الأعضاء الإشتراك و التسجيل

الملتقيات
ADs

| . . تجربتك الخاصة في مقابلتك الشخصية في السفارات الأمريكية. . |

| . . تجربتك الخاصة في مقابلتك الشخصية في السفارات الأمريكية. . |


NOTICE

تنبيه: هذا الموضوع قديم. تم طرحه قبل 1484 يوم مضى, قد يكون هناك ردود جديدة هي من سببت رفع الموضوع!

قائمة الأعضاء الموسومين في هذا الموضوع

  1. مقابلتي كانت يوم الثلثاء الموافق 2015-1-27 وكانت اول مرره لي اصلا اروح للقنصليه في السعوديه
    صراحه تنظيم فوق المتوقع ... بالنسبه ليكان موعد المقابله الساعه 8 وانا حضرت الساعه 7 تماما
    وقعت استنى مع افراد الجيش السعودي خارج القنصليه لان الشرط للدخول انك توصل قبل
    ربع ساعه من بداية وقت مقابلتك ... يعني المفروض اروح الساعه 8:45 لكن طبعا
    انا رحت قبل بثلث ساعه او 25 دقيقه دخلت من البوابه وطبعا في بلك على
    يميني و جدار القنصليه على يساري مسويا طريقه ... طبعا الموقع
    نظييف وهذا حسسني وكأني في مكان اخار بعيد عن جده

    المهم مشيت الين جاتني مظله صغيره مسوين الناس عندها طابور
    جوة في المضله في مكيفين اثنين وتحتهم مكتبين جالسين عليهم موضفتين
    اخذو الاوراق الي يحتاجوها وطبقتلي هي بطريقه معينه واعطتني هي وكملت في الطابور الين خرجت من
    المضله هذي وجيت عند غرفة التفتيش عديت من غرفة التفتيش والي كانو يفتشو فلبينيين .. مو امريكان بس يالله
    المهم كملت طريقي وانا معجب بهذا التنظيم الي قاعد يصير ... وصلت لقاعة المقابله واخذت موضفة
    الاستقبال الجواز وحطت عليه باركود او الـ ID حق الجامعه واعطتني رقم ورحت قعدت

    استنيت شوي الين جا رقمي وطبعا في قسمين شبابيك الاول عباره عن ثانين
    وكلهم عرب سوداني وسوري رحت للسوداني طلب مني الاوراق
    اعطيته هي ورتبها بطريقه معينه وسألني كذا سؤال
    يتعلق بالسفر والمدينه والولايه وكذا

    المهم اخذت الرقم ثاني مرره وقعدت استنى عشان المقابله
    الان انا جاي على اساس ان الاسئله بالعربي ومجهز كلام وكل شي
    بس كلمتني البنت بالإنجليزي طبعا اتلخبط شوي واتمالكت نفسي وخلصط
    قالتلي ان راح يرسلولي اراميكس رساله عشان اجي وآخذها

