July 19th, 2006, 09:51 PM
تفضلوا هذا الرابط لفتاة كويتية تحكي قصة رحلتها للدراسة في امريكا وبالاخص في اوهايو
http://www.travel4arab.com/vb/showthread.php?t=55717
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــ
انقل لكم اختصار ما كتبت
اود ان اكتب لكم عن تجربتي في السفر الى اوهايو
بعد ماكنت متعوده اصيف كل سنه في نيس وباريس وجنيف والنمسا وانجلترا وفجأ ومن غير سابق انذار
ابوي قرر يرسلني لاستكمال دراستي هناك وطبعا عرض علي الفكره وكنت رافضه بالاول لاني توني كنت
متخرجه من الثانويه ونسبتي قويه والحمد الله ودرست في جامعة الكويت ولكن كانت الدنيا ماخذتني بكل
معاني الكلمه ما افكر غير بالبس والكشخه والطلعه وابوي ماقصر معاي شرالي سياره وتقدر قيمتها بالشيئ
الفلاني ......... ماطول عليكم ارسل ابوي اوراقي التعليم العالي ولكن للاسف لم يقبلوني ولكن والدي اصر
علي ان يبعثني على نفقة الخاصه وبيدت اجهز اوراقي للسفر واغراضي وانا في بالي اني بروح هناك يوم
ولا اثنين واذا ماعجبني الوضع بارجع على اول طياره واجهز اغراضي وانا مادري وشنو ناطرني هناك
على فكره انا عمري ماسفرت امريكا كنت اسافر مع اهلى مثل ماقلت لكم اوربا لكن امريكا عمري ماشفتها
ولاتخيلتها . المهم جا يوم السفره كانت رحلتي الصبح الساعه 8 ودوني اخواني وخواتي والوالد والوالده المطار
لله يحفظهم مو انا اكبر وحده . ودايم يقولون اكبر واحد كبش الفدا . ودعت اهلي للمره الاولى في حياتي
كلها وكان اصعب يوم في حياتي ورحت وتوجهت عل الطياره وركبت وانا التلفت عليهم وماقمت اقدر
اشوفهم من دموعي اللي ملت عيني . المهم ركبنت الطياره وقعدت اطالع من الشباك واودع الكويت واهلي
وشريط ذكرياتي كله مر علي وانا قاعده اطالع من الشباك كانت طيارتي من الكويت الي امستردام وبعدين
شيكاغو انا كنت متعوده على سفر 6-7-8 ساعات لكن مو 16 ساعه على كرسي واحد والله قعدت احتري
الوقت الحين نوصل شوي نوصل ماكو . لا ومن حسن حظي ماكان احد قاعد حولي واللطياره كلها هنود
والوضع كأنه في باص مو طياره
خليكم معاي في الحلقه الجايه اقولكم عن اول ماوصلت امريكا وشنو صارلي
اكمل لكم قصتي بغربتي
تميت اداوم بالمعهد والله من يوم اللي صارلي اول يوم مع الشباب وهم ولاكلمه معاي اذا واحد فيهم شافني بممر يروح من ممر ثاني .كان معاي بنات خليجيات بالمعهد لكن كانو بكلاسات ثانيه انا عرفت انهم خليجيات بس ماحبيت احتك فيهم كانو غير عن طبعي وبعدين انا فرحانه بشكلي ان مايبين علي اني كويتيه او خليجيه ويمكن حتي اهم ماكانو يعرفون اني خليجيه
المهم دارت الايام وفكرت اشتري سياره انا ليما الحين ماعندي احد ولا اعرف احد تعرفت على وحده كانت ساكنه جنبي وطلعت ظربه شيئ لايستحق الذكر فتميت عايشه بروحي
احنا الحين تقريبا شهر 10 اكتوبر وفكرة السياره خلاص سيطرة على مخي ولازم مت من التكاسي والباصات وطبعا الباصات محد يركبها غير ال**** كلنا **** الرحمن
وفعلا اشتريت سياره قمت اروح من البيت المعهد البيت السوبرماركت وشويش شوي قمت ابعد الدرب شوي وصلت الى المول وبس عندي 4 مشواير ماكو غيرهم
اذكر اول مادخل علينا الشتاء طبعا شتائنا كان قارص طحت مريضه ولا اقدر اتحرك من الفراش بالمره نهائيا وبالصدفه امي دقت علي تلفون وكلمتها والصوت عساه يطلع ودرت اني تعبانه وقالت لابوي قام ابوي كلمني وقالي اتصلي الحين على 911 قلت له لا اتحمل ليما الصبح قام واصر علي اني اتصل ومن الحاح منه اتصلت ومن الخرعه والله اني صحيت من المرض قالولي عطينا العنوان وعطيتهم والله ماهي الا يمكن 5 او 10 دقايق بالكثير الا وصوت الاسعاف والنجده والمطافي بره البيت وانا من الخرعه لبست فوق البجامه كوت وطلعت بره اشوف العفسه ولا جاني ظابط الشرطه قبل مايتكلم قلت له العنوان واسمي
قالي شنو صاير قلته ابي اساعف توديني المستشفي قعد يطالعني وكأنه مومصدق انتي مريضه وطالعه بر تنطرين الاسعاف والله ماينلام لو انا مكانه كان مشيت
المهم خذتني الاسعاف ودتني المستشفى طبعا قبل ما تسوي اي شي تروح تدفع عن طريق الانشورنس
وانا ماعندي انشورنس لاني على نفقتي الخاصه مو على السفاره . طبعا انا كان فيني انفلونزا دفعت علاج بقيمة عمليه جراحيه لا ودفعوني حتى تكاليف طلعت الاسعاف ونقلي فيها
تميت عندهم بالمستشفى قريب اليوم تقريبا ولاحظو اني طالعه من البيت ببيجاما وكوت والحمد الله اني مانسيت بوكي(محفظتي) بعد ماخلصت علاج دقيت على تاكسي. طبعا انا بس حطوني على الفراش مال المستشفى وقعدت ابكي انهرت والبكي والدكاتره يسكتوني والممرضات وعبالهم اني ابكي من التعب والمرض اللي فيني وانا بالحقيقه كنت ابكي على نفسي والله انكسر خاطري على نفسي وانا بروحي بمستشفى ما اعرف فيها احد ولا احد معاي من اهلي والله طرى علي وضعي بمستشفيات الكويت لما كنت اروح كنت ادخل على طول على الاستشاري ولا انطر دور ولا اكلم احد ولا احد يكلمني وشغلي كلا ماشي على ارض من ورد
بكلمكم شوي عن الاشياء اللي ماكنت متعوده عليها ولا اعرفها ومن بعد هالغربه عرفتها
طبعا بعد ماشريت السياره والدي الح علي اني اخذ سياره جيب عشان الثلج وحتي ماينزلق وكذلك الح علي اني اخذه من الوكاله عشان اهم يهتمون بالسيرفس ...الخ
اول ما طلعت السياره رحت ورديت فيها لين وصل اليوم اللي خلص البانزين ولازم احط لها بانزين وطبعا احنا اللي متعودين عليه بالكويت ان في هندي بكل محطه يترس لنا بانزين ونعطيه فلوس ونمشي
لكن امريكا طبعا غير ماكو شي اسمه احد يخدمك .رحت محطة البانزين ووقفت كالعاده ادور احد يحطلي بانزين اتلفت يمين ويسار ماكو احد قلت لازم انا اروح احط بانزين والله طرى علي في هذي اللحظه مستر بن قعدت اطالع اللي جنبي شنو يسوي واقلده والظاهر اني سويت شيء غلط الرجال اللي بالسوبر ماركت اللي بالمحطه قام يصرخ علي بالمكرفون والله مادري شنو قاعد يقول بس حسيت ان الكلام والزف لي طبعا تدرون شنو سويت حطيت الكرديت كارد على المكينه وقعدت اطقطق فيها وماعرفت لها و بعد هذا جاني اللي يشتغل
وحط الكرديت كارد مره ثانيه وفتح لي مكان البانزين وحط الهوز فيه وقالى بكم تبين قلتله فل قالى بكم القيمه قلتله ما ادري بكم يفول قعد يطالعني وتنح فيني قالي رطن علي وما ادري وش قال هزيت له راسي موفاهمه رد كلمني انجليزي وسالني انتي من فانزويلا قلتله لا انا من الكويت شنو الكويت قلت له من الشرق الاوسط ميدل أيست واقتنع وطلع الحبيب مايعرف شنو الكويت . وبكذ تعلمت شلون اصب بانزين لسياره
ومره لما كنت رايحه اشتري تلفزيون من Best by وانا اشتري قعدت اطالع شكله وفكر شلون راح اشيله من السياره وادخله البيت لكن الحمد الله انهم وصلولي التلفزيون الى البيت وركبو
التلفزيون تم على الارض ماشريت له طاوله . رحت اشتري طاوله والحمدالله لقيتها في Target بس المشكله مايوصلونها للبيت ولازم انا اوديها بنفسي جا معاي واحد لسياره وركب لي الكرتون والله انا طول الدرب بس افكر شلون راح انزل الكرتون وصلت البيت فتحت الباب الخلفي لسياره احاول احرك التلفزيون يمين او يسار مايتحرك نهائيا قعدت افكر شنو اسوي طبعا ماخطر علي ولاشي غير حسرتي على ايام الكويت والخدم اللي كانو يشلون عنا كل شي . وطرت علي فكره افتح الكرتون واشيل قطعه قطعه وادخلها اخف من اني اشيل الكرتون كامل والحمد الله نجحت هذي الفكره
احنا الحين على نهاية الكورس الاول قدمت امتحاناتي والحمدالله كلهم زينين وحتى التوفل كان اوكي جبت فيه 516 هذا كان توفل الجامعه كانو على ايامي يشترطون توفل الجامعه يكون لازم 500 وفوق او 450 التوفل الدولي لكن الحين اعتقد انهم مايقبلون غير التوفل الدولي واللي يكون تقديمه على ما اضن بالكمبيوتر مو على ورق لكن الحمد الله اللي عديت منه انكان الى هذا اليوم انا اكتب التعبير مال التوفل على الكمبيوتر
طبعا اول ماطلعت نتيجتي مالت التوفل بشرتني عنها مديرة المعهد اني خلاص انقبلت بالجامعه وبيقابلني الدين يعني عميد الجامعه وطرت من الفرحه وعطتني موعد بعد 4 ايام قلت لها ما اقدر لاني بنزل اجازة كرسميس الكويت ويدوب الاجازه 3 اسابيع قالت لي خلاص باكر تعالي وانا احاول اشوف لك موعد
صار باكر رحت لها كان تروح معاي للعميد ودخلت عليه ولارجال كبير بالعمر وشعره ابيض وطويل ومتين اول مادخلت عليه عرفتني مديره المعهد وقام يسألني اسئله مادري من وين جايبها والحمد الله عدت على خير وختم كلامه كونقرات يوليشن يعني مبروك وقام وقف وفتح ايده وجا جنبي بيحظني عشان يبارك لي طبعا اهو رجال كبير اكبر من ابوي حتي ابوي يمكن يطلع عنده ولده اول مافتح يده وجا جنبي انا انصدمت ومادري شسوي ارده ولا اقول بمكان ابوي والله مادري اخاف ارده خاف يطردني كان اتعوذ من ابليس وقلت له لا انا مسلمه وانت رجل غريب عني وبسرعه وخرت عن طريقه كان يقول بكل رحابة صدر انا اسف وضحك بصوت عالى وضحكت معاه ووصلني حتى باب مكتبه
طبعا انا ماصدقت خبر طلعت كلمت ابوي وقلتله اني انقبلت بالجامعه وايد استانس
وقلت له اني برجع الكويت بعد4 ايام عشان عندنا اجازه طبعا ابوي عيا مارضي انزل الكويت لكن كلمت امي وترجيتها اني انزل وهي ماكان عندها مانع وحدها طارت من الفرحه لما درت اني بنزل الكويت بعد 4 ايام
طبعا اهي بدورها قنعة ابوي اني ارد
اول ماطلعت من العميد رحت سجلت مواد ودفعت لهم للكورس الجاي
رديت البيت وحضرت اغراضي وبعدها رحت المول عشان اشتري لاهلي هدايا ورجعت البيت وجهزة اغراضي . وانا من الفرحه والله ماادري شسوي والله احس اني بطير من الارض وقعدت اعد الساعات على يوم السفره واخيرا جا يوم السفر رحت المطار وطرت الي شيكاغو ومن شيكاغو على امستردام وكنت افكر وانا بالطياره وين اروح اول ما انزل الكويت بيتنا ولابيت جدتي انا وايد متعلقه بجدتي عمري ماهديتها كلا اروح وارجع معاها واهي اقدر اقول امي الاولى ماتتصورون الى اي درجه انا متعلقه فيها وعمري ماهديتها ولايوم واحد تسافر اسافر معاها تدخل المستشفى ادخل معاها ولا اهدها ولالحظه . واول ماوصلنا الكويت والله العظيم يوم نزلت الطياره الارض وشفت مطار الكويت والكتابه الكويت بالاحمر والله الود ودي ارمي نفسي من الشبك عشان بس انزل وابوس الارض من فرحتي بديرتي. والله بس افتحو باب الطياره تميت امشي وانا متنحه بوجيه الكويتين رجال ونساء واطفال والله الود ودي احظن واقبل كل كويتي وكويتيه شفتها. والحمد الله اول ماطلعت من الباب مال الخرطوم مال الطياره وتميت امشي شوي كان المح ابوي مع اخوي واقفين وقعدت اسارع بالمشي وبخطوات كبيره اول ماوصلت لبوي لميته وقعدت ابكي وتميت لامته يمكن 10 دقايق او اكثر وانا بس ابكي والله ماني مصدقه اني لامه ابوي وقبلت راسه ويده وسلمت على اخوي وطلعنا من المطار الى البيت .وانا بالسياره ابوي يسألني عن الحياة هناك وانا اسئله وين بروح الحين بيتنا ولابيت جدتي قالي لاكلهم متجمعين عندنا بالبيت قلت اوكي
اول مادخلت البيت سلمت على اهلي كلهم وقعدت طبعا كانو قاعدين يطالعوني وكاني مخلوق جاي من كوكب اخر طبعا انا بعد هالرحله نزل وزني 20كيلو .
