ياساتر ... كل هذا جوع !

صباحكم ورد .. ومسائكم فول وعدس وطعميّه ..
يقولون ... إذا جا الخير .. أقبلت الناس على الخير ... !

واحنا هالايام على مشارف شهر رمضان .. رمضان اللي فيه تفتّح أبواب الجنّه ... وتُغلّق أبواب النار .. وتصفّد فيه الشياطين .. !
أنا صراحه من الناس اللي ما أعرف في حياتي إلا شهر " زو الحِقّه " .. لأنه شهر لي مواقف معه كثيره .. ماعمري أنساها ... ومافيه أمل أمزعه من دفتر حياتي ... !

خلونا في شهر رمضان .. الشهراللي يمشيّ البضايع المتكدّسه في المحلات المهتــــريه .. ويخلي الناس يزداد وزنها .. وينسون شي أسمه " رجيم " ومزاحم الحريم في شوارع الحوامل !

قبل يومين .. مريّت من شارع توّ البلديه فاتحينه عندنا << على طاري بلديه .. أحد يعرف لي موظف في البلديه .. عندي معاملة وديّ أمشيّها .. نبي نحط لنا في شارعنا .. كم " مطبّ " صناعي أو قيصيري .. المهم أنه يفكّنا من هالدشير اللي أشغلونا في الشارع .. كل يوم يفحطوّن فيه .. كن ماعندهم إلا شارعنا .. ! .. طيب .. روحوا للشمال وفكوّنا من شرّكم .. ترى شوارعهم أوسع وأحلى .. حتى توقيف مرورهم أبرد ! المهم .. مريّت مع هالشارع الجديد إلا والقى الشارع " مصطكّ " بالسيّارات .. اللي واقف بعيد ويمشي له مسافه طويله .. واللي موقّف سيارته في الحاره وقاعد يمشي بشلقت بزران مجمّعهم من بيته !

أنا لاشعورياً .. جلست أضحك .. واقول في نفسي ( وش القصّه ؟ ) .. لايصير فيه حرب على الأبواب .. وجالسه الناس تجمع لها " عيشه " عشان اليوم الأصفر .. والا يمكن المحل مسوي تخفيضات ويعطـــون " الزبون " كرتون منقا منتهيه صلاحيته على " غرشة فيمتو " !

وقلت ياولد ... وبما أني " مواطن عربي " يحب يعرف كل شي .. لازم أعرف أيش قصّة هالاوادم اللي متحاشره في هالمحل !

نزلت ... ثم شوي ورجعت .. لأني نسيت " نعالي " .. << للعلم .. أنا من الناس اللي ما أعرف أسوق بنعال .. لازم أفسخها .. مثل مايفسخ بعض الناس حياهم في الاسواق .. أفسخ نعالي واتركها على جنب .. عشان أحس أني أسوق واقدر أوصل للفرامل في أسرع وقت !

نزلت ودخلت .. إلا وذاك اللي واقف عند الثلاجه وضاف له كرتونين " عصير شمّام " .. والثاني شايل فوق راسه " خيشة رز ابو كاس " .. والثالث يسأل العامل " عندكم لقميات برّ " .. والرابع يقلّب في " السنبوسه " يدوّر أطولها مُدّة صلاحيه !

عِندها << حلوه عِندها .. ! .. عِندها .. دريت أن ورى العلم شي .. وان ورى هالشي .. شي أسمه " رمضان " .. وان ورى هالعالم اللي ماتحب تشتري الشي إلا إذا طرّف " مقاضي " و " اغراض " تملى البطن لييييين يقول " آمين " ! سحبت رجلي على ورى .. وطلعت .. توجّهت لقصرنا << تراي تسذوب ... ماعندنا لا قصر ولايحزنون ! .. طفارى مقطعتن جلودنا خسارة الاسهم .. المهم واتوجّه لمّه .. والقى ذاك " الدستن " اللي محشورن بكل نعمه .. لقيمات . توت . سنبوسه . خبز . رز . بكنق بودر ( بكنق . هم كذا ينطقونها الحريم ؟ ) مافيه شي إلا والقاه في الدستن .. !

دخلت البيت ... سألت الوالد - طويل العمر - " وش السالفه " ؟ ... قال اسأل " أخوك الكبير " المنجطل في الصاله !
رحت للمنجطل .. وانا فاتح خشّتي " نصف متر " .. وش السالفه ياحلو .. ؟ .. التفت علي وعطاني ابتسامه " صفرا " .. طيّب غيّر ياقلبي .. خلّها يوم خضرا وطلّعها نسبه .. عشان ننبسط لو مرّه وحده !
قال .. شوف حبيبي ( ماتنبلع هالتسذبه ! ) .. قال شوف ... رمضان على الأبواب .. واحنا لازم نستعد له .. لازم نشتري أغراض ومقاضي ... لازم نملى المخزن ونترسه .. ونخلي " غما " المخزن مليان ... !
لازم نشتري سنبوسه ولحم مفروم .. عشان الأهل يجلسون يلفوّنها اسبوع ! <<< ماصارت سنبوسه .. صارت حشيش على غفله !
قلت .. وانتم بتموتون إذا ماكلتوا في رمضان ؟
قال .. لا ياحبيبي .. في رمضان .. الأكل يطلع له طعم ثاني .. خاصّه بعد المغربيه .. والجلسة بعد التراويح عشان نكمّل على البقايا الباقيه من الفطور !
قلت ... طيّب .. مافيه أي إشكـــــــــال ... كلْ إلين تقوم الساعه ... أتفخ بطنك لين يتمزّع من البطره .. !
خذ راحتك .. ولايهمّك أحد .. أدخل كل محل .. وضف من كل كرتون " ثلاث حبّات " .. أمزع براتبك وشقّه من وسطه .. ولايردّك إلا المُحاسب .. !
بس أرجوك .... خلي من حرصك شوي " لطاعة ربّك " ..
في رمضان .. أملى بطنك ... لكن لاتنس تملى ميزان حسناتك بالأجور العظيمة !
في رمضان .. تذكّر أنك تقدر تستغلها كفرصه .. وتفتح صفــــــــحه مع " ربّك " بيضاء !
لاتنسَ أنك تقدر تختم القُرآن بِكُل بساطه في شهر رمضان .. بس أقرا بعد كل صلاة " أربعة أوجه " بس !

لاتنسَ صلاة التراويح ... والعُمره في مكه .. والصدقه .. وصلة الرحم .. وأشياء كثيره عملها بسيط وأجرها كبير ..
لاتنسَ أن أهل الشر يستقبلون هالشهر بإعداد المسلسلات والبرامج الهابطه اللي تنثر أعمالك الطيّبه اللي جمعتها النهار !
لكن خليك أكبر .. وأذكى .. وأتقى !
خليك ( أكبر ) بعقلك .. فعن طريقه ... بتعرف الحق .. والحق أحق أن يُتبع ... وخليك ( أذكى ) من مُغامرات فاشله مع القنوات الفضائحية الخاسره .. وخليك ( أتقى ) مع ربك بكُل عمل طيّب !

أحلى سلام للغالين ... وكل عام وأنتم بخير
= = =

منقــــــــــــــول