تقرير مقابلتنا في القنصليه الامريكيه بـ جدة بالتفصيل

October 10th, 2013, 05:37 AM

السلام عليكم ورحمه الله وبركاته


مقابلتي كانت يوم 8/10/2013

انا ومرافقي زوجي وكلنا فيزا دراسيه

موعدنا كان الساعه 9:30

توجهنا نحو القنصليه الساعه 8:30

ونصيحه اذا انتم ساكنين بعيد عنهم حاولوا تبكروا لان وقت الدوامات الشوارع جدا زحمه وبتتاخرون في الطريق .

وصلنا الساعه 8:50 ... اللي جاي سياره يوقف امام مستشفى سليمان فقيه ويروح مشي
المستشفى امام القنصليه مباشره.

اول ماوصلنا لطابور وكان موجود شخص سوداني يطابق جوازاتنا مع القائمه للمواعيد ويشطب عالاسم في القائمه.
وطلب جوالاتنا ومفاتيح السياره وحطها في ظرف وعطانا الظرف ع اساس نسلمه للامن بعدين.
المكان اللي كنا فيه مكيف ومغطى.
بعدها صارو يدخلوا بالدور للمبنى
جا دورنا ودخلنا غرفه الامن
وضعنا الاوراق والظرف في سله ودخلنا من التفتيش.
واخذوني داخل ستاره المفتشه حرمه وطلبتني ارفع العبايه وفتشتني بجهاز وشافت وجهي وطابقته مع الجواز.
وزوجي تم تفتيشه

التفتيش عادي نفس حق المطارات.
اخذنا اوراقنا وعطيناهم الظرف
اخذوا الظرف وعطونا رقم
(احتفظوا في الرقم عشان وانتوا طالعين تستلموا اغراضكم)

بعدها دخلنا في ساحه تودي لمبنى المقابلات

اول مادخلنا المبنى لقينا مكتب استقبال في موظفه
اخذت جوازي وطابقت الاسم تتاكد ان عندي موعد
واخذت تاكيد دي اس 160
والاي توني
وورقه رسوم السيفيس

وكذلك زوجي.

وحطتها في الجواز وعطتنا
ورجعت باقي الاوراق قالت اذا طلبوها منكم عطوهم واذا ماطلبوها احتفظوا بها.

وعطتنا رقم لنا الاثنين مع بعض.

دخلنا صاله فيها كراسي انتظار و7 كونترات مرقمه
1 كاشير مدري كاشير ايش!
2-4 للمقابلات
5-7 للبصمات ومقابله مبدئيه

جلسنا دقيقه وطلع رقمنا في كونتر
كانت الموظفه جدا محترمه اخذت جوازاتنا وداخله الاوراق
سالت ليش رايحين امريكا؟
قلنا دراسه
قالت بالتوفيق
مررت الجواز في جهاز
واخذت البصمات
وقالت انتظروا حتى ينادوكم

وخلال الانتظار نشوف اللي فرحانين بالورقه البيضاء والقبول
واللي انرفضوا ايضا ورقه بيضاء!!!
والورقه الورديه كنا خايفين منها شفنا البعض اخذوها وتوترنا..
كانت الاسئله والاجابات احيانا مسموعه لكل اللي في الصاله وضع يوتر جدا!


انتظرنا ساعه كامله!

واحنا على اعصابنا قلنا شكلهم رفضونا بدون مقابله حتى

بصراحه كان فيه موظفه من اللي يسوون المقابلات اسئلتها كثيره وتدقق ع كل شي ورفضت ناس وكثير طلعوا من عندها باجراءات اداريه.

كنت ادعي مانجي عندها.

والحمدلله جات مقابلتنا عند غيرها
كان بشوش ورايق
المقابله
هو: صباح الخير
احنا: صباح النور
هو: ستذهبون للدراسه؟
زوجي: نعم
هو: طلب من كل واحد فينا يحط يده ع جهاز البصمات واخذ بصمات اليد اليمنى فقط
هو: اي ولايه؟
زوجي: ولايه واشنطن
هو: دراستكم يوم 6 يناير!
نحن: نعم
هو: من المتكفل بدراستكم؟
قلناله الجامعه وعطيناه الضمان قراه ثم ابتسم وقال مبروك البعثه
هو: هل ستدرسون لغه فقط؟ ام ماذا؟
قلناله لغه ثم بنكمل ماستر
هو: ماهو التخصص؟
علمناه بتخصصاتنا
هو: كم بتجلسون في امريكا؟
زوجي: 3 سنوات
هو: هل لديكم اطفال؟
زوجي : لا
هو: هل هي المره الاولى لكم في امريكا؟
نحن: نعم

وقتها شفناه طلع ورقه ورديه
انجلطنا بس لما عطى موظفه ثانيه ارتحنا.

طالع فينا وابتسم قال مبروك فيزتكم مقبوله وستصدر خلال 3 ايام عمل
مرحبا بكم في امريكا.
ورجع اوراقنا واخذ الجوازات
وعطانا ورقه فيها عنوان فيديكس.

بغيت اطير من الراحه وقتها لاني كنت شايله هم من كلام البعض هنا
ومن اللي شفتهم رفضوهم.

وانتهت مغامرتنا معهم ادعولنا تطلع فيزنا بدري.


الاشياء اللي ماطلبوها ولله الحمد
تعريف عمل زوجي
كشف الحساب
الشهادات
تاكيد الموعد


ماشاء الله كان الامر سهل.


ملاحظات من خلال بعض المقابلات اللي حصلت امامي
- الشخص المتردد يشكون فيه.
وممكن يرفضوه كذلك المستهتر او لبسه غير لائق ومايدل ع احترام ! رفض او اجراءات اداريه.

- لبس الثوب للموعد عادي بالنسبه للرجال. ولايوثر عالقبول او الرفض. كل اللي شفتهم بثياب انقبلوا عادي جدا.

- الشهاده البنكيه حاولوا يكون فيها مبلغ 100 الف او اكثر بالنسبه للطلاب ع حسابهم وتكون من حساب شخص موظف او تاجر وتثبتوا هالشي.
لايجي طالب معه شهاده بنكيه ويقول انا بتكفل بنفسي ع طول رفض.

- تعالوا بكل ورقه ممكن تفيدكم سواء طلبوها ام لا.

- شفت ناس انرفضوا لانهم جابوا شهاده بنكيه بمبلغ اقل من المطلوب. او ماعندهم اثبات لوجود علاقات لهم هنا. زي تعريف عمل.



الحمدلله صدرت الفيزا بعد يومين بتاريخ 10/10/2013



( تمت المشاركة باستخدام تطبيق مبتعث )

• نشر عبر تويتر
• نشر عبر فيسبوك
• نشر عبر جوجل