قعدت اطالعهم واحد واحد فقدت جدتي سألت عنها وينها :ان يسكتون ولا كلمه ولا همس سألت مره ثانيه محد رد علي شسالفه وينها قالت لي وحده من خالاتي ان جدتي تعبت امس وديناها المستشفى قلت لها اي مستشفي قالتلي الصدري والساعه الحين 10 ماكو زياره . طارة بوهتي طرت فوق الطابق العلوي كان اشوف اختي الاصغر مني سالتها عن جدتي قالت لي بالمستشفي قلت اي مستشفى قالت لي مستشفى الاميري . طبعا مثل ماانتو عارفين مستشفى الاميري غير عن مستشفى الصدري وحده في شرق والثانيه في غرب
صرخت بوجها مره ثانيه اقولش وين جدتي قامت تبكي وقالت لي ان جدتي توفت قلت لها متى قالت لي من شهر تقريبا وليش ماقلتولي قالت لي ابوي مارضي نقولك
نزلت تحت مره ثانيه ولا ابوي قاعد مع اهلي اول ماشافني شكله دره اني دريت بالخبر قالي تعالي معاي بره نقعد شوي بالحديقه طلعت معاه قعدت على الكرسي وقعد قبالي وقالي انت مؤمنه بالقضاء والقدر ولازم نرضى فيه بخيره او بشره والمؤمن عند الصدمه الاولى يحتسب ويقول انا لله وانااليه راجعون انا ساكته ولاكلمه ولاحتى بكيت من الصدمه واهو عباله اني قويه وتحملت مايدري ان الخبر هدني هد من داخل واللي ألعن من هذا ليش ماقالولي على الاقل احضر عزاها ابكي معاهم احزن عليها معاهم مويخلوني بروحي
ومثل ما اقولكم ابوي توقعني حديد مايهزني شي رد قالي الخبر الثاني وهو اختي الاصغر مني سوت حادث بسارتي حادث شنيع ولكن الحمد الله اختي ما صار فيها ولا شي بس سيارتي ودوها السكراب لانها انتهت الخبرالثاني علي عادي مقارنه بالاول
اشكر لكم حسن متابعتكم وخليكم معاي بالحلقه الجايه اقولكم عن باقي ايام غربيتي وشنو صارلي بايام دراستي بالجامعه
بعد ما انتهت اجازة الكرسيمس وانا الان على وشك الاقلاع من الكويت متجه الى شيكاغو .وانا جالسه افكر واودع ديرتي الغاليه الكويت من خلال الشباك الطائره ومن حسن حظي ان محد جالس جنبي والكرسي فاضي . بعد ساعه من الاقلاع جاتني بنت وشكلها كويتيه وقالت لي ممكن اقعد جنبك قلت لها تفضلي وتمت تكلمني وتسألني عن سبب سفر الى امريكا وقعد اقص لها قصتي وعرفتها بنفسي اكثر وهي بعد عرفتني بنفسها وبالصدفه طلعت متوجه الى اوهايو وبنفس المنطقه اللي انا فيها وسبحان الله وكأن القدر جمعني بهم مرة اخرى لانها كانت نفس الشخصيه اللي كانت مع زوجها يوم اول ماسفرت من شيكاغو الى اوهايو
فجلسنا نتبادل الكلام وهونت على فراق اهلي تميت معاها طول مدة الرحله واول ماوصلنا الى اوهايو الحت علي بان توصلني الى منزلي هي وزوجها تم ذلك
مشت الامور ولله الحمد على احسن حال بعد مارجعت امريكا وبدأت بالدراسه واكتشفت ان الجامعه من كثر العرب اللي كانو فيها كانها جامعه في دوله عربيه او خليجيه بالتحديد
استمرت علاقتي مع هذه السيده المحترمه القديره والتي اكن لها حب وتقدير من كل اعماق قلبي لمواقفها النبيله معي
وفي يوم من الايام قالت لي يوجد هنا مركز اسلامي اتريدين الذهاب اليه فرحبت بالفكره لاني بحاجه لان اسئل احد عن مواقيت الصلاة. ذهبت الى المسجد وتعرفت على الجاليه العربيه هناك واخذت منهم مواقيت الصلاة
وجرت الايام والسنين وكاني اراها الان في عيني بسرعه حتي يوم 11/9 وكنت في الجامعه في احد الكلاسات الصباحيه والا بدكتور المادة دخل علينا الكلاس وهو يبكي ويقول لنا الحدث ويجب علينا الخروج فورا من الجامعه والتوجه الى البيت لمشاهد الاحداث على التلفاز
وبالفعل حصل ذلك وجلست اشاهد الاحداث على التلفاز وكلمت اهلى وطمنتهم على اني بخير وان الاحداث بعيده عني . بعد يوم من الحدث كلمتني صاحبتي وقالت لي ان لازم مانطلع من البيت وهذا تنويه من المسجد
هنا انا حسيت بالخوف والرهبه حسيت ان السالفه من صدق
بعدها قالت لي ان اكثر الكويتين الشباب قاعدين يسون اوراقهم ويوقفون قيدهم وبيردون الكويت وحتي باقي الخلجين كذلك .كلمت ابوي وقالت له باللي صار ان مافي احد بيقعد والكل راجع ديرته .طبعا كنا تونا ابتدينا الكورس لنا يمكن اسبوعين او3 وانا طبعا دفعة لهم التوشن مصاريف الجامعه بالكامل من قبل ما ابدا بالدوام
رحت لقسم التسجيل اقولهم اني راجعه الكويت وبوقف قيدي قالو انتي مو قريت القوانين وقعتي عليها خلاص مانقدر نرجع لك القيمه بالكامل ورجعو لي جزء قليل من القيمه
كلمت ابوي وقلت له اللي صار وقالي خلاص تنزلين الكويت على اول طياره وبالفعل عمل لي حجز من الكويت وعطاني رقم الحجز وكلمت الخطوط وارسلولي التذكره من خلال البريد السريع في نفس يو السفر وفعلا رحت المطار اللي في منطقتي
خليكم معاي بالحلقه الجايه اقولكم شنو صارلي لما رحت المطار وليش ممنوعه من السفر
بعد ماحزمت اغراضي واتجهت الى المطار كانت صديقتي موصلتني عشان سياتر حطيتها بالكراج مال البيت وسكرت عليها
اول مادخلت المطار انا وشنطي توجهة على كاونتر الطياره المتوجهه الى شيكاغو كان في ناس واقفين بالدور رحت وقفت معاهم انا صديقتي نسولف ونضحك مع بعض جا دوري وسحبت شنطي معاي وحطيتهم على الكاونتر
طقت اسمي على الكمبيوتر وتمت طالعني اكثر من مره وانا كنت حدي عاديه وكول ولا في بالي شي التفت على صديقتي وكملنا كلام صديقتي كانت على يميني حسيت باحد على يساري وانا قاعده اكلم صديقتي فجاه
عيونها طارت من الخوف قلت لها شفيك التفت علي يساري ولا بذاك الظابط اللي مادري شنو ياكل عشان يصير في هذا الحجم
من غير كلام قالي انت فلانه الفلاني قلت له اي انا قالي تعالى معاي
قلت له ليش قالي اجراء عادي وروتيني
التفت على صديقتي وقلت لها عادي ترى كل الكويتين والخليجين جذي لازم ياخذون اقوالهم في هالفتره طبعا انا هالمعومه جايبتها من ابوي اهو قالي لاتخافين ممكن يسألونك بالمطار
مشيت مع الظابط ورحت معاه المكتب
اول مادخلت عطا جوازي لظابط ثاني وطلع يعني اخذ جوازي ومشي. وانا ساكته ولا كلمه لان عندي خبر باللى يصير من والدي .
ابتدي يسألني بكل ادب واحترام شنو اسمك . تاريخ ميلادك . سبب الزياره ......الخ
طبعا هذي الاسئله سئلني يمكن فوق 100 مره
ومن بعدها قالي انتي سنيه ولاشيعيه والله طارت عيني من هذا السؤال حتي مافهمته قاله لي بالعربي . ردد علي السؤال اكثر من مره قلت له انا سنيه .
سألني عن اي مسجد انا تابعه له وقالي اسامي مساجد ومراكز دينيه في توليدو انا عمري ماسمعت عنها قالي انا ادري انت ماتروحين غير مسجد واحد
قالي اي مسجد تروحين قلت له عنوان المسجد اللي اروحه قالي مسجد سعد تقصدين قالت له مو اهو المسجد اللي على الشارع الفلاني( والله ماني ذاكره حاليا اسم الشارع نسيته )
قلت له اي هذا المسجد اللي انا اروح له .انا ماكنت اروح هناك وايد لكن اذكر اني مره كنت ماره فتره من الفترات بظيقت صدر فكنت اروح المسجد وكنت متطوعه اقعد ادرس الاطفال في ايام معينه من الاسبوع .
سألني ليش كنتي تروحين المسجد وايد قلت له انا ماروح الا يمكن كل اسبوعين مره
قاللي وليش انتي تحت تنظيم معين قلت له لا طبعا انا مالي شغل باحد
قالي وشلون اهلك مرسلينك بروحك انتو موعندكم المراه ماتسافر الامع ذي محرم والله طارت عيني حشي مطوع اللي قاعد يسألني مو ظابط امريكي
.سالني وقالي انتي كل في فتره معينه من السنه تاخذين حلاو وايد وتودينه المسجد ليش
والله انا اموت واعرف من وين جاب كل هالمعلومات .
قلت له احنا الخليجيات اللي هني متفقين ان كل عيد من اعيادنا اعياد المسلمين نحط حطه مبالغ رمزيه ونودي لاطفال المسجد حلاو .
سالني عن اهلي كلهم واحد واحد عن اساميهم وعن اعمال ودراستهم ومنو ماخذين .
وسألني عن حياتي الخاصه وجاوبته .
وسألني عن اصولنا من وين وجاوبته وسالني وايد اساله دقيقه وانا اجاوبه بكل سذاجه وصراحه
سالني بعدها عن اسمي قالي تعرفين فلانه الفلانيه اللي اهو انا قلت منو انا قالي انتي فلانه الفلانيه قالت له اي انا وقلت له اسمي بالكامل
قالي فلانه الفلانيه هذي مطلوبه عندنا واسمها مدرج تحت قائمة الاسامي الممنوعين من السفر
قال اسمي واسم ابوي وقالي هذي الشخصيه ممنوعه من السفر قلتله ليش انا شنو سويت انا عمري ماضريت احد هني وشوف السوشل مالي واسئل الناس اللي يعرفوني اسئل عني بالجامعه يقولون لك انا شنو
انا باللحظه حسيت اني غلطت يوم اروح للمسجد يمكن هذا شيئ خلاهم يشتبهون فيني والله اني قعدت اذكر كل شي خير انا سويته بامريكا واقول لنفسي يمكن ماكنو يبونا نسوي اعمال خيريه اسلاميه في ديرتهم
والله قعدت احاسب نفسي حساب عنيف لاني حسيت ان السالفه صدق وانا كل همي في هاللحظه خايفه لاتطير عني الطياره
كمل اسألته اللي ماكان لها عندي جواب لان قعد يسألني عن الشخصيه المعنيه والمطلوبه . وفي خلال التحقيق قالي تقدرين تطلبين تروحين الحمام اعزكم الله
اول ماقالي جذي قلت له ابي اروح الحمام كلم ظابط ثاني عشان يروح معاي وبالفعل مسكني الظابط الثاني من ايدي وداني الحمام وقبل ما ادخل فضو الحمام من الناس انا بالحقيقه ماكنت ابي الحمام بس كنت بطلع من الجو اللي انا فيه واغسل وجه واستوعب اللي قاعد يصير دخل معاي الظابط الحمام دخلت داخل وهو وقف بره طلعت ولاهو بوجهي رحت اغسل وجهي وخطرت في باللي فكرة اتوضي عشان اصلي ركعتين لله وبالفعل توضأت والحمد الله اني كنت لابسه بنطلون طويل وبالطو طويل وساركف صوف طلعت بره رحت غرفة التحقيق مر ثانيه والحين في هالوقت ماكان باقي شي على الطائره وتقلع الايمكن ساعه استأذنت الظابط اني اصلي والحمد الله اذن لي بالصلاة
والله يمكن الركعتين اللي صليتهم كانو اطول ركعتين صليتهم بحياتي كلها ودعيت ربي ان يخلصني من هالمشكله اللي انا فيها وبعدها اول ماخلصت صلاة رجع التحقيق مره ثانيه ولكن الحمد الله بفضل من المولى عز وجل اقتنع الظابط ان مو انا الشخصيه اللي يبونها وقالي اشتباه اسماء بعد ماجابو جوازي وفتحو لي ملف بالFBI واخذو لي صور
طلعت من الفرحه وطرت على الكاونتر مره ثانيه ودخلت شنطي وودعت صديقتي وتسألني شنو صار لك وانا من الصدمه والخرعه ماقلت لها عن شي
دخلت شنطي وركبت الطائره المتوجهه لمطارشيكاغو
خليكم معاي بالحقله الجايه اقولكم وشنو صار لي لما ركبت الطياره
اكمل معاكم قصتي قصت غربتي .
بعد ماخلصت من اللي صارلي دخلت شنطي للكاونتر مره اخري و ودعت صديقتي وركبت الطيار المتوجهه الى شيكاغو والتي متدها ساعه الاربع . كانت الساعه حين ذلك الوقت 3 عصرا ورحلتي من شيكاغوا على الكويت الساعه 5 عصرا وشيكاغوا تزيد بالتوقيت عن منطقتي بساعه .يعني انزل مطار شيكاغو الساعه 4 ويتبقي على رحلة شيكاغو كويت ساعتين . هذا المتوقع
ومن سوء حظي لم يحدث ما خططت اليه فعندما ركبت الطائره المتوجه لشيكاغو بعد ربع ساعه من الاقلاع حصلت مشكله قي احد عجلات الطائره وابلغنا الكابتن بأن نجلس في وضعية الامان ( خلع الاحذيه اعزكم الله ونبقي ايدينا على رؤوسنا الى اسفل) و بانه سيعود مره اخرى الى المطار . وبالفعل هذا ماحصل رجع الى المطار وهبطت الطائره ولكن لم تلمس الارض لعدم صلاحية عجلاتها وفجأه اقلع الى اعلى من دون ان يتدرج بالاقلاع ولف لفه بالسماء ورجع وعاد الكره مرة اخري ولم يستطيع الهبوط الفعلي . وكذلك اقلع دون تدرج باالقلاع . اعاد الكره مره اخري وحتى المره الاخيره . في اخر مره فرشو مدرج الطائره بفوم ليسهل عملية الهبوط .
