كن انت الحكم في اختيارك لحاسبك الآلي !

السلام عليكم ورحمة الله وبركاته
اولا احب ان اشكر اخوي mobsahi
على موضوعه اللي استفاد منه الكثيرين !..
واسمحوا لي ان اطرح هذا الموضوع
والذي سوف اشرح فيه امور اتضح لي تشويشها على الاعضاء ..
او كما يسمى اعادة صياغه مع زيادة بهارات متبله
سأشرح كل شي بالتفصيل الممل ..
(علشان الناس تعرف وش تختار)

السؤال الأهم هو : كيف اختار الجهاز المناسب لي ؟ (سواء كان مكتبي او لابتوب)
ولكن انا سوف اتكلم عن اللاب توبات بما انها صارت اكثر استخداما من الدسك توب !
هنالك بعض المعايير التي لابد للشخص ان يحددها ويعرفها قبل ان يقدم على اختيار اي حاسب الي !..

يجب عليك ان تحدد نوع الجهاز و مواصفاته و حجمه و قيمة الجهاز !..

أولا : نوع الجهاز ..
كثرت الشركات المصنعه للـ Laptops
حتى ان هنالك شركات دخلت في هذا المجال وهو ليس بمجالها !
لان هذا العصر هو عصر التكنلوجيا وعصر (اذا ماعندك كمبيوتر ماعندك ماعند جدتي )
هنالك شركات كثيره مصنعه للأجهزه المحمولة مثل :
DELL, TOSHIBA , SONY , HP , MSI, ACER
وغيرها من الشركات ..

طبعا ابرز شركتين واقواها هي
DELL , TOSHIBA

هذي الشركتين من اعرق واقدم واقوى الشركات المصنعه للاجهزة الحاسب الآلي ..
كان هناك منافسين لها قديما مثل IBM و كومباك
ولكن مع الوقت تغيرت الامور وانقضى عصرها ومازالت الشركتين متنافسه !

فمثلا شركة DELL
شركه رائده وتعرف كيف تصنع ووشلون !
جميع اجهزتها مجهزه للمستخدمين بشكل سلس ومبسط
من مميزاتها ان مثلا اللاب توبات كل موديل يجيك فيه ثلاث موديلات
مثلا موديل الانسبايرون يجيك فيه ثلاث موديلات متشابهه بالشكل ومختلفه بالمواصفات والقيمه !
والشخص يختار احد الموديلات على حسب حاجته !
وايضا تميزت بتعداد الالوان بالشكل ! وتعدد الاحجام !
يعني مثلا فيه موديل اعجبك بس شاشته 15 انش
وانت تبي اقل ! راح تحصل نفس الموديل وحجم شاشته 12 انش !
يعني تسهيل على المستخدم وتلبية احتياجاته !
واسعارها معقوله !


اما التوشيبا !..
كلام خطير صراحه لانها شركه منافسه قويه
مميزاتها عاديه يعني فيه اشكال مختلفه
بس عيبها انو تقريبا اشكالها موحده هذا واحد
وثاني شي دايم شاشاتها كبيره واقل شاشه شفتها للتوشيبا 15 انش !
واقيامها مقارنة بغيرها غاليه شوي !
يعني مثلا اروح لتوشيبا الاقي لاب توب اعجبتني مواصفاته ولقيته مثلا ب 4000 ريال
اروح لديل مثلا الاقي نفس المواصفات ويمكن زياده في الرامات وبقيمة 3500 ريال !
وهذي الطريقه شفتها كثير << دايم بجرير ومقلب عيونه بهاللابتوبات يشوف فيه شي جديد والا لا !



وهنالك شركات اخرى متخصصه بمجالات اخرى ولكن دخلوا عالم الـ Laptops
مثل شركة HP واللي كانت متخصصة بالطابعات والماسحات الضوئية !
وصارت منافسه لهالشركتين على انها في البدايه كان فيه مشاكل كثيره في اول دفعة صنعتها من اللاب توبات .. بس اللحين صارت اوكي تقدر تنافس !

وفيه شركة Acer اللي طلعت طلعه قويه
من اول صناعه لها واجهزتها قويه ولكن ماعليها اقبال كبير !
ومن مميزاتها ان اجهزتها تتحمل ( يعني دح ولا اقول اح )
بس فيها عيب واحد .. جميع اجهزتها حجمها واحد يعني شاشاتها كلها من 15 انش وطالع وهذا غير حجم اللاب يجيك كبير شوي بخلاف باقي اللاب توبات !..

