مشكلة استخراج الجرين كارد من أمريكا أو من السعودية أفضل؟؟

أخي الكريم فيصل ماشا الله والله ماقصرت ربي يجعله في ميزان حسناتك ويوفقك
بإذن الله نحاول على الشهر الجاي
وأكيد بتطلع لي استفسارات ،
طيب ممكن أسألك انت وقت ماطلعت القرين كارد لزوجتك كم أخذ وقت تقريباً حتى وجاكم؟ يطول الموضوع؟
والتأمين يغطي الكشف الطبي؟
يعني تقريباً التكاليف راح تكون حوالي ٦٠٠٠ ريال !

وعليكم السلام ورحمة الله وبركاته أختي أم عبدالغني
ان شا الله الأخوان والأخوات مايقصروا
وماشا الله الأخ فيصل متابعنا و فاهم أمور القرين كارد وبيرد عليكِ ومايقصر بإذن الله..

وعليكم السلام ورحمة الله وبركاته،

اثبات القدرة على تحمل المصاريف ممكن يكون بواسطة ورقة اثبات الدخل اللي من الملحقية.

فيه حاجة اسمها "خط الفقر" ومعدلات الدخل لخط الفقر موجودة على الرابط تحت:

2011 HHS Poverty Guidelines

الشخص يقدر يكفل أفراد عائلته اذا كان معدل دخل الأسرة لايقل عن 125% من معدل الدخل الخاص بخط الفقر. يعني اذا الأسرة مكونة من شخصين (زوج وزوجته مثلا) ، لازم دخل الأسرة السنوي مايقل عن 14,710 ضرب 1.25 = 18388 دولار. بالنسبة لكم (أسرة مكونة من 3 أشخاص) الدخل السنوي (للأسرة كلها ، يعني مجموع مكافآتكم انتو الثلاثة) المفروض مايقل عن 23162.5 دولار. طبعا المكافأة كافية جدا وماتحتاجون كفيل اضافي.

طبعا ممكن ايضا تجيبون أي شخص (واحد يقرب لكم ، صديق ، الخ) يكفل زوجك وابنك ماليا ، الشرط الوحيد انه يكون مواطن أمريكي أو عنده غرين كارد ودخله السنوي لايقل عن 23162.5 دولار ، بس ما أتوقع تحتاجون كفيل ، انتي تقدرين تكفليهم.

أتوقع المحامي سألك اذا تدفعين ضرائب وانتي قلتي لا وهو مافهم سالفة الابتعاث والمكافآت ومادرى كيف يتصرف. على فكرة ، انتي اشتغلتي في السعودية ولا كنتي ربة منزل؟ اذا اشتغلتي لازم ترسلين نسخ من دفع الضرائب للسنوات الثلاث الماضية.

وش هي الأقسام اللي ما عرفتي تعبينها في ال I-864؟

بالتوفيق،

نقطة مهمة ، يوم ولادة ابنك ، هل كان عندك الجنسية الأمريكية ولا أخذتِ الجنسية بعد ولادته؟

الله يسلمك أختي الكريمة والله يوفقنا جميعا.

على فكرة ، استمارة ال I-130 وال I-485 ممكن ترسلينهم مع بعض (Concurrent filing) وممكن ترسلين ال I-130 لحاله وبعد فترة ترسلين ال I-485.

يعني ممكن تقدمون الطلب الخاص باستمارة I-130 الحين والشهر الجاي تقدمون الطلب الخاص باستمارة I-485. أتوقع كذا يمكن يكون أفضل لكم (عشان يخلص ال I-130 أسرع) وفي نفس الوقت تدفعون حاليا فقط الحين الرسوم الخاصة بال I-130 والشهر الجاي تدفعون الرسوم الخاصة بال I-485 وملحقاتها.

التأمين مايغطي الكشف الطبي.

ولد عمي سوى الاجراءات لزوجته وأخذت الغرين كارد في 4 أشهر بالضبط. عادة ، أول شي بيحددون لكم موعد بعد شهر تقريبا من استلامهم لاستمارة ال I-485 وبياخذون الصورة والبصمات (Biometrics) ، وبعدين بيسوون ال (Background check) وتاخذ عادة يوم أو يومين وبعدها على طول بيطلع اذن العمل EAD ، وبعدها بشهر الى شهرين يطلع اذن السفر ، وبعدها بفترة بسيطة يطلع الغرين كارد. أنا تابعت معه الاجراءات من البداية للنهاية لأني بحتاج أسويها ان شاء الله قريب :-)

بالتوفيق،

كفيت و وفيت
الله ينور قلبك بنور الإيمان ويسهل أمورك من حيث لاتحتسب ..ألف شكراً على ردك ومتابعتك أخي الفاضل ..

جزاك الله كل خير والله يرفع قدرك في الدنيا والاخرة
انا من مواليد امريكا بس اخذت الجنسية بعد ما جبت ولدي وعمره سنتين وكنت في السعودية ربة منزل وتقريبا ليا 6 او 7 شهور من يوم ما اخذت الجواز الامريكي ** في اي مشكلة والا عادي
وعشان لا ادوشك بجمع الاسئلة مرة وحدة واسألك هيا
والف شكر مرة ثانية

الله يسلمك،

لا أبدا ما فيه مشكلة ، طالما انك أمريكية بالميلاد ، تقدرين تسوين له طلب جنسية مباشرة بدون اللفة الطويلة حقت الغرين كارد.

أخي الكريم طيب هذا الشي ينطبق علينا أنا و زوجي ؟
زوجي أمريكي بالميلاد يعني من مواليد أمريكا بس بعدين أهله رجعوا السعودية وعاشوا هناك ,
نقدر نقدم على الجنسية على طول وإحنا في أمريكا بدل من القرين كارد ؟؟
يعني تعرف ناس سووا كذا في أمريكا وأخذوا الجنسية على طول ولا لازم قرين كارد؟
وكم ياخذ من وقت حتى ويطلع الجواز؟

وبالنسبة للقرين كارد , كم تقريباً تكاليف الكشف الطبي؟!

هلا فيكي،

لا ، هذا النظام ماينطبق على الأزواج. هذا النظام ينطبق فقط على الأطفال المولودين خارج أمريكا بشرط أن يكون أحد الأبوين على الأقل يحمل الجنسية الأمريكية لحظة ولادة الطفل.

أنا قصدت ان الأخت أم عبد الغني تقدر تطلع جنسية مباشرة لطفلها ، أما الزوج لازم عن طريق الغرين كارد.

تكاليف الكشف الطبي تختلف جذريا من طبيب لآخر وقد تتراوح بين 200 الى 400 دولار أو أكثر. ممكن تكلمين الأطباء بالتلفون وهم بيعطونك التكاليف بالضبط.

بالتوفيق،