طبعا انا بعد التحقيق الطويل وفلم الموت الى حصل لي في الطائر نزلت من الطياره جثه هامده غير مستوعبه للي حصل اتجه الي اقرب مكان صاد وسجدت شكرا لله على ماحصل لي
بعدها توجه الى الكاونتر لسؤال عن رحله اخري في نفس الوقت من اي مكان قريب من منطقتي وللاسف لم اجد طائره في نفس الوقت . سألت عن القطار المتجهه الى شيكاغو وقالو لي انه حرك من ساعه
فكرت ااجر سياره واروح لالحق بالرحله المتوجه الى الكويت قي تمام الساعه 5 بتوقيتنا
وبتوقيت شيكاغو 6 ولكن درب السياره مواقل من 3 ساعات . .....................
انا الان وقف مخي عن التفكير وماعندي غير فكره وحده وهي كيف اروح شيكاغو - كويت
لايوجد حل هذا الكلام كان في يوم الاحد ورحلات شيكاغو احد وثلاثه على الكويتيه واثنين وخميس من نيويورك
ماعندي غير حل واحد وهو اني انطر الي بكره كلمت الخطوط الجويه الكويتيه لتغير الحجز من شيكاغو الى نيويورك وقالولي ماكو حجز قلت لهم عندي تسجيل في جامعه الكويت الى يوم الاربعاء قالولي ماكو حجز نهائيا. كلمت ابوي وقلت له انا لازم ارجع الكويت باكر وماقلت له عن اللى صار لي بالمطار بس قلت له ان الرحله تكنسلت اليوم
كلمت تاكسي عشان يوديني البيت رحت البيت اول مادخلت ولا الدنيا معفوسه فوق تحت لما كانو يحققون معاي بالمطار راحو فتشو بيتي وماتركو مقز ابره الا ونبشو
انا هني حسيت اني ممكن اكون متراقبه ولاشي فخفت اكلم ابوي اقوله بالي صار وخفت اكلم صديقتي واقولها وحسيت اني بموت من الضغط اللي فيني اخذت اغراضي المهمه ورحت ركبت سيارتي ورحت بيت صديقتي طقيت الباب عليها والحمد الله لم تكن خارج المنزل وانصعقت لما شافتني وقالتي شنو صار وحكيت لها عن الي صار لي بالطياره ورحنا مطعم وتعشينا واول مره احس اني ماني قادره اتحمل اليوم يخلص من الخوف
قلت لها وترجيتها انها تجي تنام عندي هالليله عشان ماني قادره اتم بروحي ولكن ظروفها لم تسمح لها والحت علي بان اجلس عندها حتي الصباح وواقفت على الفور على هذا الراي وذهبت معاها الي بيتي واخذت اغراضي والحمد الله عندما رجعت البيت لقيت ابوي تارك لي رساله برقم الحجز باكر من نيويورك - كويت . كلمته وتاكد ت من اكثر من الحجز وقالي شوفي لك طياره من ديترويت الي نيويورك قلت انشاء الله
اخذت اغراضي وحطيت سيارتي بالكراج وقفلت بيتي ورحت مع صديقتي بنت الحلال ماقصرت فيني والله اهي وزوجها والله اني ما انسي فضلهم علي
وبالفعل خذتني صديقتي معاها بالسياره وانا بالسياره كلمت الامريكان ايرلاين وحجز من دترويت الى نيويورك . رحت معاها بيتها وجلست معاها وزوجها طلع ينام
وفي اليوم التالي سلمت عليهم وتشكرت منهم وجا اليموزين ووداني الى مطار دترويت ودخلت المطار وتوجهة الى الكاونتر والحمد الله لم تحدث لي اي مشاكل ودخلت اغراضي وتوجهة الي قاعة ركوب الطائره المتجه الى نيويورك . والحمد الله سافرت الى نيويورك دون اي مشاكل
نزلت مطار نيويورك الداخلي واخذت اغراضي واتجهة الى مطار نيويورك الدولي . عندما ذهبت الى هناك كانو الناس في دور كبير قبل ان يفتح كاونتر الكويتيه واتجهة واستلمت تذكرتي واخذت دور وانا الان في اخر درجه من درجات التعب والارهاق حطيت شنطي في الدور على الكاونتر ورحت قعدت بالكراسي المقابله للكاونتر والله من التعب لم احس بنفسي الا وانا منسدحه علي الكراسي ونايما جدام الناس وكل شوي افتح عيني اشوف الدور وتميت لامه شنطني بين ايدي ونايمه . بعد ماصحصحت شوي طرت على فكره اني انام بالطياره وتذكرت الكرسي مال الطياره على الدرجه السياحيه يجيب الهم جاتني فكره اروح اسوي ابقريد لتذكرتي واخذ درجة رجال اعمال او اولى. والحمد الله كان معاي فلوس كافيه لذلك
اتجهت الى مكتب الخطوط الجويه الكويتيه لعمل ذلك .
خليكم معاي بالحلقه الجايه اقولكم اللى صار لي ومنعني من السفر الى الكويت
اكمل معكم قصتي قصت غربتي
بعد ما اتجهت الى مكتب الخطوط الجويه الكويتيه لتطوير التذكره من الدرجه السياحيه الى درجة رجال اعمال اولى . سألتهم اذا يصير قالولي اي اوكي تقدرين بس تدفعين الفرق قلت مافي مشكله اعطيتهم تذكرتي وجوازي ولما حط اسمي على الكمبيوتر قال انتي فلانه الفلانيه قلت اي نعم انا قالي اسمك مدرج تحت قائمه الممنوعين من السفر وتسليمك لل FBI قلت له انا ادري ولكن هذا تشابه اسماء بيني وبين المذكوره عندكم اسمي واسم ابوي بس هو اللي مشتبه فيه ولكن تكملت الاسم غير مشتبه فيه وانا من امس كنت في ولايتي وحققو معاي وبهذلون اخر بهذله قالي انا مصدقك ولكن للاسف هذا اجراء امني وانا واقفه عند المكتب ما وعيت الا وظباط ال FBI وراي خذو جوازي واغراضي من امام الكاونتر وجدام الناس كلهم جرجروني لاومعاهم *** اعزكم الله انا من الخوف رجولي ماعد تحملني قام ظابط ثاني وسندي من ايدي وتمو يجرجروني امام الكويتين والناس الموجودين . ودوني مكتب التحقيق وانا من الخوف تمت استفرغ ودمرت ملابسي وشكو فيني اكثر بعد ما شافوني في هذي الحاله . خذتني ظابطه مراه ودتني الحمام اعزكم الله وغسلت وطلبت منها وترجيتها تجيبلي ملابس من شنطتي وكلمت ظابط ثاني وجابلي الشنطه داخل الحمام واخذت منها ملابس وغير ملابسي
طلعت بره مع الظابطه ورحت معاها مكتب التحقيق و اول مادخلت طلبت من الظابط اني اصلي اول وبعدين اكون تحت امرهم باي شي يطلبونه وانا طبعا ما ادري وين القبله ولكن خمنت وجودها وصليت وطلبت ربي ان يخلصني من هالمشكله واذكر اني بالصلاة قريت سورة يس . بعد ماخلصت صلاة التفت على الظابط و بتدأ معاي التحقيق وكان هذا الظابط بقمة الحقاره وعكس عن اللي كان في ولايتي
طبعا انا قلت له انهم حققو معاي وفتحو لي ملف عندكم ولكن لم ياخذ بكلامي قالي هم شي وانا شي وبعدين انت عندك رقم الظابط اللي حقق معاك او رقم الفايل . قلت له لا لان حقق معاي ومن بعدها طلعني وانا اذا كنت مطلوبه او مشتبه فيني ليش اهو يطلعني من اصل
طبعا كان الحوار داير في حلقه مفرقه بلا جدوى الرحله المتجه على الكويت لن يبقى عليها الا ساعه ولازم ندخل الشنط الطياره قبل ساعه او ساعتين هذا من ظمن الوائح اللي صدرت بعد 11/9
قلت له رحلتي مو باقي عليها الا ساعه متى راح نخلص قال ماراح نطول ويعتمد عليك
ومثل ماقلت لكم ان الموضوع داير في حلقه مفرقه دون جدوي حتي اقلعت الرحله المتجه مع الكويت وكان ذلك في يوم الاثنين والرحله اللي بعدها يوم الخميس .ولما سمعت اعلان الاقلاع حسيت اني من صدق خلاص راح اكون بالسجن من غير ذنب واني خلاص ماراح ارد الكويت طول عمري وطبعا انهرت وخارت قواي وافتكر اني فقدت الوعي اويمكن نمت بس اللي اذكره ان صارت فصله اني فصلت عن الوضع شوي ورديت
بعد ما استوعبت الوضع قلت له ابي اكلم اهلي بالكويت واطمنهم علي لانهم بانتظاري قالي اوكي
كلمت ابوي وقلت له السالفه كلها وقلت له ان اسمي مشتبهين فيه وقاعدين يحققون معاي من امس وانا خلاص ماني قادره اتحمل
خليكم معاي بمأساتي وانشاء الله اكمل لكم اللي صار بالحلقه الجايه
اكمل معكم القصه من حيث ماوقفت
عندما كلمت ابوي وقلت له السالفه كلها وقلت له ان اسمي مشتبهين فيه وقاعدين يحققون معاي من امس وانا خلاص ماني قادره اتحمل
وطبعا لن يسمحو لي الابمكالمه واحده وقبل ان يسمحو لي بالمكالمة والدي سألوني اذا تبين تكلمين المحامي الخاص فيك و انا اختر اكلم ابوي كان الوقت بالكويت تقريبا الساعه 6 صباحا فتصلت اول مرة لن يجيب علي احد وبالمره الثانيه كلمني ابوي وقلت له عن التفاصيل
وانا بحكم معرفتي بوالدي وبنفوذه توقعت يكلم السفاره الكويتيه في امريكا او يقلب الدنيا عاليها واطيها عليهم .
والحمد الله بعد ماكلمت ابوي ارتحت نفسيا وهديت لاني حسيت اني خلاص انشاء بطلع من هالمصيبه .
ومن بعد ما كلمته قاعدت واحتري احد يجي يطلعني من هالغرفه مرة ساعه مرة ساعتين وثلاث واربع وانا انتظر ماصار شي قلت لنفسي الظاهر ان السفاره مسكره (مقفله) في هذا الوقت يالله مابقي شي على الصبح وفي خلال هذي الفتره كل شوي يدخل علي واحد ويرد يسالني نفس الاسأله وانا اجاوب بكل صراحه وسذاجه بعد ماصارت الساعه يمكن 7 الصبح قلتلهم اني برجع اكلم ابوي بالكويت
قالولي لا ممنوع مو كلمتي امس خلاص مسموح تتكلمين مره وحده قلت له اي بس ما صار شي محد جاني
يعني انا حتى لوأني اتصلت على محامي كان جاني من امس
مرة ساعه وساعتين الساعه الحين تقريبا 10 صباحا ومحد جاني ؟؟؟؟؟
سألت الظابط ماكو احد جا سأل عني قالي لا . طلبت منه مره ثانيه اتصال على اهلي قالي ممنوع
وتم التحقيق شغال وكل شوي يدخل علي شكل اوصخ واقذر من اللي قبله . والظاهر انهم كانو يبدلون شفتات على راسي.
المهم تميت على هذا الحال حتي الليل وطبعا انا ليما الحين من امس وانا ممتنعه عن الاكل لان مالي نفس اكل
وانا في هذا الوضع صدقت اني انا الشخصيه المطلوبه وخلاص سلمت امري الى الله وقعدت افكر بالسجن وشكثر راح تكون عقوبتي وانا اساسا ما ادري هذي العله شنو كانت مسويه بامريكا واللي على هذا الاساس اسمها صار من قائمة المطلوبين
خطر في بالي اسأل الظابط عن هذي المطلوبه شنو كانت مسويه . وطبعا سألته عشان بخمن العقوبه اللي بتجازا فيها
سألته عنها قلت له انتو ليش مانعينها من السفر. قالي منو .قلتله اسمها. قالي. اللي اهو انتي
قالت. لا مو انا انت ماتدري انا منو وبنت منو وانا مستحيل اسوي شي يمنعي من السفر من ديرتي فما باللك اسوي شي هني عندكم
انا احب امريكا واحب شعبها وبدليل اخترتها من بد الدول هذي كلها عشان ادرس فيها وصدقني انا لو اني ما احس بامان بامريكا ترى كان من زمان انا راده الكويت
قالي هذا الكلام اللي تقولينه كل العرب يقولونه بدليل انك شايفه العدد الكبير منهم عندنا
المهم ماني معوره روسكم في هذا الكلام الفاضي واللي ماله فايده .
الوضع الحين الساعه تقريبا 12 وانا ليما الحين ولا شي اكلته من امس وقاعده افكر ليش محد جاني يمكن ابوي تعب من الصدمه اللي سمعها وطاح وما قال لحد ولاسوالي شي . وكان هذا الاحتمال الوحيد المقنع
وقعدت احاتي ابوي و شنو حاله
انا اذكر اني دخلت عندهم من يوم الاثنين مر يومين والثالث جاني واحد شكله نظيف وقالي غير ملابسك ولبسي ملابس رسميه و اخذوني وطلعوني بره المطار وركبوني في سياره ولاكلمه وكلمهم وين رايحين احنا الاحين . ماردو علي . انا قلت خلاص رايحه امثل امام المحكمه وخلاص راح ينفذون فيني الحكم والمصيبه انا ما ادري هذي البلوه شنو مسويه عشان اقدر ادافع عن نفسي واعرف اتكلم .