وباقي الشركات طبعا لابأس بها ولكن انا تكلمت عن افضلها !

هذي نبذه بسيطه عن الشركات يعني مميزاتها وعيوبها !


ثانيا : مواصفات الجهاز ..

طبعا اغلبية الناس مايعرفون وش في الجهاز ووش الامور اللي تخليه سريع
بس يروحون للمحل ويقولون وش احسن جهاز ويروح الهندي يجيب لهم ذاك الجهاز ويمدحه شوي وابو الشباب يشوف شكله اذا اعجبه خذاه ماعجبه دور واحد شكله حلو !

طبعا هذا اكبر خطأ !

كل جهاز له مواصفات خاصه ولازم الواحد يعرف وشلون ياخذ الجهاز اللي يصلح له !

راح ابين وش المواصفات اللي لازم تكون على علم فيها !

اولا : المعالج او الـ Processor


وشو المعالج !.؟
طبعا المعالج هو قطعه صغيره تساعد على نقل البيانات وتنظيمها بين الاجهزه الاخرى

طبعا المعالج له انواع كثيره ومن افضل المعالجات معالج AMD و Intel
انا راح اتكلم عن معالجات Intel بسبب انها هي المتداوله بين الناس !
فيه انواع كثيره من معالجات الانتيل
مثل السينترينو
والكور
والبونتيوم
وغيرها !

طبعا افضل معالجات الانتيل هي الكور Core
وهي اخر ماتوصلت له شركة انتيل !
ومعالج الكور له انواع كثيره !
مثل
Core
Core Duo
Core 2 Duo
Core Quad
Core 2 Quad

طبعا انا كاتبها حسب افضليتها من فوق لتحت !
يعني الافضل هو Core 2 Quad
ولكن اللاب توبات ماتوصلت الا عند Core 2 Duo
فإذا كان المعالج مابين Core و Core 2 Duo
فانت بالطريق السليم .. والافضل ان تأخذ Core 2 Duo
طبعا كل معالج له سرعه وسرعة المعالج دايم يرمز لها بـ GHz
يعني لو عندنا معالجين واحد منهم سرعته 1.8GHz
والثاني سرعته 2.0GHz
فالاسرع طبعا هو الثاني !
بينما لو عندنا معالجين واحد منا سرعته 2.0GHz
والثاني سرعته 2.4GHz
فكلهم متساوين بالاداء ومختلفين بالارقام !
يعني لاتغرك الارقام !
الاداء هو هو ماتغير يعني الـ 2.0 هو نفسه الـ 2.4
ولكن تجد ان فيه فرق بالسعر فهذي نقطه لازم تشوفها كويس !
لان السرعه ماتختلف الا اذا زاد 1.0GHz
يعني يصير من 2.0GHz الى 3.0GHz


ثانيا : الرامات RAM (الذاكرة العشوائية)

الرامات انواعها كثيره
فكل نوع يعتبر جيل جديد من النوع اللي قبله !
مثلا نوع الـ SDRAM
هو نوع قديم نوعا ما ولكن اتى بعده DDRAM
وهو النوع المطور من SDRAM

الاجهزه المحموله الحاليه تحمل رامات من نوع DDRAM2

واحجامها تبتدي من 256MB الى 2GB للشريحه الواحده !

طبعا اللاب توب عادة يجي فيه شريحتين رامات !
وتتقسم على حسب الحجم !

انت ماعليك من هالتفاصيل
كل اللي عليك انك تشوف كم حجم الرام !
يجب ان لايقل عن 1 جيجا !
وكل ما ازداد الحجم كل ما اسرع استجابة الجهاز وخف وصار مافيه تعليق بالبرامج !

ثالثا : كرت الشاشه Graphics Card


كروت الشاشه انواعها كثيره
وافضل نوعين هي ATI & Nvidia

طبعا كل وحده لها مميزات ...
الـ ATI قوية بالجرافيكس ! يعني تنفع للي مهتمين بالتصاميم !
والـ nVidia قوي بالقيمز ...!
طبعا الاداء للاثنين كلهم يدون النتيجه المطلوبه !
بس الـnVidia افضله على ATI
لاسباب كثيره منها الاداء والموديلات والقيمه !

