رفض طلب الفيزا بسبب التقديم على الفئة الخطأ, أتمنى منكم المشورة.

السلام عليكم ورحمة الله وبركاته

أسعد الله أوقاتكم بكل خير,

عندي مشكلة بسيطة وأدور الشور الله يعافيكم ..

يا جماعة أنا يفترض أني آخذ دورة تدريبية في أمريكا لمدة 8 أسابيع فقدمت على فيزا سياحية وخلصت الاجراءات لين وصلت المقابلة وقلت لهم أني رايح آخذ دورة, بعدها رفضت والسبب أني اخترت فئة الفيزا الخطأ. حاولت مع الموظفة لكن ما من جدوى وأرشدتني إلى التقديم على فيزا جديدة بالفئة F1 أو M1 . المشكلة أن هذا الحل راح ياخذ وقت والاجراءات والوثائق بتتعبني على بال ما أجيبها على عكس السياحية والرحلة بعد اسبوعين محجوزة فيالله يالله يمدي. كلمت موظفة الاستقبال وأنا طالع الله يعافيها كانت متعاونة وقدرت وضعي راحت أتصلت على شخص مسؤول وشرحت له سالفتي كاملة ثم حطت السماعة وقالت لي جب خطاب من الجهة المعنية بالدورة التدريبية تقول فيه أنهم ما يمانعون اني اجي بفيزا سياحية وأن الدورة بارت تايم وأرسله لهم عن طريق أرامكس مع الجواز فقطط دون أي مستند آخر.

علماً أني شيكت على حالة الفيزا من الموقع ومكتوب بالخط الكبيير REFUSED

علماً أني طلبت الخطاب وإن شاء الله على يوم الأحد بيكون جاهز وراح أرسله.


فهل سبق لأحد منكم مر أو يعرف من مر بتجربة مشابهة ؟ وش صار ؟ وكم أخذوا وقت على بال ما ردوا ؟

ووش حظوظي في رأيكم بعد مشيئة الله في القبول بعد ارسال الخطاب ؟

هل إذا قدمت مرة أخرى على فيزا سياحية وقلت لهم أني رايح سياحة ممكن تمشي ولا كل شيء موثق عندهم ؟


سؤال أخير ولو أنه ممكن يكون مضحك شوي, الآن أنا لما أرسل لهم الخطاب مع الجواز هل كل البيانات راح تكون موجودة عندهم, مثل سبب الرفض ونموذج التقديم والصورة وكل شيء ؟ لأن موظفة الاستقبال قالت أرسل الجواز مع الخطاب بس!

ياليت تفيدونني بأي نصائح أو أي مساعدة وراح أكون شاكر ومقدر ..

وينكم يا جماعة ؟

لا اله الا أنت سبحانك إني كنت من الظالمين

لا إله إلا أنت سبحانك إني كنت من الظالمين