تم السياره ماشيه فينا مده طويله وانا طول الوقت بس قاعده واطالع السما وادعي ربي ان يخلصني من المشكله .وطلعت المصحف من شنطتي انا متعوده اني احط مصحف بشنطتي وانا مسافره عشان لو حصلت وقت فاضي اقرا والحمد الله قعدت اقرا لين ربي شرح صدري وماحسيت بالوقت وانا بالسياره وتميت اقرا ولاوقفت قراه وحتى اني من التعب يحيط راسي واحس اني نمت لكن اصحى فجاه ولا استسلم للنوم عشان خلاص انا حسيت اني نحطيت بزاويه محد يقدر يسولي شي غير رب العالمين والله اني حسيت ان في مثل نفق او ممر بيني وبين السماء وانا اقرا القران وحسيت وكان السماء مفتوحه وتستمعلي وان ربي قادر على نصرتي
وانا اقراه بالدرب فجاه وكان احد قالي رفعي راسك فوق ورفعت راسي ولا المح علامه بالشارع مكتوب عليها واشنطن دي سي فعرفت ان احنا متوجهين الى واشنطن دي سي .
اول فكره جاتني انهم بيودوني المكان الرئيسي مالهم عشان يحققون معاي عدل وبعدين بيرحلوني الى السجن او المحكمه
وتميت اقراء القرانا الى ان جاءتني مثل النفاظه وقعدت ابكي ابكي ونهرت من البكي واللي قاعده يمي وحده عبده كلنا **** الرحمن رتبتها نجمتين لما شافتني كذا لمتني وانا ماصدقت احد حن علي وقعدت اقولها والله مو انا اللي انتو تبونها والله مو انا حتي قعدت اتكلم في العربي وهي مو فاهمتني قعدت ابكي الى ان وصلت الي حاله الاوعي والظاهر اني نمت .
اول ماحسيت ان السياره وقفت وطفا المحرك وسمعت الباب انفتح والله اني في هاللحظه مابي افتح عيني خوفا من الصدمه وتميت مسكرتها وما فتحتها و حطيت باللي يمكن يشوفوني نايمه يخلوني شويه .
كلمتني اللي جنبي نادتني باسمي فلانه فلانه فلانه وصلنا قامت طقني على وجهي عشان تصحيني وانا اتظاهر بالنوم عندها ماقدرت اكمل الكذبه اني نايمه وفتحت عيني والا اشوف ساريه طويله وعاليه نزلت راسي عشان اشوف العلم ولا علم الكويت والله انها دمعت عيني لما شفت علم الكويت وسفارة الكويت
نزلت من السياره ومشيت واهم معاي واول مادخلت ولا الدنيا معفوسه فوق تحت والله ان السفير لما شافني وانا داخله دمعت عينه وجا جنبي وقالي اذوك بشي قالت له لا انتو تدرون شنو صار فيني قالي اي ندري عن كل شيئ قالي قعدي وريحي نفسك شوي ودخلني مكتبه وطلع بره مادري شنو سوي ودخل واحد ثاني كويتي المكتب وقالي ماتبين شي قالت له بس ابي اكلم الكويت عطاني التلفون واول ماكلمت ابوي واقول الو...... الو ....... ما اسمع غير نهجان بالبكاء والصوت مو راضي يطلع خذت التلفون امي وسمعت صوتي اقول الو ولا اسمعها تبكي وتقولي ها يما انتي وين قلت لها انا بالسفاره الكويتيه قالت الحمد الله الحمد الله ياربي بعدها اخذ التلفون ابوي ويقولي هايبا اذوك بشيئ سولك شيئ قلت له لا بس انا امطلوبه عندهم . انا بعد اللي صار لي وكأن احد غسل مخي بسالفة اني انا هي المطلوبه اللي يدورونها
ابوي رد علي وقالي مطلوبه شنو قلت له اهم مشتبهين فيني قالي خليك بالسفاره ولاتطلعين لحين اكلم السفير قالت له انشاء الله
و بعد فتره دخل علي السفير وقعد على المكتب وشافني وقعد يضحك يضحك ضحك هستيري وانا اشوفه ولاكلمه
قالي قومي يالله روحي بره عشان الظباط ناطرينك بيودنك السجن . ويضحك
وانا ساكته واطالعه ولاكلمه شافني في هالحاله قالي متى تبين تردين الكويت ابوك يقولي على اول طياره ابي بنتي عندي. وانتي متي بتروحين .
قلت له اول شي انا بفهم شيئ واحد ماكو غيره انا مطلوبه عند الFBI وابي تفسير للي صارلي
قالي لاتشابه اسماء واجراء روتيني انهم يحققون مع اي واحد يكونون مشتبهين باسمه
قلت له انا حققو معاي من يوم الاحد خمس ايام تحقيق شنو ليش . وما يخلوني اكلم ابوي ولا احد
غير مره وحده وبس . هذا اي قانون وفي ديره تحترم القوانين
قالي هدي باللك انا مقدر الموقف اللي مريتي فيه والله محد يقدر يتحمله بس احنا عندنا خبر من اول ماكلمتيي ابوك وقلتيله باللي صار واحنا بدورنا بعثنا ناس الى المطار يسألون عنك في قسم شرطة المطار وقالو لنا الاسم هذا ماندري عنه بشئ وسألنا عنك بالاداره التابعين لهم ونفس الكلام قالو لنا ماندري عنها... وسكت. ماكمل كلامه وقالي الحين ا هم شيئ انك هني وباحسن حال وصحه وخلاص انسي اللي صار وقالي يالله ماقلتيلي متى بتردين الكويت قلت له على اول طياره قالي خلاص روحي بره عند فلان وسوي الحجز
طلعت بره وبالفعل حجز على اول طياره راجعه الكويت وكانت الرحله على الخطوط البريطانيه في الصباح و دوني بعدها الفندق القريب من السفاره وحجزلي فيه ليله وقالي باكر انشاء الله السفر
نزلت ودخلت الفندق ولاحاجزين لي جناح والله من كبره خفت انام فيه .
صحيت ثاني يوم وجهزت اغراضي ونزلت تحت بالموعد ولا السفير والقنصل وكم واحد معاهم جاين لي الفندق وركبت السياره مع السفير ورحت المطار وودعني والحمد الله سافرت الكويت اخيرا
اشوفكم على خير انشاء الله واسفه جدا على الاطاله ولكن الاحداث ماتحتاج تقطيع ان كان حقدتو علي
وارجو منكم ان تسألو انفسكم
هل fw-kw رجعت امريكا لاستكمال ما تبقي لها من دراسه ام اختارت دوله غير امريكا .ام اختارت تدرس بالكويت؟
....( كان معكم فيصل القاسم - قناة الجزير )...............
وبنتظار ردودكم
شاكره لكم حسن متابعتكم
اكمل معكم من حيث وقفت . انا سألتكم ماذا تتوقعون ان ارجع امريكا واو دوله اخري او اكتفي بالكويت
قعدت اشوف كتاباتكم وتعليقاتكم واضحك البعض حسيت انه فهمني والبعض الاخر تعاطف معي وتمنى ان اكمل دراستي بالكويت او اذهب الى دوله اخري
بالحقيقه انا اول مارجعت الكويت وكانو اهلي باستقبالي بالمطار كانو جدا فرحين بعودتي سالمه من بعد اللي صار لي لكن انا من اول ماركبت الطائر من امريكا والمتوجه الى الكويت وانا بصدمه غير مستوعبه للحدث بس قاعده افكر بالي صار نزلت مطار لندن وقعدت فيه تقريبا 6 ساعات ولم افكر حتى بالتسوق في مطار لندن اول مانزلت من الطائره توجه الى الفود كورت ركن المطاعم واخذت لي اكل وقعدت اكل ولا تحركت الى الي الطائره المتوجه الى الكويت وبنفس الحال قابلت اهلي المعبرين عن فرحتهم وانا لن اتجاوب معهم التزمت الصمت بلاحراك
رحنا البيت والا كل اهلي متجمعين عندنا لمباركت وصولي بالسلامه ولكني لن استطيع مجاملتهم واتجهت الى غرفتي ودخلت اخذت دوش وبدلت وصليت وحطيت راسي على الفراش ولن استطيع النوم كل ما اغمض عيني تمر الذكري المفزعه من امامي وكاني اشاهد فلم مرعب فاستيقض من الفزع . ومن بين هذه المرات المفزعه سمعة امي صوتي وانا اصرخ دخلت علي وقعدت جنبي وحطتني بين ذراعيها وقراءة علي بعض من القرأن لتهدء من روعي وتميت على هالحال يمكن اسبوعين ما اتكلم وبس اغمض عيني اشاهد شريط الذكرى المؤلمه . واهلي يكلموني ويترجوني اتكلم وقول لهم شنو صارلي وانا التزمت السكوت والصمت حتى انهم وصل بهم الحال انهم شكو انني قد تعرضت للضرب او ماشابه ذلك فأخذوني لطبيب لاجراء بعض الفحوصات لكي يطمئنو علي انني باحس حال والحمد لله انني لم اصب بمكروه
وتميت على هذا الحال فتره طويله حتى جاء يوم من الايام وكنت جالسه مع امي وابوي وكالعاده يكلموني ويسألوني وانا ما ارد عليهم بشيئ حتي رايت امي امام عيني تبكي وتنهار وتقولي قوليلي انت شفيك ليش ساكته وتترجاني بالكلام وعندها وكأن دموع امي عملت لي صدمه اقوي من اللي شفته
وبلا شعور قعدت احكي لهم القصه بالكامل وعن اللي صار كله . والحمد لله انني تخلصت من جدار الصمت هذا
وجلس والدي يؤنب نفسه على مافعله بي وتمني انني لم اسافر الى هذا المكان . ولكن قدر الله وماشاء فعل
ومافي احد يقدر يهرب من نصيبه والمكتوب عليه
مرت الشهور واحد تلك الاخر وانا قد نسيت حساب الايام والشهور ونسيت ان باقي لي سنه واحده على التخرج من امريكا وبعدها خلاص افتك من الغربه الى الابد
فكرة اكمال الدراسه بدات تراودني وخصوصا انه باقي لي من المده فقط كورسين دراسيين . وبعد ان استقريت نفسيا فكرت افاتح اهلى بموضوع استكمال دراستي فلن يعارضو الفكره وقالو لي ان اكمل دراستي بالكويت عوضا ان اعود الى امريكا وفكرت مليا بالموضوع فوافقة على هذا الراي وابتدي الدوام في جامعة الكويت وبدأت الدراسه في اول اسبوع اعود فيه الى الدراسه بعد انقطاع عام كامل واعوام اكثر من دراستي بالكويت والوضع تغير علي فحسيت انني بغربه في ديرتي وفي جامعتي ما قدرت اتاقلم فالوضع اللي حاصل في الجامعه عرض ازياء وكأنك داخل قاعه لعرض الملابس واخر الصيحات في عالم الموضه والازياء وتنافس قوي بين اخر موضه لسيارات الفخمه ....الخ واكيد انتو عارفين الوضع بجامعاتنا اللي بدول الخليج علي وجه الخصوص
انا هذا الوضع من زمان تخليت عنه ونسيت وتناسيته ولما نحطيت فيه مره ثانيه ماقدرت اتعايش معاه تعلمت علي عيشت الهلاقه بامريكا
بعد كم اسبوع اهلي شافوني غير متحمسه لاستكمال دراستي ولان اساسا الجامعه مافيها دراسه .كلموني شنو سبب تطنيشك لدراسه والجامعه قلت لهم انا ماني قادره اتاقلم مع الوضع وموعاجبني الوضع بالمره
وضعي بامريكا وايد احسن لي من هني بمليون الف مره
ابوي اول ماسمع امريكا وكأني جايبتله سيرت ابليس قعد يتعوذ منها مليون الف مره ويدعي عليهم وعلي سو فيني
انا اصريت على رأي اني برجع امريكا وامي وابوي يتوسلوني اقعد بالكويت وخلاص مولازم دراسه واحنا نقدر نأمن لك مستقبلك من غير غربه وشحططه
انا عارفه ان هذا الكلام من ورا قلوبهم وهم في قرارت انفسهم يبوني اكمل بس خايفين علي وابوي بيموت من عذاب الضمير من اللي سواه فيني وحاط براسه ان هالمشاكل كلها جات من تحت راسه
انا ماحبيت ان يعيش بعذاب الضمير هذا وصممت على راي ان ارجع امريكا لسببين
الاول وهو الظاهر ان اكمل دراستي
الثاني وهو الباطن ان اريح والدي من عذاب الضمير هذا واثبت له انه لن يفعل بي في يوم من الايام سوء وارفع راسه واتخرج من امريكا واحقق له الحلم اللي حلم فيه طول عمره
واستمريت بالالحاء عليهم بالسماح لي للعود لامريكا ...............واخير استجاب القدر لي واذنو لي بالسفر ولكن هذه المره مع والدي
وبالفعل سافرت انا ووالدي الى امريكا اكملت دراستي الباكلر وانتهت السنه الاولى على خير والحمد لله
وحققت حلم والدي وتحملت كل هذه الصعاب من اجل تحقق هذا الحلم
وبعدها كلمني مرشدي بالجامعه وعرض علي استكمال الماجستير في نفس الجامعه لانني كنت من الطلبه المتميزين وسالته عن مدة الدراسه وقالي ممكن سنه ونص او 2 بالكثير
وبدأت القصه تدور في عيني ومخيلتي ولن اتردد بمفاتحت والدي بالموضوع فرد الي قائلا انا كنت احلم بالبكلريوس وهذا حد حلمي والحمد الله تحقق لي الحلم فقرار الماستر راجع لك وبالدرجه الاولى فهل تستطيعين ان تكملي المشوار بروحك وانا ارجع الكويت قلتله اقدر اتحمل
فلم اتردد بالتقديم لشهادة الماجستير والحمد لله وبتوفيق من الله استطعت ان احصل عل اعلى المراتب العلميه في تخصصي
اشكركم علي حسن متابعتكم لي والي اللقاء بموضوع وتقرير اخر انشاء الله ولكن هذه المره ليس سفر بقصد الدراسه ولكن سفر بقصد السياحه وساوافيكم بالتقارير المصور انشاء الله
وحتى القاكم لكم مني اجمل تحيه
LinkBack URL
About LinkBacks
