قرار جديد من الوزارة .... ادخل قبل تطق مشوار للوزارة

May 14th, 2006, 07:05 PM

السلام عليكم ورحمة الله وبركاته

اخواني بكل إختصار

انا موعدي بالسفارة بكرة يوم الأثنين 15/5/2006

عموما جيت الرياض من يوم السبت بالليل

ونمت بالرياض علشان الصبح من يوم الاحد اروح الوزارة


المهم جلست على الساعه 10.15 تقريبا

وهوى للوزارة

الفلم الهندي الأول

وصلت عند البوابة وقابلني السكرتي

وين وين يا ابو الشباب

قلت له بدخل الوزارة بعد وين بروح.....؟؟

قال لي ممنوع

قلت له شنو ممنوع

قال لي ممنوع قلنا لك

قلت له خير انشاء الله

توني بحرك وبدخل إلا نط لي من الشباكـ

قلنا ممنوع

قلت له وش الممنوع طيب فهمني

قال لي انت جاي ببدلة ممنوع تدخل ببدلة

قلت له مين قال كذا

وراني قرار الأمير نايف الي معلق عندهم

ومكتوب فيه

يمنع دخول أي شخص بالملابس الغير لائقه

قلت له مكتوب غير لائقه يا عمي

قال لي ايوة ملابسك غير لائقة

انا هنا بديت اشك بنفسي والله

قلت يمكن انا لابس مايوه حق حريم وانا مدري بعد ....!!!!!!

قلت له هذا جينز وبدله عادية ماعليهم اي كتابات او رسومات يعني بدلة عادية والقرار يقول ملابس غير لائقة

قال لي ايوة هذي غير لائقة..

يا اخوي انا من الشرقية

قال لي وش دخلني - تبيني ادخلك ويشوفك احد المسؤولين واتوهق علشانك


والله قفل امها معاي هالمطوع الله يهداه

عموما واخذ ليموزين وارجع الشقة والبس الثوووب

وارجع الوزارة وانا داخل ما اخبي عليكم عيوني تطلع شرار وربي

لما دخلت والله والله والله والله والله

شفت 4 طلاب لابسين تبديلات على كيف كيفك

لا وابشركم واحد منهم لابس بدلة مرسوم عليها بوب مارلي :gr_908:

قلت مدري ارجع واشد السكرتي من شعر راسه واجره الى داخل الوزارة واقول له هذولا من وين ادخلوا....؟؟؟

عموما دخلت المبني وتعوذت من إبليس

الفلم الهندي الثاني

على طول توجهت عند الأستاذ / زامل العثمان

وطلبت منه طباعة الضمان المالي بالألوان

(( خاص للسفارة اخاف يطلعون لي طلعة بسبب الشيء هذا ))

المهم قال لي الاستاذ زامل هذا تخصص قسم الحاسب الآلي

طيب يالله يا Help طق مشوار إلى قسم الحاسب الآلي

ووصلت ودخلت المكتب

ولقيت موظفين

وطلبت منهم طباعة الضمان المالي

قال لي خلاص قفلنا

انا هنا بديت اشك اني داخل سوق والله تلفت على يميني ويساري قلت يمكن الهيئة تجي تقفل مكاتبهم وانا مدري ...!!!!!

عموما بعد عدة محاولات وحركات وتعال يمين وروح يسار

الموظف قال لي خلاص السستم قفل ما بيدنا شيء

الله العالم ان الموظف والله حبوب وطيب ويتكلم بكل تقدير واحترام وهذي شهادة حق

لكن الي خلاني ما انصدم وهون علي المصيبة الي انا فيها

اني تعودت من هالوزارة إن كل كل خمس دقايق يصدر قرار

عموماً قعدت اشرح له وضعي ::---

يا استاذ انا من الشرقية وجايكم الاسبوع الي طاف وقلتوا لي الطابعة خربانه تعال الاسبوع الجاي

وهذا انا جيتكم شنو ذنبي يا استاذ....خليتوني ادق مشاوير على الفاضي...؟؟

قال لي والله هذا قرار جديد وما اقدر اتجاوزه

انا لميت نفسي وقلت بقلبي

الوعد مش على الضمان

الوعد إذا طلعت التأشيرة إنشاء الله الضمان ما قدم ولاأخر عندي دام عندي نسخ مطبوعة بس انا كان ودي بالملون إحتياط للسفارة

=====
عموما طلعت مكسور الجناح

(( كعادة كل طالب يدخل هالوزارة ))

ويوم وصلت عند البوابة

قلت خلني أسئله عن إفتتاح الإبتعاث يمكن طلع قرار جديد بعد ما يندرى

عموما يوم رجعت والله يا جماعة ان نازل واحد من الموظفين قدامي من السلم

وبيده الضمان المالي مطبوع وملوووووووووون...!!!!!!!!

عاد انا هنا كرهت اني اجلس بالوزارة هذي ولو نص دقيقة زيادة

ولميت نفسي وطلعت ورحت مطبخ بخاري وقعدت واخذت لي نفر لحم

وجا الأفغاني وجاب لي الطلب

ومن القهر الي فيني قعدته جنبي وقعدت اشكي له حالتي والله

ويمين بالله كسرت خاطره :gr_908:

يا شيخ والله اني حسيت ان الأفغاني له فائدة في المجتمع السعودي أكثر من بعض موظفين هالوزارة الي هم أصلهم سعوديين

والله يستر بكرة من السفارة ودعواتكم لنا يا شباب

واترك التعليقات لكم

مراسلكم Help من مقهى العنكبوتية حي المحمدية - الرياض

دمتم بكل إحترام,,,,,,,

• نشر عبر تويتر
• نشر عبر فيسبوك
• نشر عبر جوجل