January 14th, 2007, 07:07 PM
بسم الله الرحمن الرحيم
اولا السلام عليكم ورحمه الله وبركاته
ثانيا احب اقولكم وش صار في زياره الوزاره.
فيه موضوع كتبه الاخ روبرت انه راح يزور الوزاره يوم الاحد ,فرديت عليه انه راح اروح معاك الوزاره
في صباح اليوم وهو يوم الاحد كان الموعد بيني وبين روبرت عند باب الوزاره الساعه 10 صباحا, طبعا انا يوم وصلت الوزاره قعدت 10 دقايق ادور موقف لكن ما حلصت لان الوزاره المصونه ما عندها مواقف, المهم اني في الاخير حصلت موقف خطأ ووقفت فيه وسكرت على سياره ثانيه وقلت في نفسي اللي يصير يصير, لاني لو اقعد ادور موقف نظامي ما حلصت ولا بعد سنه:100: .
المهم اني نزلت من السياره ورحت عند باب الوزاره وكلمت الاخ روبرت وقلت له وينك قال انا عند باب الوزاره ثم شفنا بعض وسلمنا على بعض ثم قلت لروبرت هاه وين تبينا نروح الحين قال اللي تبي قلت له خلنا نروح للمعجل اول شئ.
راحنا لمكتب المعجل ثم سألنا سكرتيره وكان رجال طيب بصراحه
وقلنا له: المعجل موجود قال ايه بس عنده اجتماع
قلنا: ومتى ينتهي الاجتماع
قال: الله اعلم
ثم طلعنا من مكتب المعجل متوجهين لمكتب الحميضي دخلنا مكتب الحميضي وسلمنا عليه,
ثم قلنا له :يا استاذ عبدالرحمن ترنا صرنا عاله على اهلنا وتفشلنا بين الناس وضاعت علينا فرص كثيره.
فقال: لنا خلاااااااااااااااااااااااااااااااااااااااااااااااا ااااااااااااااااااااااص خلاص انتهينا ان شاء الله السبت النتايج
قلنا: متأكد
قال: متأكد ,النتايج ان شاء الله السبت
قلنا : وبالنسبه للقبول كيف تكون الطريقه؟؟؟؟
قال: تحضرون لقاء المبتعثين ثم كل واحد يأخذ قبوله ويصير له موعد مع السفاره ثم اذا اخذ الفيزا على طول يستلم قرار الابتعاث , وقال بعد النتايج يبيلكم اسبوعين تخلصون كل الاجراءات من فيزا وقرار ابتعاث.
ثم طلعنا من مكتب الحميضي ورحنا سكرتيره زامل العثمان وسألناه متى النتايج ؟؟؟؟
قال: ما ادري متى
قلت له: وش سبب التأخير ؟؟؟؟؟؟؟؟
قال: ما لكم شغل هذي امور خاصه بالوزاره.
ثم رحنا لمكتب ال الشيخ وكان رجال طيب مره ولطيف وكوميدي دخلنا عليه ثم سألناه عن النتايج
قال: الله اعلم
قلنا : طيب وش السبب
قال: ما لكم شغل
قال له روبرت :بالنسبه للتصارح الوزاره فيه تعارض
قال: كيف
قال: روبرت في تصريح للوزير انه سيتم ابتعاث 7500 طالب والمعجل يقول 5000 طالب
قال: الحين من المسؤول الكبير قال الوزير قال خلاص بما ان الوزير قال 7500 يعني 7500 ولو يقول 1000 يعني الف يعني المسؤول الاول والأخير هو الوزير
قلنا : طيب متى تتوقع النتايج ؟؟؟؟
قال: اتوقع ان شاء الله الاسبوع الجاي او اللي بعده واي واحد ترشح مبدئي ان شاء الله انه مقبول نهائي.
ثم رحنا لمكتب ابو بندر وبصراه والشهاده لله ان الرجال هذا من اطيب الرجال واللي يبي اي فزعه يروح للرجال هذا , المهم دخلنا على مكتبه وسألناه عن النتايج.
قال: ما ادري بس سمعت انها بعد اسبوع ولا عشر ايام
قلنا: سمعنا هذا الكلام اكثر من مره
قال: هذا اللي سمعته .
ثم رحنا لمكتب العطيه وقلنا لسكرتيره نبي نقابله ,قال الحين هو في مكتبه بس عنده اجتماع مع المعجل قلنا يعني المعجل عند العطيه قال ايه ,فجلسنا ننتظر المعجل يطلع من مكتب العطيه علشان نصيد عصفورين بحجر واحد المهم جلسنا ننتظر المعجل الى ما طلع من مكتب العطيه يوم طلع المعجل على طول بدء يمشي بسرررررررررررررررررررررعه وحنا وراه نقول له يا دكتور عبدالله وهو ولا لمنا الرجال جالس يركض متجه لمكتبه بصراحه توي ادري ان المعجل بهذه السرعه في المشي الظاهر انه يشارك في المرثون
, المهم يوم دخلنا مكتبه قالنا لسكرتيه نبي نقابله قال انتظرو شوي وكان فيه ناس كثار يبون يقابلونه وبصراحه كانت الساعه 11,30 وكنا مستعجلين ولا يمدينا نقابله لان عنده زحمه واقل شئ يبيلنا نص ساعه علشان نقابله يعني ما كان فيه وقت وانا بصراحه كنت مرتبط.
ثم نزلنا ورحنا لمكتب العطيه ,وقلنا لسكرتيره نبي نقابله.
قال: توه منبه انه ما يدخل عليه احد , ثم قال لنا انتم وش تبون فيه؟؟؟؟؟؟؟؟؟
قلنا: نبي نسأله عن النتايج
قال: العطيه ماهو مسؤول عن النتايج , المسؤول الأول والأخير هو المعجل اما العطيه هو مسؤول عن الاشياء الماليه.
توجهنا بعدها لمكتب واحد اسمه نبيل راحج وهو مسؤول عن القبول الجامعي سئلناه عن النتايج قال يجيكم رسايل على الجوال قلنا لنا خمس شهور وانتم تقولون تجيكم رسايل قال هذا مو شغلكم قلنا طيب وش سبب التأخير قال ما لكم شغل
بصراحه الرجال كانت اخلاقه سيئه وشينه ولا يعطي احد وجه وشايف نفسه , على ايش انا ما ادري , كل ما سألناه سؤال قال ما لكم شغل
هذي كانت زيارتنا للوزاره الموقره وان شاء الله نكون شفينا غليلكم معاني ادري ما يشفيكم الا ظهور النتايج,وانا بصراحه لاحظت شئ وهو اننا اذا سألنا عن سبب التأخير يقولون لنا مالكم شغل , الظاهر انهم متفقين مع بعض انهم ما يعطون احد اي خبر.
وان شاء الله الاخ روبرت يذكر الأشياء اللي ما ذكرتها ونسيت اذكرها
ملاحظه للأخ سهل ( حاولت بكل جهدي اني اخذ اجابه بدون كلمه اسبوع بس ما قدرت الظاهر ان الوزاره وما تعرف الا كلمه اسبوع )
January 14th, 2007, 07:07 PM
وقلنا له: المعجل موجود قال ايه بس عنده اجتماع
قلنا: ومتى ينتهي الاجتماع
قال: الله اعلم
ثم قلنا له :يا استاذ عبدالرحمن ترنا صرنا عاله على اهلنا وتفشلنا بين الناس وضاعت علينا فرص كثيره.
قال: هذا اللي سمعته .
وان شاء الله الاخ روبرت يذكر الأشياء اللي ما ذكرتها ونسيت اذكرها