July 19th, 2006, 09:51 PM
تفضلوا هذا الرابط لفتاة كويتية تحكي قصة رحلتها للدراسة في امريكا وبالاخص في اوهايوhttp://www.travel4arab.com/vb/showthread.php?t=55717
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــ
انقل لكم اختصار ما كتبت
اود ان اكتب لكم عن تجربتي في السفر الى اوهايو
بعد ماكنت متعوده اصيف كل سنه في نيس وباريس وجنيف والنمسا وانجلترا وفجأ ومن غير سابق انذار
ابوي قرر يرسلني لاستكمال دراستي هناك وطبعا عرض علي الفكره وكنت رافضه بالاول لاني توني كنت
متخرجه من الثانويه ونسبتي قويه والحمد الله ودرست في جامعة الكويت ولكن كانت الدنيا ماخذتني بكل
معاني الكلمه ما افكر غير بالبس والكشخه والطلعه وابوي ماقصر معاي شرالي سياره وتقدر قيمتها بالشيئ
الفلاني ......... ماطول عليكم ارسل ابوي اوراقي التعليم العالي ولكن للاسف لم يقبلوني ولكن والدي اصر
علي ان يبعثني على نفقة الخاصه وبيدت اجهز اوراقي للسفر واغراضي وانا في بالي اني بروح هناك يوم
ولا اثنين واذا ماعجبني الوضع بارجع على اول طياره واجهز اغراضي وانا مادري وشنو ناطرني هناك
على فكره انا عمري ماسفرت امريكا كنت اسافر مع اهلى مثل ماقلت لكم اوربا لكن امريكا عمري ماشفتها
ولاتخيلتها . المهم جا يوم السفره كانت رحلتي الصبح الساعه 8 ودوني اخواني وخواتي والوالد والوالده المطار
لله يحفظهم مو انا اكبر وحده . ودايم يقولون اكبر واحد كبش الفدا . ودعت اهلي للمره الاولى في حياتي
كلها وكان اصعب يوم في حياتي ورحت وتوجهت عل الطياره وركبت وانا التلفت عليهم وماقمت اقدر
اشوفهم من دموعي اللي ملت عيني . المهم ركبنت الطياره وقعدت اطالع من الشباك واودع الكويت واهلي
وشريط ذكرياتي كله مر علي وانا قاعده اطالع من الشباك كانت طيارتي من الكويت الي امستردام وبعدين
شيكاغو انا كنت متعوده على سفر 6-7-8 ساعات لكن مو 16 ساعه على كرسي واحد والله قعدت احتري
الوقت الحين نوصل شوي نوصل ماكو . لا ومن حسن حظي ماكان احد قاعد حولي واللطياره كلها هنود
والوضع كأنه في باص مو طياره
خليكم معاي في الحلقه الجايه اقولكم عن اول ماوصلت امريكا وشنو صارلي
اكمل لكم قصتي بغربتي
تميت اداوم بالمعهد والله من يوم اللي صارلي اول يوم مع الشباب وهم ولاكلمه معاي اذا واحد فيهم شافني بممر يروح من ممر ثاني .كان معاي بنات خليجيات بالمعهد لكن كانو بكلاسات ثانيه انا عرفت انهم خليجيات بس ماحبيت احتك فيهم كانو غير عن طبعي وبعدين انا فرحانه بشكلي ان مايبين علي اني كويتيه او خليجيه ويمكن حتي اهم ماكانو يعرفون اني خليجيه
المهم دارت الايام وفكرت اشتري سياره انا ليما الحين ماعندي احد ولا اعرف احد تعرفت على وحده كانت ساكنه جنبي وطلعت ظربه شيئ لايستحق الذكر فتميت عايشه بروحي
احنا الحين تقريبا شهر 10 اكتوبر وفكرة السياره خلاص سيطرة على مخي ولازم مت من التكاسي والباصات وطبعا الباصات محد يركبها غير ال**** كلنا **** الرحمن
وفعلا اشتريت سياره قمت اروح من البيت المعهد البيت السوبرماركت وشويش شوي قمت ابعد الدرب شوي وصلت الى المول وبس عندي 4 مشواير ماكو غيرهم
اذكر اول مادخل علينا الشتاء طبعا شتائنا كان قارص طحت مريضه ولا اقدر اتحرك من الفراش بالمره نهائيا وبالصدفه امي دقت علي تلفون وكلمتها والصوت عساه يطلع ودرت اني تعبانه وقالت لابوي قام ابوي كلمني وقالي اتصلي الحين على 911 قلت له لا اتحمل ليما الصبح قام واصر علي اني اتصل ومن الحاح منه اتصلت ومن الخرعه والله اني صحيت من المرض قالولي عطينا العنوان وعطيتهم والله ماهي الا يمكن 5 او 10 دقايق بالكثير الا وصوت الاسعاف والنجده والمطافي بره البيت وانا من الخرعه لبست فوق البجامه كوت وطلعت بره اشوف العفسه ولا جاني ظابط الشرطه قبل مايتكلم قلت له العنوان واسمي
قالي شنو صاير قلته ابي اساعف توديني المستشفي قعد يطالعني وكأنه مومصدق انتي مريضه وطالعه بر تنطرين الاسعاف والله ماينلام لو انا مكانه كان مشيت
المهم خذتني الاسعاف ودتني المستشفى طبعا قبل ما تسوي اي شي تروح تدفع عن طريق الانشورنس
وانا ماعندي انشورنس لاني على نفقتي الخاصه مو على السفاره . طبعا انا كان فيني انفلونزا دفعت علاج بقيمة عمليه جراحيه لا ودفعوني حتى تكاليف طلعت الاسعاف ونقلي فيها
تميت عندهم بالمستشفى قريب اليوم تقريبا ولاحظو اني طالعه من البيت ببيجاما وكوت والحمد الله اني مانسيت بوكي(محفظتي) بعد ماخلصت علاج دقيت على تاكسي. طبعا انا بس حطوني على الفراش مال المستشفى وقعدت ابكي انهرت والبكي والدكاتره يسكتوني والممرضات وعبالهم اني ابكي من التعب والمرض اللي فيني وانا بالحقيقه كنت ابكي على نفسي والله انكسر خاطري على نفسي وانا بروحي بمستشفى ما اعرف فيها احد ولا احد معاي من اهلي والله طرى علي وضعي بمستشفيات الكويت لما كنت اروح كنت ادخل على طول على الاستشاري ولا انطر دور ولا اكلم احد ولا احد يكلمني وشغلي كلا ماشي على ارض من ورد
بكلمكم شوي عن الاشياء اللي ماكنت متعوده عليها ولا اعرفها ومن بعد هالغربه عرفتها
طبعا بعد ماشريت السياره والدي الح علي اني اخذ سياره جيب عشان الثلج وحتي ماينزلق وكذلك الح علي اني اخذه من الوكاله عشان اهم يهتمون بالسيرفس ...الخ
اول ما طلعت السياره رحت ورديت فيها لين وصل اليوم اللي خلص البانزين ولازم احط لها بانزين وطبعا احنا اللي متعودين عليه بالكويت ان في هندي بكل محطه يترس لنا بانزين ونعطيه فلوس ونمشي
لكن امريكا طبعا غير ماكو شي اسمه احد يخدمك .رحت محطة البانزين ووقفت كالعاده ادور احد يحطلي بانزين اتلفت يمين ويسار ماكو احد قلت لازم انا اروح احط بانزين والله طرى علي في هذي اللحظه مستر بن قعدت اطالع اللي جنبي شنو يسوي واقلده والظاهر اني سويت شيء غلط الرجال اللي بالسوبر ماركت اللي بالمحطه قام يصرخ علي بالمكرفون والله مادري شنو قاعد يقول بس حسيت ان الكلام والزف لي طبعا تدرون شنو سويت حطيت الكرديت كارد على المكينه وقعدت اطقطق فيها وماعرفت لها و بعد هذا جاني اللي يشتغل
وحط الكرديت كارد مره ثانيه وفتح لي مكان البانزين وحط الهوز فيه وقالى بكم تبين قلتله فل قالى بكم القيمه قلتله ما ادري بكم يفول قعد يطالعني وتنح فيني قالي رطن علي وما ادري وش قال هزيت له راسي موفاهمه رد كلمني انجليزي وسالني انتي من فانزويلا قلتله لا انا من الكويت شنو الكويت قلت له من الشرق الاوسط ميدل أيست واقتنع وطلع الحبيب مايعرف شنو الكويت . وبكذ تعلمت شلون اصب بانزين لسياره
ومره لما كنت رايحه اشتري تلفزيون من Best by وانا اشتري قعدت اطالع شكله وفكر شلون راح اشيله من السياره وادخله البيت لكن الحمد الله انهم وصلولي التلفزيون الى البيت وركبو
التلفزيون تم على الارض ماشريت له طاوله . رحت اشتري طاوله والحمدالله لقيتها في Target بس المشكله مايوصلونها للبيت ولازم انا اوديها بنفسي جا معاي واحد لسياره وركب لي الكرتون والله انا طول الدرب بس افكر شلون راح انزل الكرتون وصلت البيت فتحت الباب الخلفي لسياره احاول احرك التلفزيون يمين او يسار مايتحرك نهائيا قعدت افكر شنو اسوي طبعا ماخطر علي ولاشي غير حسرتي على ايام الكويت والخدم اللي كانو يشلون عنا كل شي . وطرت علي فكره افتح الكرتون واشيل قطعه قطعه وادخلها اخف من اني اشيل الكرتون كامل والحمد الله نجحت هذي الفكره
احنا الحين على نهاية الكورس الاول قدمت امتحاناتي والحمدالله كلهم زينين وحتى التوفل كان اوكي جبت فيه 516 هذا كان توفل الجامعه كانو على ايامي يشترطون توفل الجامعه يكون لازم 500 وفوق او 450 التوفل الدولي لكن الحين اعتقد انهم مايقبلون غير التوفل الدولي واللي يكون تقديمه على ما اضن بالكمبيوتر مو على ورق لكن الحمد الله اللي عديت منه انكان الى هذا اليوم انا اكتب التعبير مال التوفل على الكمبيوتر
طبعا اول ماطلعت نتيجتي مالت التوفل بشرتني عنها مديرة المعهد اني خلاص انقبلت بالجامعه وبيقابلني الدين يعني عميد الجامعه وطرت من الفرحه وعطتني موعد بعد 4 ايام قلت لها ما اقدر لاني بنزل اجازة كرسميس الكويت ويدوب الاجازه 3 اسابيع قالت لي خلاص باكر تعالي وانا احاول اشوف لك موعد
صار باكر رحت لها كان تروح معاي للعميد ودخلت عليه ولارجال كبير بالعمر وشعره ابيض وطويل ومتين اول مادخلت عليه عرفتني مديره المعهد وقام يسألني اسئله مادري من وين جايبها والحمد الله عدت على خير وختم كلامه كونقرات يوليشن يعني مبروك وقام وقف وفتح ايده وجا جنبي بيحظني عشان يبارك لي طبعا اهو رجال كبير اكبر من ابوي حتي ابوي يمكن يطلع عنده ولده اول مافتح يده وجا جنبي انا انصدمت ومادري شسوي ارده ولا اقول بمكان ابوي والله مادري اخاف ارده خاف يطردني كان اتعوذ من ابليس وقلت له لا انا مسلمه وانت رجل غريب عني وبسرعه وخرت عن طريقه كان يقول بكل رحابة صدر انا اسف وضحك بصوت عالى وضحكت معاه ووصلني حتى باب مكتبه
طبعا انا ماصدقت خبر طلعت كلمت ابوي وقلتله اني انقبلت بالجامعه وايد استانس
وقلت له اني برجع الكويت بعد4 ايام عشان عندنا اجازه طبعا ابوي عيا مارضي انزل الكويت لكن كلمت امي وترجيتها اني انزل وهي ماكان عندها مانع وحدها طارت من الفرحه لما درت اني بنزل الكويت بعد 4 ايام
طبعا اهي بدورها قنعة ابوي اني ارد
اول ماطلعت من العميد رحت سجلت مواد ودفعت لهم للكورس الجاي
رديت البيت وحضرت اغراضي وبعدها رحت المول عشان اشتري لاهلي هدايا ورجعت البيت وجهزة اغراضي . وانا من الفرحه والله ماادري شسوي والله احس اني بطير من الارض وقعدت اعد الساعات على يوم السفره واخيرا جا يوم السفر رحت المطار وطرت الي شيكاغو ومن شيكاغو على امستردام وكنت افكر وانا بالطياره وين اروح اول ما انزل الكويت بيتنا ولابيت جدتي انا وايد متعلقه بجدتي عمري ماهديتها كلا اروح وارجع معاها واهي اقدر اقول امي الاولى ماتتصورون الى اي درجه انا متعلقه فيها وعمري ماهديتها ولايوم واحد تسافر اسافر معاها تدخل المستشفى ادخل معاها ولا اهدها ولالحظه . واول ماوصلنا الكويت والله العظيم يوم نزلت الطياره الارض وشفت مطار الكويت والكتابه الكويت بالاحمر والله الود ودي ارمي نفسي من الشبك عشان بس انزل وابوس الارض من فرحتي بديرتي. والله بس افتحو باب الطياره تميت امشي وانا متنحه بوجيه الكويتين رجال ونساء واطفال والله الود ودي احظن واقبل كل كويتي وكويتيه شفتها. والحمد الله اول ماطلعت من الباب مال الخرطوم مال الطياره وتميت امشي شوي كان المح ابوي مع اخوي واقفين وقعدت اسارع بالمشي وبخطوات كبيره اول ماوصلت لبوي لميته وقعدت ابكي وتميت لامته يمكن 10 دقايق او اكثر وانا بس ابكي والله ماني مصدقه اني لامه ابوي وقبلت راسه ويده وسلمت على اخوي وطلعنا من المطار الى البيت .وانا بالسياره ابوي يسألني عن الحياة هناك وانا اسئله وين بروح الحين بيتنا ولابيت جدتي قالي لاكلهم متجمعين عندنا بالبيت قلت اوكي
اول مادخلت البيت سلمت على اهلي كلهم وقعدت طبعا كانو قاعدين يطالعوني وكاني مخلوق جاي من كوكب اخر طبعا انا بعد هالرحله نزل وزني 20كيلو .
