تجربتك الشخصية / تعلمت من الابتعاث: نصائحك للقادمين شاركونا تدوينها .

وعليكم السلام ورحمة الله وبركاته..

اولا اهنيك اخوي الكريم على هالموضوع..وانا وربي اني كنت بنزل موضوع يتكلم عن هالنقطة بالذات..واللي هي اللغة الانجليزية..لكنك سبقتني ولك الاجر ان شاء الله..

اولا باعطي نصايح من تجربتي الشخصية..

انا تخرجت كلية المعلمين قسم انجليزي..وطلعت ابتعاث ع حساب البرنامج..لما وصلت بلد الابتعاث حطوني بالمستوى الخامس من سبعه..في معهد جامعة..

لمدة بسيطة كنت اقول لنفسي ليش خامس... ياخي انا خريج لغة انجليزية.. اقل شي ابي المستوى السادس..واللي زاد الطين بلة ان بعض زملائي في الكلاس وربي جملتين ع بعض بالقوة يكتبها..

القصة طويلة لكن بعطيكم الزبدة على عدة نقاط:

1- على قد ما تكون صريح مع نفسك من ناحية استعدادك وتحضيرك واقتناعك بمستواك .. على قد ما راح تستفيد من مرحلة اللغة.

2- لا تقع بفخ ان معاهد الجامعات افضل من المعاهد الاخرى..والله ان اللي يشتغل على نفسه ما يهمه في معهد جامعه كان او في معهد غيره.

3- مو غلط او حاجة سلبية انك ما تعرف تكتب اسمك بالانجليزي او انك ما تعرف تكتب جملة كاملة او جملة معقدة..وربي مو عيب.. لكن العيب والخسارة كل الخسارة انه تمر عليك سنة ونص ومستواك زي ماهو اول ما جيت. اعرف ناس بدؤوا المعهد معي قبل سنة وثلاث شهور تقريبا..ومستواهم في الانجليزي تحسن بشكل طفيف..لكنه ما راح يؤهلهم انهم بيدخلون جامعة..والرجل يفكر انه يرجع للسعودية..ادري ان كلامي بيضيق بعض الصدور..لكن والله يا اخوان ان هذه الحقيقة المرة..ليش ياخي..وين راحت السنة والثلاث شهور..قل اربع شهور راحت تمشيات وفلة وزحف..طيب وبعدين؟؟

4- حتى لو تبدا من المستوى الاول او المستوى البدائي..ترى مو عيب يعني عادي هذاا مستواك مافيها شي..لكن اشتغل على نفسك..احفظ كلمات كثير لانك تحتاج هالشي..تعود انك تكتب يوميا اي شي..حتى لو مدة خمس دقايق..وحاول انك ما تتكلم او ترد ع سؤال او تكتب لاستاذك إلا باستخدام جمل كاملة..تعود من الآن انك تكتب بجمل كاملة..اعرف واحد معيد في جامعة القصيم قسم هندسة,,بدا الترم اللي فات معنا في المستوى الأول..والله ما تذمر ولا زعل ولا تشائم بل كمل المستوى واذكره احيانا لما نتقابل وندردش يقول انه قاعد يحفظ كلمات ويتمرن ومن هيك شغلات..يعني اجتهد على نفسه وقبل نهاية الترم صعدوه المستوى الثاني والحين بيروح المستوى الثالث ان شاء الله.. لكل مجتهد نصيب.

5- مهارة الاستماع..اذا تبي تطور الاستماع عندك انصحك انك تقلل من متابعتك للبرامج العربية سواء في الجوال او اليوتيوب..وانصحك بشدة بشدة بشدة انك لا تجيب دش عربي في البيت. لانك اذا جبته في البيت ما راح تستفيد غير ضياع الوقت وضياع التدرب ع اللغة الانجليزية. بالمقابل، انصح بمتابعة الاخبار الانجليزية او البرامج المتنوعة عبر راديو السيارة او التلفزيون..شفلك مسلسل انجليزي حلو وحاول تتابعه.. بالـ sub titles (الكتابة اللي تطلع بنص الشاشة) واللي هي تجيك مسلسلات تقدر تحط لها سب تايتل ووظيفته ان يجيك الكلام اللي تسمعه مكتوب بالانجليزي ع الشاشة..فهي عصفورين في حجر واحد.. تستمع وتقرا بنفس الوقت..

6- مهارة الكتابة: باختصار، على قد ما تحفظ كلمات وتتمرن عليهم وعلى قد ما تكتب كثير وعلى قد ما تقرا، على قد ما راح تتحسن كتابتك. وحاول انك ما تستخدم المترجم بافراط.

7- مهارة القراءة: انصح باقتناء روايات انجليزية للاطفال ما بين الـ 9 إلى الـ 16 سنة..لان هالنوع من الروايات يكون انجليزيته متوسطة وحلوة وسهلة القراءة..وع حسب جوك اختر نوع الرواية.

