محطة تجمع منتظرين الفيزا الأمريكية

يا أخي الموظفة مو شرط عشانها قالت لك هذا شغلنا يعني تكون عارفة يمكن هذا مو من أختصاصها وبعدين ما فرقت من أمريكا أو غيرها المهم أن التأشيرة متى ما خلصت بتطلع لك ..
ونصيحة لك وللباقين لاتجيب الضغط والسكر لأنفسك وأعتبر من أخوانا المتقدمين السابقين اللي حاولوا فيهم ولا نفع ترى السفارة ما درت عنك وصراحة هم واضحين وقالوا لاحد يحجز الا بعد خروج التأشيرة وحتى مرات بعد إذا أحد عمل مقابلة يرجعون جواز الشخص عشان ما يعطلونة يمكن يحتاج جوازة ومتى ما أنتهت فيزته يرسلون له إيميل وكذلك كرروا مراراً وتكراراً إذا خلصت التأشيرة بتطلع وما بيديهم شيء لأنهاء الأجرائات .
ما أعتقد فيه أحد منكم أسوا مني .. أنا طلبوا مني ورقة خلو سوابق مع أني الحمدلله ما عندي سوابق وكنت خارج المملكة وقتها وتبهذلت ورجعت الرياض ورحت للأدلة الجنائية وكل هذا عشان حضرتهم ولا أستلمت التأشيرة الا بعد شهور طويلة جداً تفوق النصف سنة بكثير وفيه غيري طلبوا منهم نفس الطلب حسبي الله عليهم ،،

الله يبارك فيك ويسلمك عبادي
لا عاد شف بعد كل هالحماس رحت وحجزت الليلة امشي لكن حصل اللي ماكنت متوقعه
حصل لي ظروف بالعمل صرت لازم ارجع ماقدر اخذ اجازتي إلا بعد اسبوعين من الآن ... إن شاء الله خيرة
عاد قررت بإذن الله اخلي سفرتي بعد رمضان الله يبلغنا الشهر الفضيل
والله يختار لنا الخيرة الزينة إن شاء الله

هههههههه لاحول الله يعين
مثل ما قلت لك سابقاً يمكن أفضل إذا خليتها بعد رمضان و أنا إن شاءلله بعد العيد تقريباً بروح لأمريكا بإذن لله ..
وماشاءلله عليك على طول طلعت التأشيرة رحت حجزتوالله يبلغنا رمضان أمين أمين ،،

ماشاء الله . . اللي يحجز ويقرر رمضان واللي بعد العيد و و و . . الله يوفقكم وييسرلكم ويبعد عنكم كل ضيق يارب . .

اما انا قاعده ودراستي بعد ما أجلتها حتبدأ يوم العيد والشنطه جاهزه والتأشيره جاهزه . . وانا قاعده اتفرج للناس اللي تسافر ومستقبلي كله موقف على تأشيرة مرافق . .

حسبي الله ونعم الوكيل فيهم . . وربي قلبي محرووووووق قهر على نفسي . . . . . . . .



بس ما الله خلقني من بكاي معصوم
وادري ان المحاجر لو تفيض افضحت.

والله إني على قهري صبور وكتوم
لكن الدموع ان روحت روحت.




تحياتي . .

متابعه لكم من شهر ماااااارس وربي رحمتكم جدد حرقت أعصاب أنا مالي إلا إسبوعين تقريبا أحس إن الدنيا بوجهي مقفلة وراح أقول إيش صار معاي عملت مقابلة((( أنا و بناتي و الماما و أخوبه الصغير من أبوي أمه غير سعودية من دولة عربية ))) في السفارة بالرياض يوم 22 مارس بهدف الفيزا السياحية كانت الأمور كلها ماشية تمام في المقابلة الأولى قال لنا إنه بما إننا بس نساء وأطفال خلال يومين تطلع بس قال لازم تصريح للطفل من جهة إمه قلنا هي مطلقة و عايشه ببلدها والحضانة من حق أبوي فقال للأمانة ضروري تصريح من الأب والأم المهم خلصنا من الأول رحنا للمقابلة الثانية سالت كم سؤال على السريع وبعدين أخذت أوراقنا وقالت مبروك بعد إسبوع راح تصدر روحوا للفديكس هناااااااااااااا الغلطة الشنيعة اللي سويتها حطيت كل الجوازات بظرف واحد ماكنت أعرف إنه أقدر كل جواز بظرف