قعدت اطالعهم واحد واحد فقدت جدتي سألت عنها وينها :ان يسكتون ولا كلمه ولا همس سألت مره ثانيه محد رد علي شسالفه وينها قالت لي وحده من خالاتي ان جدتي تعبت امس وديناها المستشفى قلت لها اي مستشفي قالتلي الصدري والساعه الحين 10 ماكو زياره . طارة بوهتي طرت فوق الطابق العلوي كان اشوف اختي الاصغر مني سالتها عن جدتي قالت لي بالمستشفي قلت اي مستشفى قالت لي مستشفى الاميري . طبعا مثل ماانتو عارفين مستشفى الاميري غير عن مستشفى الصدري وحده في شرق والثانيه في غرب
صرخت بوجها مره ثانيه اقولش وين جدتي قامت تبكي وقالت لي ان جدتي توفت قلت لها متى قالت لي من شهر تقريبا وليش ماقلتولي قالت لي ابوي مارضي نقولك
نزلت تحت مره ثانيه ولا ابوي قاعد مع اهلي اول ماشافني شكله دره اني دريت بالخبر قالي تعالي معاي بره نقعد شوي بالحديقه طلعت معاه قعدت على الكرسي وقعد قبالي وقالي انت مؤمنه بالقضاء والقدر ولازم نرضى فيه بخيره او بشره والمؤمن عند الصدمه الاولى يحتسب ويقول انا لله وانااليه راجعون انا ساكته ولاكلمه ولاحتى بكيت من الصدمه واهو عباله اني قويه وتحملت مايدري ان الخبر هدني هد من داخل واللي ألعن من هذا ليش ماقالولي على الاقل احضر عزاها ابكي معاهم احزن عليها معاهم مويخلوني بروحي
ومثل ما اقولكم ابوي توقعني حديد مايهزني شي رد قالي الخبر الثاني وهو اختي الاصغر مني سوت حادث بسارتي حادث شنيع ولكن الحمد الله اختي ما صار فيها ولا شي بس سيارتي ودوها السكراب لانها انتهت الخبرالثاني علي عادي مقارنه بالاول
اشكر لكم حسن متابعتكم وخليكم معاي بالحلقه الجايه اقولكم عن باقي ايام غربيتي وشنو صارلي بايام دراستي بالجامعه
بعد ما انتهت اجازة الكرسيمس وانا الان على وشك الاقلاع من الكويت متجه الى شيكاغو .وانا جالسه افكر واودع ديرتي الغاليه الكويت من خلال الشباك الطائره ومن حسن حظي ان محد جالس جنبي والكرسي فاضي . بعد ساعه من الاقلاع جاتني بنت وشكلها كويتيه وقالت لي ممكن اقعد جنبك قلت لها تفضلي وتمت تكلمني وتسألني عن سبب سفر الى امريكا وقعد اقص لها قصتي وعرفتها بنفسي اكثر وهي بعد عرفتني بنفسها وبالصدفه طلعت متوجه الى اوهايو وبنفس المنطقه اللي انا فيها وسبحان الله وكأن القدر جمعني بهم مرة اخرى لانها كانت نفس الشخصيه اللي كانت مع زوجها يوم اول ماسفرت من شيكاغو الى اوهايو
فجلسنا نتبادل الكلام وهونت على فراق اهلي تميت معاها طول مدة الرحله واول ماوصلنا الى اوهايو الحت علي بان توصلني الى منزلي هي وزوجها تم ذلك
مشت الامور ولله الحمد على احسن حال بعد مارجعت امريكا وبدأت بالدراسه واكتشفت ان الجامعه من كثر العرب اللي كانو فيها كانها جامعه في دوله عربيه او خليجيه بالتحديد
استمرت علاقتي مع هذه السيده المحترمه القديره والتي اكن لها حب وتقدير من كل اعماق قلبي لمواقفها النبيله معي
وفي يوم من الايام قالت لي يوجد هنا مركز اسلامي اتريدين الذهاب اليه فرحبت بالفكره لاني بحاجه لان اسئل احد عن مواقيت الصلاة. ذهبت الى المسجد وتعرفت على الجاليه العربيه هناك واخذت منهم مواقيت الصلاة
وجرت الايام والسنين وكاني اراها الان في عيني بسرعه حتي يوم 11/9 وكنت في الجامعه في احد الكلاسات الصباحيه والا بدكتور المادة دخل علينا الكلاس وهو يبكي ويقول لنا الحدث ويجب علينا الخروج فورا من الجامعه والتوجه الى البيت لمشاهد الاحداث على التلفاز
وبالفعل حصل ذلك وجلست اشاهد الاحداث على التلفاز وكلمت اهلى وطمنتهم على اني بخير وان الاحداث بعيده عني . بعد يوم من الحدث كلمتني صاحبتي وقالت لي ان لازم مانطلع من البيت وهذا تنويه من المسجد
هنا انا حسيت بالخوف والرهبه حسيت ان السالفه من صدق
بعدها قالت لي ان اكثر الكويتين الشباب قاعدين يسون اوراقهم ويوقفون قيدهم وبيردون الكويت وحتي باقي الخلجين كذلك .كلمت ابوي وقالت له باللي صار ان مافي احد بيقعد والكل راجع ديرته .طبعا كنا تونا ابتدينا الكورس لنا يمكن اسبوعين او3 وانا طبعا دفعة لهم التوشن مصاريف الجامعه بالكامل من قبل ما ابدا بالدوام
رحت لقسم التسجيل اقولهم اني راجعه الكويت وبوقف قيدي قالو انتي مو قريت القوانين وقعتي عليها خلاص مانقدر نرجع لك القيمه بالكامل ورجعو لي جزء قليل من القيمه
كلمت ابوي وقلت له اللي صار وقالي خلاص تنزلين الكويت على اول طياره وبالفعل عمل لي حجز من الكويت وعطاني رقم الحجز وكلمت الخطوط وارسلولي التذكره من خلال البريد السريع في نفس يو السفر وفعلا رحت المطار اللي في منطقتي
خليكم معاي بالحلقه الجايه اقولكم شنو صارلي لما رحت المطار وليش ممنوعه من السفر
بعد ماحزمت اغراضي واتجهت الى المطار كانت صديقتي موصلتني عشان سياتر حطيتها بالكراج مال البيت وسكرت عليها
اول مادخلت المطار انا وشنطي توجهة على كاونتر الطياره المتوجهه الى شيكاغو كان في ناس واقفين بالدور رحت وقفت معاهم انا صديقتي نسولف ونضحك مع بعض جا دوري وسحبت شنطي معاي وحطيتهم على الكاونتر
طقت اسمي على الكمبيوتر وتمت طالعني اكثر من مره وانا كنت حدي عاديه وكول ولا في بالي شي التفت على صديقتي وكملنا كلام صديقتي كانت على يميني حسيت باحد على يساري وانا قاعده اكلم صديقتي فجاه
عيونها طارت من الخوف قلت لها شفيك التفت علي يساري ولا بذاك الظابط اللي مادري شنو ياكل عشان يصير في هذا الحجم
من غير كلام قالي انت فلانه الفلاني قلت له اي انا قالي تعالى معاي
قلت له ليش قالي اجراء عادي وروتيني
التفت على صديقتي وقلت لها عادي ترى كل الكويتين والخليجين جذي لازم ياخذون اقوالهم في هالفتره طبعا انا هالمعومه جايبتها من ابوي اهو قالي لاتخافين ممكن يسألونك بالمطار
مشيت مع الظابط ورحت معاه المكتب
اول مادخلت عطا جوازي لظابط ثاني وطلع يعني اخذ جوازي ومشي. وانا ساكته ولا كلمه لان عندي خبر باللى يصير من والدي .
ابتدي يسألني بكل ادب واحترام شنو اسمك . تاريخ ميلادك . سبب الزياره ......الخ
طبعا هذي الاسئله سئلني يمكن فوق 100 مره
ومن بعدها قالي انتي سنيه ولاشيعيه والله طارت عيني من هذا السؤال حتي مافهمته قاله لي بالعربي . ردد علي السؤال اكثر من مره قلت له انا سنيه .
سألني عن اي مسجد انا تابعه له وقالي اسامي مساجد ومراكز دينيه في توليدو انا عمري ماسمعت عنها قالي انا ادري انت ماتروحين غير مسجد واحد
قالي اي مسجد تروحين قلت له عنوان المسجد اللي اروحه قالي مسجد سعد تقصدين قالت له مو اهو المسجد اللي على الشارع الفلاني( والله ماني ذاكره حاليا اسم الشارع نسيته )
قلت له اي هذا المسجد اللي انا اروح له .انا ماكنت اروح هناك وايد لكن اذكر اني مره كنت ماره فتره من الفترات بظيقت صدر فكنت اروح المسجد وكنت متطوعه اقعد ادرس الاطفال في ايام معينه من الاسبوع .
سألني ليش كنتي تروحين المسجد وايد قلت له انا ماروح الا يمكن كل اسبوعين مره
قاللي وليش انتي تحت تنظيم معين قلت له لا طبعا انا مالي شغل باحد
قالي وشلون اهلك مرسلينك بروحك انتو موعندكم المراه ماتسافر الامع ذي محرم والله طارت عيني حشي مطوع اللي قاعد يسألني مو ظابط امريكي
.سالني وقالي انتي كل في فتره معينه من السنه تاخذين حلاو وايد وتودينه المسجد ليش
والله انا اموت واعرف من وين جاب كل هالمعلومات .
قلت له احنا الخليجيات اللي هني متفقين ان كل عيد من اعيادنا اعياد المسلمين نحط حطه مبالغ رمزيه ونودي لاطفال المسجد حلاو .
سالني عن اهلي كلهم واحد واحد عن اساميهم وعن اعمال ودراستهم ومنو ماخذين .
وسألني عن حياتي الخاصه وجاوبته .
وسألني عن اصولنا من وين وجاوبته وسالني وايد اساله دقيقه وانا اجاوبه بكل سذاجه وصراحه
سالني بعدها عن اسمي قالي تعرفين فلانه الفلانيه اللي اهو انا قلت منو انا قالي انتي فلانه الفلانيه قالت له اي انا وقلت له اسمي بالكامل
قالي فلانه الفلانيه هذي مطلوبه عندنا واسمها مدرج تحت قائمة الاسامي الممنوعين من السفر
قال اسمي واسم ابوي وقالي هذي الشخصيه ممنوعه من السفر قلتله ليش انا شنو سويت انا عمري ماضريت احد هني وشوف السوشل مالي واسئل الناس اللي يعرفوني اسئل عني بالجامعه يقولون لك انا شنو
انا باللحظه حسيت اني غلطت يوم اروح للمسجد يمكن هذا شيئ خلاهم يشتبهون فيني والله اني قعدت اذكر كل شي خير انا سويته بامريكا واقول لنفسي يمكن ماكنو يبونا نسوي اعمال خيريه اسلاميه في ديرتهم
والله قعدت احاسب نفسي حساب عنيف لاني حسيت ان السالفه صدق وانا كل همي في هاللحظه خايفه لاتطير عني الطياره
كمل اسألته اللي ماكان لها عندي جواب لان قعد يسألني عن الشخصيه المعنيه والمطلوبه . وفي خلال التحقيق قالي تقدرين تطلبين تروحين الحمام اعزكم الله
اول ماقالي جذي قلت له ابي اروح الحمام كلم ظابط ثاني عشان يروح معاي وبالفعل مسكني الظابط الثاني من ايدي وداني الحمام وقبل ما ادخل فضو الحمام من الناس انا بالحقيقه ماكنت ابي الحمام بس كنت بطلع من الجو اللي انا فيه واغسل وجه واستوعب اللي قاعد يصير دخل معاي الظابط الحمام دخلت داخل وهو وقف بره طلعت ولاهو بوجهي رحت اغسل وجهي وخطرت في باللي فكرة اتوضي عشان اصلي ركعتين لله وبالفعل توضأت والحمد الله اني كنت لابسه بنطلون طويل وبالطو طويل وساركف صوف طلعت بره رحت غرفة التحقيق مر ثانيه والحين في هالوقت ماكان باقي شي على الطائره وتقلع الايمكن ساعه استأذنت الظابط اني اصلي والحمد الله اذن لي بالصلاة
والله يمكن الركعتين اللي صليتهم كانو اطول ركعتين صليتهم بحياتي كلها ودعيت ربي ان يخلصني من هالمشكله اللي انا فيها وبعدها اول ماخلصت صلاة رجع التحقيق مره ثانيه ولكن الحمد الله بفضل من المولى عز وجل اقتنع الظابط ان مو انا الشخصيه اللي يبونها وقالي اشتباه اسماء بعد ماجابو جوازي وفتحو لي ملف بالFBI واخذو لي صور
طلعت من الفرحه وطرت على الكاونتر مره ثانيه ودخلت شنطي وودعت صديقتي وتسألني شنو صار لك وانا من الصدمه والخرعه ماقلت لها عن شي
دخلت شنطي وركبت الطائره المتوجهه لمطارشيكاغو
خليكم معاي بالحقله الجايه اقولكم وشنو صار لي لما ركبت الطياره
اكمل معاكم قصتي قصت غربتي .
بعد ماخلصت من اللي صارلي دخلت شنطي للكاونتر مره اخري و ودعت صديقتي وركبت الطيار المتوجهه الى شيكاغو والتي متدها ساعه الاربع . كانت الساعه حين ذلك الوقت 3 عصرا ورحلتي من شيكاغوا على الكويت الساعه 5 عصرا وشيكاغوا تزيد بالتوقيت عن منطقتي بساعه .يعني انزل مطار شيكاغو الساعه 4 ويتبقي على رحلة شيكاغو كويت ساعتين . هذا المتوقع
ومن سوء حظي لم يحدث ما خططت اليه فعندما ركبت الطائره المتوجه لشيكاغو بعد ربع ساعه من الاقلاع حصلت مشكله قي احد عجلات الطائره وابلغنا الكابتن بأن نجلس في وضعية الامان ( خلع الاحذيه اعزكم الله ونبقي ايدينا على رؤوسنا الى اسفل) و بانه سيعود مره اخرى الى المطار . وبالفعل هذا ماحصل رجع الى المطار وهبطت الطائره ولكن لم تلمس الارض لعدم صلاحية عجلاتها وفجأه اقلع الى اعلى من دون ان يتدرج بالاقلاع ولف لفه بالسماء ورجع وعاد الكره مرة اخري ولم يستطيع الهبوط الفعلي . وكذلك اقلع دون تدرج باالقلاع . اعاد الكره مره اخري وحتى المره الاخيره . في اخر مره فرشو مدرج الطائره بفوم ليسهل عملية الهبوط .
