لمـواليد أمريكا وحاملين الجنسية الأمريكية .. جميع مايهمكم !

مشكووووور اخوي محمد والله يعطيك العافيه ماقصرت

( تمت المشاركة باستخدام تطبيق مبتعث )

العفو اختي وبالخدمه ..

السلام عليكم ورحمة الله وبركاته
ياخوان انا رزقني الله بمولود في امريكا وطلعت له جواز سفر وكذلك تذكرة مرور عشان بيسافر مع امه للسعودية
سؤالي الاول:
كاتبين باخر صفحة من تذكرة المرور انه تم اصداراها بناء على طلب الوالد رقم بطاقة احوال رقم وحواز رقم
طيب هو بيسافر مع امه فقط يعني انا راح اجلس بامريكا عندي دراسة عادي يدخل مع امه ولا لازم اكون معهم انا؟؟
مالها داعي يتكون بمطار دبي عشان ذا الحاجة

السؤال الثاني:
كيف اضيفة بدفتر العائلة واطلع له جواز سعودي وان هنا بامريكا عشان يرجع امريكا؟؟؟
هل الاحوال تقبل الوكالة من السفارة السعودية؟ هل الحوازات تقبل الوكالة برضو؟؟؟

احد الاخوان سالتة يقولي لازم تطلع له جواز سعودي ولا موظف الجوازات يالسعودية ماراح يخلية يطلع من السعودية اذا جاء بيرجع امريكا فسالتة قلت هو معه جواز امريكي يقول رفض الموظف بحجة انه داخل بتذكرة مرور وليس بتاشيرة واذا تبي ولدك يطلع ورنا التاشيرة ولا جواز سعودي.
عشان كذا ابي افك عمري واطلع له جواز سعودي

وعليكم السلام ورحمة الله وبركاته ..
والف مبروك ياغالي وعسا الله يبارك فيه ويصلحه ويجعله من البارين بوالديه وشفيع لهم يوم الدين يارب العالمين ..

بالنسبه لتذكرة المرور .. فكلام صاحبك صحيح .. هذي التذكره فقط تستخدم مره واحده .. واذا وصلت الام هناك تقدر تسوي وكاله لأي شخص يخلص اموركم هناك ..
تضيفه في دفتر العائله وايضا تطلع له جواز سعودي ..
وهذي تقدر توكل احد يخلصها لك مايحتاج انك ترجع .. ولو تعرف احد بالجوازات .. راح تكون اسهل لك بإذن الله ولاراح تحتاج لا وكاله ولا هم يحزنون ..

وماراح تتعطل ان شاء الله ولا تحتاج انك تكون معها .. خلاص الورقه اللي معها تكفي لعبور الطفل الحدود السعودية ...

انا انصحك بانك تراجع القنصلية السعوديه .. حتى تعرف إجرائات الطفل الجديد لأنك مانزلت السعودية ... فمن الممكن أنهم يقدرون يساعدونك في هذا الخصوص ..

الله يعطيك العافية يا اخ محمد وماقصرت
اتصلت ع القنصلية بلوس انجلوس ويقولون لي تعال وسوا وكالة لاحد تعرفة ويسوي نيابة عنك الجواز ودفتر العائلة

بس ياخي مدري احس الاحوال نظامهم شياب اتوقع لو اودي لهم الوكالة يقولون مانبي الا شي من المحكمة ههههه احس انهم بيقولون وشو قنصلية ذي هههه امزح
الجوازات احس انهم فاهمين واقدر ادبرها لو صار شي بس الاحوال احس انها مصيبة

اي ورقه مختومه من القنصليه السعودية في اي دوله بالعالم .. فهي معترف فيها في كل القطاعات الحكوميه في السعودية !

يعني حتى على الاحوال راح تمشي عندهم بإذن الله .. لانها ورقه رسميه !

لذلك أنت توكل على الله وخلص اوراقك مع القنصلية وأرسل الورقه للي سويت له الوكاله ..

وإن شاء الله ان امورك تخلص بإذن الله ..