    انطباعي :
    الامور كلها مشيت بتنظيم ما شفتله مثيل ابدا .
    7 "
  2. مساكم الله بالخير ..مقابلتي كانت اليوم في السفارة الامريكية في الرياض ولله الحمد انتهيت بشكل سريع لم اكن اتصوره ..
    موعدي كان الساعه 8 ونص بس كالعادة دايم احب اروح بكري لدرجة اني 7 و40 دقيقه مصبح عليهم اول شيء اخذوا مني الجواز واول ورقة من الابلكيشن والموعد اخذت ورقة الابلكيشن صفطتها وحطتها وسط الجواز وردت الاوراق لي ..رحت الشباك اللي جنبه حطيت اغراضي الجوال والمفتاح .. دخلت غرفة التفتيش حطيت شليت اي حاجه فيها معدن مثل الحزام وكذا .. ودخلت الجهاز ومشت الامور .. دخلت السفارة كان فيه مكتب طلبو الجواز وحطو لي زي الباركود ورجعو لي ياه ودخلت الغرفه اللي جنب المكتب طبعا هي صالتين ومقسمين الكاونترات اخذت عشر دقايق وجا رقمي رحت عندهم طلبت الضمان المالي والجواز والاي تونتي وورقة السفس على ما اظن حطتها في ملف ورجعتها لي قالت خلاص هذي اللي بتحتاجها .. بصمتني ع الجهاز وحنا متعودين ع بصمة الادلة الجنائية تطلع وانت تحسب نفسك مجرب المهم قالت خلاص انتظر لين يجي دورك في المقابله طبعا مابدو المقابلات باقي .. انتظرت حول 25 دقيقه الا هم ينادون رقمي الفخم 26 وادرعم ع كاونتر 11 من طلع فيه ؟؟ تذكرون اللي جا ملتقى الرياض اللي اسمه كريس على ما اظن كان يتكلم عربي احسن مني عطيته الاوراق اللي قبل جمعوها لي في ملف .. المهم انا يوم شفته ارتحت ولا من اليوم ماني عارف اركب جمله بس يوم شفته قمت اسولف حسيت اني امريكي .. المهم تشقلبت الدنيا هو يتكلم عربي وانا انقليزي اقول لكم يوم طلعت ضحكت على نفسي .. عاد الاسئلة حقته وين بتروح اي ولاية واي مدينه وش تخصصك مبروك انتظر الفيزا.. راح يتصلوا عليك ارامكس بعد 3 ايام دخلت الساعه 7 و40 دقيقه طلعت 8 و50 تقريبا .. عموما في حاجة ضايقتني اللي هي اخواتنا وبنات بلدنا نسيوا انهم مسلمات لدرجة ان بعضهم رامين الحجاب هذي حريه لهم لكن نخاف عليهم مثل مانخاف على اهلنا ..شكرا لكم 😍
    7 "
  3. توجهت يوم الثلاثاء الماضي للقنصليه في شارع فلسطين جدة .. موعدي كان الساعه ٩:١٥ ... الاوراق المطلوبه

    I-20 - ايصال السيفيز - ورقه تاكيد ds160

    بعدين تعطيهم الاوراق .. يرتبونا ترتيب معين ويعطونك اياها .. زي ما هيا بتعطيها لبنت في المكتب الدخلي .. وتعطيك رقم .. تنتظر الين يجيك الرقم .. تدخل المكتب الاول وتجاوب ع الاسئله بالعربي .. ليه رايح امريكا ومن مسؤول عن مصاريفك .. بعدين تبصم وتروح تمسك سرا حق المقابلات الشخصية .. يسؤلونك ايش تخصصك - متى عيد ميلادك - فين ولدت - اسم الجامعه او المعهد الي راح تدرس فيه وفي اي ولايه ومتى تبدا دراستك ... وقالتلي مبروك فيزتك مقبوله تلاقيها بعد ٤ ايام في ارامكس .. يومين واستلمتها الحمد لله .. وبالتوفيق للجميع
    7 "
  4. التأشيرة الدراسية لـ دولة: أمريكا
    القنصلية: الظهران
    النوع: (جديد / تجديد / بدل فاقد) : جديد
    التاريخ: 2105-2-3

    اسئلة المقابلة مع الاجوبة:
    - اول مرة تروح امريكا ؟ ايه
    - مين بيصرف التكاليف ؟ الوالد
    - وين يشتغل ؟ متقاعد

    شكرا لك فيزتك مقبولة تستلمها بعد ٤ ايام

    الاوراق التي تم طلبها منك:
    طبعا اللي سار كالتالي ، ما راح يدخلونك اذا رحت لموعدك بأكثر من نص ساعة
    راح تروح اول شي تسلم اوراقك ويحطون كود ع الجواز ويدخلونك ، لما تدخل راح تحصل واحد جالس ع اليسار معه كمبيوتر راح يطلب منك الاوراق التالية :
    ١- صورة DS
    2- تسديد السيفيس
    ٣- ايصال سامبا
    ٤- اي توني
    ٥- ضمان بنكي او اللي هي شهادة بنكية تثبت بوجود مبلغ وقدرة ، ما اخذ مني كشف حساب ٣ اشهر

    بعدها تروح تنتظر بعد ما تسحب رقم بنادونك ع شباك يسألونك ٣ اسئلة :
    ١- اول مرة رايح امريكا ؟
    ٢- ليش رايح ؟
    ٣- ايش راح تدرس

    بعدها ترجع تنتظر بينادون على اسمك وتروح ويسألونك كم سؤل وينتهي الموضوع . الاسئلة اللي سألوها لي موجودة فوق

    هل تم حصولك على التأشيرة؟ ٤ ايام ان شاء الله

    ملاحظات أخرى: مافي اي شي يخوف بالموضوع والناس هناك متساهلين جدا جدا و بشوشين والامور سهلة وع فكرة يتكلمون عربي يعني لا تشيل هم لغتك الانجليزية اذا كانت ضعيفة

    وهذا اللي سار معي وشكرا لكم . دعواتكم لي
    7 "
  5. السلام عليكم
    مقابلتي كانت يوم الثلاثاء .. واستلمت الجواز يوم الجمعة

    الاوراق اللي طلبوها :
    ايصال سامبا "اخذ الاصل" .. الحمد لله اني صورته قبل .
    الاي توني .
    تسديد السيفس .
    ds-160 .
    الضمان المالي .
    ورقة موعد المقابلة .