8- مهارة التحدث: اولا ومن ناحية الـ pronunciation واللي هو نطق الكلمات.. انصح بانك تشوف لك قاموس ناطق..والانترنت مليان..وتشوف الكلمة اللي بتتدرب عليها وترددها ورا الصوت..وحركة اخرى انك تتابع لك مادة مرئية يكون فيها سب تايتل، وتقرا السب تايتل وتردد ورا المتحدث.. فمثلا.. واحد قاعد يسولف مع واحد في فلم ولا مسلسل..والسب تايتل موجود عندك ع الشاشة.. تدرب على مشهد من المشاهد..واقرا الكلام وردده مثل ما يفعل الممثل اللي بالمشهد..وقس ع ذلك بقية المشاهد.

9- اعلم ان المدرس اللي يجاملك في كتاباتك واختباراتك ومقابلاتك انه راح يضرك، لانه يوهمك انك اللي محد قدك..خلك واثق من نفسك وقله علمني وش الاخطاء وكيف اصححها. وصدقني كل ما كنت متابع مع المدرس وتطبق وتعدل اخطاءك اللي يقول لك عليها..راح تتحسن لغتك بشكل ما تتصوره.

10- الواجبات ثم الواجبات ثم الواجبات، لا تقول يا رجال ما راح ينفعني حل الواجب بشي.. حتى لو انك فهمت الدرس في الكلاس..فراح تنساه عاجلا ام آجلا.. لكن بحلك الواجب راح باذن الله يرسخ في ذهنك اللي تعلمته بالكلاس.

11- الحضور وعدم الغياب..والله يا جماعة مو هياط ولا كلام فاضي ولا اقول هالكلام عشان املأ الفراغ...لكن وربي الحضور المستمر، ومو بس كذا.. الا الحضور و التركيز في الكلاس من اهم العوامل اللي تطور لغتك وتحسنها، وبنفس الوقت تشجعك على الاندماج في جو التعلم واستقبال المعلومة بانسب شكل ممكن.

12- ابتعد كل البعد عن الزميل اللي في الكلاس اللي يثبطك، ويقلل من جدك واجتهادك.. انا ما اقول ابتعد عن سيئ الخلق ولا الداشر ولا غيره..لا..احيانا تلقى واحد من احسن الناس اخلاقا..لكن انسان مو مجتهد ولا هو شايل هم الدراسة..فهذه الاشكال، صاحبها بالمعروف.. اضحك وسولف بس لا تعطي وجه كثير..وخلك همك الاول والاخير دراستك..واي شي يحول بينك وبينها..اعلم انه ليس من مصلحتك..حتى ولو كان شي محبب لك.

13- أسأل دائما وابدا..لا يردك حيائك ولا خجلك ولا اغترارك بانك تعرف معلومة معينة..فاحيانا تظن انك تعرف المعلومة الفلانية .. ولكن لو سالت انت او احد غيرك عن كيفية استعمال هالمعلومة سيتضح انك كنت فاهمها غلط. فدائما اسال واستفسر حتى عن اصغر الاشياء في اللغة.

14- تعلم انك تصغي وتستمع للطرف الآخر حتى لو كان مخالف لك. فأحيانا حتى لو كنت على حق ومقتنع ان المعلومة التي لديك هي الصحيحة..فحاول فهم وجهة نظر خصمك, ولتبقي دائرة الحوار في حدود الأدب.. فوالله ان كل شي يذهب ولا يبقى الا سوء وحسن الخلق..فخالق الناس بخلق حسن لكي يقبلوا منك ولا يتشاؤموا منك ويهربوا عنك كلما حصلت بينك وبينهم مناقشة.

15- لا تغتر ولا تتكبر ولا توهم نفسك بانك الفلة اللي تعرف كل شي..فوالله ان اكبر عدو لك هو نفسك..فاعرف قدر وقدرات نفسك وكيف تتعامل معها بالشكل المناسب.. وانا اضمن لك انك راح تحقق مبتغاك.

16- ان كان والداك على قيد الحياة فلا يمر عليك يوم الا وانت مدخل على قلوبهم السرور..سواء بمكالمة او بصورة لك مع غيرك وانت مستانس.. دق واتصل عليهم واسال عن اخبارهم وين راحوا ووين جوا..تواصل معهما دائما.. واسالهما في كل حين الدعاء لك.. فوالله لا يوجد افضل من دعاء الاب والام.

17- استغفر الله سبحانه وتعالى كثيرا..واساله دائما في السر والعلن ان يوفقك وييسر لك امورك ويحفظك عن كل ما يضرك.



في الختام اشكر صاحب الموضوع على هالفكرة المميزة اللي والله غفل عنها الكثيرون وهي اهم شي في الابتعاث..

أرجوا اني قد افدت اخوتي ولو بالقليل.. واساله الله سبحانه وتعالى ان يغفر لي وان ينفع بما قلت..


وعسى الله ييسر أمورنا أجمعين..



..