تجربتي في السفاره الامريكيه " الرياض" 2013/2/20
السلام عليكم ورحمة الله وبركاته
مدخل ..
يقول الحق سبحانه وتعالى في حديثه القدسي: "أنا عند ظن عبدي بي إن ظن خيرًا فله وإن ظن شرًا فله".. رواه مسلم،
حاب اشاركم في تجربتي بالسفاره وان شاء الله انكم تستفيدو منها وتعم المنفعه ..
توكلت على ربي ورحت للسفاره الساعه 7.30 وموعدي كان الساعه 9
ولله الحمد كانت النفسيه والامور عال العال وهذا لاني موكل امري لله
صفيت مع العالم طابور الين جيت عند الشباك وعطيتهم
1- الجواز
2- ورقة الموعد
3- ايصال DS-160
4- سداد سامبا
5-صوره شخصيه
كلها كانت داخل الجواز وعلى طول رحت للشباك الثاني
وطفيت الجوال ونزلت اغراضي ودخلت على بركة الله
وحصلت الهندي طول بعرض ومعه سلاح يحسسك انك مجرم اول ما يشوفك
المهم دخلنا وحط استكر على الجواز واخذت رقم وانتظرت الين ماجاء
وكانت شوي زحمه والحمد لله استغليتهاا بالاستغفار حتى جاء رقمي وخل عينك
على اللوحه الارقام علشان تعرف وين تروح اي كاونتر
كاونتر 4 وكان الموظف سوداني صراحه انا تشققتو من الفرح
لان السودانين قلوبهم بيضاء وروحهم حلوه وسالني سبب روحتك لامريكا
قلت دراسه اخذ الاوراق اللي ذكرتها + السيفيس
وكان في خطاء في مكان الميلاد في i20 وكلمت العيال هناك زبطوه لي وطبعته وعلمته
بالمشكله قلي اوك المهم سالني سوال واحد لك اقارب قلت لا واخذ شوي وقالي لك اصدقاء
انا صراحه كنت صادق وقلت اي اخذ اسمه الثلاثي وقالي انتظر الين ينادو رقمك علشان المقابله
اول مانادو رقمي كاونتر 12 كانت لبنانيه نفسها براس خشمهاا وانا بارد وجه بس ابتسم لها
وهي احسه تقول ياليل وش ذا النشبه ههههه المهم بدت تسولف معي انقلش
انا لغتي كويسه بس تمنيت انها تكون بالعربي علشان ما اجيب العيد وسالتني
وين رايح :
درجاتك العلميه عطيتها الثانويه والدبلوم
مين يتكفل في مصاريف الدراسه قلت ابوي
ابوك وش يشتغل : قلت متقاعد وقالت بالماضي قلت كان عسكري
وقالت الرتبه هل هو " ميجور " هنا انا توهقت قلت لها ما اعرف اسم الرتبه بالانجليزي
وسبحان الله بدت تتكلم عربي انا انقهرت طول اليوم تتكلم انقلش واخرتهاا تتكلم احسن من عربي
المهم صرفت لها ان الرتبه عريف قالت انا مااعرف ترتيب الرتب العسكريه وقعدت تضحك
انا هنا ارتحت اخيرا شفت ضروسهاا ههههههه
قالت فيزتك مقبوله رحت سدد فديكس انا هناا طرت من الفرحه
والحمد لله وهذا كان من فضل ربي ..
واخيرا حط في بالك ان التوفيق من الله سبحانه وهم مجرد سبب
وان الفيزاء حق من حقوقك لاترتبك ولاتكذب وخلك راعي طويله ولاتتفلس بزياده
واي شي يطلبونه عطهم لاتححذف الملف كله اي شي يسالونك عنه طلع لهم الورقه اللي تثبت
والابتسامه اهم شي لانها مفتاح القلوب ..
وختاماَ دعوه بسيطه لي ولوالدي ,,
وربي يوفقككككم جميعا ياارب ..
رد: تجربتي في السفاره الامريكيه " الرياض" 2013/2/20
الله يعجل بها لك ان شاء الله
رد: تجربتي في السفاره الامريكيه " الرياض" 2013/2/20
مبرووك ياخوي عقبالي ان شاء الله
انا عبيت ds160 لسفاره في الرياض و يوم انتهيت طلع مااقدر احجز موعد و في اخير اوراقي معلقه في سفاره بحاول اراسلهم و اشوف سبب تعليق اوراقي
الله يكتب مافيه الخير وصالح
رد: تجربتي في السفاره الامريكيه " الرياض" 2013/2/20
اعطناء نصائح اكثر حول المقابلة وش االاسئلة بعد في المقابلة
رد: تجربتي في السفاره الامريكيه " الرياض" 2013/2/20
الله يوفقك اخوي في دراستك. بس حبيت استفسر عن السيفيس هل دفعت رسومه ولالا وهو قيمته ٢٠٠دولار. لان عندي موعد الاسبوع الجاي ومدري عن السيفيس.
( تمت المشاركة باستخدام تطبيق مبتعث )
رد: تجربتي في السفاره الامريكيه " الرياض" 2013/2/20
السلام عليكمورحمة الله وبركاته
وبعد
اتمنى لك والى الجميع التوفيق ولي كمان
هل قدمت طلب الدارسة عن طريق مكاتب الابتعاث
لانهم بصراحة لديهم خبرة في المجال هذا
انا قدمت ولسا في لاجراءت الاوليه مع المكاتب لانهم راح يقوم بكل شي
اما سيفس لزم تمر على اقرب مكتب يكون مختص في الموضوع
اتمنى لك التوفيق والسداد
ali_mashi@yahoo.com
الاخ سعد اتصل 0599363321
اتمنى الرد الاخ علي بن حسن
رد: تجربتي في السفاره الامريكيه " الرياض" 2013/2/20
اقتباس:
المشاركة الأصلية كتبت بواسطة سعد الشلآحي
الله يوفقك اخوي في دراستك. بس حبيت استفسر عن السيفيس هل دفعت رسومه ولالا وهو قيمته 200دولار. لان عندي موعد الاسبوع الجاي ومدري عن السيفيس.
( تمت المشاركة باستخدام تطبيق مبتعث )
اخوي السيفس يندفع اونلاين ، تدخل موقع السفارة بعد ماتعبي الابلكيشن فيه شي خاص برسوم السيفس ، فيه رقم cgi اللي من خلاله تقدر تدفع
لو كنت مبتعث احتفظ بنسخة من السيفس + ايصال سامبا للتعويض في المستقبل