    الاسئلة :
    ليش اخترت كاليفورنيا ؟ امم الجو !
    تعرف احد في امريكا ؟ لا
    وش بتدرس بعد اللغة .. والتخصص ؟ ....... ......
    بتسكن مع هوم ستاي ؟ لا ..... قال "وحيد " !!

    وبس ,,
    7 "
  6. طيب السلام عليكم طبتم وطاب مساءكم
    حقيقتا انا استفدت الشيء الكثير من هالموقع الكويس وحاب ارد الجميل وكذا المهم انا بقص لكم تجربتي مع السفارة الأمريكيه لإستخراج فيزا اف ون من طقطق لسلام عليكم
    نخليها بشكل تفصيلي يعني نبدأ بالأوراق الي لازم تكون معك أو ممكن راح يطلبونها منك :
    1. استمارة تأكيد موعد مقابله اهم حاجة لا تنساها انتبه ي مال الغنيمه
    2. والي هي عبارة عن الصفحة الاولى فقط الي فيها خشتك ومعلوماتك والبار كود Ds-160 تجيب معك استمارة
    3. إحضار صورة شخصية مقاس خمسه بخمسه وللعلم ماخذوها مني مير خذها احتياط
    4. الضمان المالي وذا برضو مهم جدا وبالنسبه لي ما جبت لهم شهادة بنكيه جبت لهم صفحه وحده والي هي تحركات الحساب الفترة الاخيره ومشت اموري
    5. الأي توني خذ الاصل وصوره منه لانهم عند البوابه يعفطون الاوراق فلا تعطيهم الاصل وانت بكيفك
    6. إيصال سداد رسوم السيفس مهم
    7. إيصال سامبا الي هو سداد رسوم التأشيره
    8. جواز سفرك
    9. شهادة اخر مرحله درستها والترانسكربت للي مخلص بكلوريوس