كيف نعرف ان كرت الشاشه مضبوط او لا !؟
كرت الشاشه اهم شي فيه هو الميموري حقه !
فيه كروت شاشه يجي الميموري حقها 64MB
وبعضها 128MB وانت طالع !
طبعا المتوسط لازم مايقل عن 256MB
يعني راح يجيك معلومات كرت الشاشه تقريبا بالورقه اللي عند الجهاز بالمحل زي كذا
مثال :
Graphics Card : Nvidia Geforce 8800 FX 256MB Shared Memory.
طبعا اللي باللون الازرق هو اسم الشركه وموديل القطعه
واللي باللون الاحمر هو حجم الميموري واللي المفروض تركز عليه لانه مهم !
اما اللي باللون البرتقالي هذي تحصلها فقط اذا كان الميموري مشترك وهذي راح اشرحها !


اسم الشركه او الموديل ماراح اتكلم فيه لان اللاب توبات عموما ماتتعامل الا مع ATI & Nvidia

اما حجم الميموري فهو زي سالفة الرام بس انه مخصص لكرت الشاشه

يعني كل مازاد كل ماصار افضل ويجب انه مايقل عن 256MB

والشيرد ميموري هذي خاصيه حلوه ...
فايدتها انه اذا صار ضغط على الميموري الخاص في كرت الشاشه !
استخدم الرامات بدال هالميموري كبديل ..
وهذي الخاصيه تخليه يعمل بشكل افضل !..

طبعا الكل راح يسأل ليش كرت الشاشه مهم !؟

لان كرت الشاشه هو اللي يتحكم بالجرافيكس !
ولو حصل خلل بسيط فيه .. ماراح يشتغل معك الجهاز بالشكل المطلوب !


رابعا : الهاردسك HardDrive
الهاردسك او كما يسمى بالقرص الصلب !
هو قرص تحفظ فيه المعلومات ..
يعني بدونه ماتقدر لاتحفظ ملفاتك ولا تقدر اصلا تركب ويندوز !؟

طبعا الهاردسكات انواعه كثيره
بس انت عليك من حجم هالهاردسك !
يفضل انه يكون لايقل عن 120GB
وكل ماكبر حجمه كل ماصار الجهاز افضل !
لان نظام الويندوز ياخذ جزء من الهاردسك ويخليه ملفات ترحيل !
يعني زي الرام !
فكل ماكبر حجم الهاردسك كل ماصار الويندوز ياخذ جزء اكبر وصار شغلك اوكي !



طبعا هذي اهم اربع شغلات اللي لها الاوليه تشوفها قبل لا تشتري !


باللخص هالشرح كله في كلمتين !

باعطيكم ثلاث انواع من المواصفات وكل وحده لها خاصيه !

المواصفات التي يحتاجها مستخدم الكمبيوتر العادي.
(لتصفح البريد والمواقع والدردشه)

المعالج : Intel core dual 2.0GHz
الرامات : 1GB DDRAM
كرت الشاشه : Nvidia Geforce 256MB
القرص الصلب : 120GB


المواصفات اللتي يحتاجها مستخدم الكمبيوتر المتقدم .
(يعني راعي برامج وافلام وتحميل وحويسته ماتخلص )


المعالج : Intel core 2 Duo 2.0GHz
الرامات : 2GB DDRAM
كرت الشاشه : Nvidia Geforce 256MB
القرص الصلب : 200GB


المواصفات اللي يحتاجها مستخدم كمبيوتر محترف !
(يعني خرابيطه ماتخلص وراعي جيمز وتصاميم )


المعالج : Intel core dual 2.0GHz
الرامات : 4GB DDRAM ( او اكثر )
كرت الشاشه : Nvidia Geforce 512MB (او اكثر)
القرص الصلب : 360GB ( او اكثر)

باقي الامور اختياريه !


اتمنى اني وفقت بالشرح ... واعذروني على اللغه المكسره << ساقط بالنحو

واي اسئله او استفسارات في اي مجال في الكمبيوتر سواء كان في الموضوع او خارج الموضوع انا حاضر


تقبلوا تحية عبقه !
اخوكم نفر اوكي