دارس على حسابي وحضور الملتقى موهقني
السلام عليكم جميعا
انا موجود في امريكا من شهر ديسمبر 2013 يعني صار ليس اكثر من اربع شهور وجاي ادرس على حسابي الخاص وتعثرت اموري في الحصول على القبول الجامعي وتوني بس لقيت احد يجيبه لي بفلوس وجالس انتظره
لكن المشكلة الحين في حضور الملتقى الخاص بالدارسين على حسابهم الخاص شلون الدبره معاه ؟؟
انا من جيت امريكا وقاعد بس ارفع اوراقي للملحقية ويجيني الرفض بسبب عدم وجود القبول الجامعي
والحين لما لقيت الا بيجيبه لي قلت بس جاني الفرج .. يطلع لي هذا الشرط الصعب!!
نعم صعب لاني درست في معهدين والمعهد الثاني الا انا فيه يقولون مانقدر ننزل البلد الا بعد ما نكمل معاهم لفلين وكل لفل شهرين ونص يعني خمس شهور متتاليه واحنا الحين قريب نهاية اللفل الاول
ولو نزلنا راح يتكنسل الاي توني !!!
وفي غيري في المعهد قدر يرفع اوراقه كاملة ويفتح له قبول ملف لانهم خلصوا امورهم قبل لا يجون امريكا والحين مساكين قاعدين يضربون اسداس في اخماس بسبب هذه المعضله
ترا في كثيييير من الطلاب في مدينة هيوستن لوحدها قاعدين يشتكون الحال لان في عودتهم للمملكة لحضور الملتقى صعوبة ومخاطرة كبيرة زي حالتي واكيد في غيرنا الكثير كمان متوزعين على كل الولايات بامريكا
طيب ليش ما يسوون ملتقى هنا في امريكا خاص بالذي مايقدر يسافر ويحضره بالسعودية مثلا في واشنطن حق جميع الطلاب في امريكا ويريحونهم من عناء السفر والمخاطرة بالايتوني
يمكن البعض يقول طيب ليش ما حضرته قبل لا تسافر ؟؟
وانا اجاوبه بان وضعي ما سمح بحضوره في وقتها اضف على ذلك باني سالت اكثر من شخص ممن سافر على حسابه وتالي جاه قبول والتحق بالبعثه وقال ان الحضور غير الزامي وهذا هون عليي الوضع وسافرت وانا مطمئن بعد التوكل على الله سبحانه وتعالى .
ياريت الا عنده حل لمشكلتنا يساعدنا ترا وضع الطلاب الا في امريكا صعب جدا مو زي وضع الطلاب الا بالبلد ولا الكل يقدر ينزل عشان يحضر الملتقى مو ناقصين خساير اكثر يكفي خسارة التذاكر الا جينا فيها واجار السكن وقيمة الدراسة بالمعهد والله الحياة صعبة وننتظر الفرج لا تبخلون بآرائكم والا عنده معلومات يفيدنا فيها واعتذر على الاطالة والكتابة ببعض الكلمات الدارجه والله من ضيق الحال الا احنا فيها عقب ما شفنا القرار
أخوكم المغترب راشد
رد: دارس على حسابي وحضور الملتقى موهقني
معقولة خمسون متابع ولا في رد واحد:sad:
رد: دارس على حسابي وحضور الملتقى موهقني
عزيزي كلنا عندنا نفس المشكله ، بس انت المفروض تاخذ موافقه قبل لا تسافر .
الله يوفقك ويسر امورك
( تمت المشاركة باستخدام تطبيق مبتعث )
رد: دارس على حسابي وحضور الملتقى موهقني
كلنا نردد يا ليل مطولك اتمنى يجي من يفيدك ويفيدنا
ما اقول غير حسبي الله ونعم الوكيل على الي كان السبب في مشكلتك ومشكلتنا والله يوفقك ويسر دربك