السلام عليكم ورحمة الله وبركاته

اخوي جزاك الله خير ع كل ما قدمته من معلومات تفيد مواليد امريكا

والصحيح بعد اطلاعي على موضوعك نويت اني اطلع الجواز الامريكي بحكم اني مواليد

امريكا سنة 1981

وواجهتني بعض المشاكل وحليت بعضها ووقفت امام مشكله لم استطع ان احلها

وهي اني اسمي بشهادة الميلاد الامريكيه

ثلاثي فقط اسمي والوالد والعائله

وبعد فترة طلبت الاحوال المدنيه من الوالد اضافة القبيله

وهنا جات المشكله حيث جميع الاثباتات وجوازي اصبح الاسم رباعي

اسمي والوالد والعائله والقبيله

ورحت للقنصليه الامريكيه وقابلت الوظفه ع الشباك

وشافت الاوراق وشهادة الميلاد وقالت كل الاوراق مضبوطه لكن الاسم لايتطابق مع شهادة الميلاد

حيث فيه زياده في اخر الاسم ولازم تجيب ما يثبت هذي الاضافه

من هنا راجعة الاحوال وقالوا ما نعطيك الا برنت باسمك الكامل ولا نعطيك شي غير

وبكذا تعلقت ولا قدرت استخرج الجواز الامريكي

اذا امكن انك توجهني التوجيه الصحيح

لاني طفشت

شهادة الميلاد الامريكية اساسا لاتظهر سوا الاسم الاول واسم الاب والاسم الاخير فقط ! (الاسم الثلاثي) + (إسم الأم الثلاثي منسوبة إلى اسم عائلة الزوج) ..
انا مادري ايش الاوراق اللي اعطيتهم لتثبت اسمك ..
لكن انا انصحك انك تعطيهم فقط الجواز السعودي "الحالي" .. (اهم شي مايكون منتهي) ..
تروح للجوازات وتعدل الاسم (الانجليزي) فيها وتخليه متطابق مع الاسم اللي بشهادة الميلاد .. (وهذي ماتاخذ وقت) ..
مو شرط يكون بنفس الترتيب .. اهم شي يكون الاسم الاول واسم الاب واسم العائله (متطابق بالسبلينج) ..
واذا كان "بالجواز" اسمك بالانجليزي مكتوب فيه اسم القبيله او العائله .. فلابد تطلب منهم إنهم فقط يضعون (اسمك الاول + اسم الاب + أول حرف من أسم الجد + العائله ) ..
وان شاء الله امورك تكون محلوله ..

انا أنصح ان الاثبات يكون بالجواز السعودي افضل .. حتى تكون المعلومات فيه متطابقه مع شهادة الميلاد ..

ولا اذكر انهم دققوا علي كثير .. لان بالجواز السعودي عندي السبلينج لاسمي ولاسم الوالد .. يختلف عن شهادة الميلاد الامريكية .. ومع ذلك وافقوا عليها ! لتطابق بقية المعلومات !

أعمل اللي قلت لك عليه .. وخذ معهم موعد ثاني .. من الساعه 11 الى الساعه 2 .. هذي افضل الاوقات "تجيهم مروقين" .. وتمشي امورك ان شاء الله ..

واذا قالولك شي .. قلهم إن نظام الاسماء بالسعوديه يختلف عن نظام الاسماء في امريكا .. لان في امريكا يعتمدون على الاسم الثلاثي .. بينما بالسعودية يعتمدون على الاسم الثماني ..
وتقدر تثبت انك انت صاحب المعلومات وتعطيهم صوره من جواز الوالده الله يحفظها ..
حتى تطابق اسمها مع اسمها اللي بشهادة الميلاد .. ولو عندك اي اوراق من المستشفى اللي ولدت فيه بيكون افضل بعد .. لانهم بيلاقون اسم امك الكامل واسم ابوك الكامل ..
(اسم الام في اوراق المستشفى يكون بإسمها الكامل واسم قبيلتها ) .. فبالتالي راح يكون فيه تطابق ..

ماعليك تاخذها باذن الله بس طول بالك شوي وتوكل على الله واعمل اللي قلت لك عليه وان شاء الله تنحل الامور ...