إللي حصل الأربعاء كلموا ماما وقالوا لها أرسلوا تصريح الطفل من أمه عن طريق الفاكس وفعلا في نفس اللحظة أرسلتها... طبعا للآن ماوصلنا شي بسبب جواز أخوي وأنا محتاجة لجوازي أنا وبناتي عشان يطلع لي زوجي تصريح بالسفر

أرسلت لهم إيميل السبت وكلمتهم الأحد قالوا وصلنا إيميلك إنتطري 48 ساعة نرد علييييييييك هذا إذا تكرموا وردوا عليا واليوم الإثنين أرسلت لهم إيميل ثاني وفاكس لأني أبغى اخذ الجوازات إللي خلصت

بس مو قادرة أحصل طريقة أتواصل معاهم أو أطلب جوازتنا لأنها أكيد خلصت بس التأخير بسبب جواز أخوي

وإللي يقهرررررررر بابا حجز في 16/7 على الخطوط التركية وهي تذاكر غير مسترجعة وإذا فاتت موعد الرحلة بتطير علينااااااااااااااااا حوالي 40 ألف


ياريت إللي بيعرف طريقة أخذ الجوازات إللي خلصت يقولي لأنه شايفه هنا ناس قدرت تتواصل معهم وتأخذ جوازها وتسأل عن الوضع من خلال التليفون

الله يكون بعونك .. فعلاً شي يقهر .. لاكن تقدري تتواصلي معهم لسحب الجواز واعرف اصدقاء سحبوا جوازاتهم للسفر ومن ثم ارسلوها للسفارة مرة اخرى

إن شاء الله تطلع فيزة اخوك وتسافرين ونبارك لك بالعيدين عيد الفطر وعيد بداية دراستك واخوك معك
الله يوفقك يارب ويزرقك من واسع فضله وعليك بالدعاء صدقيني هو اللي بيزيل كل همومك ويسهل جميع دروبك

والله بصراحة حرام تروح كل التذاكر هذي وهنا غلطة ضروري الجميع يتجنبها وهي حجز التذاكر غير المسترجعة
يعني مهمى كان انت ماتدري عن ظروفك وماتدري وش يصيرلك أي شي ممكن يأجل السفر وفرق المبلغ اللي بين المسترجعة وغير المسترجعة بصراحة مايسوى المخاطرة لذلك يجب ان اللي ينوي الحجز وخصوصاً الرحلات البعيدة مايتعامل أبداً مع غير المسترجعة ..
يعني مايتعامل معها إلا إذا كان بيحجز بيوم السفر نفسه ولا على الأقل قبله بيوم واحد وإذا كان ضامن كل شيء انه اوكي وتمام

على العموم موضوعك اعتقد لو تكلمي فيدكس على التلفون رقم 920009999 وتستفسري منهم يمكن يفيدونك اعتقد لو تدفعون حق ارسالية جديدة يرسلون عن طريقها الجوازات اللي خلصت
اما عن السفارة فترسلين على ايميلهم هذا : RiyadhNIV@state.gov إذا كان تقديمكم بالرياض أو تشوفي ايميل القنصلية بجدة او الظهران إذا كنتي مقدمة فيها
توضحين لهم ان سفرتكم قربت وان اللي طلع لهم تأشيراتهم بيسافرون بالوقت المحدد وتقولين لهم ان انتم ممكن تروحون لفيدكس وتدفعون حق ارسالية جديدة للجوازات الباقية علشان يتم التفريق بين المنتهية وغير المنتهية
وإن شاء الله يفيدونك برسالة من خلالها تقدرين تتخذين الاجراء المناسب
لكن ماقلتي هل تاريخ سفركم اللي هو 16/7 بالميلادي ولا بالهجري؟
إذا بالميلادي فلاتخافين معك وقت اما بالهجري يجب انك ترسلين لهم الآن وبأسرع وقت وتقولين لهم تاريخ السفر بالميلادي لأنهم يتعاملون فيه وتوضحين لهم ان تذاكركم غير مسترجعة وكم مبلغها علشان ممكن تحصلون احد يتعاطف معكم ويفيدكم بالسرعة الكافية

موفقين

كتبت رد وحذفته كنت في حاله نشوه بكرى اعطيكم العلم الاكيد

صباح الخير للجميع . . صباحكم صباح منور

الله يجعلها بهذا الصباح تنفرج كل همومنا وتتيسر بإذن واحد واحد . .