والجيب قالت لا هذولي عادي تدخل بهم الطيارة ...
المهم ركبنا طيارة سياتل ..وبيني وبينكم السوالف مع اليونانية اللي جنبي صارت مملة لأنها الرحلة من فرانكفورت لسياتل 10 ساعات و 35 دقيقة ..
قرأت القرآن ثم شغلت افلامهم وبصراحة مااعجبتني افلامهم ابد .. فسكرته حاولت انام ولا قدرت .. المهم بالجهد الجهيد نمت وكل شوي اصحصح .. ومانمت الا ساعة بالكثير .. المهم وزعوا لنا الاي 94 و حقت العفش ..
لما وصلت لسياتل ومرينا بالطيارة فوقها كان الشعور غير بمعنى الكلمة.. ولما نزلت بالمطار .. كان فيه زحمة عند الجوازات شوي نادونا مع البوابة المخصصة للأمريكان والكنديين .. ودخلنا معها بعد ماختم الجواز والاي 94 و حقت العفش .. رحت استلمت شنطتي .. وحطيتها بالسير اللي يوصلها لمكان مابعد المترو .. وركبنا المترو ونزلت ورحت استلم الشنط هناك وكنت مواعد موظفة شركة العائلات هناك هي توصلني لعائلتي ..
المهم وننزل ونركب السيارة وعلى البيت .. بصراحة سياتل خياااال طبيعتها ماشاء الله
بصراحة بيتهم صغير بس حلوو مررة الغرفة على صغرها بس حلووة واثاثها كنها فندق ..
مابغيت انام علطول لأني ابي انظم نومي ..
فقبل شوي تعشيت مع العائلة والحين شوي وانام ان شاء الله ..
الساعة عندنا الان 6:32 دقيقة .. وبكرة ان شا الله اسوي امور الملحقية ..
بالتوفيق للجميع
رد: وصلت امريكا ... تجربة السفر كاملة ..
ياعيني عليك ابوعابد ، اتمنى جميع امورك صارت على ماتحب
الف الحمدلله على السلامة
موفق خير في خطواتك القادمة ...
رد: وصلت امريكا ... تجربة السفر كاملة ..
ماشاالله تجربه رائعه وافدتنا كثيرر يعطيك الف عافيه
بصراحة حزنت يوم ودعت الاهل احس هالمووقف جداً صعب الله ييسر لك امورك يارب وترجع تفرح اهلك وترفع الراس :)
موووفق
رد: وصلت امريكا ... تجربة السفر كاملة ..
هههههههههه مو صاحين الألمان ، بس شايفين الفرق بين الفرنسيين والألمان!
الحمدلله على سلامتك و موفق في امور الملحقيه ..
رد: وصلت امريكا ... تجربة السفر كاملة ..
الحمدلله على سلامة الوصول <<عقبال ما اوصل انا كمان ان شاء الله
رد: وصلت امريكا ... تجربة السفر كاملة ..
الحمدلله على سلامتك يبو عابد
شوقتنا للرحيل
رد: وصلت امريكا ... تجربة السفر كاملة ..
حمد للة على السلامة وبتوفيق في حياتك العملية والعلمية ان شاء اللة :cool:
رد: وصلت امريكا ... تجربة السفر كاملة ..
الحمدلله على السلامة . .
ماشاء الله ,,
رد: وصلت امريكا ... تجربة السفر كاملة ..
الحمدلله ع السلامه اخوي عبدالله ،لاتشيل هم الملف بسيط جداً موفق يارب .
رد: وصلت امريكا ... تجربة السفر كاملة ..