طبعا انا بعد التحقيق الطويل وفلم الموت الى حصل لي في الطائر نزلت من الطياره جثه هامده غير مستوعبه للي حصل اتجه الي اقرب مكان صاد وسجدت شكرا لله على ماحصل لي
بعدها توجه الى الكاونتر لسؤال عن رحله اخري في نفس الوقت من اي مكان قريب من منطقتي وللاسف لم اجد طائره في نفس الوقت . سألت عن القطار المتجهه الى شيكاغو وقالو لي انه حرك من ساعه
فكرت ااجر سياره واروح لالحق بالرحله المتوجه الى الكويت قي تمام الساعه 5 بتوقيتنا
وبتوقيت شيكاغو 6 ولكن درب السياره مواقل من 3 ساعات . .....................
انا الان وقف مخي عن التفكير وماعندي غير فكره وحده وهي كيف اروح شيكاغو - كويت
لايوجد حل هذا الكلام كان في يوم الاحد ورحلات شيكاغو احد وثلاثه على الكويتيه واثنين وخميس من نيويورك
ماعندي غير حل واحد وهو اني انطر الي بكره كلمت الخطوط الجويه الكويتيه لتغير الحجز من شيكاغو الى نيويورك وقالولي ماكو حجز قلت لهم عندي تسجيل في جامعه الكويت الى يوم الاربعاء قالولي ماكو حجز نهائيا. كلمت ابوي وقلت له انا لازم ارجع الكويت باكر وماقلت له عن اللى صار لي بالمطار بس قلت له ان الرحله تكنسلت اليوم
كلمت تاكسي عشان يوديني البيت رحت البيت اول مادخلت ولا الدنيا معفوسه فوق تحت لما كانو يحققون معاي بالمطار راحو فتشو بيتي وماتركو مقز ابره الا ونبشو
انا هني حسيت اني ممكن اكون متراقبه ولاشي فخفت اكلم ابوي اقوله بالي صار وخفت اكلم صديقتي واقولها وحسيت اني بموت من الضغط اللي فيني اخذت اغراضي المهمه ورحت ركبت سيارتي ورحت بيت صديقتي طقيت الباب عليها والحمد الله لم تكن خارج المنزل وانصعقت لما شافتني وقالتي شنو صار وحكيت لها عن الي صار لي بالطياره ورحنا مطعم وتعشينا واول مره احس اني ماني قادره اتحمل اليوم يخلص من الخوف
قلت لها وترجيتها انها تجي تنام عندي هالليله عشان ماني قادره اتم بروحي ولكن ظروفها لم تسمح لها والحت علي بان اجلس عندها حتي الصباح وواقفت على الفور على هذا الراي وذهبت معاها الي بيتي واخذت اغراضي والحمد الله عندما رجعت البيت لقيت ابوي تارك لي رساله برقم الحجز باكر من نيويورك - كويت . كلمته وتاكد ت من اكثر من الحجز وقالي شوفي لك طياره من ديترويت الي نيويورك قلت انشاء الله
اخذت اغراضي وحطيت سيارتي بالكراج وقفلت بيتي ورحت مع صديقتي بنت الحلال ماقصرت فيني والله اهي وزوجها والله اني ما انسي فضلهم علي
وبالفعل خذتني صديقتي معاها بالسياره وانا بالسياره كلمت الامريكان ايرلاين وحجز من دترويت الى نيويورك . رحت معاها بيتها وجلست معاها وزوجها طلع ينام
وفي اليوم التالي سلمت عليهم وتشكرت منهم وجا اليموزين ووداني الى مطار دترويت ودخلت المطار وتوجهة الى الكاونتر والحمد الله لم تحدث لي اي مشاكل ودخلت اغراضي وتوجهة الي قاعة ركوب الطائره المتجه الى نيويورك . والحمد الله سافرت الى نيويورك دون اي مشاكل
نزلت مطار نيويورك الداخلي واخذت اغراضي واتجهة الى مطار نيويورك الدولي . عندما ذهبت الى هناك كانو الناس في دور كبير قبل ان يفتح كاونتر الكويتيه واتجهة واستلمت تذكرتي واخذت دور وانا الان في اخر درجه من درجات التعب والارهاق حطيت شنطي في الدور على الكاونتر ورحت قعدت بالكراسي المقابله للكاونتر والله من التعب لم احس بنفسي الا وانا منسدحه علي الكراسي ونايما جدام الناس وكل شوي افتح عيني اشوف الدور وتميت لامه شنطني بين ايدي ونايمه . بعد ماصحصحت شوي طرت على فكره اني انام بالطياره وتذكرت الكرسي مال الطياره على الدرجه السياحيه يجيب الهم جاتني فكره اروح اسوي ابقريد لتذكرتي واخذ درجة رجال اعمال او اولى. والحمد الله كان معاي فلوس كافيه لذلك
اتجهت الى مكتب الخطوط الجويه الكويتيه لعمل ذلك .
خليكم معاي بالحلقه الجايه اقولكم اللى صار لي ومنعني من السفر الى الكويت
اكمل معكم قصتي قصت غربتي
بعد ما اتجهت الى مكتب الخطوط الجويه الكويتيه لتطوير التذكره من الدرجه السياحيه الى درجة رجال اعمال اولى . سألتهم اذا يصير قالولي اي اوكي تقدرين بس تدفعين الفرق قلت مافي مشكله اعطيتهم تذكرتي وجوازي ولما حط اسمي على الكمبيوتر قال انتي فلانه الفلانيه قلت اي نعم انا قالي اسمك مدرج تحت قائمه الممنوعين من السفر وتسليمك لل FBI قلت له انا ادري ولكن هذا تشابه اسماء بيني وبين المذكوره عندكم اسمي واسم ابوي بس هو اللي مشتبه فيه ولكن تكملت الاسم غير مشتبه فيه وانا من امس كنت في ولايتي وحققو معاي وبهذلون اخر بهذله قالي انا مصدقك ولكن للاسف هذا اجراء امني وانا واقفه عند المكتب ما وعيت الا وظباط ال FBI وراي خذو جوازي واغراضي من امام الكاونتر وجدام الناس كلهم جرجروني لاومعاهم *** اعزكم الله انا من الخوف رجولي ماعد تحملني قام ظابط ثاني وسندي من ايدي وتمو يجرجروني امام الكويتين والناس الموجودين . ودوني مكتب التحقيق وانا من الخوف تمت استفرغ ودمرت ملابسي وشكو فيني اكثر بعد ما شافوني في هذي الحاله . خذتني ظابطه مراه ودتني الحمام اعزكم الله وغسلت وطلبت منها وترجيتها تجيبلي ملابس من شنطتي وكلمت ظابط ثاني وجابلي الشنطه داخل الحمام واخذت منها ملابس وغير ملابسي
طلعت بره مع الظابطه ورحت معاها مكتب التحقيق و اول مادخلت طلبت من الظابط اني اصلي اول وبعدين اكون تحت امرهم باي شي يطلبونه وانا طبعا ما ادري وين القبله ولكن خمنت وجودها وصليت وطلبت ربي ان يخلصني من هالمشكله واذكر اني بالصلاة قريت سورة يس . بعد ماخلصت صلاة التفت على الظابط و بتدأ معاي التحقيق وكان هذا الظابط بقمة الحقاره وعكس عن اللي كان في ولايتي
طبعا انا قلت له انهم حققو معاي وفتحو لي ملف عندكم ولكن لم ياخذ بكلامي قالي هم شي وانا شي وبعدين انت عندك رقم الظابط اللي حقق معاك او رقم الفايل . قلت له لا لان حقق معاي ومن بعدها طلعني وانا اذا كنت مطلوبه او مشتبه فيني ليش اهو يطلعني من اصل
طبعا كان الحوار داير في حلقه مفرقه بلا جدوى الرحله المتجه على الكويت لن يبقى عليها الا ساعه ولازم ندخل الشنط الطياره قبل ساعه او ساعتين هذا من ظمن الوائح اللي صدرت بعد 11/9
قلت له رحلتي مو باقي عليها الا ساعه متى راح نخلص قال ماراح نطول ويعتمد عليك
ومثل ماقلت لكم ان الموضوع داير في حلقه مفرقه دون جدوي حتي اقلعت الرحله المتجه مع الكويت وكان ذلك في يوم الاثنين والرحله اللي بعدها يوم الخميس .ولما سمعت اعلان الاقلاع حسيت اني من صدق خلاص راح اكون بالسجن من غير ذنب واني خلاص ماراح ارد الكويت طول عمري وطبعا انهرت وخارت قواي وافتكر اني فقدت الوعي اويمكن نمت بس اللي اذكره ان صارت فصله اني فصلت عن الوضع شوي ورديت
بعد ما استوعبت الوضع قلت له ابي اكلم اهلي بالكويت واطمنهم علي لانهم بانتظاري قالي اوكي
كلمت ابوي وقلت له السالفه كلها وقلت له ان اسمي مشتبهين فيه وقاعدين يحققون معاي من امس وانا خلاص ماني قادره اتحمل
خليكم معاي بمأساتي وانشاء الله اكمل لكم اللي صار بالحلقه الجايه
اكمل معكم القصه من حيث ماوقفت
عندما كلمت ابوي وقلت له السالفه كلها وقلت له ان اسمي مشتبهين فيه وقاعدين يحققون معاي من امس وانا خلاص ماني قادره اتحمل
وطبعا لن يسمحو لي الابمكالمه واحده وقبل ان يسمحو لي بالمكالمة والدي سألوني اذا تبين تكلمين المحامي الخاص فيك و انا اختر اكلم ابوي كان الوقت بالكويت تقريبا الساعه 6 صباحا فتصلت اول مرة لن يجيب علي احد وبالمره الثانيه كلمني ابوي وقلت له عن التفاصيل
وانا بحكم معرفتي بوالدي وبنفوذه توقعت يكلم السفاره الكويتيه في امريكا او يقلب الدنيا عاليها واطيها عليهم .
والحمد الله بعد ماكلمت ابوي ارتحت نفسيا وهديت لاني حسيت اني خلاص انشاء بطلع من هالمصيبه .
ومن بعد ما كلمته قاعدت واحتري احد يجي يطلعني من هالغرفه مرة ساعه مرة ساعتين وثلاث واربع وانا انتظر ماصار شي قلت لنفسي الظاهر ان السفاره مسكره (مقفله) في هذا الوقت يالله مابقي شي على الصبح وفي خلال هذي الفتره كل شوي يدخل علي واحد ويرد يسالني نفس الاسأله وانا اجاوب بكل صراحه وسذاجه بعد ماصارت الساعه يمكن 7 الصبح قلتلهم اني برجع اكلم ابوي بالكويت
قالولي لا ممنوع مو كلمتي امس خلاص مسموح تتكلمين مره وحده قلت له اي بس ما صار شي محد جاني
يعني انا حتى لوأني اتصلت على محامي كان جاني من امس
مرة ساعه وساعتين الساعه الحين تقريبا 10 صباحا ومحد جاني ؟؟؟؟؟
سألت الظابط ماكو احد جا سأل عني قالي لا . طلبت منه مره ثانيه اتصال على اهلي قالي ممنوع
وتم التحقيق شغال وكل شوي يدخل علي شكل اوصخ واقذر من اللي قبله . والظاهر انهم كانو يبدلون شفتات على راسي.
المهم تميت على هذا الحال حتي الليل وطبعا انا ليما الحين من امس وانا ممتنعه عن الاكل لان مالي نفس اكل
وانا في هذا الوضع صدقت اني انا الشخصيه المطلوبه وخلاص سلمت امري الى الله وقعدت افكر بالسجن وشكثر راح تكون عقوبتي وانا اساسا ما ادري هذي العله شنو كانت مسويه بامريكا واللي على هذا الاساس اسمها صار من قائمة المطلوبين
خطر في بالي اسأل الظابط عن هذي المطلوبه شنو كانت مسويه . وطبعا سألته عشان بخمن العقوبه اللي بتجازا فيها
سألته عنها قلت له انتو ليش مانعينها من السفر. قالي منو .قلتله اسمها. قالي. اللي اهو انتي
قالت. لا مو انا انت ماتدري انا منو وبنت منو وانا مستحيل اسوي شي يمنعي من السفر من ديرتي فما باللك اسوي شي هني عندكم
انا احب امريكا واحب شعبها وبدليل اخترتها من بد الدول هذي كلها عشان ادرس فيها وصدقني انا لو اني ما احس بامان بامريكا ترى كان من زمان انا راده الكويت
قالي هذا الكلام اللي تقولينه كل العرب يقولونه بدليل انك شايفه العدد الكبير منهم عندنا
المهم ماني معوره روسكم في هذا الكلام الفاضي واللي ماله فايده .
الوضع الحين الساعه تقريبا 12 وانا ليما الحين ولا شي اكلته من امس وقاعده افكر ليش محد جاني يمكن ابوي تعب من الصدمه اللي سمعها وطاح وما قال لحد ولاسوالي شي . وكان هذا الاحتمال الوحيد المقنع
وقعدت احاتي ابوي و شنو حاله
انا اذكر اني دخلت عندهم من يوم الاثنين مر يومين والثالث جاني واحد شكله نظيف وقالي غير ملابسك ولبسي ملابس رسميه و اخذوني وطلعوني بره المطار وركبوني في سياره ولاكلمه وكلمهم وين رايحين احنا الاحين . ماردو علي . انا قلت خلاص رايحه امثل امام المحكمه وخلاص راح ينفذون فيني الحكم والمصيبه انا ما ادري هذي البلوه شنو مسويه عشان اقدر ادافع عن نفسي واعرف اتكلم .
