تجربتي مع القنصلية الأمريكية بالظهران بتاريخ 1/4/2014 ...

بسم الله الرحمن الرحيم

السلام عليكم و رحمة الله و بركاته

اليوم بإذن الله راح أشاركم تجربتي مع مقابلة الحصول على فيزا في القنصلية الأمريكية بالظهران



في البداية موعدي كان 1/4/2014 الساعة 9 صباحاً

وصلت الساعة 8:30 سألوني عند البوابة عن ورقة الموعد

و عطوني بعض التعليمات مثل يجب ترك الجوال في السيارة الخ

و دلوني على المواقف حطيت جميع الأغراض الي بجيبي في سيارة ما عدا مبلغ مالي و مفتاح السيارة و حاولت اتخلص من أي شيء فيه معدن

نزلت و لقيت صف للتفتيش تأخذ كيس بلاستيك و تحط فيه كل ما فيه جيبك و الحزام إذا لابس

راح يفتش أغراضك و أوراقك و تدخل في جهاز كشف المعادن و تكمل بعدها لصف آخر

هذا الصف توقف لين يجي دورك تروح لشباك و بيأخذون كل اوراقك و يتأكدون من إن عندك موعد و يدخلونك من باب و تتفتش مرة أخرى

بعد التفتيش أخذوا مفتاح سيارتي و حطوه في صندوق امانات و يرجعون لك أوراقك و فيه منها ملفوفة بمطاط خلها زي ما هي

الأوراق الملفوفة هي : الجواز و إيصال الدفع من سامبا و I-20 و DS-160

بعدها تدخل من عدة أبواب لين تصل لغرفة التأشيرات و الجوازات

تأخذ رقم و تجلس , أنا أخذت رقمي الساعة 9:05

طبعا فيه كوفي جوفريز للي بيبي و فيه دورات مياه و قدام الكراسي فيه تلفزيون يعرض فيه افلام تعريفية بأمريكا

أنتظرت تقريبا إلى 10:15 حتى جاء رقمي رحت لموظف من أصول عربية أخذ الاوراق الملفوفة بمطاط و سألني التالي :

أول مرة تروح أمريكا ؟
وين رايح ؟ ( تقول له الولاية و المدينة )
وش سبب السفر ؟ ( دراسة طبعاً )

و بعدها أخذ بصماتي و قال لي رح أجلس لين ما نادي على أسمك

أنتظرت أقل من نصف ساعة و نادوا على أسمي في شباك مغلق بباب زجاجي

و كان فيه وحدة أمريكية رحبت فيني و قال حط يدك اليمين على جهاز البصمة

طبعا هي قالت لي حط يدك اليمين على الجهاز و كان صوتها راخي فقالت what ردت على بعربي مكسر يدك اليمين على الجهاز

سألتني بالعربي من بيتكفل بك قلت الوالد و سألت وش وظيفة الوالد رديت بالانجيلزي و بعدها كملت المقابلة بالانجيلزي

و قلت متقاعد و كان شغال بشركة ارامكوا و اعطيتها الشهادة البنكية

الاسئلة كانت :

رحت لامريكا قبل كذا ؟
وين رايح ؟
وش بتدرس ؟ ( لغة و بكالوريس )
من بيتكفل باك ؟

بعدها قالت لي إنه دراستي تبدأ في 22 سبتمبر صح ؟ قلت ايه

قالت إنه عندهم نظام ما يعطون طالب الـF-1 فيزته قبل أكثر من 120 يوم (اربع شهور) نظراً لأن كثير منهم يضيعها

فطلعت الورقة الصفراء وقتها خفت و كتبت فيه قانون ال120 يوم لفيزا الطالب

و قالت لي إن فيزتك مقبولة لكن ما راح نرسلها لك قبل 22 مايو و سألتني إذا ممكن نحتفظ بالجواز أو ترسله لنا قبل 22 مايو عن طريق ارامكس ؟

قالت احتفظوا فيه و قالت لي إذا احتجته أرسل لنا إيميل نرسله لك عن طريق ارامكس غير كذا راح يبقى عندنا و راح نرسله لك مع الفيزا

