روحوا دققوا ولا يهمكم كلام الأشاعات .. هذه قصتي بالتدقيق ..

السلام عليكم ورحمة الله وبركاته

كان موعدي اليوم بفندق موفنبيك ببريدة للتدقيق .. وكالعادة كنت مخالف لأنظمة الأقامة والعمل قصدي للوزارة الموقرة

المهم موعدي كان مساءً .. رحت وانا خايف لكن مع دعوات الوالدة الغالية الله يخليها لي كان التوفيق من نصيبي ..

عند الدخول استقبلني الموظف عند الباب بالتأكد من اكتمال الأوراق والتوقيع عليها لاتنسون توقعون مثلي على الأبليكشن حق الجامعة وعلى ورقة التقديم اللي بالموقع

بعدها سئلني اذا بغيت اعدل بيانات قلت اكيد المعدل ورقم الجواز بعد التجديد ..

قال خذ وعدل ونسئلك التوفيق وكان بشوش جداً ويدعيلي الله يجزاه خير ورحت وعدلت باوراقي بهالفندق اللي يفتح النفس ..

وفيه موظف يسمى مستشار الطلبة الله يجزاه خير يمشي بين الطلاب ويسئلهم من يبغى مساعدة او استفسار ..

سئلته عن المعدل قال ماعليك ناخذ اوراقك والله يوفقك .. وسئلته عن وضع رقم صندوق البريد بالأبليكشن حق الجامعة وقال خطوة ممتازة ناخذه مافيه مشكلة .. وسئلته عن اللي يقولون اسمك بالقائمة السوداء اذا قدمت او يتلف ملفك .. قعد يضحك وقال كلا غير صحيح جميع المفات سترفع للوزارة وهي من سترشح ولا يوجد من هالكلام اللي تقول

قال رتب اوراقك بالملف وانتظر دورك ..

كان اللي يدققون ثلاثة ومن خلفهم ثلاثة يدققون بعد زيادة .. كل موظف خلفه موظف يعني ..

جاء دوري ورحت وجلست عند الموظف وطابق الصور بالأصول وتأكد من التعديل مع بعض القفشات والسواليف وكان يقولي تفائل خير القبول هالسنة إن شاء الله من نصيبكم

رحت للي بعده وياسلام على هالموظف ياناس .. رقة وتعامل وضحكة لاتفارق محياه ..
طابق زيادة مع تعليقات خفيفة ..

وبعدها سئل الله لي التوفيق وان اكون خير سفير لبلدي وان ارفع اسم بلادي عالياً ..

وقال لا اخفيك سراً معدلك مخالف .. لكن تفائل خير وابشرك بأن الأقبال ضعيف هذه السنة وسيكون القبول حليفكم بأذن الله ..

ودعى لي بالتوفيق وغادرته متوجهاً الى الرس الحبيبة ..



نقطة مهمة .. الفترة المسائية مقرر ان يحضر 80 شخص .. ولم يحضر سوى 15 شخص تقريباً ..

لأن آخر من طلع انا الساعة 9.30

بالتوفيق للجميع ..