تم السياره ماشيه فينا مده طويله وانا طول الوقت بس قاعده واطالع السما وادعي ربي ان يخلصني من المشكله .وطلعت المصحف من شنطتي انا متعوده اني احط مصحف بشنطتي وانا مسافره عشان لو حصلت وقت فاضي اقرا والحمد الله قعدت اقرا لين ربي شرح صدري وماحسيت بالوقت وانا بالسياره وتميت اقرا ولاوقفت قراه وحتى اني من التعب يحيط راسي واحس اني نمت لكن اصحى فجاه ولا استسلم للنوم عشان خلاص انا حسيت اني نحطيت بزاويه محد يقدر يسولي شي غير رب العالمين والله اني حسيت ان في مثل نفق او ممر بيني وبين السماء وانا اقرا القران وحسيت وكان السماء مفتوحه وتستمعلي وان ربي قادر على نصرتي
وانا اقراه بالدرب فجاه وكان احد قالي رفعي راسك فوق ورفعت راسي ولا المح علامه بالشارع مكتوب عليها واشنطن دي سي فعرفت ان احنا متوجهين الى واشنطن دي سي .
اول فكره جاتني انهم بيودوني المكان الرئيسي مالهم عشان يحققون معاي عدل وبعدين بيرحلوني الى السجن او المحكمه
وتميت اقراء القرانا الى ان جاءتني مثل النفاظه وقعدت ابكي ابكي ونهرت من البكي واللي قاعده يمي وحده عبده كلنا **** الرحمن رتبتها نجمتين لما شافتني كذا لمتني وانا ماصدقت احد حن علي وقعدت اقولها والله مو انا اللي انتو تبونها والله مو انا حتي قعدت اتكلم في العربي وهي مو فاهمتني قعدت ابكي الى ان وصلت الي حاله الاوعي والظاهر اني نمت .
اول ماحسيت ان السياره وقفت وطفا المحرك وسمعت الباب انفتح والله اني في هاللحظه مابي افتح عيني خوفا من الصدمه وتميت مسكرتها وما فتحتها و حطيت باللي يمكن يشوفوني نايمه يخلوني شويه .
كلمتني اللي جنبي نادتني باسمي فلانه فلانه فلانه وصلنا قامت طقني على وجهي عشان تصحيني وانا اتظاهر بالنوم عندها ماقدرت اكمل الكذبه اني نايمه وفتحت عيني والا اشوف ساريه طويله وعاليه نزلت راسي عشان اشوف العلم ولا علم الكويت والله انها دمعت عيني لما شفت علم الكويت وسفارة الكويت
نزلت من السياره ومشيت واهم معاي واول مادخلت ولا الدنيا معفوسه فوق تحت والله ان السفير لما شافني وانا داخله دمعت عينه وجا جنبي وقالي اذوك بشي قالت له لا انتو تدرون شنو صار فيني قالي اي ندري عن كل شيئ قالي قعدي وريحي نفسك شوي ودخلني مكتبه وطلع بره مادري شنو سوي ودخل واحد ثاني كويتي المكتب وقالي ماتبين شي قالت له بس ابي اكلم الكويت عطاني التلفون واول ماكلمت ابوي واقول الو...... الو ....... ما اسمع غير نهجان بالبكاء والصوت مو راضي يطلع خذت التلفون امي وسمعت صوتي اقول الو ولا اسمعها تبكي وتقولي ها يما انتي وين قلت لها انا بالسفاره الكويتيه قالت الحمد الله الحمد الله ياربي بعدها اخذ التلفون ابوي ويقولي هايبا اذوك بشيئ سولك شيئ قلت له لا بس انا امطلوبه عندهم . انا بعد اللي صار لي وكأن احد غسل مخي بسالفة اني انا هي المطلوبه اللي يدورونها
ابوي رد علي وقالي مطلوبه شنو قلت له اهم مشتبهين فيني قالي خليك بالسفاره ولاتطلعين لحين اكلم السفير قالت له انشاء الله
و بعد فتره دخل علي السفير وقعد على المكتب وشافني وقعد يضحك يضحك ضحك هستيري وانا اشوفه ولاكلمه
قالي قومي يالله روحي بره عشان الظباط ناطرينك بيودنك السجن . ويضحك
وانا ساكته واطالعه ولاكلمه شافني في هالحاله قالي متى تبين تردين الكويت ابوك يقولي على اول طياره ابي بنتي عندي. وانتي متي بتروحين .
قلت له اول شي انا بفهم شيئ واحد ماكو غيره انا مطلوبه عند الFBI وابي تفسير للي صارلي
قالي لاتشابه اسماء واجراء روتيني انهم يحققون مع اي واحد يكونون مشتبهين باسمه
قلت له انا حققو معاي من يوم الاحد خمس ايام تحقيق شنو ليش . وما يخلوني اكلم ابوي ولا احد
غير مره وحده وبس . هذا اي قانون وفي ديره تحترم القوانين
قالي هدي باللك انا مقدر الموقف اللي مريتي فيه والله محد يقدر يتحمله بس احنا عندنا خبر من اول ماكلمتيي ابوك وقلتيله باللي صار واحنا بدورنا بعثنا ناس الى المطار يسألون عنك في قسم شرطة المطار وقالو لنا الاسم هذا ماندري عنه بشئ وسألنا عنك بالاداره التابعين لهم ونفس الكلام قالو لنا ماندري عنها... وسكت. ماكمل كلامه وقالي الحين ا هم شيئ انك هني وباحسن حال وصحه وخلاص انسي اللي صار وقالي يالله ماقلتيلي متى بتردين الكويت قلت له على اول طياره قالي خلاص روحي بره عند فلان وسوي الحجز
طلعت بره وبالفعل حجز على اول طياره راجعه الكويت وكانت الرحله على الخطوط البريطانيه في الصباح و دوني بعدها الفندق القريب من السفاره وحجزلي فيه ليله وقالي باكر انشاء الله السفر
نزلت ودخلت الفندق ولاحاجزين لي جناح والله من كبره خفت انام فيه .
صحيت ثاني يوم وجهزت اغراضي ونزلت تحت بالموعد ولا السفير والقنصل وكم واحد معاهم جاين لي الفندق وركبت السياره مع السفير ورحت المطار وودعني والحمد الله سافرت الكويت اخيرا
اشوفكم على خير انشاء الله واسفه جدا على الاطاله ولكن الاحداث ماتحتاج تقطيع ان كان حقدتو علي
وارجو منكم ان تسألو انفسكم
هل fw-kw رجعت امريكا لاستكمال ما تبقي لها من دراسه ام اختارت دوله غير امريكا .ام اختارت تدرس بالكويت؟
....( كان معكم فيصل القاسم - قناة الجزير )...............
وبنتظار ردودكم
شاكره لكم حسن متابعتكم
اكمل معكم من حيث وقفت . انا سألتكم ماذا تتوقعون ان ارجع امريكا واو دوله اخري او اكتفي بالكويت
قعدت اشوف كتاباتكم وتعليقاتكم واضحك البعض حسيت انه فهمني والبعض الاخر تعاطف معي وتمنى ان اكمل دراستي بالكويت او اذهب الى دوله اخري
بالحقيقه انا اول مارجعت الكويت وكانو اهلي باستقبالي بالمطار كانو جدا فرحين بعودتي سالمه من بعد اللي صار لي لكن انا من اول ماركبت الطائر من امريكا والمتوجه الى الكويت وانا بصدمه غير مستوعبه للحدث بس قاعده افكر بالي صار نزلت مطار لندن وقعدت فيه تقريبا 6 ساعات ولم افكر حتى بالتسوق في مطار لندن اول مانزلت من الطائره توجه الى الفود كورت ركن المطاعم واخذت لي اكل وقعدت اكل ولا تحركت الى الي الطائره المتوجه الى الكويت وبنفس الحال قابلت اهلي المعبرين عن فرحتهم وانا لن اتجاوب معهم التزمت الصمت بلاحراك
رحنا البيت والا كل اهلي متجمعين عندنا لمباركت وصولي بالسلامه ولكني لن استطيع مجاملتهم واتجهت الى غرفتي ودخلت اخذت دوش وبدلت وصليت وحطيت راسي على الفراش ولن استطيع النوم كل ما اغمض عيني تمر الذكري المفزعه من امامي وكاني اشاهد فلم مرعب فاستيقض من الفزع . ومن بين هذه المرات المفزعه سمعة امي صوتي وانا اصرخ دخلت علي وقعدت جنبي وحطتني بين ذراعيها وقراءة علي بعض من القرأن لتهدء من روعي وتميت على هالحال يمكن اسبوعين ما اتكلم وبس اغمض عيني اشاهد شريط الذكرى المؤلمه . واهلي يكلموني ويترجوني اتكلم وقول لهم شنو صارلي وانا التزمت السكوت والصمت حتى انهم وصل بهم الحال انهم شكو انني قد تعرضت للضرب او ماشابه ذلك فأخذوني لطبيب لاجراء بعض الفحوصات لكي يطمئنو علي انني باحس حال والحمد لله انني لم اصب بمكروه
وتميت على هذا الحال فتره طويله حتى جاء يوم من الايام وكنت جالسه مع امي وابوي وكالعاده يكلموني ويسألوني وانا ما ارد عليهم بشيئ حتي رايت امي امام عيني تبكي وتنهار وتقولي قوليلي انت شفيك ليش ساكته وتترجاني بالكلام وعندها وكأن دموع امي عملت لي صدمه اقوي من اللي شفته
وبلا شعور قعدت احكي لهم القصه بالكامل وعن اللي صار كله . والحمد لله انني تخلصت من جدار الصمت هذا
وجلس والدي يؤنب نفسه على مافعله بي وتمني انني لم اسافر الى هذا المكان . ولكن قدر الله وماشاء فعل
ومافي احد يقدر يهرب من نصيبه والمكتوب عليه
مرت الشهور واحد تلك الاخر وانا قد نسيت حساب الايام والشهور ونسيت ان باقي لي سنه واحده على التخرج من امريكا وبعدها خلاص افتك من الغربه الى الابد
فكرة اكمال الدراسه بدات تراودني وخصوصا انه باقي لي من المده فقط كورسين دراسيين . وبعد ان استقريت نفسيا فكرت افاتح اهلى بموضوع استكمال دراستي فلن يعارضو الفكره وقالو لي ان اكمل دراستي بالكويت عوضا ان اعود الى امريكا وفكرت مليا بالموضوع فوافقة على هذا الراي وابتدي الدوام في جامعة الكويت وبدأت الدراسه في اول اسبوع اعود فيه الى الدراسه بعد انقطاع عام كامل واعوام اكثر من دراستي بالكويت والوضع تغير علي فحسيت انني بغربه في ديرتي وفي جامعتي ما قدرت اتاقلم فالوضع اللي حاصل في الجامعه عرض ازياء وكأنك داخل قاعه لعرض الملابس واخر الصيحات في عالم الموضه والازياء وتنافس قوي بين اخر موضه لسيارات الفخمه ....الخ واكيد انتو عارفين الوضع بجامعاتنا اللي بدول الخليج علي وجه الخصوص
انا هذا الوضع من زمان تخليت عنه ونسيت وتناسيته ولما نحطيت فيه مره ثانيه ماقدرت اتعايش معاه تعلمت علي عيشت الهلاقه بامريكا
بعد كم اسبوع اهلي شافوني غير متحمسه لاستكمال دراستي ولان اساسا الجامعه مافيها دراسه .كلموني شنو سبب تطنيشك لدراسه والجامعه قلت لهم انا ماني قادره اتاقلم مع الوضع وموعاجبني الوضع بالمره
وضعي بامريكا وايد احسن لي من هني بمليون الف مره
ابوي اول ماسمع امريكا وكأني جايبتله سيرت ابليس قعد يتعوذ منها مليون الف مره ويدعي عليهم وعلي سو فيني
انا اصريت على رأي اني برجع امريكا وامي وابوي يتوسلوني اقعد بالكويت وخلاص مولازم دراسه واحنا نقدر نأمن لك مستقبلك من غير غربه وشحططه
انا عارفه ان هذا الكلام من ورا قلوبهم وهم في قرارت انفسهم يبوني اكمل بس خايفين علي وابوي بيموت من عذاب الضمير من اللي سواه فيني وحاط براسه ان هالمشاكل كلها جات من تحت راسه
انا ماحبيت ان يعيش بعذاب الضمير هذا وصممت على راي ان ارجع امريكا لسببين
الاول وهو الظاهر ان اكمل دراستي
الثاني وهو الباطن ان اريح والدي من عذاب الضمير هذا واثبت له انه لن يفعل بي في يوم من الايام سوء وارفع راسه واتخرج من امريكا واحقق له الحلم اللي حلم فيه طول عمره
واستمريت بالالحاء عليهم بالسماح لي للعود لامريكا ...............واخير استجاب القدر لي واذنو لي بالسفر ولكن هذه المره مع والدي
وبالفعل سافرت انا ووالدي الى امريكا اكملت دراستي الباكلر وانتهت السنه الاولى على خير والحمد لله
وحققت حلم والدي وتحملت كل هذه الصعاب من اجل تحقق هذا الحلم
وبعدها كلمني مرشدي بالجامعه وعرض علي استكمال الماجستير في نفس الجامعه لانني كنت من الطلبه المتميزين وسالته عن مدة الدراسه وقالي ممكن سنه ونص او 2 بالكثير
وبدأت القصه تدور في عيني ومخيلتي ولن اتردد بمفاتحت والدي بالموضوع فرد الي قائلا انا كنت احلم بالبكلريوس وهذا حد حلمي والحمد الله تحقق لي الحلم فقرار الماستر راجع لك وبالدرجه الاولى فهل تستطيعين ان تكملي المشوار بروحك وانا ارجع الكويت قلتله اقدر اتحمل
فلم اتردد بالتقديم لشهادة الماجستير والحمد لله وبتوفيق من الله استطعت ان احصل عل اعلى المراتب العلميه في تخصصي
اشكركم علي حسن متابعتكم لي والي اللقاء بموضوع وتقرير اخر انشاء الله ولكن هذه المره ليس سفر بقصد الدراسه ولكن سفر بقصد السياحه وساوافيكم بالتقارير المصور انشاء الله
وحتى القاكم لكم مني اجمل تحيه