    وبس ذا الي المفروض تاخذه معك نجي الحين لتفاصيل مقابلتي :
    كان موعدي اليوم الساعة 8:45 صباحا في جدة طبعا طلعت من البيت وفي يدي كوب القهوه السوداء النقيه ولكن مسافة باب بيتنا الى باب السياره صارت قهوه سوداء ونص كيلو رمل اي نعم ي سادة كان يوم مغبر للاسف حتى تكدرت قلت ذي اولها والله ينعاف تاليها المهم تعوذت من ابليس وشغلت سيارتي واتجهت للسفاره وقفت في مواقف مستشفى فقيه وترجلت من سيارتي هههه حلوه ترجلت المهم واتجهت للمدخل طبعا كان سرا شوي كثير يعني مو مره شوي يمكن 10 قدامي المهم كانت لبنانيه تجي يمك وتقول طلع تاكيد موعد المقابله + النموذج الي فيه خشتك ومعلوماتك + الضمان المالي + إيصال السيفس +الاي توني + جوازك , طبعا مثل ما قلت فوق تعفط هالاوراق كلهن وتحطهن بوسط الجواز وبس تمشي بالسرا شوي تجيك على يسارك وحده تاخذ الجواز بالاوراق الي بوسطه وتسألك معك جوال ومفتاح سياره انا كان معي جوالي ومفتاح سيارتي قالت هاتهن وحطتهن بظرف وقالت تفضل وبعدين تجي مرحلة التفتيش ثلاثه بنقاليه مستانسين احس لسان حالهم يقول اهلن نفرات سعودي المهم اخذ كل ما معي حتى اوراقي وحطهم بصندوق بلاستك وفتشني ودخلت عاد من الجهاز , إلا فيه فلبينيه تستقبلك كشرتها تشوفها عن بعد كيلوين المهم خذت مني الظرف الي فيه جوالي ومفتاح سيارتي وعطتني رقم وقالت اذا جيت طالع خذهم المهم دخلت عاد للمكان المنشود وكان فيه وحده لبنانيه خذت جوازي بالاوراق الي بوسطه وطلعت النموذج الي فيه خشتي ومعلوماتي + تأكيد موعد المقابله وقالت خلاص ما تحتاجهم وعطتني رقم وقلت تفضل على الكراسي لين يجي رقمك المهم انتظرت لين جاء رقمي اتجهت للشباك نفس نظام البنك قزاز وتشوف الموظفه قدامك قالت بالانقليزي طبعا صباح الخير حط جوازك بالاوراق الي فيه حطيتها وشيكتهم وقالت فيصل ليه رايح امريكا قلت للدراسه وقالت اها وبس قعدت تطقطق على الكمبيوتر شوي ثم حطت مطاط على جوازي بالاوراق الي فيه وقالت تفضل بالتوفيق شكرتها ورحت بجلس الا وحده تناديني اكس كيوز مي سير اون ذا لاين بليز وكان فيه سرا وقفت فيه والسرا ذا يفتح على 3 شبابيك الي هي شباك رقم 2, 3, 4 الان المقابله الي بإذن الله يترتب عليها قبولك أو رفضك المهم جاء دوري على شباك 4 وكانت مررررره حبوبه الي سوت معي المقابله طبعا رحت ومجهز اجوبه كلها بالانقلش طول الليل وأنا احفظهم , إلا يوم قالت لي اهلن انا وقتها اسفهليت ي جماعه قلت كويس عشان اجاوب بكل ثقه وبدون لخبطة قالت بتدرس انقليزي قلت ايه قالت بتكمل ماستر قلت ايه قالت باي ولايه قلت لها كذا كذا قالت باي مدينه قلت لها كذا قالت لك اقارب بامريكا قلت ايه قالت وش يقرب لك قلت عمي قالت ايش , قلت عمي قالت ايش , قلت عمي بعدين قالت اها عموك باللغه العربيه الفصحى خخخخخ في تكرارها للسؤال احس لها مغزى مير مدري وشو المهم قالت من بيتكفل بدراستك قلت ابوي قالت وين يشتغل قلت لها كذا كذا المهم رجعت وبسرعه كذا قالت عموك وش يسوي بامريكا لخمتني بنت اللذينا قلت لها يكمل دراسته قالت ب أي ولايه واي مدينه علمتها المهم جلست تطقطق بالكمبيوتر شوي ومدت علي اوراقي باستثناء الجاوز وانا هنا قلبي بدأ يخفق بسرعه واحس نبضه يجي ويروح مثل ارسال اس تي سي بالبر المهم طالعت فيني وابتسمت وقالت اتمنى لك حياة دراسيه ناجحه فيزتك مقبوله المهم اسفهليت وابتسمت لها وشكرتها وبس طبعا محاثتي معها بالعربي تتكلم مره عربي فصيح وفجأة تقلب نجوى كرم المهم أن الأمور سهالات ومافي اي تعقيد ولاحظت شيء وانا جالس انتظر طبعا جسلت بأول صف ورميت اذاني عند الشبابيك ولاحظت ان الي اوراقه مش كامله اما يرفضونه او يطولون معه بالاسئله وفيه واحد انسئل سؤال خرشني قاله اقنعني انك بتكمل دراستك وترجع على طول ؟؟ قلت وش جواب هالسؤال بعد , المهم انا حطيت الموضوع وفصلت فيه كله عشان الي بيروح للمقابله بالمستقبل لا يشيل هم ترى بسيطه بس خل اوراقك كامله وامورك بتزين إن شاء الله , ملاحظه : أنا طالع على حسابي الخاص وأرجوا منكم الدعاء لي بالأنضمام للبعثة

    انتهى...
    7 "
  7. المشاركة الأصلية كتبت بواسطة طموح رجال
    يا شباب انا كنت موظف واستقلت وبصرف على نفسي بس وش اقول لهم عشان الفيزا اذا قالوا من الي يصرف عليك عشان ما يرفضوا الفيزا هل اقول انا الي بصرف على نفسب ولا وش اقول الفزعه
    عادي قول لهم انا جمعت مبلغ للدراسة ، انا قلت لهم كذا
    7 "
18 من 25 صفحة 18 من 25 ... 1317181923 ...
ADs

قم بتسجيل دخولك للمنتدي او

الانضمام لمبتعث

Search Engine Optimization by vBSEO ©2011, Crawlability, Inc.