بعدها تمنت لي يوم سعيد و خلصت بكذا

الخلاصة :
الورقة الصفراء ليست مصيبة أو دليل على الرفض بل هي ورقة تفيد إن أحد متطلبات الحصول على فيزا ناقصة إن كانت ورقة فكل ما عليك تحضر الورقة لارامكس
و ترسله للسفارة و في حالتي كانت إني مبكر في التقديم يعني لا تخافون منها ابداً

المقابلة سهالات خلك مرتاح و واثق و مبتسم و لا ترتبك
لإنك بمجرد ما تخلص بتضحك على نفسك إنك كنت مرتبك على شيء ما يسوى
جاوب على قد السؤال و لا تتفلسف لأن عندهم زحمة و ما هم فاضيين للطويلة

الاوراق التي تم طلبها منك:
الجواز و I-20 و DS-160 و إيصال الدفع لسامبا و تأكيد دفع السيفس و شهادة بنكية

أي اسئلة لا تترددوا أنا حاضر و في الخدمة

الله يوفقنا جميعاً

الله ييسر امرك وامرنا ان شاء الله

عليكم السلام ورحمة الله وبركاته

موفق اخوي ان شاء الله
عقبال ما تصدر الفيزا وتسافر

كثير الى 22 مايو
انا مقابلتي الاسبوع الجاي عسى ماياخرونا بس

اقتباس:

---

المشاركة الأصلية كتبت بواسطة عالقة في عنق الزجاجة

كثير الى 22 مايو
انا مقابلتي الاسبوع الجاي عسى ماياخرونا بس

---

مو كثير بالنسبة لي أنا دراستي تبدأ في 22 سبتمبر , يعني بعد اربع شهور من 22 مايو

إذا كانت دراستك باقي عليها أقل من 4 شهور , تصدر في فترة بين اسبوعين إلى 3 اسابيع بالكثير و فيه ناس حسب ما قرأت و خصوصا النساء في يومين إلى 4 ايام

الله يوفق الجميع

اللي يحتاج مواعيد اقرب و اسرع يحجز ع الرياض و تعاملهم حلو و مرتب
لكن الافضل حجز المواعيد المتقدمه يعني من 7 او 7:30 و كلما كان مبكر كان افضل لانهم يدخلونك لمبنى السفاره حسب موعدك
و في كل السفارات اهم نقطه هي انك تكون واثق من نفسك عند القنصل ، حتى لو معلوماتك ناقصه خليك مبتسم و تكلم بطلاقه

و الله يوفق الجميع

الحمد لله تم اليوم إصدار الفيزا بتاريخ 26 مايو أي بعد اربع أيام من الوقت المحدد

الحمد لله كما ينبغي لجلال وجهه الكريم

الله يوفق الجميع و ييسر أمورهم

الف مبروك و تروح و ترجع بالسلامة ،، قرأت موضوعك من يوم كتبته و اليوم صدرت فيزتك ع خير و الحمدلله :D

اقتباس:

---

المشاركة الأصلية كتبت بواسطة Hirako

الف مبروك و تروح و ترجع بالسلامة ،، قرأت موضوعك من يوم كتبته و اليوم صدرت فيزتك ع خير و الحمدلله :D

---

الله يبارك فيك يالغالي

أتمنى إني افدتك و افدت المنتدى بشكل بسيط و يكون جزء من رد الجميل للي أفادوني

الله يسهل أمورنا جميعا

مبرووك يالغالي بس عندي استفسار اذا ممكن وش تقصد بقانون 120 يوم(4اشهر)
قالت إنه عندهم نظام ما يعطون طالب الـF-1 فيزته قبل أكثر من 120 يوم (اربع شهور) نظراً لأن كثير منهم يضيعها

يعني الـ F1 يكون قبولهم بعد 4 اشهر عشان يستلمون الفيزا ايضا كم اود الاستفسار بخصوص المدة المخصصه لتحديد موعد المقابلة الشخصيه يعني

من وقت حجزك للمقابلة الى وقت المقابلة كم اسبوع او او اقل؟

ولك لك الشكر والتقدير