حياك الله ياخوي

وياجعل والديك بالجنه

الاوراق اللي قدمتها لهم هي

شهادة الميلاد

شهادة اثبات حياة من نفس المستشفى

اللي ولدت فيه

اثباتات تواجد العائله في امريكا اثناء ولادتي

والجواز السعوي

وجواز الوالد + كرت العائله

وانا سويت اللي ذكرته انت بالضبط

وجوازي السعودي منتهي وفيه اسمي

كامل بالعائله والقبيله بالعربي

وما دققت بالاسم بالانجليزي لكن بجدد جوازي واحاول اني اغيير الاسم

لكن ابي اسالك هم يعتمدون الاسم الانجليزي

اللي بالجواز السعودي ؟وهل الاسم العربي له اهميه عندهم ؟

اذا فيه اضافه ؟؟

اشكرك جزيل الشكر اخوي على تفاعلك

الله .. وش دخل كرت العائله ؟ هههههه انت ماخليت شي الله يحييك ..
علشان كذا عقدوا عليك الامور ...

جدد الجواز السعودي .. وعدل فيه الاسم الانجليزي مثل ماقلت لك سابقا .. خله متطابق مع الاسم اللي بشهادة الميلاد بس ..
وماعليك من الاسم بالعربي لانهم مايدققون الا بس بالانجليزي !

ولا تحتاج لا جواز ابوك ولا بطاقة العائله ..

كل اللي يهمهم اسمك بالانجليزي اللي بالجواز السعودي .. هذا اللي يبونه بس !
اذا عندك الجواز اللي دخلت فيه السعوديه اول مره او صوره منه .. جيبه وهذا يكفي لاثبات صلة الاب والام ..

وترا مثل ماقلت لك ماعليهم من ابوك وامك .. عليهم منك انت !
كذا شخص والله كلمني بنفس الموضوع .. ومشوا على طريقتي والحمدلله مشت امورهم ..
حتى فيه واحد اسم العائله بشهادة الميلاد ماله اي دخل باسم العائله اللي بالجواز ! (كاتبينها بشهادة الميلاد غلط ! ) ..
ومع ذلك بتوفيق من رب العالمين اولا .. ثم الطريقه اللي مشوا عليها .. خلصوا امورهم وطلعوا جوازاتهم !

دائماً في التعاملات الامريكية بالذات .. لا تجيب اكثر من اللي مطلوب ! خلك مع المطلوب بس !
تقدر تجيب معك اوراق زياده بس لاتعطيهم اي شي غير مطلوب .. لان مجرد تزيد بالاثباتات .. معناته راح تزيد الطلبات !

يعني انا لما قدمت عليها .. كنت جايب معي ملفين .. ملف فيه كل الاوراق اللي مطلوبه مني .. "اللي مكتوبه بالموضوع" ..
وملف حاط فيه اوراق حياتي كلها هههههه تطعيماتي و شهادات المستشفى الامريكية وشهاداتي الدراسية وصور من امريكا وحتى عقد الزواج واوراق الاهل وكنت بعد جايب صوره من شهادة الوالد .. ومادري ايش خرابيط واجده كنت حاطها احتياطاً لو طلبوا مني شي !
كل هالملف اللي جبته معي ماطلبوا منه الا شغلتين "اول جواز دخلت فيه السعوديه (وانا عندي الجواز الاصلي مو صوره .. ) و صور تثبت وجود الاهل بامريكا (كانوا يبون كم صوره .. انا جايب الالبوم كامل ههههه لدرجة قعدت العجوز مستانسه على الصور تقلبها صوره صوره وتقول اووه انا اعرف هذا المكان وطقتها سوالف) .. بس غير هذا ما طلبوا اي شي اضافي غير اللي ذكرته بالموضوع !

لذلك خلك على اللي قلت لك وتوكل على الله ولا عليك .. ولا تضيف امور اضافيه .. تقدر تحطها بملف خارجي وتجيبها معك "إحتياطاً" بس لاتظهر شي طالما ماطلبوه منك !